U tʼaan máak ich jejeláas tʼaanoʼob: ¿tiʼ Dios wa u taal?

DEVONEʼ ku yaʼalik: «Maʼ tin naʼatik, baʼaxten teʼ tin iglesiaoʼ cada semanaeʼ yaʼab máaxoʼob kin wilik ku kʼamkoʼob le espíritu santooʼ yéetel ku káajal u tʼaanoʼob ich jejeláas tʼaanoʼob. Yanoʼobeʼ jach kʼaas bix u kuxtaloʼob. Teneʼ kin wilik in beetik baʼax maʼalob ichil in kuxtal. Tsʼoʼoleʼ kex kin sen orar tiʼ Dios utiaʼal in kʼáatik u espíritu santoeʼ, mix juntéen in kʼame. ¿Baʼaxten ku yúuchulten beyaʼ?».

Láayliʼ xan bey u yúuchul tiʼ Gabriel tu religionoʼ. Letiʼeʼ ku yaʼalik: «Baʼax maas chiʼichnakkúuntkeneʼ tumen ken joʼopʼok in orareʼ, jujuntúul tiʼ le máaxoʼob yanoʼoboʼ ku joʼopʼol u yaawtoʼob tsʼoʼoleʼ mix letiʼob ku naʼatkoʼob baʼax ku yaʼalikoʼob. Bey in wóol mix baʼal u biilal le baʼax ku beetkoʼobaʼ. Wa tiʼ Dios u taaleʼ, ¿máasaʼ unaj u taasik utsiloʼob?».

Le baʼaloʼob ku yúuchlaʼ ku beetik k-tuklik wa tak bejlaʼa ku tsʼáaik Dios le páajtalil tiʼ le máakoʼoboʼ. Utiaʼal k-ilik wa jaajeʼ koʼox ilik bix úuchik u meyaj le páajtalil teʼ yáax siglooʼ.

«Joʼopʼ u tʼaanoʼob ichil jejeláas tʼaanoʼob»

Le Bibliaoʼ ku yaʼalikeʼ úuchjeakileʼ Dioseʼ tu tsʼáaj tiʼ uláakʼ máakoʼob u páajtalil u tʼaanoʼob ich uláakʼ tʼaanoʼob maʼ u yoojloʼob kaʼachiʼ. Lelaʼ yáax úuch teʼ Pentecostés tu jaʼabil 33 tu kaajil Jerusalén, maʼ sen úuch kíimik Cristoiʼ. Teʼ kʼiin jeʼeloʼ ciento veinte u disipuloʼob Jesús «chuʼupoʼob yéetel [espíritu santo], ka joʼopʼ u tʼaanoʼob ichil jejeláas tʼaanoʼob». Le máaxoʼob náach u taaloʼoboʼ jach jaʼakʼ u yóoloʼob le ka tu yuʼuboʼob, «tumen tu jujuntúulileʼ táan u yuʼubikoʼob u yúuchul tʼaan [ichil] le tʼaan síijikoʼoboʼ» (Beetaʼanoʼob [Hechos] 1:15; 2:1-6).

Tsʼoʼoleʼ le Bibliaoʼ ku yaʼalik xaneʼ Dioseʼ tu tsʼáaj tiʼ uláakʼ disipuloʼob le páajtalilaʼ. Juntúul tiʼ letiʼobeʼ Pablo, letiʼeʼ yéetel u yáantaj le espíritu santooʼ béeychaj u tʼaan ich jejeláas tʼaanoʼob (Beetaʼanoʼob 19:6; 1 Corintoiloʼob 12:10, 28; 14:18). Jeʼex k-ilkoʼ wa u espíritu santo Dios tsʼáaik le páajtalilaʼ, yaan utsiloʼob ku taasik. ¿Baʼax oʼolal tsʼaʼab u páajtalil u tʼaan máak ich jejeláas tʼaanoʼob úuchjeak?

Junpʼéel baʼax eʼesik tiʼ Dios u taal

Le ka tsʼíibnaj Pablo tiʼ le corintoiloʼob, tuʼux táakaʼan jujuntúul máaxoʼob ku yaʼalaʼal ku tʼaanoʼob ich jejeláas tʼaanoʼoboʼ, tu yaʼaleʼ le páajtalilaʼ bey «junpʼéel chíikulal utiaʼal [...] le máaxoʼob maʼ j-oksaj óoloʼoboʼ», wa maʼ cristianoʼoboʼ (1 Corintoiloʼob 14:22). Bey túunoʼ le u tʼaan máak ichil uláakʼ tʼanoʼob yéetel le u páajtalil u beetkoʼob uláakʼ baʼaloʼoboʼ, ku yeʼesik ku yáantaʼal le yáax cristianoʼob tumen Diosoʼ. Le jejeláas páajtaliloʼob ku tsʼáaik le espíritu santooʼ jeʼel u páajtal u keʼetel yéetel le señaloʼob ku  tsʼaʼabal teʼ carreteraʼoboʼ tumen lelaʼ ku yáantaj utiaʼal ka u yil le máakoʼob máakalmáak u kaajal Diosoʼ.

