Kʼexaʼab u kuxtaloʼob tumen le Bibliaoʼ

¿BIX úuchik u xuʼulul u drogarkuba yéetel u kaʼa biskuba yéetel u paalal utúul koʼolel kajaʼan Rusia? ¿Bix úuchik u pʼatik u vicioʼob yéetel u xuʼulul u máansik óotsilil, utúul máak japonil yéetel chéen bey u máan calleʼoboʼ? ¿Baʼax áant u pʼat u káaltal utúul vaquero kajaʼan Australia? Koʼox ilik baʼax ku yaʼalikoʼob.

«Tin kanaj kʼaʼabéet in meyaj yéetel in kanáantik in paalal»

(NELLY BAYMATOVA)

U JAʼABIL: 45

KAJAʼAN: RUSIA

KAʼACHEʼ: KU DROGARKUBA

LE BIX KUXLIKEN KAʼACHOʼ: Líikʼen Vladikavkaz, u noj kaajil u republicai Osetia del Norte (bejlaʼeʼ Alania). Tumen yaan taakʼin tiʼ in taataʼobeʼ, yanten kaʼach tuláakal baʼax in kʼáat. Kex beyoʼ maʼ kiʼimak in wóol kaʼachiʼ. Ka tu tsʼáajten 34 jaʼaboʼobeʼ tsʼokaʼaniliʼ u tsʼoʼokol in beel kaʼatéeneʼ, baʼaleʼ tiʼ mix upʼéel binten utsiliʼ. Diez jaʼaboʼob kaʼach káajak in drogarkimba yéetel kaʼatéen anchajen tiʼ upʼéel clínica utiaʼal in wáantaʼal in pʼate. Pʼáat maʼatech in jach biskimba yéetel in familia mix yéetel in amigoʼob. Yaan kaʼatúul in paalal, baʼaleʼ kin wuʼuyik kaʼach maʼ in yaabiltmoʼobiʼ.

In maama kaʼacheʼ u j-jaajkunaj Jéeoba (testigo de Jehová), letiʼeʼ mantatsʼ ku yokʼol tin woʼolal yéetel jach ku kʼáatik tiʼ Dios ka u yáanten. Ken u kʼáat leloʼ teneʼ kin tuklik kaʼachi: «¿Bix ken u creert in maama u yáantken Jéeoba in pʼat in vicio?». Teneʼ tin juunal in kʼáat in wil kaʼach in xulik in drogarkimba, baʼaleʼ maʼ tu páajtal kaʼach in xulik. Utéenjeakeʼ pʼáat kaʼapʼéel kʼiin maʼ tin drogartimbaiʼ. Baʼaleʼ tumen jach léek in nervioseʼ taakchaj in jóokʼol tin wotoch, ka tin pulimba desde tu ventanai le kaʼapʼéel pisooʼ. Úuchik in pulkimbaoʼ káach upʼéel in kʼab, upʼéel in wook yéetel tin kiimbesaj in puʼuch. Utiaʼal in maʼalobtaleʼ anchaj in pʼáatal chital upʼéel mes.

Tuláakal le tiempo jeʼeloʼ in maama kanáanten. Yéetel mix utéen tu chʼinchʼin aʼalajten baʼal, tumen u yojel jach lubaʼan in wóol. Baʼaleʼ tu pʼataj yaʼab revistaʼob ¡Despertad! * tu yiknal in cama. Jach jatsʼuts tin wilil le revistaʼoboʼ le oʼolal tin xokaj cada upʼéel tu túulisil. Teʼ túun tin chʼaʼatuklaj in xokik le Biblia yéetel u j-jaajkunajoʼob Jéeobaoʼ.

BIX TU KʼEXIL IN KUXTAL LE BIBLIAOʼ: Teʼ Bibliaoʼ tin kanaj kʼaʼabéet in meyaj yéetel in kanáantik in paalal; tumen lelaʼ in maama beetik kaʼachi. Baʼaleʼ tumen máan yaʼab tiempo chéen táan in beetik baʼax in kʼáateʼ, talamchaj u suuktal in meyaj.

Jach tu yáanten le baʼax ku yaʼalik Deuteronomio 6:5-7, tuʼux ku yaʼalikeʼ unaj u kaʼansaʼal tiʼ le paalal u meyajtoʼob Diosoʼ. Tin tsʼáaj cuentaeʼ teen  ken in kʼub cuenta tiʼ Jéeoba tu yoʼolal le baʼaxoʼob kin kaʼansik tiʼ in paalaloʼ. Le oʼolaleʼ káaj in máansik maas yaʼab tiempo yéetel in paalaloʼob yéetel tin wilaj u káajal in yaabiltkoʼob.

Tumen jach kiʼimak in wóol úuchik u tsʼáaikten Dios u nojoch páajtalil in kʼaj óoltikeʼ, tin chʼaʼatuklaj in kʼubik in kuxtal tiʼ yéetel in wokjaʼ.

