Maʼalob péektsil utiaʼal le óotsiloʼoboʼ

LE Bibliaoʼ ku yaʼalik: «Maʼ láaj kʼiin ku tuʼubsaʼal le óotsiloʼoboʼ» (Salmo 9:18). Tsʼoʼoleʼ ku yaʼalik yoʼolal Dios: «Ka jeʼik a kʼabeʼ, yéetel maʼalob óolaleʼ ka naʼajkúunsik tuláakal le kuxaʼan baʼaloʼoboʼ» (Salmo 145:16). Le baʼax ku yaʼalik le Bibliaaʼ jach yaan u béeytal. Le Dios yaan tuláakal páajtalil tiʼoʼ yaan u xuʼulsik le óotsililoʼ. ¿Baʼax túun kʼaʼabéet utiaʼal u xuʼulsaʼal le óotsililoʼ?

Juntúul koʼolel africail u xokmaj bix jeʼel u meyaj maʼalob le taakʼinoʼ, tu yaʼaleʼ junpʼéel baʼax jeʼel u yáantik le luʼumoʼob óotsiloʼoboʼ, letiʼe ka yanak juntúul gobernante jach yaan u páajtalil ka u yaʼal bix kun beetbil tuláakal baʼaloʼ, baʼaleʼ ka u yeʼes xan utsil. Le óotsililoʼ ku yantal tumen le jejeláas gobiernoʼob yaan teʼ yóokʼol kaabaʼ maʼatech u paklan áantikubaʼob, le oʼolal kʼaʼabéet chéen juntúul máax ka u gobernart tuláakal le Luʼumaʼ. Tsʼoʼoleʼ utiaʼal u luʼsik le óotsililoʼ le gobernanteaʼ kʼaʼabéet u yojel baʼax jeʼel u beetik utiaʼal u xuʼulul u kaxtik máak chéen u yutsileʼ. ¿Yaan wa juntúul gobernante jeʼel u páajtal u beetik le baʼax tsʼoʼok k-aʼalikaʼ?

Dioseʼ tu túuxtaj u Hijo utiaʼal u tsʼáaik u yojéelt le óotsiloʼob baʼax kun beetbil tu yoʼolaloʼoboʼ. Jesuseʼ tu tsʼáaj ojéeltbil baʼax túuxtaʼab u beet le ka tu chʼaʼchiʼitaj le baʼax ku yaʼalik le Bibliaaʼ: «U [espíritu] Yuumtsileʼ tiʼ yaan tin wóokʼoleʼ, tumen u junpáaykunsmajen utiaʼal in tsʼáa maʼalob péektsil tiʼ le óotsiloʼoboʼ» (Lucas 4:16-18).

¿Máakalmáak le maʼalob péektsiloʼoboʼ?

Dioseʼ tsʼoʼok u tsʼáaik u Hijo utiaʼal u beet u Reyil, leloʼ junpʼéel baʼax jach maʼalob. Jesuseʼ juntúul maʼalob gobernante tumen: 1) yaan u páajtalil u gobernartik tuláakal wíinik; 2) ku chʼaʼik óotsilil tiʼ le máaxoʼob óotsiloʼoboʼ yéetel ku kaʼansik tiʼ u disipuloʼob ka u yil u yáantkoʼob, yéetel 3) jeʼel u páajtal u xuʼulsik u tuukul máak chéen tiʼ u kaxtik u yutsileʼ. Koʼox xakʼaltik le óoxpʼéel baʼaloʼobaʼ.

1. Le páajtalil yaan tiʼ Jesús utiaʼal u gobernart tuláakal wíinikoʼ Le Bibliaoʼ ku yaʼalikeʼ tsʼaʼab tiʼ Jesús «gobernación [...] utiaʼal ka meyajtaʼak tumen tuláakal kaajoʼob, múuchʼ luʼumiloʼob yéetel tʼaaniloʼob» (Daniel 7:14, NM). ¡Chéen tukult bukaʼaj utsiloʼob jeʼel u taasik wa ka yanak chéen juntúuliliʼ gobernanteeʼ! Yaan u xuʼulul u baʼateltaʼal tumen le gobiernoʼob le baʼaxoʼob yaan teʼ yóokʼol kaabaʼ, yéetel lelaʼ yaan u taasik utsil tiʼ tuláakal máak. Jesuseʼ tu yaʼaleʼ yaan u beetik u gobernanteil tiʼ tuláakal le luʼumaʼ yéetel yaan u béeykuntik baʼax ku yaʼalik, letiʼeʼ tu yaʼalaj: «Tiʼ teen tsʼaʼan tuláakal páajtalil kaʼan yéetel luʼum» (Mateo 28:18).

