父母——帮助仔女“有智慧可以得救”
“你从婴儿时期就认识圣经。……就有智慧可以得救。”——提摩太后书3:15
1，2． 知道仔女想献身受浸，点解有啲父母会担心？
每年，成千上万嘅圣经学生通过受浸表明佢哋献身俾耶和华。当中，有好多系喺真理中长大嘅年轻人，佢哋选择咗最好嘅生活方式。（诗篇1:1-3）如果你系基督徒父母，你一定好期待仔女受浸嘅嗰一日。（参考约翰三书4）
2 不过，你可能仲系会有啲担心。或者你见过一啲年轻人受咗浸，不过后来开始怀疑按上帝标准生活系咪真系值得，有啲甚至已经离开咗真理。你可能会担心你嘅仔女成为基督徒之后，逐渐失去当初对真理嘅爱，就好似1世纪以弗所嘅基督徒噉。耶稣对佢哋讲:“你离弃咗你最初嘅爱。”（启示录2:4）你可以点样尽力避免噉样嘅情况，同时帮助你嘅仔女“成长，以至得救”？（彼得前书2:2）等我哋嚟睇吓提摩太嘅例子。
“认识圣经”
3． （甲）提摩太喺乜嘢情况下成为基督徒？佢对所学到嘅事有乜嘢反应？（乙）保罗劝勉提摩太要留意边三方面嘅教导？
3 公元47年左右，使徒保罗第一次探访路司得。当时好可能系提摩太初次接触同耶稣有关嘅教导。虽然提摩太当时仲系个青少年，但系佢已经将学到嘅应用出嚟。两年之后，佢就同保罗到各地传道。大约16年之后，保罗写信俾提摩太话:“你所学到同受劝导去相信嘅事，你要持守住，因为你知道系跟边个学嘅，又知道你从婴儿时期就认识圣经［希伯来语经卷］。圣经能够使你因信基督耶稣，就有智慧可以得救。”（提摩太后书3:14，15）请留意保罗提到要（1）认识圣经，（2）受劝导去相信所学到嘅事，（3）通过对耶稣基督怀有信心而有智慧可以得救。
4． 喺教导年幼仔女方面，你觉得有边啲实用嘅工具？（请睇吓课文开头嘅图片）
4 身为基督徒父母，你自然都好想仔女认识圣经。今日整本圣经包括希伯来语经卷同希腊语经卷。父母可以按照仔女嘅学习能力去教导佢哋，其实就算仔女嘅年纪好细，佢哋都可以学习基本嘅圣经人物同事迹。耶和华嘅组织提供咗好多工具帮助父母教导仔女。你谂到有边啲工具有你嘅语言版本呢？要记住，圣经知识系同耶和华建立深厚友谊嘅基础。
“受劝导去相信”
5． （甲）“受劝导去相信”系乜嘢意思？（乙）我哋点知道提摩太对耶稣嘅好消息有坚定嘅信心？
5 圣经知识系好重要嘅。不过，只系教导仔女圣经人物同事迹系唔够嘅。提摩太自己都系“受劝导去相信”。喺原文，呢句话嘅意思系“坚信不疑”或者“确信而且肯定某件事系真实嘅”。提摩太从婴儿时期就受到教导认识希伯来语经卷。后来，佢因为确凿嘅证据而坚信耶稣就系弥赛亚。提摩太对好消息有坚定嘅信心，所以佢决定受浸成为基督嘅门徒，后来仲同保罗一齐参与海外传道。
6． 你可以点样帮助仔女培养对圣经真理嘅信心？
6 你可以点样帮助你嘅仔女建立好似提摩太一样嘅信心？首先，要有耐心。坚强嘅信心唔系一朝一夕就可以培养到嘅。你有坚强嘅信心，唔代表你嘅信心可以自然传俾下一代。每个小朋友都需要运用“理智”去培养对圣经真理嘅信心。（请读罗马书12:1）喺呢方面，父母担任好重要嘅角色，特别系仔女问你问题嘅时候。请睇吓一个例子。
7，8． （甲）一个基督徒爸爸点样耐心教导佢嘅女？（乙）你曾经点样表现同样嘅耐心？
