Síijen Bakú (Azerbaiyán). Teen u x-tʼuupil yéetel chéen juntúul in kiik anchaji. Kex musulmán in taata yéetel judía in maamaeʼ, maʼalob u biskubaʼob tumen jach u yaabiltmubaʼob. Tu mesil ramadán ken ayunarnak in taataeʼ, in maamaeʼ maʼatech u yaʼalik mix baʼal tiʼ. Ken u kʼiinbes in maama le Pascuaoʼ in taataeʼ ku yáantik xan. Tin wotocheʼ yaantoʼon kaʼach Corán, Torá yéetel le Bibliaoʼ.

Teneʼ musulmana in wuʼuyikinba kaʼachi. Kin creertik Dios, baʼaleʼ yaan baʼaloʼob maʼ tin naʼatik: ¿Baʼaxten tu beetoʼon Dios? ¿Baʼax u biilal u muʼyaj máak ichil tuláakal u kuxtal wa láayliʼ yaan u muʼyaj teʼ infiernooʼ? Suuk u yaʼalaʼaleʼ Dios beetik u yúuchul tuláakal baʼal, le oʼolal kin tuklik: «¿Dios wa controlartik tuláakal baʼax k-beetik? ¿Uts tu tʼaan wa u yilik k-muʼyaj?».

Le ka tu tsʼáajten 12 jaʼabeʼ, joʼopʼ in beetik namaz, le cinco oracionoʼob suuk u beetik sáamsamal le musulmanoʼoboʼ. In taata xaneʼ tu kʼuben yéetel in kiik tiʼ junpʼéel escuela judía. Teʼeloʼ t-kanaj hebreo yéetel religión. Sáamsamal k-orar jeʼex suuk u beetik le judíoʼoboʼ. Le oʼolal tin wotocheʼ kin orar bey musulmanaeʼ yéetel teʼ escuelaoʼ bey judíaeʼ.

Jach chiʼichnaken tumen yaʼab baʼaxoʼob maʼ tin naʼatik kaʼachi. Mantatsʼ kin kʼáatik tiʼ le rabinoʼob ku kaʼansajoʼob teʼ escuelaoʼ: «¿Baʼaxten tu beetoʼon Dios? ¿Baʼax ta tʼaan ku tuklik Dios yoʼolal in taata musulmán? Wa in taata juntúul utsul máakeʼ, ¿baʼaxten túun ku yaʼalaʼal kʼaas yanil tu táan Dios? Wa kʼaas yanileʼ, ¿baʼaxten túun beetaʼab tumen Dios?». Le baʼax tu núukoʼoboʼ maʼ tu convencerteniʼ.

Tu jaʼabil 2002, úuch junpʼéel baʼal tu beetaj u xuʼulul in creertik Dios. Binoʼon kajtal Alemania. Chéen kaʼapʼéel semana kʼuchkoʼoneʼ tu tsʼáaj junpʼéel derrame cerebral tiʼ in taata, ka pʼáat en coma. Úuch káajak in kʼáatik tiʼ Dios ka u kanáant in láakʼtsiloʼob.  Tumen in wojel chéen Dios jeʼel u salvartikoʼoneʼ, sáamsamal kin kʼáatiktiʼ ka u yáant in taata. Kin tuklikeʼ chéen chʼaʼabil ken u yáant in taata jeʼex in kʼáatiktiʼoʼ. In tsʼaamileʼ jach yaan u tojtal u yóol in taata, baʼaleʼ kíimi.

Jach lúub in wóol. Káaj in tuklikeʼ baʼax u kʼáaj tiʼ Dios baʼax ku yúuchultoʼon. Le oʼolal tin tuklaj: «Wa túun maʼ in wojel orariʼ, wa minaʼan Dios». Tumen maʼ in wojel baʼax in creerteʼ xuʼul in orar. Tu tsʼookeʼ mix junpʼéel religión maʼalob in wilik, le oʼolal kʼuch in tukult minaʼan Dios.

Ka máan seis meseseʼ xíimbaltaʼaboʼon tumen u j-jaajkunajoʼob Jéeoba. Teʼ kʼiinoʼob jeʼeloʼ maʼ tu lúubultoʼon utsil le religionoʼob ku yaʼalikubaʼob cristianoʼoboʼ. Teen yéetel in kiikeʼ t-óotaj k-eʼestiʼob yéetel tsiikil maʼ maʼalob baʼax ku kaʼanskoʼobiʼ, ka t-kʼáatajtiʼob: «Wa le Diez Mandamientos ku yaʼalik maʼ unaj u adorartaʼal imagenoʼobiʼ, ¿baʼaxten túun ka adorartikeʼex le cruzoʼ, u imagen Jesús yéetel María?». Tu jóoʼsoʼob u Bibliaʼobeʼ ka tu yeʼesoʼobtoʼoneʼ le jaajil cristianoʼoboʼ maʼ unaj u adorartikoʼob imagenoʼobiʼ, yéetel chéen tiʼ Dios unaj u oraroʼob. Pʼáat jaajap in chiʼ ka tin wuʼuyaj.

