U testigoʼob Jéeobaeʼ ku respetarkoʼob le gobiernooʼ bey xan le baʼax suuk u beetaʼal teʼ luʼumil tuʼux kajaʼanoʼoboʼ. Toʼoneʼ k-respetartik le máaxoʼob aʼalik le juramentooʼ, le máaxoʼob saludartik le banderaoʼ bey xan le máaxoʼob kʼayik le himno nacionaloʼ.

 Chéen baʼaleʼ u testigoʼob Jéeobaeʼ maʼatech u táakpajloʼob tiʼ le baʼaloʼobaʼ tumen ku bin tu contra baʼax ku kaʼansik le Bibliaoʼ, baʼaleʼ k-respetartik baʼax ku beetik u maasil, le oʼolal k-páaʼtik xan ka respetartaʼak baʼaxoʼob k-creertik.

Teʼ xookaʼ yaan k-núukik le preguntaʼobaʼ:

•  ¿Baʼax ku yaʼalik le Biblia yoʼolal le baʼaloʼob suukaʼan u beetaʼal tiʼ jujunpʼéel luʼumiloʼoboʼ?

•  ¿Baʼax unaj k-beetik wa le leyoʼ ku yaʼalik unaj k-táakpajal tiʼ le baʼaloʼobaʼ?

•  ¿U testigoʼob Jéeobaeʼ ku péeksikoʼob wa u maasil utiaʼal ka beetaʼak le baʼax ku creerkoʼoboʼ?

 Koʼox ilik kaʼapʼéel baʼax ku yaʼalik le Biblia yoʼolal leloʼ:

•   Chéen Dios unaj k-adorartik. Le Bibliaoʼ ku yaʼalik: «Jéeoba a Dios unaj a adorartik, yéetel chéen letiʼ kʼaʼabéet a meyajtik» (Lucas 4:8). Le kéen aʼalaʼak le juramentoʼob bey xan le kéen kʼaʼayak le himno nacionaloʼoboʼ suuk u yaʼalaʼal yaan u maas yaabiltik máak u luʼum ke tiʼ uláakʼ luʼumil. Le oʼolal u testigoʼob Jéeobaeʼ maʼatech u chaʼabaltiʼob tumen u concienciaʼob ka táakpajkoʼobiʼ.

   U testigoʼob Jéeobaeʼ ku yilkoʼob xaneʼ u saludartaʼal le banderaoʼ bey jeʼex ka adorartaʼak imagenoʼobeʼ, leloʼ junpʼéel baʼal ku prohibirtik le Bibliaoʼ (1 Corintios 10:14). Jujuntúul máaxoʼob kaʼanchajaʼan u xookoʼobeʼ ku yaʼalikoʼobeʼ le banderaoʼ yaan baʼax u yil yéetel religión. Le historiador Carlton Hayesoʼ tu tsʼíibtaj: «Utiaʼal yaʼab luʼumiloʼobeʼ le banderaoʼ junpʼéel baʼax jach importante, hasta ku adorarkoʼob». a Daniel Mannixeʼ tu yaʼalaj yoʼolal le yáax cristianoʼoboʼ: «Le cristianoʼoboʼ [...] maʼ tu yóotaj u beetoʼob sacrificioʼob tiʼ le emperador [romanooʼ], leloʼ láayliʼ bey jeʼex maʼ u yóotik máak u saludart le bandera teʼ kʼiinoʼobaʼ». b

  Kex u testigoʼob Jéeoba maʼatech u saludarkoʼob le banderaoʼ maʼatech xan u kʼaskúuntikoʼob mix tech u tóokikoʼob, letiʼobeʼ ku respetarkoʼob tuláakal le u maasil baʼaxoʼob representartik le luʼumiloʼoboʼ.

•   Dioseʼ mix máak jelaʼan u paktik (Hechos 10:34, 35). Le Bibliaoʼ ku yaʼalikeʼ Dioseʼ chéen yéetel juntúul wíinikeʼ «tu beetaj tuláakal u kajnáaliloʼob le luʼumaʼ» (Hechos 17:26). Le oʼolal u testigoʼob Jéeobaeʼ maʼatech u tratarkoʼob maas maʼalob chéen u jaats máakoʼob, baʼaxeʼ ku respetarkoʼob tuláakal máak kex yaanal u raza wa kex yaanal luʼumil u taaloʼob (1 Pedro 2:17).

 U testigoʼob Jéeobaeʼ maʼ tu binoʼob tu contra le gobiernooʼ. Toʼoneʼ k-respetartik le gobiernooʼ tumen Dios tsʼaamiloʼob (Romanos 13:1-7). Le oʼolal toʼoneʼ k-ilik obedecertik jeʼel baʼalak autoridad ka tsʼaʼabakeʼ (Lucas 20:25).

 Chéen baʼaleʼ, ¿baʼax unaj k-beetik wa le leyoʼ ku yaʼalik ka k-beet junpʼéel baʼal ku bin tu contra Dios? Yaan horaeʼ jeʼel u páajtal u beetik máak junpʼéel solicitud tiʼ le gobierno utiaʼal u kʼáatik wa jeʼel u kʼeʼexel le leyoʼ, c baʼaleʼ wa le gobierno ku yaʼalik maʼ tu páajtal u kʼeʼexeleʼ, toʼoneʼ maases k-ilik «uʼuyik u tʼaan Dios maʼ u tʼaan chéen máakoʼobiʼ» (Hechos 5:29).

 Maʼ. Toʼon u testigoʼon Jéeobaeʼ maʼatech k-oksikba tiʼ baʼaloʼob yaan yil yéetel política mix tech k-obligartik u maasil ka u beetoʼob le baʼaxoʼob k-creerkoʼ. Toʼoneʼ maʼatech k-aʼalik le juramentooʼ, maʼatech k-saludartik le banderaoʼ yéetel maʼatech k-kʼayik le himno nacional yoʼolal baʼax ku kaʼansik le Bibliaoʼ.