«Ken in wuʼuy le alarmaoʼ ku káajal u kukulankil in puksiʼikʼal —ku yaʼalik Alona—. Kin taʼakkinba tu séebaʼanil utiaʼal maʼ in kíimil ken puʼuluk le bombaʼoboʼ. Pero kex in taʼakminbaeʼ láayliʼ saajkeneʼ. Tsoʼoleʼ maas kʼaas wa minaʼanen tin wotoch, tumen minaʼan mix tuʼux in taʼakkinba. Junpʼéel kʼiin jokʼaʼaneneʼ tin wuʼuyaj u juum le alarmaoʼ ka joʼopʼ in sen okʼol, hasta pʼáat maʼ tu páajtal in chʼaʼik in wiikʼ. Máan horaʼob utiaʼal u páajtal in calmarkinba. Ka tsʼoʼokeʼ le ku kaʼa juum le alarmaoʼ.»

Maʼ chéen le máaxoʼob kajaʼanoʼob tuʼux ku yúuchul baʼateltáambal ku sajaktaloʼoboʼ. Por ejemploeʼ jeʼel k-sajaktal wa ku yaʼalaʼaltoʼon jach kʼojaʼan juntúul k-láakʼtsil wa juntúul k-amigoeʼ. Uláakʼoʼobeʼ ku chiʼichnaktaloʼob tak yoʼolal baʼaxoʼob maʼ úuchkiʼ. Maʼ xaaneʼ ku tuklikoʼob: «¿Bix kun bin tiʼ in paalal yéetel tiʼ in wáabiloʼob ken nojochchajkoʼob? ¿Yaan wa u yilkoʼob u maasil baʼateltáambaloʼob, kʼaakʼas kʼojaʼaniloʼob yéetel contaminación?». Le oʼolaleʼ ¿baʼax jeʼel u páajtal k-beetik utiaʼal maʼ k-sen chiʼichnaktaleʼ?

Le Bibliaoʼ ku yaʼalik: «J-ojéelajeʼ ku yilik u taal kíimileʼ ku tselikuba» (Proverbios 27:12). Baʼaleʼ maʼ chéen unaj k-tselikba tiʼ baʼax jeʼel u kíimskoʼoneʼ, tak tiʼ baʼaxoʼob jeʼel u kʼaskúuntik k-tuukuleʼ wa jeʼel u beetik k-sajaktaleʼ. Wa k-náaysik k-óol yéetel baʼaloʼob yaan yil yéetel kíimsajbail bey xan wa k-chaʼantik peliculaʼob wa  tak noticiaʼob tuʼux ku chíikpajal baʼaloʼob jach kʼaastakeʼ, jeʼel k-maas k-chiʼichnaktaleʼ bey xan k-paalal. Wa maʼ t-chaʼantikeʼ maʼ u kʼáat u yaʼal wa táan k-beetik bey mix baʼal ku yúuchleʼ, baʼaxeʼ táan k-kanáantikba. Dioseʼ maʼ tu beetoʼon utiaʼal k-tuukul tiʼ baʼaloʼob kʼaastakiʼ, baʼaxeʼ tiʼ baʼaloʼob jaajtak, tojtak, limpiotak yéetel utstak. Wa k-tuukul tiʼ le baʼaloʼob maʼalobtakaʼ «u Diosil túun le jeetsʼeliloʼ» yaan u yáantkoʼon utiaʼal maʼ k-chiʼichnaktal (Filiposiloʼob 4:8, 9).

Wa jach tu jaajil yaan k-fejeʼ jeʼel u xuʼulul k-sen chiʼichnaktaleʼ. Le Bibliaoʼ ku yaʼalik: «Orarneneʼex mantatsʼ tu jaajil a wóoleʼex» (1 Pedro 4:7). Ken yanaktoʼon problemaʼobeʼ, jeʼel u páajtal k-kʼáatik tiʼ Dios ka u yáantoʼon, ka u tsʼáatoʼon naʼat yéetel ka u luʼs k-saajkil utiaʼal k-beetik baʼax maʼalob, tumen k-ojel jeʼel u «yuʼubik tuláakal baʼax k-kʼáatiktiʼeʼ» (1 Juan 5:15).

