TIʼ U YÁAX TÁAN JUʼUNIL: ¿KʼASAʼAN WA DIOS?
¿Baʼaxten yaan máax aʼalik kʼasaʼan Dios?
¿JACH wa jaaj yaan máax tuklik kʼasaʼan Dios? U jaajileʼ yaan máaxoʼob tuklikeʼ míin kʼasaʼan Dios; uláakʼoʼobeʼ juntaatsʼ u yaʼalikoʼob kʼasaʼan. ¿Baʼaxten bey u tuukuloʼoboʼ?
Le máaxoʼob tsʼoʼok u muʼyajoʼob yoʼolal le nukuch loobiloʼoboʼ ku yaʼalikoʼob: «¿Baʼaxten ku chaʼik Dios u yúuchul le baʼaloʼobaʼ? ¿Maʼ wa tu yilik baʼax ku yúuchul? ¿Kʼasaʼan wa?».
Uláakʼoʼobeʼ ku chiʼichnaktaloʼob ken u xokoʼob jujunpʼéel baʼaxoʼob ku yaʼalik le Bibliaoʼ. Óoliʼ jeʼex ken u xokoʼob yoʼolal le Búulkabal anchaj tu kʼiinil Noeoʼ, ku yaʼalikoʼob: «Wa Dios u yaabiltmaj wíinikeʼ ¿baʼaxten tu kíimsaj yaʼabkach máakoʼob? ¿Kʼasaʼan wa?».
Techeʼ ¿tuukulnajaʼanech wa tiʼ le kʼáatchiʼobaʼ? Wa ka kʼáataʼaktech tumen wa máax wa kʼasaʼan Dioseʼ ¿baʼax jeʼel a núukikeʼ? Koʼox ilik junpʼéel kʼáatchiʼ jach jeʼel u yáantkoʼoneʼ.
¿BAʼAXTEN K-PʼEKMAJ LE KʼASAʼANILOʼ?
Toʼoneʼ k-pʼekmaj le kʼasaʼaniloʼ tumen tsʼaʼantoʼon u páajtalil k-naʼatik baʼax uts yéetel baʼax kʼaas. Maʼ beyoʼon baʼalcheʼeʼ. Dioseʼ tu beetoʼon «jeʼel bix letiʼeʼ» (Génesis 1:27). ¿Baʼax u kʼáat u yaʼal leloʼ? U kʼáat u yaʼaleʼ tu tsʼáajtoʼon u páajtalil k-eʼesik u jatsʼuts modos, jeʼex le justiciaoʼ. Tukult lelaʼ: wa Dios tsʼáatoʼon u páajtalil k-pʼektik le kʼasaʼaniloʼ, ¿maʼ wa túun ku yeʼesikeʼ Dioseʼ u pʼekmaj xan?
Le Bibliaoʼ bey u yeʼesikoʼ. Teʼeloʼ Dioseʼ ku yaʼalik: «In tuukuloʼob yéetel baʼaxoʼob kin beetkeʼ, [maas] kaʼanaltakoʼob tiʼ le a tiaʼaleʼexoʼ» (Isaías 55:9). Bey túunoʼ wa k-aʼalik kʼasaʼan Dioseʼ, ¿maʼ wa táan k-taasikba maas utsoʼon tiʼ letiʼiʼ? Táanil tiʼ leloʼ maas maʼalob ka k-il wa yaan baʼaxoʼob eʼesik wa jach tu jaajil kʼasaʼan. Tsʼoʼoleʼ tu lugar k-tuklik wa kʼasaʼan Dioseʼ maas maʼalob ka k-naʼat baʼaxten ku yilaʼal bey kʼaas jujunpʼéel baʼaxoʼob ku beetkeʼ. Utiaʼal leloʼ koʼox ilik jach baʼax u kʼáat u yaʼal «kʼasaʼan».
Ken k-aʼal kʼasaʼan wa máaxeʼ táan k-aʼalikeʼ kʼaas u tuukul. Juntúul máak kʼasaʼaneʼ kiʼimak u yóol u yilik u muʼyaj u maasil, wa chéen ku yilik. Juntúul taatatsil ku castigartik u paal chéen tumen uts tu tʼaan u beetik u muʼyajeʼ kʼasaʼan. Baʼaleʼ juntúul taatatsil ku castigartik u paal tumen u kʼáat u kaʼans yéetel u kanáanteʼ uts. Baʼaleʼ wa maʼ k-ojel baʼaxten juntúul máakeʼ ku beetik wa baʼaxeʼ jeʼel k-tuklik chéen kʼasaʼaneʼ. Maʼ xaaneʼ tak tiʼ teech tsʼoʼok u yúuchul beyoʼ.
Koʼox ilik kaʼapʼéel baʼax beetik u tuklaʼal kʼasaʼan Dios: le nukuch loobiloʼob ku yúuchul bejlaʼoʼ yéetel le castigoʼob ku yaʼalik le Biblia tu taasaj Diosoʼ. Le kaʼapʼéel baʼaloʼobaʼ ¿jach wa tu jaajil ku yeʼeskoʼob kʼasaʼan Dios?