2. Tu chʼaʼaj óotsilil Le ka taal Jesús way Luʼumeʼ tu chʼaʼaj óotsilil tiʼ le máaxoʼob óotsiloʼoboʼ. Jeʼex juntéenjeakeʼ juntúul koʼolel tsʼoʼok u xupik yaʼab taakʼin yiknal doctor utiaʼal u tsʼaʼakleʼ, tu machaj u nookʼ Jesús utiaʼal u yutstal. Tsʼoʼok doce jaʼaboʼob joʼopʼok u tuul kʼiʼikʼ tiʼ yéetel yaan anemia tiʼ. Le Ley tsʼaʼab tiʼ Moisesoʼ ku yaʼalikeʼ le máax ku maʼachal tumen juntúul máax kʼojaʼan beyaʼ, ku pʼáatal maʼ limpioiʼ yéetel maʼ tu páajtal u meyajtik Dios. Baʼaleʼ Jesuseʼ tu yeʼesaj u yutsil tiʼ le koʼolelaʼ, yéetel tu yaʼalajtiʼ: «Koʼolel, tsʼoʼok u tojtal a wóol tumen oksaj óolnajech. Xeen tiʼ jeetsʼel yéetel pʼáatak toj a wóol tiʼ a kʼojaʼanil» (Marcos 5:25-34).

Le baʼaxoʼob tu kaʼansaj Jesusoʼ yaan u páajtalil u kʼexik u tuukul le máakoʼob utiaʼal ka u chʼaʼob óotsililoʼ. Tuukulnen tiʼ baʼax tu yaʼalaj Jesús tiʼ juntúul máak tu kʼáataj baʼax unaj u beetaʼal utiaʼal u kiʼimakkúuntaʼal u yóol Dios. Le máakaʼ u yojel kaʼach kʼaʼabéet u yaabiltik u yéet máakil, kex beyoʼ tu kʼáataj tiʼ Jesús tiʼ máax unaj u yeʼesik yaabilaj.

 Utiaʼal u núukik tiʼeʼ Jesuseʼ tu tsikbaltaj u kettʼaanil le samaritano tu yáantaj juntúul máak okoltaʼab yéetel «pʼaʼat kʼas kimen» le táan u bin Jericooʼ. Le ka máan juntúul sacerdote teʼ bej tuʼux yaan le máakoʼ, tu tséelteʼ ka bin táanxel tuʼux, bey xan tu beetil juntúul levitaoʼ. «Baʼaleʼ juntúul Samariail ku máan xan teʼ bejoʼ, le ka tu yilajeʼ tu chʼaʼaj óotsilil tiʼ.» Tu choʼaj le tuʼuxoʼob beetaʼab loob tiʼoʼ, ka tu bisaj kanáantbil tiʼ junpʼéel u najil uʼulaboʼob. Jesuseʼ tu kʼáataj tiʼ le máakoʼ: ¿Máakalmáak tiʼ le óoxtúul máakoʼob tu yeʼesaj u yaabilaj tiʼ le máax lúub tu kʼab le j-ookoloʼoboʼ? Le máakoʼ tu núukaj túun tiʼ: «Le máax tu chʼaʼaj óotsilil tiʼeʼ». Jesuseʼ tu yaʼalajtiʼ: «Xeen, beet teech xan beyoʼ» (Lucas 10:25-37).

Le máaxoʼob ku beetkubaʼob u j-jaajkunajoʼob Jéeobaoʼ (testigos de Jehová), ken u kanoʼob baʼax tu kaʼansaj Jesuseʼ ku yilik u yáantkoʼob le máaxoʼob kʼaʼabéet áantaj tiʼoboʼ. Juntúul koʼolel letoniail, tu tsʼíibtaj junpʼéel libro ku tʼaan tiʼ le koʼoleloʼob kʼaloʼob cárcel teʼ Unión Soviéticaoʼ (Women in Soviet Prisons), le ka tʼaanaj tiʼ bix tsaʼayik junpʼéel kʼojaʼanil tiʼ le táan u meyaj tu carcelil Potma tu jaʼabiloʼob mil novecientos sesentaoʼ, tu yaʼalaj: «Le ka kʼojaʼanchajenoʼ [le koʼoleloʼob j-Jaajkunajoʼoboʼ] jach tu yáantenoʼob utiaʼal in wutstal. Mix máak jeʼel u kanáantken jeʼex tu beetiloʼoboʼ». Tsʼoʼoleʼ tu yaʼalaj xan: «U j-jaajkunajoʼob Jéeobaeʼ jach kʼaʼanaʼan u yilik u yáantkoʼob u maasil, kex yaanal u religión wa u raza».

