Tu libroil Genesiseʼ le Bibliaoʼ ku yaʼalik bix káajik tuláakal baʼal: «Tu yáax chuuneʼ [Dioseʼ] tu beetaj kaʼanoʼob yéetel luʼum» (Génesis 1:1). Dioseʼ le ka tsʼoʼok u beetik cheʼob yéetel baʼalcheʼobeʼ tu beetaj xan Adán yéetel Eva, le yáax wíinikoʼoboʼ. Letiʼobeʼ maʼ jeʼex baʼalcheʼobeʼ tumen tsʼaʼab u páajtalil u yeʼeskoʼob u jatsʼuts modos Dios yéetel u chʼaʼtuklikoʼob baʼax ken u beetoʼob. Le oʼolal kʼáataʼab cuenta tiʼob. Wa ka u yuʼuboʼob u tʼaan Dioseʼ jeʼel u kuxtaloʼob kaʼach ich jeetsʼelil yéetel u paalaloʼob utiaʼal mantatsʼ x-maʼ kʼebanil, jeʼex u tukultmil Dios desde tu káajbaloʼ.

Baʼaleʼ juntúul angeleʼ tu tusaj wíinikoʼobeʼ ka kʼuch kʼaabaʼtbil Satanás, u kʼáat u yaʼaleʼ «máax ku tsʼáaikuba tu contra uláakʼ». Tiʼ Satanaseʼ meyajnaj juntúul kaan utiaʼal u tusik Eva. Tu yaʼalajtiʼeʼ maas jeʼel u bin utsil tiʼ wa ka u nuʼuktuba tu juunaleʼ. Adán yéetel Evaeʼ tu creertoʼob le baʼax tu yaʼalaj Satanasoʼ ka tu náachkuntubaʼob tiʼ le Máax beetmiloʼoboʼ. Úuchik u beetkoʼob beyaʼ luʼsaʼab u páajtalil u kuxtaloʼob minaʼan u xuul ka tu máansoʼob le kʼeban yéetel le kíimil tiʼ u paalaloʼoboʼ.

Dioseʼ tu séebaʼanil tu yaʼalaj yaan u yutskíintik le baʼax úuchoʼ yéetel yaan u yáantik u paalal Adán utiaʼal u kuxtaloʼob minaʼan u xuul. Dioseʼ tu yaʼaleʼ junpʼéel «chʼiʼibal» —juntúul wíinikeʼ— yaan u xuʼulsik Satanás bey xan le muʼyajil tu taasaj Satanás, Adán yéetel Evaoʼ (Génesis 3:15). ¿Máax le «chʼiʼibal» aʼalaʼaboʼ? Ka máan kʼiineʼ chíikpaji.

Baʼaleʼ táanil tiʼ u chíikpajleʼ Satanaseʼ tu yilaj u kʼaskúuntik baʼax u tukultmaj u beetik Dios. Le kʼeban yéetel le kʼasaʼaniloʼ tu séebaʼanil kʼiʼitpajoʼob. Dioseʼ tu chʼaʼtuklaj u taasik junpʼéel Búulkabal utiaʼal u xuʼulsik le kʼasaʼaniloʼ. Letiʼeʼ tu yaʼalaj tiʼ Noé, juntúul máak toj u kuxtal, ka u beet junpʼéel nojoch caja wa arca utiaʼal u salvarkuba letiʼ, u láakʼtsiloʼob bey xan le baʼalcheʼob aʼalaʼabtiʼ ka u yoksoʼob ichiloʼ.

Junpʼéel jaʼab tsʼoʼokok le Búulkabaloʼ, Noé yéetel u láakʼtsiloʼobeʼ jóokʼoʼob tiʼ junpʼéel yóokʼol kaab limpio. Baʼaleʼ le «chʼiʼibaloʼ» láayliʼ maʼ kʼuchuk kaʼacheʼ.

(Jóoʼsaʼan tiʼ Génesis 1-11; Judas 6, 14, 15; Apocalipsis 12:9.)