Le tsolnuʼuk ku tsʼáaik le Biblia yoʼolal le familiaoʼ jach ku yáantaj, tumen Jéeoba, le Dios beet u tsʼíibtaʼal le Bibliaoʼ, letiʼ káajs xan le tsʼoʼokol beeloʼ. Le Bibliaoʼ ku yaʼalik baʼax modosil unaj u yantaltoʼon, yéetel baʼax modosil jeʼel u kʼaskúuntik le familiaoʼ. Ku kaʼansik xan bix unaj u tʼankuba máak yéetel u núup utiaʼal ka yanak kiʼimak óolal tiʼob. (Xok Colosasiloʼob 3:8-10, 12-14.)

Máakeʼ unaj u yeʼesik tsiikil tiʼ u núup. Wa le atantsil yéetel íichamtsil ku yuʼubikoʼob u tʼaan Dioseʼ jeʼel u kiʼimaktal u yóoloʼobeʼ. (Xok Colosasiloʼob 3:18, 19.)

Le yaabilajoʼ ku yáantik máak utiaʼal maʼ u pʼatik u núup. Dioseʼ ku kaʼansik bix unaj k-yaabiltikba. Dios yéetel u Paaleʼ jach maʼalob bix tu yeʼesiloʼob le yaabilaj unaj u yantal t-baatsiloʼ. (Xok 1 Juan 4:7, 8, 19.)

Wa íichamtsil yéetel atantsil ku naʼatkoʼob Dios káajs le tsʼoʼokol beeloʼ yaan u yilik maʼ u pʼatkubaʼob. Dioseʼ le ka tu tsʼoʼoksaj u beel le yáax xiib yéetel le yáax koʼoleloʼ tu beetaj utiaʼal mantatsʼ. Máakeʼ jeʼel u páajtal u pʼáatal mantatsʼ yéetel u núupeʼ, tumen le xiib yéetel le koʼoleloʼ beetaʼanoʼob utiaʼal u paklan áantkubaʼob yéetel u paklan kanáantkubaʼob. Dioseʼ tu beetoʼob jeʼex letiʼeʼ: yéetel u páajtalil u yaabilajoʼob. (Xok Génesis 1:27; 2:18, 24.)