BAʼAXTEN MAʼ TU CREERTAʼAL: Yaan máakeʼ kex jach lubaʼan u yóoleʼ maʼatech u kʼáatik áantaj tiʼ Dios, tumen ku tuklikeʼ yaan uláakʼ máakoʼob maas kʼaʼabéet u yáantaʼaloʼob. Juntúul koʼolel ku kʼaabaʼtik Raqueleʼ ku yaʼalik: «Ken in wil bukaʼaj máakoʼob ku muʼyajoʼobeʼ kin tsʼáaik cuentaeʼ mix baʼal le kin muʼyajtik tenoʼ, le oʼolal kin tuklikeʼ míin maas maʼalob maʼ in kʼáatik áantaj tiʼ Dios».

BAʼAX KU KAʼANSIK LE BIBLIAOʼ: Dioseʼ yaan baʼax tsʼoʼok u beetik utiaʼal u yáantkoʼon yéetel u líiʼsik k-óol. Way Luʼumeʼ láaj kʼebanoʼon, maʼ tu páajtal k-beetik tuláakal le baʼax ku yaʼalik Diosoʼ. Kex beyoʼ Dioseʼ tu «yaabiltoʼon úuchik u túuxtik u Paal kíimil t-oʼolal utiaʼal u tsʼáaik tuʼux u perdonartaʼal k-kʼebanoʼob» (1 Juan 4:10). Dioseʼ, tu yoʼolal Jesucristoeʼ, ku béeytal u perdonartik k-kʼebanoʼob, ku tsʼáaiktoʼon junpʼéel maʼalob conciencia, yéetel ku tsʼáaiktoʼon u páajtalil k-kuxtal minaʼan u xuul ich jeetsʼelil way Luʼumeʼ. * Yoʼolal le baʼax tu beetoʼ, tu yeʼesaj taak u yáantik tuláakal wíinik. Baʼaleʼ ¿tuukulnaj wa ta woʼolal?

Apóstol Pabloeʼ, yoʼolal le kiʼimak óolal ku yuʼubik úuchik u kʼubik u kuxtal Cristooʼ, tu tsʼíibtaj: «Le kuxtal yaanten beoraaʼ letiʼe yaanten yoʼolal le fe in tsʼaamaj tiʼ u Paal Diosoʼ, máax tu yaabilten yéetel tu kʼubaj u kuxtal tin woʼolal» (Galaciailoʼob 2:20). Pabloeʼ, kex tsʼokaʼaniliʼ u kíimil Jesús le ka tu beetuba cristianoileʼ, tu yuʼubaj bey jach tiʼ letiʼ tsʼaʼab junpʼéel siibal tumen Dioseʼ.

Le u kuxtal Jesús tu kʼuboʼ junpʼéel siibal tu tsʼáaj Dios xan tiʼ teech. Leloʼ ku yeʼesik bukaʼaj u yaabiltmech, «ku tsʼáaik[tech] junpʼéel nojoch esperanza» yéetel ku ‹muʼukʼaʼankúuntik a wóol› (2 Tesalonicailoʼob 2:16, 17).

Baʼaleʼ wa tsʼoʼok u máan óoliʼ dos mil jaʼaboʼob u kʼub u kuxtal Jesuseʼ, ¿bix jeʼel a wojéeltik wa láayliʼ taak u yáantkech Dioseʼ?