Kaʼans a paalaleʼex

Juntúul x-chʼúupal jach yaabiltaʼan

BEJLAʼEʼ yaan in tsikbaltiktech tu yoʼolal juntúul x-chʼúupal jach maʼalob baʼax tu beetaj. Le x-chʼúupalaʼ u hija Jefté. Le Bibliaoʼ maʼatech u yaʼalik bix u kʼaabaʼ baʼaleʼ ku yaʼalik baʼax úuchtiʼ. Koʼox kʼaʼajsik u tsikbalil Jefté yéetel u hija. Ken k-xokeʼ yaan a tsʼáaik cuentaeʼ jach yaabiltaʼan kaʼach tumen Jéeoba Dios yéetel tumen u amigaʼob.

Le tsikbalaʼ tiʼ ku chíikpajal teʼ capítulo 11 tiʼ u libroil Juecesoʼ. Tumen Jefté juntúul máax meyajtik kaʼach Dioseʼ, maʼ xaaneʼ jach ku xokik le Biblia yéetel u hija, jeʼex u yaʼalmaj Jéeoba ka u beet le taatatsiloʼob israelitaʼoboʼ.

Teʼ kʼiinoʼoboʼ, minaʼan juntúul rey nuʼuktik le israelitaʼoboʼ. Baʼaleʼ táan kaʼach u aktáantkoʼob talamiloʼob yéetel kʼaʼabéet juntúul máax nuʼuktikoʼob. Le ammonitaʼob u enemigoʼoboʼ, táan kaʼach u baʼateʼel tu yéeteloʼob. Tumen Jefté jach u yojel baʼateʼel yéetel maʼ saajkeʼ, le israelitaʼoboʼ tu kʼáatoʼob áantaj tiʼ.

Jefteeʼ u kʼáat kaʼach ka áantaʼak tumen Dios teʼ baʼateloʼ, le oʼolal tu beetaj junpʼéel promesa. Tu yaʼalajtiʼeʼ wa ku ganareʼ, yaan u kʼubik le máax kun yáax jóokʼol tu yotoch u kʼam utiaʼal meyajtikoʼ (Jueces 11:30, 31). Le máax ku jóokʼol kaʼachoʼ yaan u bin kajtal teʼ tabernáculo, tuʼux kun bin adorar le máakoʼoboʼ, yéetel tiʼ kun pʼáatal u meyajt Diosiʼ. ¿Tu ganartaj wa Jefté le baʼateloʼ? Tu ganartaj. ¿A wojel wa máax yáax jóokʼ kʼamik? *...

 U hija. Tu káajbaleʼ Jefteeʼ jach yaachaj tu yóol tumen minaʼan uláakʼ u paalal. Baʼaleʼ tsʼoʼok kaʼach u beetik junpʼéel promesa tiʼ Dios yéetel unaj u tsʼoʼokbesik. U hijaeʼ maʼ tu yaʼalaj wa maʼ kun biniʼ. Baʼaxeʼ tu yaʼalaj tiʼ u taata ka u tsʼoʼokbes baʼax u yaʼalmaj u beetkoʼ. Tsʼoʼoleʼ tu kʼáataj permiso tiʼ u taata utiaʼal u bin dos meses teʼ puʼukoʼoboʼ. ¿Baʼaxten? Tumen jach yaachajaʼan u yóol. Yéetel u yojel kaʼacheʼ ken xiʼik teʼ tabernáculooʼ maʼ kun páajtal u tsʼoʼokol u beel mix u yantal u paalal. Maʼ xaaneʼ letiʼeʼ u kʼáat ka yanak u paalal. Baʼaleʼ maas kʼaʼanaʼan u yilik u yuʼubik u tʼaan u taata yéetel u chúukpajal u yóol u meyajt Jéeoba. ¿A tuklikeʼ kiʼimakchaj wa u yóol Jéeoba yéetel Jefté úuchik u beetik lelaʼ?...

Jefteeʼ tu chaʼaj u bin dos meses yéetel u amigaʼob. Le ka suunajeʼ tu túuxtaj teʼ tabernáculo jeʼex u yaʼalmil tiʼ Jéeobaoʼ. Cada jaʼabeʼ u x-chʼúupaliloʼob u kaajil Israeleʼ ku binoʼob u xíimbaltoʼob u hija Jefté teʼ tabernáculo utiaʼal u líiʼskoʼob u yóoloʼ. Le x-chʼúupalaʼ tiʼ tu máansaj u yalab u kʼiiniloʼob u kuxtaliʼ.

¿A kʼaj óol wa uláakʼ mejen paalal ku yuʼubkoʼob u tʼaan u taataʼob yéetel u yaabiltmoʼob Jéeoba?... Jach maʼalob ka a bisaba tu yéeteloʼob. Baʼaleʼ utiaʼal lelaʼ unaj xan a beetik jeʼex u hija Jefteoʼ: unaj a wuʼuyik u tʼaan a taataʼob yéetel u chúukpajal a wóol a meyajt Jéeoba. Beyoʼ a taata yéetel a maamaeʼ yaan u kiʼimaktal u yóoloʼob yéetel jach yaan a yaabiltaʼal tumen Jéeoba.

Xok ta Biblia

Deuteronomio 6:4-6

Jueces 11:30-40

1 Corintoiloʼob 7:37, 38

[Tsolajil]