Le religión kʼaj óolaʼan bejlaʼa bey u testigoʼob Jéeobaoʼ desde teʼ siglo 19 yanoʼ. Tu kaajil Pittsburgh (Pensilvania) teʼ Estados Unidosoʼ, junmúuchʼ máakoʼob suuk u xokikoʼob le Bibliaoʼ tu chʼaʼtuklaj u xakʼalxoktikoʼob tubeel. Tu ketoʼob u kaʼansajil le iglesiaʼob yéetel le baʼax jach tu jaajil ku kaʼansik le Bibliaoʼ. Utiaʼal u tsʼáaikoʼob ojéeltbil baʼax tu kanoʼobeʼ, káaj u beetkoʼob libroʼob yéetel tsʼíiboʼob utiaʼal jóoʼsbil teʼ periódicooʼ, ka joʼopʼ xan u jóoʼskoʼob le revista kʼaj óolaʼan bejlaʼa bey U Pʼíich Tulumil Kanan. Táan u kʼaʼaytik u Reino Jéeobaoʼ.

 U kʼaabaʼ juntúul tiʼ le j-Xoknáaloʼob tiʼ le Bibliaoʼ Charles Taze Russell. U jaajileʼ letiʼ u yáax directoril le revista U Pʼíich Tulumil Kananoʼ, letiʼ xan nuʼukt le kaʼansaj tu beetaj le j-Xoknáaloʼob tiʼ le Bibliaoʼ, baʼaleʼ leloʼ maʼ u kʼáat u yaʼal wa tu káajsaj junpʼéel túumben religioniʼ. U tuukul Russell yéetel u yéet meyajoʼob kaʼacheʼ u tsʼáaikoʼob ojéeltbil baʼax tu kaʼansaj Jesucristo yéetel u múul meyajoʼob jeʼex le múuchʼulil tu pʼataj Cristo teʼ yáax siglooʼ. Toʼoneʼ k-naʼatikeʼ Jesús máax káajs k-religión, tumen letiʼ káajs le cristianismooʼ (Colosasiloʼob 1:18-20).