K-religioneʼ tuláakal tuʼux kʼaj óolaʼan, baʼaleʼ maʼatech u múul meyaj yéetel uláakʼ religionoʼob. Kex tiaʼan Estados Unidos le sede mundialoʼ, u maas yaʼabil u j-jaajkunajoʼob Jéeobaeʼ táanxel luʼum kajaʼanoʼob. Tiʼ tuláakal yóokʼol kaabeʼ yaan kex ocho millones j-Jaajkunajoʼob ku kaʼansajoʼob yéetel le Biblia tiʼ maanal 230 luʼumoʼoboʼ. Toʼoneʼ k-beetik le baʼax tu yaʼalaj Jesucristooʼ: «U maʼalob péektsilil le Reinoaʼ yaan u kʼaʼaytaʼal tiʼ tuláakal yóokʼol kaab utiaʼal ka ojéeltaʼak tumen u kajnáaliloʼob tuláakal kaajoʼob» (Mateo 24:14).

Kex jeʼel tuʼuxak kajaʼanoʼoneʼ k-respetartik le leyoʼ yéetel k-beetik baʼax ku yaʼalik. Chéen maʼ t-oksikba tiʼ política, tumen k-kʼaʼajsik baʼax tu yaʼalaj Jesús tiʼ le cristianoʼoboʼ: «Teʼexeʼ maʼ yóokʼol kaabileʼexiʼ». Tu yoʼolal lelaʼ maʼatech k-jóokʼol votar, mix tech k-táakpajal tiʼ baʼax yaan yil yéetel baʼateltáambaloʼob (Juan 15:19; 17:16). Le oʼolal teʼ Kaʼapʼéel Nojoch Baʼateltáambaloʼ, yaʼab j-Jaajkunajoʼob kʼaʼaloʼob cárcel, loobiltaʼaboʼob wa kíimsaʼaboʼob. Juntúul alemán u beetmaj u obispoileʼ tu tsʼíibtaj: «Jeʼel u páajtal u yaʼalaʼaleʼ letiʼe grupo maas nojoch maʼ tu yóotaj u apoyartoʼob Hitler teʼ Alemania Nazi yoʼolal u concienciaʼoboʼ».

Pero lelaʼ maʼ u kʼáat u yaʼal wa junpuliʼ maʼatech k-bisikba yéetel uláakʼ máakoʼobiʼ. Jesuseʼ tu yaʼalaj tiʼ Dios ich oración: ‹Maʼ tin kʼáatiktech ka a jóoʼsoʼob tiʼ le yóokʼol kaaboʼ› (Juan 17:15). Le beetkeʼ toʼoneʼ k-bin meyaj, k-jóokʼol maan yéetel k-bin escuela jeʼex u maasil máakoʼobeʼ.