Utiaʼal yaʼab máakoʼobeʼ le cruzoʼ junpʼéel baʼal jach importante tumen ku yeʼesik yaan u fejoʼob tiʼ Jesús. Chéen baʼaleʼ le Bibliaoʼ maʼatech u yaʼalik jach bix le tuʼux chʼuykíintaʼab Jesús ka kíimsaʼaboʼ. Mix máak u jach ojel bixi, baʼaleʼ le Bibliaoʼ ku yáantkoʼon k-naʼateʼ Jesúseʼ maʼ kíimsaʼab tiʼ junpʼéel cruziʼ, baʼaxeʼ chéen tiʼ junpʼéel toj cheʼ.

 Kéen tʼaanak le Biblia tiʼ le baʼax meyajnaj utiaʼal u chʼuykíintaʼal Jesúsoʼ ku meyajtiʼ le tʼaan ich griego staurósoʼ (Mateo 27:40; Juan 19:17). Tiʼ yaʼab bibliaʼobeʼ le tʼaan staurósoʼ ku traducirtaʼal «cruz», chéen baʼaleʼ yaʼab máaxoʼob xokik baʼax u kʼáat u yaʼal u tʼaaniloʼob le Bibliaoʼ ku yaʼalikoʼobeʼ le tʼaan staurósoʼ «maases ku meyaj utiaʼal u yúuchul tʼaan tiʼ junpʼéel toj cheʼ». a Junpʼéel libroeʼ ku yaʼalik: «Le tʼaan staurósoʼ maʼatech u meyaj utiaʼal u yúuchul tʼaan tiʼ kaʼatsʼíit cheʼob kʼatakbaloʼob» (A Critical Lexicon and Concordance to the English and Greek New Testament).

 Teʼ Bibliaoʼ ku meyaj xan uláakʼ tʼaan ich griego xýlon, lelaʼ chíikaʼan tiʼ le tʼaan staurosoʹ (Hechos 5:30; 1 Pedro 2:24). Le tʼaanaʼ u kʼáat u yaʼal: «Cheʼ», «junxóotʼ cheʼ», «estaca» wa «junkúul cheʼ». b U notail junpʼéel libroeʼ ku yaʼalik: «Le tʼaan xýlonoʼ maʼ táan u tʼaan tiʼ le cruz jeʼel bix kʼaj óolaʼaniloʼ, baʼaxeʼ chéen táan u tʼaan tiʼ juntsʼíit cheʼ» (Historia universal de la Iglesia Católica, de René F. Rohrbacher).

¿Unaj wa túun u meyajtoʼon le cruz utiaʼal k-adorartik Diosoʼ?

 Kex maʼ k-ojel jach bix le tuʼux chʼuykíintaʼab Jesús utiaʼal u kíimsaʼaloʼ le Bibliaoʼ ku yáantkoʼon k-naʼat baʼaxten maʼ unaj u meyajtoʼon le cruz utiaʼal k-adorartik Diosoʼ. Koʼox ilik óoxpʼéel baʼal oʼolal.

1.   Dioseʼ maʼ u kʼáat ka meyajnaktoʼon imagenoʼob wa uláakʼ baʼaloʼob jeʼex le cruz utiaʼal k-adorarkoʼ. Úuchjeakileʼ Dioseʼ tu yaʼalaj tiʼ le israelitaʼob maʼ u meyajtiʼob «junpʼéel imagen ka yanaktiʼ u forma wa baʼax» utiaʼal ka u adorartoʼob. Teʼ kʼiinoʼobaʼ Dioseʼ ku yaʼalik tiʼ le máaxoʼob u kʼáatoʼob lúubul utsil tiʼoʼ: «Maʼ a adorarkeʼex imagenoʼob» (Deuteronomio 4:15-19; 1 Corintios 10:14).

2.   Le cristianoʼob teʼ yáax siglooʼ maʼ meyajnaj cruz tiʼob utiaʼal u adorarkoʼob Diosiʼ. c Tuláakal máax u kʼáat u beet baʼax ku yaʼalik Dioseʼ unaj u kuxtaloʼob jeʼex le apóstoloʼoboʼ yéetel unaj u beetkoʼob baʼaxoʼob tu kaʼansoʼob (2 Tesalonicenses 2:15).

3.   Le cruzoʼ ku meyaj kaʼach tiʼ uláakʼ religiónoʼob maʼatech u meyajtikoʼob Dios. d Le ka máan yaʼab años kíimik Jesúseʼ le máakoʼoboʼ xuʼul u beetkoʼob le baʼaxoʼob tu kaʼansoʼ. Letiʼobeʼ tu formartoʼob uláakʼ grupoʼob yéetel «ichiloʼobeʼ ook uláakʼ máakoʼob ku adorarkoʼob jejeláas baʼaloʼobiʼ», ichileʼ tiaʼan le cruzoʼ (Diccionario expositivo de palabras del Antiguo y del Nuevo Testamento exhaustivo, teʼ jaats «Crucificar, cruz»). Jeʼex k-ilkoʼ le Bibliaoʼ maʼatech u yaʼalik ka adorartaʼak imagenoʼob wa uláakʼ wa baʼax chéen utiaʼal ka taakak u adorartaʼal Dios tumen uláakʼ máakoʼob (2 Corintios 6:17).