Le Bibliaoʼ maʼatech u yaʼalik wa Jesús yéetel le profetaʼob anchaj úuchjeakiloʼ, tʼaanajoʼob ichil uláakʼ tʼaanoʼob. K-ilik túuneʼ yanchaj uláakʼ baʼax oʼolal tʼaanaj ichil uláakʼ tʼaanoʼob u disipuloʼob Cristo.

Áantajnaj utiaʼal u kʼaʼaytaʼal le maʼalob péektsiloʼ

Tu káajbal u kʼaʼaytajeʼ Jesuseʼ tu yaʼalaj tiʼ u disipuloʼob ka u kʼaʼaytoʼob u Reino Dios chéen tiʼ le judíoʼoboʼ (Mateo 10:6; 15:24). Le oʼolaleʼ le disipuloʼoboʼ maʼ suuk u binoʼob kʼaʼaytaj teʼ tuʼuxoʼob minaʼan judíoʼoboʼ. Baʼaleʼ maʼ xáanchaj ka xuʼul u beetkoʼobiʼ.

Tu jaʼabil 33, le maʼ úuch kíimik yéetel kaʼa kuxkíintaʼak Jesusoʼ, tu yaʼalaj tiʼ u disipuloʼob: «Xeeneʼex túun tiʼ u kajnáaliloʼob tuláakal kaajoʼobeʼ ka a beeteʼexoʼob j-kaanbaloʼob» (Mateo 28:19; Beetaʼanoʼob 1:8). Utiaʼal u kʼaʼaytaʼal le maʼalob péektsil tuláakal yóokʼol kaaboʼ maʼ chéen hebreo unaj u tʼankoʼobiʼ.

Baʼaleʼ yaʼab tiʼ le yáax cristianoʼoboʼ «maʼ xooknajaʼanoʼobiʼ bey xan chéen ichil meyajil máakoʼob u taaloʼob» (Beetaʼanoʼob 4:13). ¿Bix túun ken u kʼaʼaytoʼob le maʼalob péektsil tiʼ táanxel luʼumiloʼob wa maʼ u yoojloʼob le tʼaanoʼob ku beetaʼaloʼ? Yéetel u yáantaj le espíritu santooʼ, páajchaj u kʼaʼaytajoʼob yéetel u tʼaanoʼob jach maʼalob ichil le tʼaanoʼob maʼ u yoojloʼob kaʼachoʼ.

Jeʼex tsʼoʼok ilkoʼ, kaʼapʼéel baʼax oʼolal jach kʼaʼanaʼan kaʼach u tʼaan máak ichil uláakʼ tʼaanoʼoboʼ. Yáaxeʼ ku yeʼesikeʼ le yáax cristianoʼoboʼ táan u nuʼuktaʼaloʼob kaʼach tumen Dios. Yéetel u kaʼapʼéeleʼ áantajnaj utiaʼal u kʼaʼaytaʼal le maʼalob péektsil tiʼ tuláakal kaajoʼoboʼ. Kux bejlaʼeʼ, ¿láayliʼ wa Dios beetik u tʼaan le máakoʼob ichil uláakʼ tʼaanoʼoboʼ? ¿Láayliʼ wa ku yáantaj jeʼex úuchjeakileʼ?

¿Dios wa beetik u tʼaan le máakoʼob ichil uláakʼ tʼaanoʼob bejlaʼoʼ?

Wa yaantech junpʼéel letrero yéetel a kʼáat ka ilaʼak baʼax ku yaʼalik tumen tuláakal máakeʼ, ¿tuʼux ken a chʼuykíinte? ¿Máasaʼ maʼ ken a tsʼáa ichil junpʼéel naj tuʼux maʼ tu páajtal u yilaʼal? Baʼaxeʼ yaan a tsʼáaik tuʼux jeʼel u páajtal u yilaʼal tumen tuláakal máakeʼ. Le Bibliaoʼ ku yaʼalikeʼ yaʼab máakoʼob il u disipuloʼob Jesús táan u tʼaanoʼob ichil uláakʼ tʼaanoʼob teʼ Pentecostesoʼ. Úuchik u beetkoʼob beyaʼ«tiʼ le kʼiinoʼ yanchaj min tres mil máakoʼob tu nupubaʼob tiʼ le j-oksaj óoloʼoboʼ» (Beetaʼanoʼob 2:5, 6, 41). Baʼaleʼ bejlaʼeʼ le máaxoʼob ku yaʼalikoʼob ku tʼankoʼob jejeláas tʼaanoʼoboʼ chéen ku béeytal u beetkoʼob ichil u iglesiaʼob. ¿Máasaʼ maʼ tu páajtal u meyaj utiaʼal u yeʼesaʼal máakalmáak le religión kaʼansik u jaajiloʼ?

