TIʼ U YÁAX TÁAN JUʼUNIL | JEʼEL U PÁAJTAL A NATSʼKABA TIʼ DIOSEʼ
¿Ka wilik wa Dios bey a amigoeʼ?
«Wa u amigoech Dioseʼ ka wuʼuyik kanáantaʼanech yéetel maʼalob anikech. Ka wuʼuyik mantatsʼ táan u yilik ka xiʼiktech utsil.» (CHRISTOPHER, XIʼIPAL KAJAʼAN GHANA)
«Dioseʼ ku yilik wa ku yaatal a wóol; ken u yeʼestech yaabilajeʼ ka wilik maas u yaabiltmech tiʼ le ka tuklik kaʼachoʼ.» (HANNAH, CHAN X-CHʼÚUPAL DE 13 JAʼAB, KAJAʼAN ESTADOS UNIDOS)
«Dioseʼ ku beetik in wuʼuyikinba kanáantaʼanen. In biskinba yéeteleʼ letiʼe baʼax maas jatsʼuts in wilkoʼ.» (GINA, KOʼOLEL YAAN KEX 45 JAʼAB TIʼ, KAJAʼAN JAMAICA)
Maʼ chéen Christopher, Hannah yéetel Gina ku yuʼubikubaʼob beyoʼ. Tiʼ tuláakal yóokʼol kaabeʼ yaʼab máax ilik Dios bey u amigoeʼ. ¿Kux túun teech? ¿Ka wilik wa Dios bey a amigoeʼ? Wa maʼeʼ, ¿uts wa ta tʼaan ka a maas bisaba tu yéetel? Maʼ xaaneʼ jeʼel a waʼalikeʼ: «¿Bix jeʼel u beetkuba u amigo Dios juntúul luʼumkabil máak jeʼexenaʼ?».
JEʼEL U PÁAJTAL A BEETKABA U AMIGO DIOSEʼ
Le Bibliaoʼ ku yaʼalikeʼ jeʼel u páajtal k-bisikba yéetel Dios, le Máax beetmiloʼonoʼ. Teʼ Isaías 41:8, Dioseʼ tu yaʼalaj «in wéet bisajba» tiʼ Abrahán, u úuchben taata le israelitaʼoboʼ. Tsʼoʼoleʼ ilawil bukaʼaj jatsʼutsil le baʼax ku yaʼalik Santiago 4:8: «Natsʼabaʼex tiʼ Dios, letiʼ túuneʼ bíin u natsʼuba tiʼ teʼex». Tuláakal lelaʼ ku yeʼesikeʼ jeʼel u páajtal k-beetikba u amigo Dioseʼ. Baʼaleʼ ¿bix jeʼel u páajtal k-natsʼikba tiʼ Dios wa maʼ tu páajtal k-ilkeʼ?
Utiaʼal k-ojéeltikeʼ tuukulnakoʼon tiʼ bix u káajal u biskuba kaʼatúul amigoʼob. U suukileʼ u kʼaabaʼob ku yáax aʼalikoʼob. Wa ku suuktal u múul tsikbal tu kaʼatúulaloʼobeʼ ku káajal u kʼaj óoltkubaʼob yéetel u yaabiltikubaʼob. Tsʼoʼoleʼ ken u paklan áantubaʼob wa ken múul meyajnakoʼobeʼ ku maas jatsʼutstal bix u biskubaʼob. Óoliʼ bey u yúuchul xan tiʼ toʼon yéetel Diosoʼ. Koʼox ilik baʼaxten.
Maʼ xaaneʼ jeʼel u yutstal xan ta wicheʼ
LE MÁAX KU KANANOʼ
¿A wojel wa bix u kʼaabaʼ Dios?
U jaajileʼ Dioseʼ tsʼoʼok u yaʼaliktoʼon u kʼaabaʼ: «Teen Jehová; lelaʼ in kʼaabaʼ».
