为你嘅思想打场胜仗
你而家正受到攻击！你嘅敌人系撒但，佢用一个好犀利嘅武器嚟攻击你。呢个武器系乜嘢？就系误导人嘅宣传！佢攻击嘅唔系你嘅身体，而系你嘅思想。
使徒保罗清楚知道，撒但嘅宣传有几咁危险。但系，佢啲同工唔系个个都好似佢咁谨慎。例如，有啲哥林多嘅基督徒变得过度自信，以为自己喺真理企得好稳，永远唔会跌倒。（哥林多前书10:12）所以保罗警告佢哋:“我惊你哋俾人用手段败坏咗思想，失去对基督应有嘅诚恳同贞节，就好似蛇用诡计诱惑咗夏娃一样。”（哥林多后书11:3）
保罗讲嘅话使我哋睇出，我哋唔应该过度自信。如果你想喺思想上打赢呢场仗，就需要睇出误导人嘅宣传系几咁危险，同埋识得点样保护自己。
误导人嘅宣传有几危险？
乜嘢系误导人嘅宣传？喺呢篇文章，呢种宣传指嘅系用片面或者错误嘅信息嚟操控人嘅思想同影响人嘅行为。《宣传与说服》（英语）呢本书话，有人形容误导人嘅宣传系“大话、扭曲嘅言论、欺骗、思想控制、洗脑，［同埋］心理战术”，佢哋将呢种宣传同“唔道德嘅，有害嘅，同埋唔公平嘅策略”联系埋一齐。
噉样嘅宣传有几危险呢？呢个系一种好阴险嘅手段，就好似无色无味嘅毒气一样，可以不知不觉噉影响人嘅思想。行为学家万斯·帕卡德留意到，“由于我哋睇唔出宣传背后嘅真相，好多时俾人影响同操控咗都唔知道。”《古往今来嘅宣传——轻易令人上当》（英语）呢本书里面有一位学者话，喺误导人嘅宣传嘅影响之下，人往往“好容易做出一啲极度危险又唔合理嘅事，例如种族屠杀、战争，同埋种族或宗教迫害。”
如果凡人都能够利用宣传嚟愚弄人，噉何况撒但呢？从人类被创造以来，撒但一直喺度研究人类嘅行为。而家撒但控制紧“全世界”，佢可以利用呢个世界嘅任何事物去散播佢嘅大话。（约翰一书5:19；约翰福音8:44）撒但好成功噉“整盲咗［人嘅］心眼”，所以今日“普天下嘅人”都受到佢嘅“迷惑”。（哥林多后书4:4；启示录12:9）你可以点样对抗撒但嘅宣传呢？
加强你嘅防卫能力
耶稣话:“认识真理，真理会使你哋自由。”（约翰福音8:31，32）呢个系一个简单嘅方法可以对抗误导人嘅宣传。喺战争期间，士兵需要知道喺边度得到可靠嘅情报，因为敌人会散布假情报嚟误导佢哋。耶和华通过圣经为我哋提供真实嘅信息，噉我哋就可以揾到所需嘅知识去对抗撒但嘅宣传。（提摩太后书3:16，17）
撒但呢个宣传高手当然好清楚呢一点。佢利用自己所控制嘅呢个世界使我哋分心，唔想阅读同埋研究圣经。千祈唔好俾佢呢个奸计得逞！（以弗所书6:11）要“清楚领会”真理嘅全貌。（以弗所书3:18）噉样做系需要付出努力嘅。请留意作家诺庵·杭士基（诺姆·乔姆斯基）所讲嘅事实:“冇人能够将真理灌入你个脑。真理系需要你自己去揾嘅。”所以要努力“日日细心查考圣经”，你就可以揾到真理。（使徒行传17:11）
如果你想为自己嘅思想打场胜仗，就一定要睇出误导人嘅宣传有几危险，噉先可以保护到自己
要紧记，撒但唔想你运用思考力，亦都唔想你善于推理。点解？因为“如果人缺乏严谨嘅思维，就会好容易接受错误嘅讯息。”——《第二十世纪嘅媒体与社会》（英语）。所以，千祈唔好盲目接受所有听到嘅嘢，要小心谂清楚先。（箴言14:15）要运用上帝赐俾你嘅思考力同理智嚟强化自己嘅信心。（箴言2:10-15；罗马书12:1，2）
提防“先分化，后攻破”嘅策略
军事战略家会先用宣传嚟打击敌人嘅士气，削弱对方嘅战斗力。军事战略家可能会使对方引起内讧，又或者误导对方，使佢哋离开大队。据说一个德国嘅将军曾经讲过，佢哋喺第一次世界大战当中之所以打败仗，系因为当时嘅人民俾敌军嘅宣传所迷惑。撒但亦都用类似嘅手段去先分化，后攻破，例如佢喺基督徒成员当中引起纷争，或者使佢哋感到自己受到唔公平嘅对待，觉得好委屈，就孤立自己，同耶和华嘅组织疏远。