Le Bibliaoʼ ku yaʼalikeʼ le u yantal baʼax u yil máak yéetel máax maʼ u núup yéetel le u beetaʼal uláakʼ baʼaloʼob «ku binoʼob tu paach le kʼaakʼas tsʼíibolaloʼoboʼ» ku beetik maʼ u yáantik máak le espíritu santooʼ. Tsʼoʼoleʼ ku yaʼalik xaneʼ «le máaxoʼob ku beetikoʼob le baʼaloʼobaʼ maʼ tu táakpajaloʼob tu [reino] Jajal Dios» (Galaciailoʼob 5:17-21). Yoʼolal lelaʼ yaan máakoʼobeʼ ku sen tsʼíikiloʼob ken u yuʼuboʼob u yaʼalaʼal yaan máaxoʼob ku tʼankoʼob jejeláas tʼaanoʼob kex táan u beetkoʼob baʼaloʼob kʼaastak. ¿Jeʼel wa u tsʼáaik Dios u espíritu santo tiʼ máaxoʼob ku beetkoʼob baʼaloʼob kʼaastakeʼ? Lelaʼ jeʼel u páajtal u keʼetel yéetel u tsʼaʼabal junpʼéel letrero ku yaʼalik ka xiʼik máak tuʼux maʼ unajeʼ.

¿Ku meyaj wa le u tʼaan máak ichil uláakʼ tʼaanoʼob utiaʼal le kʼaʼaytajoʼ?

Jeʼex tsʼoʼok k-ilkoʼ, teʼ yáax siglooʼ le u tʼaan máak ichil uláakʼ tʼaanoʼoboʼ meyajnaj utiaʼal u kʼaʼaytaʼal le maʼalob péektsiloʼ. Kux túun bejlaʼeʼ, ¿láayliʼ wa ku meyaj utiaʼal u yúuchul kʼaʼaytajeʼ? Kʼaʼajaktoʼoneʼ le máaxoʼob bin Jerusalén utiaʼal u kʼiimbesoʼob le Pentecostesoʼ, maʼ junpʼéeliliʼ tuʼux u taaloʼobiʼ. Yéetel le ka kʼaʼaytajnaj le disipuloʼob yéetel u yáantaj le espíritu santo ichil le tʼaan u yojel le máakoʼoboʼ, jach maʼalob úuchik u naʼataʼaloʼob. Baʼaleʼ bejlaʼeʼ le máakoʼob ku yaʼalikoʼob ku tʼaanoʼob bin ichil uláakʼ tʼaanoʼoboʼ, maʼatech u naʼataʼal junpuliʼ le baʼax ku yaʼalikoʼoboʼ.

 Lelaʼ ku yeʼesikeʼ, le páajtalil ku yaʼalikoʼob yaantiʼoboʼ, maʼ bey jeʼex le tsʼaʼab tiʼ le yáax cristianoʼob tumen le espíritu santooʼ. Tsʼoʼoleʼ mix baʼal eʼesik wa yaan uláakʼ máaxoʼob béeychaj u tʼaanoʼob ichil uláakʼ tʼaanoʼob yéetel u yáantaj le espíritu santo ka tsʼoʼok u kíimil le apostoloʼoboʼ. Lelaʼ junpʼéel baʼax u yojel le máaxoʼob xokik le Bibliaoʼ, tumen le ka tʼaanaj le apóstol Pablo tiʼ le páajtaliloʼob ku tsʼáaik le espíritu santooʼ, tu yaʼalaj: «Bíin jáawak xan u yúuchul tʼaan tiʼ jejeláas tʼaanoʼob» (1 Corintoiloʼob 13:8). Bey túunoʼ, ¿bix jeʼel k-ojéeltik tiʼ máaxoʼob ku tsʼáaik u espíritu santo Dios teʼ kʼiinoʼobaʼ?

¿Máaxoʼob eʼesik yaan le espíritu santo tiʼoboʼ?

