Yoʼolal le baʼaxoʼob tsʼoʼok k-kanik teʼ Bibliaoʼ, u testigoʼon Jéeobaeʼ maʼ t-oksikba tiʼ política. Minaʼanoʼon tu tséel mix junpʼéel partido, maʼatech k-votar, maʼatech k-báaxtik política mix tech k-aʼalik tiʼ u maasil ka líikʼkoʼob tu contra le gobiernoʼoboʼ. Le Bibliaoʼ ku yeʼesik baʼaxten maʼ unaj k-oksikba tiʼ politicaiʼ.

•   Jesuseʼ maʼ tu chaʼaj u beetaʼal gobernanteil tumen le máakoʼoboʼ (Juan 6:​15). Tu kaʼansaj xan tiʼ u disipuloʼobeʼ letiʼobeʼ «maʼ yóokʼol kaabiloʼobiʼ», u kʼáat u yaʼaleʼ maʼ unaj u tsʼáaikubaʼob tu tséel mix junpʼéel partidoiʼ (Juan 17:14, 16; 18:36; Marcos 12:13-​17).

•   Toʼoneʼ k-apoyartik chéen u Reino Dios, le gobierno tu chʼaʼchiʼitaj Jesús le ka tu yaʼalaj: «U maʼalob péektsilil le Reinoaʼ yaan u kʼaʼaytaʼal tiʼ tuláakal yóokʼol kaab» (Mateo 24:14). Túuxtaʼanoʼon k-kʼaʼayt u Reino Dios, le oʼolal maʼ t-oksikba tiʼ mix baʼal yaan yil yéetel política, mix teʼ luʼum tuʼux kajaʼanoʼonoʼ mix tiʼ yaanaliʼ (2 Corintoiloʼob 5:​20; Efesoiloʼob 6:​20).

•   Como maʼ t-oksikba tiʼ politicaeʼ jeʼel u páajtal k-tsikbaltik yéetel u jaajil k-óol tuláakal le jatsʼuts baʼaloʼob ken u beet u Reino Diosoʼ. Yéetel le baʼaxoʼob k-beetik bey xan yéetel le baʼaxoʼob k-aʼalikoʼ k-eʼesik le baʼax k-creertikoʼ: u Reino Dioseʼ jach tu jaajil yaan u yutskíintik le problemaʼob yaan teʼ yóokʼol kaabaʼ (Salmo 56:11).

•   Wa k-oksikba tiʼ politicaeʼ jeʼel u xuʼulul k-múul meyaj tiʼ tuláakal yóokʼol kaab bey junpʼéeliliʼ familiaeʼ (Colosasiloʼob 3:​14; 1 Pedro 2:​17). U suukileʼ le religionoʼob ku yoksikubaʼob ich politicaoʼ ku yantal kʼuuxilil ichiloʼob (1 Corintoiloʼob 1:​10).

 K-respetartik le gobiernoʼoboʼ. Kex maʼ t-oksikba tiʼ politicaeʼ k-respetartik le máaxoʼob ku gobernaroʼoboʼ. K-beetik baʼax ku yaʼalik Romailoʼob 13:1: «Tuláakal máak unaj u tsʼáaikuba yáanal u páajtalil le autoridadoʼob tsʼaʼanoʼoboʼ». Le oʼolal toʼoneʼ k-respetartik le leyoʼ, k-boʼotik impuesto yéetel k-beetik baʼax ku yaʼalik le gobierno unaj u beetaʼal utiaʼal u yutsil le kaajoʼ. Minaʼanoʼon tu contra le gobiernoʼoboʼ, baʼaxeʼ hasta k-orar «tu yoʼolal reyoʼob bey xan tu yoʼolal tuláakal le máaxoʼob yaan autoridad tiʼoboʼ», maases wa yaan u chʼaʼtuklikoʼob baʼaloʼob yaan yil yéetel u chaʼabal u adorartaʼal Diosoʼ (1 Timoteo 2:​1, 2).

 K-respetartik le derecho yaan tiʼ cada juntúul máak utiaʼal u táakpajal tiʼ politicaoʼ. Por ejemploeʼ maʼatech k-jeʼelsik le votacionoʼoboʼ mix tech k-obligartik mix máak utiaʼal maʼ u jóokʼol votar.

 ¿Chéen wa toʼon maʼ t-oksikba tiʼ política? Maʼ. Le apostoloʼob yéetel uláakʼ cristianoʼob kuxlajoʼob teʼ yáax siglooʼ maʼ xan tu yoksubaʼob tiʼ politicaiʼ. Junpʼéel libro ku tʼaan tiʼ le política yéetel tiʼ le Bibliaoʼ, ku yaʼalik: «Kex u yojloʼob kʼaʼabéet u respetartikoʼob le gobiernoʼoboʼ, le yáax cristianoʼoboʼ u yojloʼob xaneʼ maʼ unaj u yoksikubaʼob tiʼ politicaiʼ» (Beyond Good Intentions—A Biblical View of Politics). Tsʼoʼoleʼ juntúul teólogo u kʼaabaʼ Orígenes kuxlaj tu yáamil le siglo 2 yéetel 3, tu tsʼíibtaj: «Le yáax cristianoʼoboʼ maʼ tu yóotaj u kʼamoʼob mix junpʼéel puesto ichil le politicaoʼ».

 Le bix k-tuukul yoʼolal le politicaoʼ, ¿jeʼel wa u beetik u bin kʼaasil tiʼ le gobiernoʼoboʼ? Maʼatech. Toʼoneʼ maʼ j-kaxan baʼateloʼoniʼ yéetel maʼalob k-bisikba. Por ejemploeʼ le Academia Nacional de Ciencias teʼ Ucraniaoʼ tu jaʼabil 2001, tu yaʼalaj: «Maʼ xaaneʼ maʼ tuláakal máak maʼalob u yilik le bix u tuukul u testigoʼob Jéeoba [yoʼolal le politicaoʼ]. U jaajileʼ le oʼolal xan túuxtaʼab kíimsbiloʼob tumen le naziʼob yéetel le comunistaʼoboʼ». Tu yaʼalaj xaneʼ «le Testigoʼoboʼ mantatsʼ tu respetartoʼob le ley tsʼaʼab tumen le sovieticoʼoboʼ [...], meyajnajoʼob x-maʼ ookolil tu yoʼolal u yutsil uláakʼ máakoʼob tiʼ nukuch granjaʼob yéetel fabricaʼob», tsʼoʼoleʼ «mix juntéen líikʼoʼob tu contra le comunistaʼoboʼ». Tu tsʼookeʼ le academiaoʼ tu yaʼaleʼ le baʼax ku creertik yéetel ku beetik u testigoʼob Jéeoba bejlaʼoʼ «maʼ tu beetik loob tiʼ mix máak, mix tu yoksik kʼuuxilil ichil u kajnáaliloʼob mix junpʼéel luʼum».