Líikʼen tiʼ junpʼéel u chan kaajil Nueva York ku kʼaabaʼtik Ancram. Teʼeloʼ yaʼab tuʼux ku tséentaʼal vacaʼob utiaʼal ka poʼotsʼok u lecheʼob. Hasta maas yaʼab le vacaʼob ke le máakoʼoboʼ.

In familiaeʼ ku bin kaʼach iglesia. Tu jaʼatskabil domingoeʼ in abueloeʼ ku jáan choʼik in xaanab utiaʼal ka xiʼiken doctrina. Suuk in bisik kaʼach junpʼéel chan sak Biblia u siimajten in abuela. Teen yéetel in wíitsʼnoʼobeʼ kaʼansaʼaboʼon meyaj, k-respetart yéetel k-áant k-vecinoʼob, bey xan k-tsʼáaik u diosboʼotikil tiʼ Dios yoʼolal le baʼaxoʼob yaantoʼonoʼ.

Ka nojochchajeneʼ lukʼen tin wotocheʼ ka tin beetaj in maestrail. Taakchaj in wojéeltik yaʼab baʼaloʼob yoʼolal Dios bey xan yoʼolal le kuxtaloʼ. Yaan tiʼ le paalal kin kaʼansik kaʼachoʼ jach yaan u naʼatoʼob, uláakʼoʼobeʼ jach xaan u kaanbaloʼob. Yaneʼ jach tʼaʼajoʼob, uláakʼoʼobeʼ kʼojaʼanoʼob. Maʼ tin naʼatik kaʼach baʼaxten bey le kuxtaloʼ. Yaan kʼiineʼ u taata le paalal maʼ uts u bintiʼoboʼ ku yaʼalikoʼobten: «Baʼax maas. Bey u kʼáat Diosoʼ». Teneʼ maʼ tin naʼatik kaʼach baʼaxten Dioseʼ ku beetik u yantal paalal kʼojaʼantakoʼob. ¡Si mix baʼal kʼaas u beetmoʼob!

Yaan kʼiineʼ kin tuklik xan: «¿Baʼax ku páaʼtaʼal ka in beet yéetel in kuxtal?». Kin wuʼuyikeʼ bey chéen táan u máan le tiempooʼ. Líikʼen ichil junpʼéel maʼalob familia, xooknajen tiʼ maʼalob escuelaʼob, yéetel jach uts tin tʼaan le meyaj kin beetkoʼ. Baʼaleʼ kin wuʼuyik bey yaan baʼax ku bineltikteneʼ. Wa ku binten utsileʼ, yaan u tsʼoʼokol in beel, yaan u yantal in paalal, junpʼéel in wotoch jatsʼuts, yaan u seguer in meyaj tak ken jubilartaʼaken, yéetel tu tsʼookeʼ yaan in bisaʼal teʼ naj tuʼux ku kanáantaʼal le máaxoʼob tsʼoʼok u chʼíijloʼoboʼ. Kin máansik tin tuukul: «¿Chéen wa letiʼe u biilal le kuxtaloʼ?».

Ka jóokʼen tu vacacionesil yáaxkʼiineʼ, binen Europa yéetel uláakʼ maestraʼob. T-xíimbaltaj le abadía Westminsteroʼ, le catedral Notre-Dame yaan Parisoʼ, le Vaticanooʼ, bey xan yaʼab uláakʼ iglesiaʼob. Jeʼel tuʼuxak ka xiʼikeneʼ puro letiʼe  kʼáatchiʼob kin beetkoʼ. Ka suunajen tin wotoch, tu kaajil Sloatsburg, Nueva Yorkeʼ, binen tiʼ jejeláas iglesiaʼob. Baʼaleʼ le baʼax tu núukoʼobtenoʼ maʼ tu convencerteniʼ.

Junpʼéel kʼiineʼ juntúul tiʼ le paalal kin kaʼansikoʼ, juntúul chan x-chʼúupal yaan 12 años tiʼeʼ, tu beetaj óoxpʼéel kʼáatchiʼob tiʼ teen. Yáaxeʼ tu kʼáatajten wa in wojel letiʼeʼ juntúul u j-jaajkunaj Jéeoba. Ka tin núukajtiʼ: «In wojel». Tsʼoʼoleʼ tu kʼáatajten wa in kʼáat in wojéelt u maasil yoʼolal le j-Jaajkunajoʼoboʼ. Ka tin núukajtiʼ: «In kʼáat». Tu tsʼookeʼ tu kʼáatajten tuʼux kajaʼanen. Ka tin tsʼáaj in dirección tiʼeʼ t-tsʼáaj cuentaeʼ vecinaʼon. Maʼ tin tuklaj wa yaan u kʼexpajal in kuxtal le ka tin núukaj le óoxpʼéel kʼáatchiʼoboʼ.

Tuláakʼ kʼiineʼ le chan x-chʼúupaloʼ taal tin wotoch yéetel u bicicleta, ka káaj u tsʼáaikten xook yéetel le Bibliaoʼ. Tin beetajtiʼ le kʼáatchiʼob in beetmaj tiʼ u nuuktakil le religionoʼoboʼ. Baʼaleʼ le chan x-chʼúupaloʼ tin Biblia tu yeʼesajten u núukil le kʼáatchiʼoboʼ. ¡Maʼ tin tuklaj wa tiaʼan teʼ Bibliaoʼ!