7 汤姆斯有个11岁嘅女，佢话:“我个女有时会问，‘耶和华会唔会通过进化嚟繁殖生命？’或者‘点解我哋唔参与多啲社区活动，例如参加竞选嚟改善吓社会？’有时我要克制自己，唔好马上同佢讲应该相信乜嘢。对真理嘅信心应该建立喺好多细小嘅证据之上，而唔系夹硬要佢相信一大条道理。”
8 汤姆斯知道，佢需要耐心噉去教导。其实，对于所有基督徒嚟讲，耐心都系好重要嘅。（歌罗西书3:12）汤姆斯发觉通过多次嘅讨论先可以帮到个女建立信心，噉样做真系需要时间。汤姆斯同个女推理，帮助佢清楚明白从圣经学到嘅知识。汤姆斯话:“特别喺一啲重要嘅事上，我同太太都想知道个女系咪真系相信佢所学到嘅，同埋对佢嚟讲圣经嘅教导合唔合理。如果佢提出问题，噉系好嘅。老实讲，如果佢问都唔问就接受，我仲担心呀。”
9． 你可以点样反复教导仔女上帝嘅话语？
9 通过父母不断耐心教导，仔女就可以逐步领悟到真理嘅“长阔高深”。（以弗所书3:18）我哋可以用适合佢哋年纪，又容易明白嘅资料嚟施行教导。佢哋相信自己所学到嘅知识，就能够喺其他人，包括喺同学面前，更有信心噉解释自己嘅信仰。（彼得前书3:15）例如，你嘅仔女可唔可以根据圣经解释人死后嘅情况？对佢哋嚟讲，圣经嘅解释合唔合理？ * 反复教导仔女上帝嘅话语真系需要耐心，但系你付出嘅努力系非常值得嘅。（申命记6:6，7）
10． 喺教导仔女方面，乜嘢系好重要嘅？
10 当然，喺帮助仔女建立信心方面，父母嘅榜样系好重要嘅。斯蒂芬妮有三个女，佢话:“我几个女仲系好细嘅时候，我就问自己，‘我有冇同啲细路解释，点解我对耶和华嘅存在，佢嘅爱，同佢正义嘅行事方式深信不疑？我啲细路有冇清楚睇出我真系好爱耶和华？’如果我自己都冇信心，我又点可以期望我啲细路有信心呢。”
“有智慧可以得救”
11，12． 智慧系乜嘢？点解我哋唔应该只系凭一个人嘅年龄去衡量佢嘅智慧？
11 上文提到，提摩太有（1）圣经知识（2）坚定嘅信心。噉保罗话，圣经可以使提摩太“有智慧可以得救”又系乜嘢意思？
12 《洞悉圣经》下册解释，喺圣经里面，智慧可以“使人善用知识同悟性成功解决问题，避免危险，达到某啲目标，或者劝其他人噉样做。智慧嘅反面就系愚蠢”。圣经话，“愚昧缠住孩子嘅心”。（箴言22:15）既然智慧嘅反面系愚蠢，噉一个人行事有智慧就表明佢系成熟嘅人。一个人灵性成唔成熟，唔可以单单睇佢嘅年龄，而系要睇佢对耶和华有冇敬畏之心，系咪乐意服从上帝嘅诫命。（请读诗篇111:10）
13． 一个年轻人点样表明佢有智慧可以得救？
13 一个灵性成熟嘅年轻人，唔会因为自己嘅欲望或者同辈压力而“飘忽不定，随波逐流”。（以弗所书4:14）相反，佢哋嘅“理解力……锻炼纯熟，能够明辨是非”。（希伯来书5:14）就算父母同其他成年人唔喺身边，佢哋都可以作出明智嘅决定，表明佢哋越来越成熟。（腓立比书2:12）智慧可以使佢哋得救。（请读箴言24:14）你可以点样帮助你嘅仔女培养智慧？首先，你要向仔女清楚解释你持守嘅圣经标准。通过自己嘅言行同榜样，俾佢哋知道上帝话语嘅标准就系你嘅标准。（罗马书2:21-23）
点解父母持续不断嘅努力好重要？（请睇第14-18段）
14，15． （甲）一个打算受浸嘅年轻人需要考虑乜嘢重要问题？（乙）你可以点样帮助仔女沉思服从上帝诫命嘅益处呢？