唔好上当！要受上帝嘅话语指引。例如，喺保持会众团结方面，圣经鼓励我哋要“彼此甘心宽恕”，尽快化解纷争。（歌罗西书3:13，14；马太福音5:23，24）圣经强烈警告我哋，千祈唔好孤立自己。（箴言18:1）要做好准备，尽力抵抗撒但嘅宣传。问吓自己:“上一次我遇到噉样嘅情况，当时我嘅思想受乜嘢支配呢？系世界嘅精神抑或系圣灵？”（加拉太书5:16-26；以弗所书2:2，3）
唔好失去你对上帝嘅信赖
如果一个士兵慢慢失去对自己上司嘅忠诚，就唔会尽力作战。所以敌人会谂办法散播谣言，破坏士兵同上司之间嘅信任。敌人嘅宣传可能系“你嘅上司系唔值得信任嘅！”又或者“唔好听你上司讲，佢会害死你㗎！”敌人仲好识得利用呢啲上司曾经犯过嘅错误，使自己嘅宣传更有说服力。呢啲就系撒但嘅手段嘞。佢一心想破坏你对上帝领导权安排嘅信心，所以佢系唔会放弃嘅。
噉你可以点样保护自己呢？要决心紧紧依附耶和华嘅组织，亦都要忠心噉支持佢所委任嘅人，就算呢啲人系唔完美嘅。（帖撒罗尼迦前书5:12，13）叛道者或其他想误导你嘅人可能会诋毁上帝嘅组织。即使表面睇嚟，指控好似系真实嘅，都“唔好轻易动摇，失去理智”。（帖撒罗尼迦后书2:2；提多书1:10）要听从保罗俾提摩太嘅劝勉，持守你所学过嘅真理，亦都要紧记呢啲真理系嚟自边度嘅。（提摩太后书3:14，15）差唔多有一百年嘅时间，耶和华都系运用同一个渠道嚟帮助人行走真理嘅道路。你一定可以揾到足够嘅证据，使自己能够信赖呢项安排。（马太福音24:45-47；希伯来书13:7，17）
唔好俾恐吓嘅手段吓倒
撒但亦都会用直接嘅方式去影响人，例如恐吓。呢种手段“系最古老嘅宣传方法之一”——《古往今来嘅宣传——轻易令人上当》（英语）。英国嘅教授菲尔普·泰勒讲过，亚述人会将恐吓同宣传结合埋一齐去制服敌人。撒但都会利用我哋对迫害、死亡或者其他事物嘅恐惧心理嚟控制我哋，使我哋退缩，唔再事奉耶和华。（以赛亚书8:12；耶利米书42:11；希伯来书2:15）
撒但通过恐吓使你意志消沉，破坏你对上帝嘅忠义，千祈唔好中咗佢嘅奸计。耶稣话:“唔好畏惧嗰啲杀身体之后，唔能够再做任何嘢嘅人。”（路加福音12:4）要对上帝嘅应许有坚定嘅信心，佢承诺会保护你，俾你“超凡嘅力量”，亦都会帮助你抵抗所有嚟自撒但嘅攻击。（哥林多后书4:7-9；彼得前书3:14）
当然，你会遇到一啲令你恐惧、意志消沉嘅事。但系要紧记耶和华鼓励约书亚嘅话:“要勇敢坚强，唔好恐惧，亦都唔好惊慌，因为无论你去到边度，你嘅上帝耶和华都与你同在。”（约书亚记1:9）当你感到恐惧嘅时候，要马上向耶和华祷告，将你嘅忧虑全部话俾佢知。你可以确信，上帝“一定会赐［你］平安，……可以守护［你］嘅内心同头脑”，使你有力量抵抗撒但所有嘅宣传。（腓立比书4:6，7，13）
仲记唔记得亚述王攻击上帝子民嘅时候，佢差派嘅御前总长讲咗乜嘢恐吓人嘅话呢？其实佢嘅意思系，“冇嘢可以帮到你哋脱离亚述人嘅手，就算系你哋嘅上帝耶和华都无能为力”。佢仲好大胆噉话，“耶和华上帝叫我哋嚟毁灭呢个地方。”耶和华又点回应呢？“你听见亚述王嘅侍役辱骂我嘅说话，唔使怕。”（列王纪下18:22-25；19:6）然后，佢差派一位天使喺一夜之间，杀死咗18万5千个亚述士兵。（列王纪下19:35）
要明智，时刻听从耶和华
喺睇戏嘅时候，你有冇见过戏入面嘅人俾人呃或者受人控制？你系唔系好想话俾嗰个人知，“唔好信佢哋呀！佢哋呃你㗎咋！”你可以想象到，天使都好想话俾你知，“唔好俾撒但嘅大话呃到呀！”
所以千祈唔好听撒但嘅宣传。（箴言26:24，25）要听从耶和华，喺你所做嘅一切事上，都要全心信赖佢。（箴言3:5-7）要响应耶和华亲切嘅呼吁:“我儿，你要有智慧，使我嘅心欢喜”。（箴言27:11）你噉样做就可以为你嘅思想打场胜仗！
