LE BAʼAXOʼOB kaxtaʼab marzo tiʼ 1961, maas tiʼ cuatrocientos nuʼukuloʼob toʼanoʼob yéetel junpʼéel póop (petate), taʼakaʼan tu yáam junpʼéel tuunich. Óoliʼ tuláakal le baʼaloʼobaʼ beetaʼanoʼob yéetel cobre. Yaan coronaʼobiʼ, xóolteʼob, u nuʼukuliloʼob meyaj yéetel u nuʼukuliloʼob baʼateʼel. Utiaʼal le máaxoʼob xokik le Bibliaoʼ le baʼaxoʼob kaxtaʼaboʼ kʼaʼanaʼan, tumen Génesis 4:22, ku tʼaan yoʼolal Tubal-caín, juntúul máak «ku beetik kaʼach nuʼukuloʼob [de] bronce». *

Le tesoroaʼ maʼ jach ojéelaʼan tuʼux u taal yéetel bix kʼuchik teʼeloʼ. Baʼaleʼ ku yeʼesikeʼ desde úuchjeakil suuk u jóoʼsaʼal yéetel u meyajtaʼal cobre teʼ kaajoʼob ku yaʼalal teʼ Bibliaoʼ.

Le taʼaytak u yokol le israelitaʼob teʼ Luʼum Aʼalaʼan u Tsʼaʼabaltiʼoboʼ, aʼalaʼabtiʼob tumen Moisés: «Tiʼ u witsiloʼobeʼ yaan [a] jóoʼskeʼex cobre» (Deuteronomio 8:7-9). Tu luʼumil Israel yéetel Jordaniaeʼ le arqueologoʼoboʼ tsʼoʼok u kaxtikoʼob úuchben kúuchiloʼob tuʼux ku jóoʼsaʼal yéetel ku yiʼibil metaloʼob, jeʼex teʼ Feinan, Timna, yéetel Khirbat en-Nahasoʼ. ¿Baʼax tu yiloʼobiʼ?

Teʼ Feinan yéetel Timnaoʼ tuláakal tuʼux yaan jooloʼob bey nukuch jaltunoʼob tuʼux meyajtaʼab le cobre tu yáamil kex 2,000 jaʼaboʼoboʼ. Teʼ kúuchiloʼobaʼ tak bejlaʼa kʼiʼitpajaʼan u xéexetʼal tuunich jóojom yaʼaxtak yoʼolal le cobre yaan ichiloʼ. Le úuchben mineroʼoboʼ yéetel nuʼukuloʼob de tuunich ku jóoʼskoʼob kaʼach le cobre chíikaʼan yóoʼkabiloʼ. Ka máan kʼiineʼ joʼop u chʼaʼakal le tuunich yéetel nuʼukuloʼob de metal tak ka beetaʼab taamkach chʼeʼenoʼob yéetel tuneloʼob. U libroil Job yaan teʼ Bibliaoʼ ku tsolik bix le meyaj kaʼach teʼ úuchben minaʼoboʼ (Job 28:2-11). Jach kaʼanaʼantsil le meyajaʼ. Le oʼolal teʼ siglo 3 tak 5 tsʼoʼokok u taal Cristooʼ, u autoridadiloʼob Romaeʼ tu beetoʼob u meyaj le kʼasaʼan máakoʼob tu minail Feinan tuʼux ku jóoʼsaʼal cobreoʼ.

Teʼ Khirbat en-Nahasoʼ (u kʼáat u yaʼal «U Ruinasil Cobre») yaʼab u xiixel tuunich nikkúuntaʼaniʼ. Lelaʼ ku yeʼesik bukaʼaj úuchik u sen meyajtaʼal le cobre teʼeloʼ. Ku tuklaʼaleʼ le tuunichoʼoboʼ tiʼ ku jóoʼsaʼal kaʼach tu minailoʼob Feinan  yéetel Timna yanoʼob naatsʼoʼ. Utiaʼal u chʼaʼabal u cobreil le tuunichoʼ ku yustaʼal le chúuk tak ken náakak 1,200°C (grados Celsius) u chokoil tu yáamil kex ocho wa diez horaʼoboʼ. U suukileʼ tiʼ 5 kilos tuunicheʼ ku jóoʼsaʼal tak junpʼéel kilo cobre utiaʼal u beetaʼal jejeláas baʼaloʼobiʼ.

