¿Baʼax ka tuklik yoʼolal lelaʼ?

•   ¿Kʼaas wa u xokik máak u horóscopo, u xoʼokol u táan u kʼab, u bin yiknal juntúul j-meen wa u meyajtiʼ uláakʼ baʼaloʼob utiaʼal u jóoʼsaʼal suerte?

•   Le baʼaxoʼob ku tsikbaltaʼal yoʼolal le espiritismooʼ, ¿jach wa tu jaajil ku yúuchul?

 Teʼ xookaʼ yaan k-ilik baʼaxten yaʼab máakoʼob uts tu tʼaanoʼob le baʼaxoʼob yaan yil yéetel espiritismooʼ. Yéetel yaan k-ilik baʼaxten unaj k-kanáantikba tiʼ le baʼaloʼobaʼ.

•  ¿Baʼaxten jach jatsʼuts u yilaʼal?

•  ¿Baʼaxten unaj k-kanáantikba?

•  Baʼax jeʼel u páajtal a beetkeʼ

•  Baʼax ku yaʼalik uláakʼ paalaloʼob

 Yaʼab tiʼ le baʼaxoʼob ku meyaj utiaʼal u náaysik u yóol maakoʼ yaan yil yéetel espiritismo. Ku chíikpajal tiʼ peliculaʼob, tiʼ baʼaxoʼob ku máansaʼal tiʼ televisión, tiʼ videojuegoʼob yéetel tiʼ libroʼob. Bejlaʼeʼ yaʼab táankelmoʼobeʼ uts tu tʼaan u chaʼantikoʼob baʼaloʼob yaan yil yéetel baʼax ku taal u kʼiin, demonioʼob, j-meenil, vampiroʼob bey xan yéetel brujaʼob. ¿Baʼaxten jach uts tu yichoʼob le espiritismooʼ?

•   Tumen taak u yojéeltikoʼob wa jach tu jaajil yaan u pixan máak.

•   Tumen chiʼichnakoʼob yoʼolal baʼax ku taal u kʼiin.

•   Tumen u kʼáatoʼob tsikbal yéetel juntúul máak tsʼoʼok u kíimil.

 U jaajileʼ maʼ kʼaas u taaktal u yojéeltikoʼob le baʼaloʼobaʼ. Yaan máaxeʼ jach u kʼáat u yojéelt baʼax ku taal u kʼiin, u taaktal u yilik juntúul u láakʼtsil wa juntúul u amigo tsʼoʼok u kíimil. Chéen baʼaleʼ le espiritismooʼ maʼ chéen báaxaliʼ.

 Le Bibliaoʼ jach claro u yaʼalik baʼaxten unaj k-kanáantikba tiʼ le espiritismooʼ. Teʼeloʼ ku yaʼalik:

 «Mix máak ichileʼex [...] [unaj] u beetkuba meenil, mix u táabal u yaʼal baʼaxoʼob ku taal u kʼiinil, mix u beetik u pulyaʼajil, mix u beetik u j-wáayil, mix u bin u kʼáatchiʼit le chuchuk naʼatoʼob, mix u kʼáatankil tiʼ pixanoʼob, mix u tʼaan yéetel kimenoʼob. Tumen Yuumtsileʼ u léem pʼeek máaxoʼob beetik le baʼaloʼoboʼ» (Deuteronomio 18:10-​12).

 ¿Baʼaxten ku yaʼalik le Biblia jach kʼaas le espiritismooʼ?

•   U yoksikuba máak tiʼ baʼaxoʼob yaan yil yéetel espiritismoeʼ bey jeʼex ka u bisuba máak yéetel demonioʼobeʼ. Le Bibliaoʼ ku yaʼalikeʼ jujuntúul angeloʼobeʼ tu tsʼáajubaʼob tu contra Dios (Génesis 6:2; Judas 6). Le kʼasaʼan angeloʼoboʼ ku tuskoʼob máak yéetel u yáantaj le máakoʼob ku jóoʼskoʼob suerteoʼ, le ku yaʼalikoʼob baʼax ku taal u kʼiinoʼ bey xan yéetel le máaxoʼob ku yaʼalikoʼob ku tʼaanoʼob yéetel le kimenoʼoboʼ. U yoksikuba máak tiʼ le baʼaloʼobaʼ jeʼel u beetik u bin tu contra Dioseʼ.

•   Yaʼab máaxoʼob yaan baʼax u yiloʼob yéetel le espiritismooʼ ku yaʼalikoʼobeʼ jeʼel u páajtal u yojéeltikoʼob baʼax ku taal u kʼiin u yúuchleʼ. Baʼaleʼ chéen Dios jeʼel u beetik lelaʼ. Letiʼeʼ ku yaʼalik: ‹Desde tu yáax chuuneʼ kin waʼalik baʼax ku taal tu tsʼook kʼiin; kin waʼalik baʼax ku taal u kʼiin maʼiliʼ úuchkeʼ› (Isaías 46:10; Santiago 4:13, 14).

•   Ichil le baʼaxoʼob táakaʼan teʼ espiritismooʼ tiaʼan u creertaʼal jeʼel u páajtal u tʼaan máak yéetel le kimenoʼoboʼ. Chéen baʼaleʼ le Bibliaoʼ ku yaʼalik: «Kimenoʼobeʼ maʼ u yojloʼob mix baʼaliʼ», tsʼoʼoleʼ ku yaʼalik xan: «Teʼ muknal tuʼux bíin xiʼikechoʼ, maʼ tu yúuchul tuukuliʼ, mix kʼaj óolal, mix ojéelaj» (Eclesiastés 9:​5, 10).

 Yoʼolal le baʼaxoʼob tsʼoʼok k-ilkaʼ, u testigoʼob Jéeobaeʼ maʼatech u táakpajloʼob tiʼ baʼaxoʼob yaan yil yéetel espiritismo. Tsʼoʼoleʼ maʼatech u náaysik u yóoloʼob yéetel baʼaloʼob tuʼux ku chíikpajal zombis, vampiros yéetel uláakʼ baʼaloʼob yaan yil yéetel espiritismo. María, juntúul x-chʼúupaleʼ, ku yaʼalik «Wa yaan baʼax u yil yéetel espiritismoeʼ, maʼ maʼalob kin chaʼantiʼ». a

•   Maʼ a chaʼantik mix a táakpajal tiʼ baʼaloʼob yaan yil yéetel espiritismo. Beyoʼ yaan u yantaltech junpʼéel maʼalob conciencia tu táan Dios (Baʼaxoʼob [Hechos] 24:16).

•   Wa yaantech wa baʼax yaan yil yéetel espiritismoeʼ, pule. Xok Baʼaxoʼob 19:19 yéetel 20, teʼeloʼ yaan a wilik baʼax tu beetaj le máaxoʼob meyajt Dios teʼ yáax siglooʼ.

 Kʼaʼajaktech lelaʼ: Wa ka náachtal tiʼ baʼaxoʼob táakaʼan tiʼ espiritismoeʼ yaan a weʼesik taak a beetik baʼax u kʼáat Dios yéetel yaan a kiʼimakkúuntik u yóol (Proverbios 27:11).