Jesuseʼ u yojel kaʼacheʼ le u páajtalil u tʼaan máak ich jejeláas tʼaanoʼoboʼ yaan u xuʼulul le ken káajak u yantal le múuchʼuliloʼoboʼ. Le oʼolal táanil tiʼ u kíimileʼ tu yaʼalaj baʼax kun chíikbesik le jaajil cristianoʼoboʼ: «Wa ka yaabiltkabaʼex ta baatsileʼexeʼ tuláakal yóokʼol kaab kun u kʼaj óolteʼ teʼexeʼ in j-kaambaleʼex» (Juan 13:35). Tsʼoʼoleʼ 1 Corintoiloʼob 13:8 tuʼux ku yaʼalik yaan u xuʼulul u tsʼáaik jejeláas páajtaliloʼob le espíritu santooʼ, ku yaʼalik xaneʼ «le yaakunajoʼ mix bikʼin ku kíimil».

Le yaabilajoʼ letiʼe yáax tiʼ le nueve jatsʼuts modosoʼob ku yaʼalik le Biblia «u yich u meyaj [u espíritu santo]» Diosoʼ (Gálatas 5:22, 23, Le Tumben Nuptʼan). Bey túunoʼ le máaxoʼob yaantiʼob le espíritu santo yéetel u yáantaj Diosoʼ, letiʼe máaxoʼob jach u yaabiltmubaʼoboʼ. Tsʼoʼoleʼ le u yóoxpʼéel jatsʼuts modos ku tsʼáaik le espíritu santooʼ letiʼe jeetsʼeliloʼ. Le oʼolaleʼ le máaxoʼob táan u meyajtikoʼob Diosoʼ ku yilik u yeʼeskoʼob jeetsʼelil tumen ku yilik u chʼaʼikoʼob en cuenta u maasil, maʼatech u pʼektikoʼob mix máak yéetel maʼatech u baʼateloʼob.

Koʼoneʼex kʼaʼajsik le baʼax tu yaʼalaj Jesús ku chíikpajal tiʼ Beetaʼanoʼob 1:8. Letiʼeʼ tu yaʼaleʼ u disipuloʼobeʼ yaan u kʼamkoʼob páajtalil yéetel yaan u tʼaanoʼob tiʼ u kʼaabaʼ «tak le kúuchiloʼob yaan tu xuul yóokʼol kaaboʼ». Tu yaʼalaj xaneʼ le meyajaʼ yaan u seguer u beetaʼal tak ken taak u «xuul yóokʼol kaab» (Mateo 28:20). U kʼaʼaytaʼal le maʼalob péektsil tiʼ tuláakal yóokʼol kaab teʼ kʼiinoʼobaʼ ku yeʼesik tiʼ máaxoʼob yaan le espíritu santooʼ.

Techeʼ a tuklikeʼ, ¿máaxoʼob eʼesik yaan le espíritu santo tiʼoboʼ? ¿Máaxoʼob eʼesik yaantiʼob le jatsʼuts modos ku beetik u yantal tiʼ máak le espíritu santo, jeʼex le yaabilaj yéetel le jeetsʼeliloʼ? ¿Máaxoʼob maʼatech u yóotkoʼob bin tiʼ guerra kex ka chʼaʼpachtaʼakoʼob tu yoʼolal? (Isaías 2:4.) ¿Máaxoʼob ku yilik maʼ u lúubloʼob tiʼ junpʼéel kʼeban jeʼex u yantal baʼax u yil máak yéetel máax maʼ tsʼokaʼan u beeliʼ? ¿Máaxoʼob ka wilik maʼatech u chaʼikoʼob u pʼáatal ichiloʼob máaxoʼob ku kʼebantaloʼob yéetel maʼatech u arrepentiroʼob? (1 Corintoiloʼob 5:11-13.) ¿Máaxoʼob xan táan u kʼaʼaytikoʼob tuláakal tuʼux chéen u Reino Dios jeʼel u yáantik wíinikeʼ? (Mateo 24:14.)

Toʼon máaxoʼon beetik le revistaaʼ, k-aʼalikeʼ u j-jaajkunajoʼob Jéeobaeʼ (testigos de Jehová) ku yeʼeskoʼob yaantiʼob u espíritu santo Dios jeʼex u yaʼalik le Bibliaoʼ. ¿Baʼaxten maʼ ta natsʼkaba tiʼ letiʼob utiaʼal ka a maas kʼaj óoltoʼob? Beyoʼ jeʼel u páajtal a wilik wa jach jaaj táan u yáantaʼaloʼob tumen Dioseʼ.