Kiʼimakchaj in wóol yéetel le baʼax tin kanaj teʼ Bibliaoʼ. Jaʼakʼ in wóol ka tin xokaj 1 Juan 5:19, tuʼux ku yaʼalik: «U túulisil yóokʼol kaabeʼ tiʼ yaan yáanal u páajtalil le j-Kʼasaʼanoʼ». Tu líiʼsaj in wóol in wojéeltikeʼ maʼ Dios beetik u muʼyaj wíinikiʼ, baʼaxeʼ Satanás, yéetel maʼ tun xáantaleʼ Dioseʼ yaan u yutskíintik tuláakal baʼal (Apocalipsis 21:3, 4). Tin tsʼáaj cuentaeʼ utiaʼal u naʼataʼal le Bibliaoʼ maʼ tsaaj u tsoʼolol yaʼab baʼaloʼobiʼ. Como chéen 12 años yaan tiʼ le máax kaʼansenoʼ, tin tsʼáaj cuentaeʼ le jaajoʼ letiʼ u jaajil, kex jeʼel máaxak ka u kaʼanseʼ.

Kex beyoʼ taak in wojéeltik kaʼach wa le j-Jaajkunajoʼoboʼ ku tsʼáaik ichil u kuxtaloʼob le baʼax ku kaʼanskoʼoboʼ. Por ejemploeʼ le chan x-chʼúupaloʼ mantatsʼ táan u yaʼalikeʼ juntúul cristianoeʼ kʼaʼabéet u yeʼesik paciencia yéetel utsil (Galaciailoʼob 5:22, 23). Ka tin beetaj junpʼéel prueba tiʼ. Junpʼéel kʼiineʼ, in wóoliliʼ kʼuchken tarde utiaʼal le xookoʼ. Le maʼ kʼuchkenoʼ táan in tuklik: «¿Láayliʼ wa táan u páaʼtikeneʼ? ¿Kʼuuxilnajaʼan wa?». Ka kʼuchen yéetel in cocheeʼ kulukbal tu escalerail in wotoch. Áalkabil taalik tin wiknal, ka tu yaʼalajten: «Jach nikaʼaj kaʼach tin wotoch utiaʼal in waʼalik tiʼ in maama ka tʼaanak yéetel le policía wa teʼ hospitaloʼoboʼ. Como maʼatech a kʼuchul tardeeʼ tin tuklaj yaan baʼax úuchtecheʼ. ¡Ta jaʼasaj in wóol!».

Uláakʼ juntéeneʼ tin beetajtiʼ junpʼéel kʼáatchiʼ kin tuklik maʼ tu páajtal u núukik. Chéen taak in wilik kaʼach baʼax ken u núuke. Letiʼeʼ tu jach pakteneʼ ka tu yaʼalaj: «Leloʼ maʼ chéen chʼaʼabil u núukaʼaliʼ. Nikaʼaj in tsʼíibte, utiaʼal in kʼáatik tiʼ in taataʼob». Tuláakʼ kʼiineʼ tu taasajten le revista U Pʼíich Tulumil Kanan tuʼux ku tsoʼolol le baʼax tin kʼáatajtiʼoʼ. Le oʼolal taakchaj in maas kʼaj óoltik u j-jaajkunajoʼob Jéeoba: tumen ichil le jóoʼsaʼaniloʼob ku beetkoʼoboʼ tiʼ ku tsoʼolol yéetel le Biblia tuláakal le baʼaxoʼob taak in wojéeltikoʼ. Seguernaj in xook yéetel le chan x-chʼúupaloʼ. Ka máan junpʼéel añoeʼ okjaʼanajen bey juntúul u j-jaajkunaj Jéeobaeʼ. *

Ka núukpaj tuláakal in kʼáatchiʼobeʼ taakchaj in tsikbaltik tiʼ tuláakal máak le baʼax tsʼoʼok in kanikoʼ (Mateo 12:35). Tu káajbaleʼ kʼuuxilnaj in láakʼtsiloʼob, baʼaleʼ ka máan kʼiineʼ xuʼul u kʼuuxiloʼob. In maamaeʼ káaj u xokik le Biblia antes u kíimiloʼ. Kex maʼ okjaʼanajeʼ u chʼaʼtukultmiliʼ u meyajtik Jéeobaeʼ.

Tu jaʼabil 1978, tsʼoʼok in beel yéetel Elías Kazan, ka invitartaʼaboʼon meyaj tu Najil Betel Estados Unidos tu jaʼabil 1981. * Kex yaachaj tin wóol úuchik u kíimil Elías kanpʼéel años ookkoʼon Beteleʼ, teneʼ seguernaj in meyaj teʼeloʼ. Le áanten maʼ u lúubul in wóol, tumen mantatsʼ ocupadaen.

Tu jaʼabil 2006, tsʼoʼok in beel yéetel Richard Eldred, uláakʼ juntúul máax ku meyaj Betel. Tak bejlaʼeʼ tiaʼanoʼon Beteleʼ, yéetel kiʼimak k-óol yoʼolal le meyaj k-beetkoʼ. Úuchik in kaanbal tiʼ le Bibliaoʼ núukpaj in kʼáatchiʼob yéetel anchaj u biilal in kuxtal. ¡Yaaske tin núukaj le óoxpʼéel kʼáatchiʼob tu beetajten le chan x-chʼúupaloʼ!