LE UTSILOʼOB TSʼOʼOK U TAASIKTENOʼ: Tumen tsʼoʼok in pʼatik le kʼaakʼas modos yanten kaʼachoʼ, bejlaʼeʼ maʼalob in biskimba yéetel in maama. Tsʼoʼoleʼ maas maʼalob in biskimba xan yéetel in paalal.

Bejlaʼeʼ in pʼekmaj le baʼaxoʼob u pʼekmaj xan Diosoʼ yéetel yoʼolal lelaʼ minaʼanten mix upʼéel tiʼ le talamiloʼob yanten kaʼachoʼ. Bejlaʼeʼ jach kiʼimak in wóol ikil in jóoʼsik tiempo utiaʼal in tsikbaltik tiʼ uláakʼ máakoʼob le jatsʼuts modos yaan tiʼ Jéeoba Diosoʼ.

«Le baʼaxoʼob ku yaʼalik le Bibliaoʼ tu kanáantoʼob in kuxtal» (MINORU TAKEDA)

U JAʼABIL: 54

KAJAʼAN: JAPÓN

KAʼACHEʼ: CHÉEN BEY U MÁAN CALLEOʼ

LE BIX KUXLIKEN KAʼACHOʼ: Tin paalileʼ tiʼ kajaʼanen kaʼach tu kaajil Yamaguchi, yéetel in papá yéetel in abuela. Maʼ tin kʼaj óoltaj in maamaiʼ. Le ka tu tsʼáajten 19 jaʼaboʼoboʼ, kíim in abuela ka pʼáaten chéen yéetel in papá. Teneʼ kin meyaj kaʼach tiʼ upʼéel tuʼux ku beetaʼal janal yéetel in papaeʼ láayliʼ letiʼe meyaj ku beetik xan kaʼachoʼ. Baʼaleʼ tumen tiʼ yaanal horaʼob k-meyajeʼ, óoliʼ maʼatech k-ilikba. Jujumpʼíitileʼ pʼáat chéen esa kin bin meyaj yéetel ken tsʼoʼokkeʼ kin bin káaltal yéetel in amigoʼob.

Ka máan kʼiineʼ náak in wóol meyaj teʼ tuʼux yanen kaʼachoʼ. Upʼéel kʼiineʼ baʼateʼel tʼaanajen yéetel in patrón, lelaʼ tu beetaj in káaltal. Le taʼaytak u tsʼáaikten 30 jaʼaboʼoboʼ, tin chʼaʼatuklaj in lukʼul tin wotoch utiaʼal ka xiʼiken le tuʼux in kʼáateʼ. Le ka pʼáat minaʼanten taakʼineʼ, káaj in meyaj tiʼ upʼéel tuʼux yaan yaʼab maquinitaʼob kʼaj óolaʼanoʼob bey pachinko, le báaxloʼobaʼ jach kʼaj óolaʼanoʼob Japón. Teʼelaʼ tin kʼaj óoltaj utúul x-chʼúupaliʼ yéetel tsʼoʼok in beel tu yéetel, baʼaleʼ ka máan kaʼapʼéel jaʼab yéetel táankucheʼ t-chʼaʼatuklaj k-pʼatikba.

Ka tsʼoʼok u yúuchulten lelaʼ jach lúub in wóol yéetel pʼáat chéen esa yanen. Káaj in kʼáatik taakʼin tiʼ jujuntúul máaxoʼob suuk u tsʼáaikoʼob taakʼin majantbil, yéetel jach yaʼabchaj in pʼaax. Utiaʼal in púutsʼul tiʼ le máaxoʼob ku taal u kʼáatoʼob le taakʼin in majáantmoʼ, binen tu yotoch in papá, teʼ kaaj tuʼux líikʼenoʼ. Baʼaleʼ tumen kin sen tuskeʼ xuʼul u biskuba tin wéetel. Ka lukʼen tin wotocheʼ tin chʼaʼaj taakʼin yéetel pʼáat chéen kin kaxtik in kuxtal yéetel le taakʼin kin ganartik ikil in báaxloʼ. Ka tsʼoʼokeʼ jach pʼáat minaʼanten taakʼin yéetel teʼ kin wenel tiʼ upʼéel u estacionil treneʼ. Tsʼoʼoleʼ binen tu kaajil Hakata, Himeji yéetel tu tsʼookeʼ Kioto. Tin máansaj wa jaypʼéel jaʼaboʼob chéen bey in máan teʼ calleʼoboʼ.