Le ka pʼáat jach minaʼan meyaj tiʼ u j-jaajkunajoʼob Jéeoba tu kaajil Anconeʼ (Ecuador), uláakʼ j-Jaajkunajoʼobeʼ tu yiloʼob baʼax jeʼel u beetkoʼob utiaʼal u yáantkoʼobeʼ: tu beetoʼob janal u konoʼob tiʼ le máakoʼob ken suunakoʼob chuk kay de áakʼaboʼ (u fotoil le yaan ta x-noʼojoʼ). Tuláakal le múuchʼulil áantajnajoʼ, tak le mejen paalaloʼ. Láauna u sáastal tu káajal u máakʼantkoʼob le janal utiaʼal u listotal ken suunak le j-chuk kayoʼob las cuatro u sáastaloʼ. U tojol le janal koʼonoʼ tʼoʼox tiʼ cada juntúul jeʼel bix kʼaʼabéet tiʼeʼ.

Lelaʼ ku yeʼesikeʼ le baʼaxoʼob tu beetaj yéetel tu kaʼansaj Jesusoʼ jeʼel u beetik u kʼexik u tuukul yaʼab máakoʼob utiaʼal ka u yáantoʼob le óotsiloʼoboʼ.

3. Le páajtalil yaan tiʼ Jesús utiaʼal u kʼexik u tuukul wíinikoʼ Teʼ yóokʼol kaabaʼ tsʼoʼok u yilaʼaleʼ yaʼab máakoʼob chéen ku kaxtik u yutsiloʼob. Le Bibliaoʼ ku yaʼalikeʼ lelaʼ junpʼéel kʼeban. Tak le apóstol Pablooʼ tu yaʼalaj: «Bey túunoʼ ku yúuchulten lelaʼ: le ken in wóolt in beet le utsoʼ, chéen kin wilik tiʼ teen le kʼaasoʼ». Tsʼoʼoleʼ tu yaʼalaj: «¿Máax tokiken tiʼ le wíinklil ku bisiken tiʼ le kíimiloʼ? Chéen Yuum Jajal Dios, tu yoʼolal k-Yuumtsil Jesucristo» (Romailoʼob 7:21-25). Teʼelaʼ Pabloeʼ tu tsʼáaj naʼatbileʼ Dioseʼ yéetel u yáantaj Jesuseʼ, yaan u salvartik tiʼ le kʼeban le máaxoʼob meyajtikoʼ. Junpʼéel tiʼ le baʼax ken u luʼsoʼ letiʼe u kaxtik máak chéen u yutsiloʼ. ¿Bix kun béeytal lelaʼ?

Juan Bautistaeʼ le ka tsʼoʼok u tsʼáaik u yokjaʼ Jesuseʼ, tu yaʼalaj: «Ileʼex, lelaʼ u taman Jajal Dios, máax ku lukʼesik u kʼeban yóokʼol kaab» (Juan 1:29). Maʼ kun xáantaleʼ tiʼ tuláakal le Luʼumaʼ chéen yaan u kajtal le máaxoʼob kun luʼsbil u kʼebanoʼoboʼ, ken úuchuk lelaʼ mix máak ken u kaxt chéen u yutsil (Isaías 11:9). Bey ken u luʼs Jesús le óotsililoʼ.

¿Máasaʼ jach ku taasiktoʼon kiʼimak óolal k-ojéeltik yaan u kʼuchul u kʼiinil u yantaltoʼon tuláakal baʼax kʼaʼabéet? Le Bibliaoʼ ku yaʼalik: «Tuláakaloʼob bíin kajlakoʼob x-maʼ sajakil, tuláakaloʼob bíin páatak u jeʼeleloʼob tu boʼoy u pakʼal uva yéetel tu boʼoy u pakʼal higo» (Miqueas 4:4). Le jatsʼuts tʼaanoʼobaʼ ku yeʼesik bix kun kʼuchul u kʼiinil u yantal meyaj tiʼ máak, u kuxtal máak ich jeetsʼelil yéetel u páajtalil u kuxtal ich kiʼimak óolal tiʼ junpʼéel luʼum tuʼux maʼ kun antal óotsilil, yéetel tuláakal lelaʼ yaan u tsʼáaik nojbeʼenil tiʼ Jéeoba.