Teʼ tu Witsil Sinaíoʼ, Jéeobaeʼ tu yaʼalaj ka meyajnak le cobre yaan teʼ luʼumoʼ utiaʼal u beetaʼal le tabernaculooʼ. Ka máan kʼiineʼ le meyajnaj xan utiaʼal u beetaʼal u temploil Jerusalén (Éxodo capítulo 27). Maʼ xaaneʼ le israelitaʼoboʼ tu kanaj u meyajtoʼob metal táanil tiʼ u binoʼob Egipto, wa le tiaʼanoʼob teʼeloʼ. ¿Bix k-ojéeltik? Tumen le maʼ úuch jóokʼkoʼob Egiptooʼ páajchaj u patkoʼob juntúul chan wakax de oro, yéetel u beetkoʼob yaʼab nuʼukuloʼob de cobre utiaʼal meyaj teʼ tabernáculooʼ, jeʼex le nojoch káatoʼ, sartenoʼob, palaʼob yéetel trinchanteʼob (Éxodo 32:4).

Le táan xan u máan le israelitaʼob teʼ desiertooʼ, maʼ xaaneʼ naatsʼ tiʼ u kaajil Punón tuʼux yaan yaʼab cobreeʼ (ku tuklaʼaleʼ Feinan bejlaʼeʼ), joʼopʼ u tutukchiʼob yoʼolal le maná yéetel le jaʼoʼ. Yoʼolal leloʼ Jéeobaeʼ tu túuxtaj chiʼibal kaanoʼob ichiloʼob, ka kíim yaʼab máakoʼob. Le ka tu kʼexaj u tuukul le israelitaʼoboʼ, Moiseseʼ kʼáat óolnaj tu yoʼolaloʼob; Jéeoba túuneʼ tu yaʼalaj ka u beet juntúul kaan de cobre (wa de bronce) yéetel ka u tsʼáa yóokʼol junpʼéel cheʼ. Le Bibliaoʼ ku yaʼalik: «Wa máax ku chiʼibil tumen juntúul kaaneʼ, chéen pʼel u paktik le kaan bronce u kaʼajoʼ ku yutstal» (Números 21:4-10; 33:43).

Rey Salomoneʼ tu beetaj yaʼab nuʼukuloʼob de cobre utiaʼal u temploil Jerusalén. Yaʼab tiʼ le cobre meyajnajoʼ David u taata tok tiʼ le sirioʼoboʼ (1 Crónicas 18:6-8). Le «nojoch chulub» beetaʼan de cobreoʼ —junpʼéel nuxiʼ káat ku meyaj utiaʼal u pʼoʼik u kʼab yéetel u yook le sacerdoteʼoboʼ— ku páajtal u bisik kaʼach kex 66,000 litros, yéetel kex 30 toneladas u aalil (1 Reyes 7:23-26, 44-46). Le nukuch columnaʼob de cobre yaan tu yookbal le templooʼ jóojochiloʼob, baʼaleʼ 7.5 centímetros u piimil u cobreil. U polkiloʼobeʼ 1.7 metros, u kaʼanliloʼobeʼ 8 metros, yéetel le capitel yaan tu pʼíichoʼobeʼ kex 2 metros (1 Reyes 7:15, 16; 2 Crónicas 4:17). ¡Bukaʼaj cobre wal meyajnaj chéen utiaʼal u beetaʼal le baʼaloʼobaʼ!

Le cobreoʼ jejeláas bix meyajnajik úuchjeakil. Le Bibliaoʼ ku tʼaan tiʼ nuʼukul baʼateloʼob, cadenaʼob, nuʼukul paaxoʼob yéetel joonajoʼob beetaʼan yéetel cobre (1 Samuel 17:5, 6; 2 Reyes 25:7; 1 Crónicas 15:19; Salmo 107:16). Jesuseʼ tʼaanaj tiʼ le taakʼin de «cobre» ku bisik máak tu bolsail u kʼaxnakʼoʼ. Apóstol Pablo xaneʼ tʼaanaj tiʼ «Alejandro le máax ku meyajtik cobreoʼ» (Mateo 10:9; 2 Timoteo 4:14).

Yaʼab baʼaloʼob láayliʼ maʼ ojéelaʼan tumen le arqueologoʼob yéetel le historiadoroʼob yoʼolal le baʼaloʼob de cobre ku yaʼalik le Bibliaoʼ bey xan yoʼolal u tesoroil Nahal Mishmar. Jeʼel bixakeʼ, le Bibliaoʼ ku yaʼalikeʼ jach tu jaajil junpʼéel «maʼalob luʼum» tsʼaʼab tiʼ le israelitaʼoboʼ, yéetel tiʼ u witsiloʼobeʼ yaʼab cobre tu jóoʼsoʼobiʼ (Deuteronomio 8:7-9).