14 不过，净系同仔女讲乜嘢系啱，乜嘢系错系唔够嘅。你亦都要喺一啲问题上帮助佢哋学识推理，例如:“点解圣经谴责一啲睇嚟好吸引嘅嘢？乜嘢使我确信圣经嘅标准总系对我有益？”（以赛亚书48:17，18）
15 如果你嘅仔女想受浸，你要帮助佢哋明白成为一个基督徒之后会有乜嘢责任，睇吓佢哋对呢啲责任有乜嘢感觉。佢哋知唔知道:受浸嘅益处系乜嘢？为此要付出乜嘢？得到嘅益处点样远远超过所付出嘅？（马可福音10:29，30）一个人受浸之后好多时要面对以上嘅问题，所以喺未踏出咁重要嘅一步之前，就要先考虑清楚。要帮助你嘅仔女沉思，服从上帝嘅诫命会有乜嘢好结果，唔服从又会造成乜嘢后果。噉样佢哋就会更加相信，按照圣经嘅标准嚟生活一定系最好嘅选择。（申命记30:19，20）
年轻人受浸后喺信心上动摇
16． 如果仔女受浸后对真理表示怀疑，父母需要考虑乜嘢？
16 但系，如果你嘅仔女喺受浸之后对真理表示怀疑又点呢？例如，一个受咗浸嘅青少年可能会受到呢个世界嘅事吸引，或者开始怀疑按圣经原则生活系咪最好嘅。（诗篇73:1-3，12，13）作为父母，你点样处理呢个情况关系到你嘅仔女会选择留喺真理，抑或离开。无论佢系个细路仔，抑或已经系一个青少年，都要决心唔好为呢件事同你嘅仔女开战。你嘅目标系要提供仁爱嘅支持同协助，赢得佢嘅心。
17，18． 如果仔女嘅信心动摇，父母可以点样做？
17 一个受咗浸嘅年轻人，已经向耶和华承诺会将自己嘅一生献俾佢。佢嘅献身表明，佢爱耶和华亦都会将佢嘅旨意放喺生活嘅首位。（请读马可福音12:30）耶和华好重视呢个承诺，所以我哋每个人都应该有同样嘅睇法。（传道书5:4，5）喺一个适当嘅时间，以仁慈嘅方式提醒你嘅仔女要重视自己作过嘅承诺。同仔女讨论之前，好好运用耶和华嘅组织向父母提供嘅资料。如果你噉样做，就可以帮助仔女睇出佢哋献身俾耶和华，并受浸成为基督徒系一件好重要嘅事，亦都会得到好多福分。
18 例如，我哋可以喺《青年人所提出嘅问题——有实效嘅答案》（英语）第1册嘅附录“父母提出嘅问题”揾到好多实用嘅建议。附录提到:“首先，唔好贸然认定仔女抗拒真理。好多年轻人表面睇嚟对属灵嘅事唔再感兴趣，其实系遇到一啲难题。”好可能系觉得孤单、面对同辈压力，或者认为自己喺属灵上冇其他年轻基督徒做得咁好。附录亦都提到，“请留意，仔女有呢啲问题，唔系因为佢哋唔同意圣经嘅原则，而系目前嘅某啲情况令佢哋觉得好难按照圣经嘅吩咐去做。”之后，附录亦都提供咗一啲建议俾父母，使父母可以喺仔女信心动摇嘅时候帮助佢哋。
19． 父母可以点样帮助仔女“有智慧可以得救”？
19 身为父母，你有好重要嘅责任，亦都有荣幸“照耶和华嘅意思管教［仔女］，纠正佢哋嘅思想，将佢哋抚养成人”。（以弗所书6:4）就好似呢篇课文所讲嘅，父母唔单止需要教导仔女圣经知识，亦都要帮助佢哋对所学嘅培养信心。仔女培养坚强嘅信心先会受到推动献身俾耶和华，全心全意事奉佢。愿耶和华嘅话语、圣灵，以及你身为父母所付出嘅努力，能够帮助你嘅仔女“有智慧可以得救”。
^ 9段 《辨明圣经的真理》研读指南系一个非常好嘅工具，可以帮助年轻人同成年人明白并解释圣经真理。你可以喺jw.org网站揾到多种语言版本嘅研读指南。点击“圣经与生活”> “圣经研读工具”。
