Síijen Tirana, u noj kaajil Albania, tsʼoʼoleʼ in familiaeʼ jach táaj óotsil. In papáeʼ maʼ kʼasaʼaniʼ yéetel yaʼab u meyaj kaʼach utiaʼal u tsʼáaiktoʼon baʼax kʼaʼabéettoʼon. Kex beyoʼ istikyaj u yantaltoʼon baʼax kʼaʼabéet. Kʼajaʼanteneʼ tin paalileʼ jach kin tristetal kéen in wil jach táaj óotsiloʼon. Kʼajaʼanten xaneʼ yaan kʼiineʼ ku pʼáatal minaʼan baʼal k-jaante mix u tojol utiaʼal u maʼanal in xaanab.

 Jach táankelmen ka káaj in wookol, tumen kin tuklikeʼ táan kaʼach in wáantik in familia. Chéen baʼaleʼ maʼachen tumen le policíaoʼ, le oʼolaleʼ tu añoil 1988 le yáanten 14 añosoʼ kʼaʼalen tuʼux ku bisaʼal le paalaloʼob utiaʼal u tojkíintaʼal u kuxtaloʼoboʼ. Le dos años tin máansaj teʼ lugaroʼ tin kanaj in beet in soldadoril. Ka jóokʼeneʼ tin wilaj in kaxtik junpʼéel meyaj in beete pero mix tuʼux tin kaxtaj. Casi minaʼan meyaj Albania tumen jach yaʼab problemas yaan yoʼolal le políticaoʼ. Leloʼ tu beetaj u jach lúubul in wóol, le oʼolal káaj in kaʼa biskinba yéetel le in amigoʼob yaanten kaʼachoʼ ka káaj in wookol tu kaʼatéen. Tu tsʼookeʼ maʼachoʼon tumen policíaeʼ ka kʼaʼaloʼon tres años cárcel.

 Ka jóokʼen cárceleʼ seguernaj in beetik baʼaloʼob kʼaastak. Teʼ kʼiinoʼob jeʼeloʼ yaachaj le kuxtal Albaniaoʼ tumen minaʼan meyajiʼ. Yoʼolal leloʼ utiaʼal u yantalten yaʼab taakʼineʼ káaj in beetik meyajoʼob ku bin tu contra le leyoʼ. Juntéenjeak ka ookolnajoʼoneʼ maʼach kaʼatúul tiʼ toʼoniʼ, le oʼolal binen kajtal tiʼ yaanal luʼumil tumen maʼ in kʼáat ka kʼaʼalken cárceliʼ. Teʼ kʼiinoʼob jeʼeloʼ tsʼokaʼaniliʼ u tsʼoʼokol in beel yéetel Julinda yéetel yaan juntúul k-chan hijo.

 Binoʼon kajtal Inglaterra. U jaajileʼ teneʼ in kʼáat kaʼach in kʼex in kuxtal, taak in kuxtal ich kiʼimak óolal yéetel in watan bey xan yéetel in chan hijo. Chéen baʼaleʼ káaj in beetik baʼaloʼob kʼaastak tu kaʼatéen. Teʼ vezaʼ káaj in konik droga yéetel yaʼab taakʼin kin náajaltik kaʼachi.

 ¿Baʼax ku tuklik kaʼach Julinda ikil in konik droga? Letiʼeʼ ku yaʼalik: «Como líikʼen Albaniaeʼ jach kin tsʼíiboltik u yantaltoʼon taakʼin. Kin tuklik kaʼacheʼ wa ka ayikʼalchajkoʼoneʼ jeʼel u bintoʼon maʼalobileʼ, le oʼolaleʼ maʼ in pʼeek kaʼach u yookol Artaniʼ, u tuus wa u konik droga..., mientras tu náajaltik taakʼineʼ kin apoyartik tuláakal baʼax ku beetik».

 Chéen baʼaleʼ tu añoil 2002, maʼachen le táan in konik drogaoʼ ka oksaʼaben cárcel tu kaʼatéen. Yoʼolal leloʼ kʼexpaj k-kuxtal yéetel maʼ béeychaj tuláakal le baʼax k-tuklik k-beetik kaʼachoʼ.

