Le Bibliaoʼ ku yaʼalikeʼ maʼ unaj u jaantaʼal kʼiʼikʼiʼ. Le oʼolal le máaxoʼob meyajtik Diosoʼ maʼ unaj u jaantikoʼobiʼ. Tsʼoʼoleʼ maʼatech k-kʼamik ka tsʼaʼabaktoʼon kʼiʼikʼ mix le baʼaxoʼob patik le kʼiʼikʼoʼ wa u componentesil. Koʼox ilik jujunpʼéel tekstoʼob eʼesik lelaʼ:

•   Génesis 9:4. Ka tsʼoʼok le Diluviooʼ Jéeobaeʼ tu yaʼalaj tiʼ Noé yéetel u familiaeʼ jeʼel u páajtal u jaantikoʼob bakʼeʼ. Pero tu yaʼalajtiʼob maʼ u jaantikoʼob kʼiʼikʼ. Tu yaʼalajtiʼob lelaʼ: «Chéen baʼaleʼ bakʼ láayliʼ yaan u kʼiʼikʼeleʼ maʼ unaj a jaantikeʼexiʼ». Como tuláakloʼon k-taal tiʼ Noéeʼ tuláakloʼon unaj k-beetik le baʼax tu yaʼalaj Diosoʼ.

•   Levítico 17:14. «Maʼ unaj a jaantikeʼex u kʼiʼikʼel mix junpʼéel clase baʼal kuxaʼaniʼ, tumen u kuxtal jeʼel baʼalak kuxaʼaneʼ tiaʼan tu kʼiʼikʼeleʼ. Jeʼel máaxak ka u jaanteʼ yaan u xuʼulsaʼaltiʼ». Le kuxtaloʼ tiaʼan teʼ kʼiʼikʼoʼ yéetel le kuxtaloʼ u tiaʼal Dios. Le leyaʼ tiʼ u kaajil Israel tsʼaʼabi, chéen baʼaleʼ ku yeʼesiktoʼon bix u yilik Dios le kʼiʼikʼoʼ.

•   Hechos 15:20. Dioseʼ ku yaʼalik tiʼ le máaxoʼob meyajtikoʼ «ka u náachkuntubaʼob [...] tiʼ kʼiʼikʼ». Le yáax cristianoʼoboʼ maʼatech u jaantikoʼob kaʼach kʼiʼikʼ, tsʼoʼoleʼ maʼatech xan u meyajtiʼob bey tsʼaakeʼ.

¿Baʼaxten ku yaʼalik Dios maʼ unaj k-jaantik mix u tsʼaʼabaltoʼon kʼiʼikʼiʼ?

 Yaʼab doctoroʼobeʼ ku yaʼalikoʼobeʼ maas maʼalob maʼ u tsʼaʼabal kʼiʼikʼ tiʼ máak. Pero toʼoneʼ maases k-ilik k-beetik tumen Dios aʼaliktoʼon maʼ k-jaantik mix u tsʼaʼabaltoʼon kʼiʼikʼ t-wíinklil tumen tu táaneʼ le kʼiʼikʼoʼ santo (Levítico 17:11; Colosenses 1:20).