¿Baʼax jeʼel u yáantkech a naʼat le Bibliaoʼ?

PAX ICH

Baʼax ku yaʼalik le Bibliaoʼ

Teʼ Biblia tsʼíibtaʼan baʼax unaj k-beetik utiaʼal k-naʼatik baʼax ku kaʼansiktoʼonoʼ. Le baʼax ku yaʼalikoʼ tuláakal máak jeʼel u páajtal u yojéeltikeʼ yéetel fácil u beetaʼal (Deuteronomio 30:11).

Le baʼax kʼaʼabéetoʼ

U yantaltech u tsʼíibolalil a kaanbal. Kʼaʼabéet a creertik de ke le Bibliaoʼ u Tʼaan Dios tumen le máaxoʼob ku creerkubaʼoboʼ maʼatech u lúubloʼob utsil tiʼ Dios. Utiaʼal u creertik máak baʼax ku yaʼalik le Bibliaoʼ kʼaʼabéet u tuukul tiʼ baʼax ku kaʼansik (Romanos 12:1, 2).
A kʼáatik tiʼ Dios ka u tsʼáatech naʼatil. Proverbios 3:5, ku yaʼalik: «Maʼ a confiar chéen tiʼ le naʼat yáantechoʼ». Jach kʼaʼabéet a kʼáatik naʼatil tiʼ Dios utiaʼal u páajtal a kaanbal tiʼ le baʼax ku yaʼalik u Tʼaan Diosoʼ (Santiago 1:5).
Tsʼáa a wóol a xoke. Wa ka tsʼáaik a wóol a xok le Biblia sáamsamaloʼ yaan a jach jóoʼsik u yutsil.
Maʼ tuláakal junpuul ken a kaniʼ. Táanileʼ kʼaʼabéet a kanik le baʼaloʼob maas kʼaʼanaʼantak ku kaʼansik le Bibliaoʼ, tsʼoʼoleʼ ka kanik le baʼaloʼob maas chan difíciltakoʼ (Hebreos 6:1, 2). Kéen a comparart junpʼéel teksto yaan teʼ Biblia yéetel uláakʼoʼobeʼ yaan a tsʼáaik cuenta fácil u naʼataʼal tu chúukaʼanil le Bibliaoʼ (2 Pedro 3:16).
Kaxt máax áantkech. Le Bibliaoʼ ku yaʼalikeʼ jeʼel u páajtal a kʼamik u yáantaj wa máax utiaʼal a naʼatik baʼax ku kaʼansikeʼ (Hechos 8:30, 31). U testigoʼob Jéeobaeʼ gratis u kaʼanskoʼob le máaxoʼob taak u kaanbaloʼoboʼ. Teʼ yáax siglooʼ le cristianoʼoboʼ tu xakʼaltoʼob jejeláas tekstoʼob utiaʼal u naʼatkoʼob baʼax ku kaʼansik le Bibliaoʼ, u testigoʼob Jéeobaeʼ bey xan u beetkoʼoboʼ (Hechos 17:2, 3).

Le baʼax maʼ kʼaʼabéetoʼ

U kaʼantal a xook. U discípuloʼob Jesúseʼ páajchaj u naʼatkoʼob u Tʼaan Dios yéetel tu kaʼanskoʼob tiʼ uláakʼ máakoʼob kex kʼaj óolaʼanoʼob bey máakoʼob óotsiloʼob yéetel maʼ kaʼanchajaʼan u xookoʼobeʼ (Hechos 4:13).
U yantaltech yaʼab taakʼin. Jeʼel u páajtal a kaanbal sin ke a boʼotkeʼ. Jesúseʼ tu yaʼalaj tiʼ u discípuloʼob: «Le baʼax tsʼaʼabteʼexoʼ siibil úuchik u beetaʼalteʼex, le oʼolal siibil xan unaj a beetkeʼex» (Mateo 10:8).