¿Ka creertik wa yaan Dios? Wa beyoʼ, ¿bix jeʼel a weʼesik wa jaaj yaneʼ? U jaajileʼ yaʼab baʼaloʼob eʼesik yaan Máax beet tuláakal baʼal. Chíikaʼan u yilaʼaleʼ yaan u naʼat, u páajtalil yéetel u yaabilaj. ¿Máakalmáak le baʼaloʼobaʼ, yéetel bix u yáantkoʼon k-creert Dios? Utiaʼal k-ojéeltikeʼ koʼox ilik baʼax tu tsʼíibtaj apóstol Pablo tiʼ le cristianoʼob yanoʼob kaʼach Romaoʼ.

Pabloeʼ tu yaʼalaj: «U jatsʼuts modos Dios maʼ tu páajtal u yilaʼaloʼ, chíikaʼan u yilaʼal desde ka beetaʼab yóokʼol kaab, tumen yoʼolal le baʼaxoʼob u beetmoʼ jeʼel u páajtal u tsʼaʼabal cuentaeʼ, le páajtalil yaantiʼoʼ minaʼan u xuul, tsʼoʼoleʼ le baʼaloʼobaʼ ku yeʼeskoʼob letiʼ u jaajil Dios; le oʼolal maʼ tu páajtal u yaʼalaʼal wa maʼ jaajtakoʼobiʼ» (Romailoʼob 1:20). Jeʼex tu yaʼalil Pabloeʼ jeʼel u páajtal u yaʼalaʼaleʼ Dioseʼ tu tsʼáaj u firma tiʼ le baʼaxoʼob tu beetoʼ. Koʼox ilik baʼaxten.

Pabloeʼ tu yaʼaleʼ «desde ka beetaʼab yóokʼol kaa[beʼ]» ku páajtal u yilaʼal u jatsʼuts modos Dios. Le tʼaan griego ku suʼutul «yóokʼol kaab» teʼelaʼ maʼ letiʼe Luʼumoʼ, letiʼe máakoʼoboʼ. * Pablo túuneʼ táan u yaʼalikeʼ desde le ka beetaʼab le yáax máakoʼoboʼ páajchaj u yilkoʼob u jatsʼuts modos Dios tiʼ le baʼax u beetmoʼ.

U jatsʼuts modos Dioseʼ «chíikaʼan u yilaʼal» tiʼ tuláakal le baʼaxoʼob baʼpachmiloʼonoʼ, maʼ taʼakaʼanoʼobiʼ. Kex nuuktak wa kex mejentakeʼ maʼ chéen ku yeʼeskoʼob yanchaj Máax beetmiloʼobiʼ baʼaxeʼ ku chíikbeskoʼob xan le jatsʼuts modos yaantiʼoʼ. Le bix beetaʼaniloʼoboʼ ¿máasaʼ ku yeʼesik le naʼat yaan tiʼ Diosoʼ? Le yaʼabkach estrellaʼob yéetel u olasil le kʼáaʼnáaboʼ ¿máasaʼ ku yeʼesik u páajtalil Dios? ¿Máasaʼ le kiʼikiʼ janaloʼob yéetel u jóokʼbal bey xan u tʼúubul le kʼiinoʼ ku yeʼesikeʼ Dioseʼ jach u yaabiltmaj wíinik? (Salmo 104:24; Isaías 40:26).

Tuláakal le baʼaloʼobaʼ jach tu jaajil ku yeʼesik yaan Dios, le oʼolal «maʼ tu páajtal u yaʼalaʼal wa maʼ jaajtakoʼobiʼ», mix tumen le máaxoʼob maʼatech u creertikoʼob Diosoʼ. Juntúul máakeʼ bey tu tsolilaʼ: Tukulteʼ juntúul máak táan u manejareʼ ku yilik junpʼéel letrero ku yaʼalik «Tséelkech ta x-tsʼíik», baʼaleʼ maʼ tu chʼaʼik en cuenta. Ku jeʼelsaʼal túun tumen juntúul policíaeʼ ku multartaʼal. Le máakoʼ ku káajal u yaʼalikeʼ maʼ tu yilaj le letrerooʼ. Baʼaleʼ le policíaoʼ maʼ tu creertik, tumen le letrerooʼ chíikaʼan u yilaʼal, yéetel maʼalob u paakat le máakoʼ. Tsʼoʼoleʼ le máax ku manejaroʼ kʼaʼabéet u yilik le letreroʼoboʼ. Bey xan u yúuchul yéetel le baʼaxoʼob eʼesik yaan Diosoʼ. Le «letrero», wa le baʼaxoʼob u beetmoʼ, mix máak jeʼel u páajtal u yaʼalik wa maʼ chíikaʼaneʼ.

Le baʼaxoʼob yanoʼoboʼ ku kaʼansiktoʼon yaʼab baʼaloʼob yoʼolal le Máax beetmiloʼoboʼ. Baʼaleʼ le Bibliaoʼ ku kaʼansiktoʼon uláakʼ baʼaloʼob jeʼex lelaʼ: ¿Baʼax u tukultmaj Dios utiaʼal le Luʼum bey xan utiaʼal le máakoʼoboʼ? K-ojéeltik u núukil le kʼáatchiʼaʼ yaan u yáantkoʼon k-maas natsʼikba tiʼ Jéeoba, le Dios «chíikaʼan u yilaʼal» u jatsʼuts modos tiʼ tuláakal baʼax baʼpachmiloʼonoʼ.