Le Bibliaoʼ ku yaʼalikeʼ Satanás «u gobernanteil le yóokʼol kaabaʼ», maʼ Diosiʼ (Juan 12:31; 1 Juan 5:19). Le oʼolal Jesuseʼ tu yaʼalaj ka k-kʼáat ich oración «kanáantoʼon tiʼ le j-Kʼasaʼanoʼ», wa Satanás (Mateo 6:13). U jaajileʼ le oracionoʼ jeʼel u beetik k-calmareʼ. Alonaeʼ ku yaʼalik: «Ken in wuʼuy le alarmaʼoboʼ kin kʼáatik tiʼ Dios ka u yáanten in calmartinba. Tsoʼoleʼ in wíichameʼ ku tʼanken tiʼ teléfono yéetel k-múul orar. Leloʼ ku pʼatken tranquilail». Jeʼex u yaʼalik le Bibliaoʼ, Jéeobaeʼ «naatsʼ yanil tiʼ máaxoʼob tʼanik» (Salmo 145:18).

Tu Kaʼansajil le Puʼukoʼ Jesuseʼ tu yaʼalaj tiʼ u disipuloʼob ka u kʼáatoʼob ich oración: «Taalak a Reino» (Mateo 6:10). U Reino Dios kun xuʼulsik tuláakal baʼax beetik k-chiʼichnaktal. Jesucristo ‹u reyil jéetsʼeleʼ› yaan u taasik «xuul tiʼ le baʼateloʼob tuláakal tuʼux yóokʼol kaab[oʼ]» (Isaías 9:6; Salmo 46:9). Dioseʼ «bíin [juzgarnak] ichil múuchʼ kaajoʼob [...]. Mix junpʼéel kaaj bíin u kaʼa mach u nuʼukul u baʼateʼel utiaʼal u bin u baʼatelt uláakʼ kaaj». Tsʼoʼoleʼ «tuláakloʼob bíin kajlakoʼob x-maʼ saajkil» (Miqueas 4:3, 4). Teʼ kʼiinoʼoboʼ «máaxoʼob ku beetkoʼob u yotochoʼobeʼ bíin kajlakoʼob ichiloʼob, máaxoʼob pakʼik uvaobeʼ bíin u jaantoʼob u yich» (Isaías 65:21). Tsoʼoleʼ «mix juntúul kajnáal bíin u yaʼal: Kʼojaʼanen» (Isaías 33:24).

U jaajileʼ yaan horaeʼ mix baʼal ku páajtal k-beetik utiaʼal maʼ u yúuchul wa baʼax (Eclesiastés 9:11). Maʼ xaaneʼ kex mix máak páaʼtikeʼ jeʼel u yúuchul wa baʼax teʼ tuʼux yanoʼonoʼ. Tsʼoʼoleʼ jeʼex suuk u yúuchleʼ yaʼab inocenteʼob ku kíimloʼob yoʼolal baʼateltáambal, loobil, yéetel kʼojaʼaniloʼob. ¿Bey wa túun kun tsʼoʼokoltiʼoboʼ?

Maʼ. U millonesil máakoʼob kun kaʼa kuxtaloʼob, chéen Jéeoba u yojel jaytúuloʼob. «Tuláakal le máaxoʼob yanoʼob ichil le muknaloʼoboʼ» táan u jeʼeleloʼob mientras u kʼuchul u kʼiinil u kaʼa kuxkíintaʼaloʼob (Juan 5:28, 29). Le Bibliaoʼ ku yaʼalik: «Le esperanzaaʼ bey junpʼéel ancla utiaʼal k-kuxtaleʼ, tumen jach jeetsʼel yanil yéetel maʼ tu kʼexpajal» (Hebreoʼob 6:19). Tsʼoʼoleʼ Dioseʼ úuchik u kaʼa kuxkíintik Jesuseʼ «tsʼoʼok u yeʼesik tiʼ tuláakal máak jach tu jaajil yaan u beetik» le baʼax u yaʼalmoʼ (Baʼaxoʼob [Hechos] 17:31).

Bejlaʼeʼ tak máaxoʼob meyajtik Dios jeʼel u chiʼichnaktaloʼobeʼ. Baʼax áant Paul, Janet yéetel Alonaeʼ u beetkoʼob jujunpʼéel baʼaloʼob ku yilkoʼob jeʼel u yáantajeʼ, u kʼáatkoʼob áantaj ich oración yéetel u confiaroʼob tiʼ Dios. Wa k-beetik jeʼex letiʼobeʼ Jéeoba «le Dios ku tsʼáaik esperanzaoʼ [yaan u chupkoʼon] yéetel kiʼimak óolal bey xan yéetel jeetsʼelil» (Romailoʼob 15:13).