Tsʼoʼoleʼ t-kʼáatajtiʼob: «¿Kux túun le Trinidadoʼ? Wa Jesús Dioseʼ, ¿baʼaxten túun taal way Luʼum utiaʼal ka kíimsaʼakeʼ?». Letiʼobeʼ tu kaʼa jeʼekʼabtoʼob le Bibliaoʼ ka tu tsoloʼob de ke Jesuseʼ maʼ Diosiʼ, tsʼoʼoleʼ Dioseʼ maas nojoch u páajtalil tiʼ Jesús, le oʼolal bin maʼ tu creertikoʼob le Trinidadoʼ. Jaʼakʼ in wóoleʼ ka tin tuklaj: «Jach túun jelaʼan le cristianoʼobaʼ».

Baʼaleʼ taakchaj xan in wojéeltik baʼaxten ku kíimil máak yéetel baʼaxten ku chaʼik Dios k-muʼyaj. Le j-Jaajkunajoʼoboʼ tu yeʼesoʼobten le libro El conocimiento que lleva a vida eterna. * Teʼ librooʼ tiaʼan u núukil tuláakal le kʼáatchiʼob taak in wojéeltikoʼ. Tu séebaʼanil joʼopʼ in xokik le Biblia tu yéeteloʼoboʼ.

Cada ken u tsʼáaʼobten xookeʼ kin tsʼáaik cuenta jaaj baʼax ku yaʼalik le Bibliaoʼ. Tin kaneʼ u kʼaabaʼ Dioseʼ Jéeoba, yéetel jach yaan u yaabilaj (Salmo 83:18; 1 Juan 4:8). Le ka tu tsʼáaj k-kuxtaloʼ tu beetaj tumen u kʼáat ka yanaktoʼon kiʼimak óolal jeʼex letiʼoʼ. Tin kaneʼ kex Dios ku chaʼik u yantal kʼasaʼanileʼ maʼ tun xáantal ken u luʼse, tumen u pʼekmaj. Tin kanaj xaneʼ tu yoʼolal u kʼeban Adán yéetel Evaeʼ bin kʼaasil tiʼ wíinik (Romailoʼob 5:12). Le oʼolal ku kíimil le máaxoʼob k-yaabiltmoʼ, jeʼex úuchten yéetel in taataoʼ. Baʼaleʼ teʼ túumben luʼum ku yaʼalik Dios u tsʼáaikoʼ, yaan u xuʼulul tuláakal baʼax beetik k-muʼyaj yéetel yaan u kaʼa kuxtal le kimenoʼoboʼ (Baʼaxoʼob [Hechos] 24:15).

Teʼ Biblia tin kaxtaj u núukil in kʼáatchiʼoboʼ, ka joʼopʼ in kaʼa creertik Dios. Jujunpʼíitil tin kʼaj óoltil u j-jaajkunajoʼob Jéeoba, ka tin wileʼ jach tu jaajil bey junpʼéel familia yaan tiʼ tuláakal yóokʼol kaabeʼ. Jatsʼuts tin wilil bix u biskubaʼob yéetel bix u yeʼeskoʼob yaabilaj tu baatsiloʼob (Juan 13:34, 35). Yoʼolal le baʼaxoʼob tin kanoʼ taakchaj in meyajtik Jéeoba Dios, ka okjaʼanajen 8 tiʼ enero tiʼ 2005.

Séeb tin wilil jach jaaj baʼax ku yaʼalik le Bibliaoʼ, le oʼolal bejlaʼeʼ yaan u biilal in kuxtal yéetel maas kiʼimak in wóol. Ku líiʼsik in wóol in wojéeltikeʼ Dioseʼ yaan u kaʼa kuxkíintik in taata, jeʼex u yaʼalik le Bibliaoʼ (Juan 5:28, 29).

Tsʼoʼok seis jaʼaboʼob tsʼoʼokok in beel yéetel Jonathan, juntúul máax meyajtik Dios. Tu kaʼatúulaloʼoneʼ tsʼoʼok k-kanikeʼ le Bibliaoʼ mantatsʼ ku yaʼalik u jaajil, séeb u naʼataʼal yéetel minaʼan uláakʼ libro jeʼex letiʼeʼ. Le oʼolal jatsʼuts k-ilik k-tsikbaltik tiʼ uláakʼ máakoʼob le baʼaxoʼob k-kanmaj teʼ Bibliaoʼ. Bejlaʼeʼ kin wilkeʼ u j-jaajkunajoʼob Jéeobaeʼ maʼ cristianoʼob jelaʼantakoʼobiʼ, baʼaxeʼ u jaajil cristianoʼob.