 Julindaeʼ káaj u xokik le Biblia yéetel u testigoʼob Jéeoba tu añoil 2000. Teneʼ maʼ uts tin tʼaan kaʼachiʼ, nak óol in wilik. Chéen baʼaleʼ Julindaeʼ jach uts tu tʼaan le baʼax ku kanikoʼ. Letiʼeʼ ku yaʼalik: «In familiaeʼ jach ku creertik Dios, le oʼolal teneʼ in yaabiltmaj yéetel kin respetartik le Bibliaoʼ. Desde úuch taakchajak in wojéeltik baʼax ku kaʼansik yéetel jach ku kiʼimaktal in wóol ikil in xokik kaʼach yéetel le Testigoʼoboʼ. Le baʼax tin kanoʼ tu yáanten in kʼex in kuxtal tumen tin wileʼ jach jaaj le baʼaxoʼob ku kaʼansikoʼ. Chéen baʼaleʼ láayliʼ kin tuklikeʼ le taakʼinoʼ jeʼel u taasiktoʼon kiʼimak óolaleʼ. Pero le ka kʼaʼal Artanoʼ kʼexpaj bix in tuukul. Tin tsʼáaj cuentaeʼ jach jaaj le baʼax ku yaʼalik le Biblia yoʼolal le taakʼinoʼ, kex tsʼoʼok k-beetik yaʼab baʼal utiaʼal u yantaltoʼoneʼ maʼ kiʼimak k-óoliʼ. Tin naʼateʼ wa in kʼáat ka xiʼikten maʼalobileʼ unaj in beetik tuláakal le baʼaxoʼob ku yaʼalik Diosoʼ».

 Tu añoil 2004, jóokʼen teʼ cárceloʼ yéetel tin wóotaj in kaʼa kon droga. Chéen baʼaleʼ Julindaeʼ tsʼokaʼaniliʼ u kʼexik u kuxtaleʼ ka tu yaʼalajten junpʼéel baʼal jach tu beetaj in tuukul: «Maʼ in kʼáat a taakʼiniʼ. Baʼax in kʼáateʼ ka a máans tiempo tin wéetel bey xan yéetel k-paalal». Maʼ tin kaxtaj baʼax in waʼaliʼ tumen jaaj le baʼax tu yaʼaloʼ. Tsʼoʼok u máan kaʼach yaʼab años náachchajken tiʼ in familia. Tuukulnajen xan tiʼ le bukaʼaj baʼaloʼob tsʼoʼok in muʼyajtik ikil in bin tu paach taakʼinoʼ. Le oʼolaleʼ tin chʼaʼtuklaj in kʼexik in kuxtal yéetel u xuʼulul in biskinba yéetel le amigoʼob yaantenoʼ.

 Junpʼéel baʼax maʼ tu tuʼubulteneʼ letiʼe ka tin láakʼintaj in watan yéetel in kaʼatúul paalal teʼ reunión ku beetik u testigoʼob Jéeobaoʼ. Jach jatsʼuts tin wilil bix u modos le Testigoʼoboʼ tumen jach táaj utsoʼob. Le oʼolal tin kʼamaj ka tsʼaʼabakten xook yéetel le Bibliaoʼ.

 Teʼ Bibliaoʼ tin kaneʼ «u yaabiltaʼal le taakʼinoʼ u moots tuláakal u jejeláasil baʼaloʼob kʼaastak. Yaan máakoʼobeʼ tumen ku sen tsʼíiboltkoʼob u yantaltiʼob taakʼineʼ [...] tsʼoʼok u sen muʼyajoʼob» (1 Timoteo 6:9, 10). ¡Jach jaaj le baʼax ku yaʼalik le Bibliaoʼ! Teneʼ jach yaachajaʼan in wóol yoʼolal le baʼaloʼob maʼ maʼalobtak in beetmoʼ bey xan úuchik in beetik u sen sufrir in familia (Gálatas 6:7). Tin kanaj xaneʼ Jéeoba bey xan Jesucristo, u Hijoeʼ, jach u yaabiltmoʼon, le oʼolal káaj in kʼexik in kuxtal. Teneʼ káaj in kaxtik u yutsil u maasil, ichil leloʼ tiaʼan le in máansik maas tiempo yéetel in familiaoʼ.

 Jach yaʼab utsil tsʼoʼok u taasikten le consejo yaan teʼ Bibliaaʼ: «Le bix a kuxtaleʼexoʼ ka u yeʼes maʼ a yaabiltmeʼex le taakʼinoʼ, yéetel kiʼimakchajak a wóoleʼex yéetel le baʼaxoʼob yaanteʼexoʼ» (Hebreos 13:5). Bejlaʼeʼ jach kiʼimak in wóol tumen yaanten jeetsʼelil yéetel tranquilo in conciencia. Tsʼoʼoleʼ jach maʼalob in biskinba yéetel in watan bey xan yéetel in paalal.

 Kaʼacheʼ kin tuklikeʼ wa yaantoʼon taakʼineʼ jeʼel u kiʼimaktal k-óoleʼ. Pero bejlaʼeʼ kin tsʼáaik cuentaeʼ le in sen yaabiltik le taakʼinoʼ tu kʼaskúuntaj in kuxtal yéetel tu beetaj in sen muʼyaj. Maʼ ayikʼaloʼoniʼ, pero bejlaʼeʼ k-bisikba maʼalob yéetel Jéeoba. Leloʼ letiʼe baʼax maas koʼoj jeʼel u yantaltoʼonoʼ. K-múul meyajtik Jéeoba bey familiaeʼ jach ku taasiktoʼon kiʼimak óolal.