BIX TU KʼEXIL IN KUXTAL LE BIBLIAOʼ: Tu jaʼabil 1999, le tiaʼanen naatsʼ tiʼ upʼéel parque naatsʼ tiʼ u rioi Kamogawa, yaan tu kaajil Kiotoeʼ, náatsʼ kaʼatúul koʼoleloʼob tin wiknal. Utúul tiʼ letiʼobeʼ tu  kʼáatajten wa jeʼel in wóotik ka tsʼaʼabakten xook yéetel le Bibliaoʼ, yéetel tin waʼalajtiʼobeʼ jeʼeleʼ. Maʼ xáanchajeʼ, joʼopʼ in xíimbaltaʼal tumen kaʼatúul j-jaajkunajoʼob tiʼ Jéeoba jach úuch joʼopʼok u kaʼansajoʼob, letiʼobeʼ tu yeʼesoʼobten u kʼaʼananil in beetik le baʼax ku yaʼalik le Bibliaoʼ. Tsʼoʼoleʼ tu yaʼaloʼobten ka in kaxt upʼéel meyaj yéetel upʼéel naj utiaʼal in wantal. Binen in wil wa jeʼel in kaxtik meyajeʼ, baʼaleʼ chéen tin beetaj utiaʼal maʼ u yaʼalkoʼobten mix baʼal. Baʼaleʼ ka tsʼoʼokeʼ orarnajen tiʼ Dios utiaʼal u yáantken in kaxt meyaj, yéetel joʼopʼ in kaxtik jach tu jaajil in wóol. Yéetel tu tsʼookeʼ tin kaxtaj.

Le oracionoʼ jach tu yáanten xan in aktáant uláakʼ talamil. Le máaxoʼob majáanten le taakʼineʼ tu kaxtenoʼob yéetel tu yaʼaloʼobten ka in sute. Lelaʼ jach tu beetaj in chiʼichnaktal. Baʼaleʼ le táan in xokik in Biblia jeʼex suuk in beetik sáamsamaloʼ, tin wilaj baʼax ku yaʼalik u tsʼíibil Isaías 41:10 yoʼolal le máaxoʼob ku chúukpajal u yóol u meyajtoʼob Diosoʼ: «Teen áantikech». Lelaʼ jach tu yáanten. Yéetel tin tsʼáaj in wóol meyaj utiaʼal in sutik le taakʼinoʼ. Tu jaʼabil 2000 tin wilaj in láaj beetik le baʼaxoʼob ku kʼáataʼal tiʼ máak utiaʼal u yokjaʼoʼ, yéetel okjaʼanajen.

LE UTSILOʼOB TSʼOʼOK U TAASIKTENOʼ: Le baʼax tin kanaj teʼ Bibliaoʼ tu yáanten in beet tuláakal le ku páajtal utiaʼal in kaʼa biskimba yéetel in papaoʼ, yéetel letiʼeʼ tu perdonarten. Jach kiʼimakchaj u yóol ka tu yilaj táan in nuʼuktik in kuxtal yéetel le baʼax ku yaʼalik le Bibliaoʼ. Le ken kʼaʼajakten bix in kuxtal kaʼacheʼ, jeʼel u páajtal in waʼalikeʼ letiʼe Biblia salvart in kuxtaloʼ.

Bejlaʼeʼ kin wilik in kuxtal yéetel le taakʼin kin náajaltikoʼ (Efesoiloʼob 4:28; 2 Tesalonicailoʼob 3:12). Tsʼoʼoleʼ jach maʼalob in biskimba yéetel le sukuʼunoʼob yaan teʼ múuchʼuliloʼ (Marcos 10:29, 30). Jach kin tsʼáaik u graciasi tiʼ Jéeoba yoʼolal le baʼaxoʼob tsʼoʼok u kaʼansiktenoʼ.

«Maʼ chéen chʼaʼabil úuchik in kʼexik bix in kuxtaliʼ» (DAVID HUDSON)

U JAʼABIL: 72

KAJAʼAN: AUSTRALIA

KAʼACHEʼ: KÁALTAL MÁAK

LE BIX KUXLIKEN KAʼACHOʼ: Le ka síijeneʼ, Willie yéetel Lucy, in taataʼobeʼ, tsʼoʼokiliʼ u yantal diez u paalaloʼobeʼ. Teʼ kajakbaloʼon kaʼach tu xamanil Queensland, náatsʼ tiʼ le kʼáaʼnáaboʼ, tiʼ upʼéel chan kaaj ku kʼaabaʼtik Aurukun, naatsʼ xan tiʼ u rioi Archer. Teʼelaʼ chéen kajaʼan kaʼach máaxoʼob sijnaloʼob Australiaiʼ. Tiʼ teen yéetel in sukuʼunoʼobeʼ kaʼansaʼaboʼon tsʼoon yéetel chuk kay utiaʼal k-kaxtik baʼal k-jaante. Teʼ kʼiinoʼob jeʼeloʼ le máaxoʼob sijnaloʼob teʼ tuʼux kajaʼanoʼonoʼ minaʼan kiʼimak óolal ichiloʼob, le gobiernooʼ maʼatech u chaʼik k-beetik le baʼax k-kʼáat yéetel k-taakʼineʼ yéetel maʼatech u chaʼik k-jóokʼol kajtal táanxel tuʼux.

Kʼajaʼanteneʼ in taataʼobeʼ mantatsʼ tu kaʼanskoʼobtoʼon k-eʼes jatsʼuts modos. Tu kaʼansoʼobtoʼoneʼ kex upʼíit baʼax yantoʼoneʼ unaj k-tsʼáaik xan tiʼ u maasiloʼob yéetel tu kaʼansoʼobtoʼon k-eʼes tsiikil tiʼ le máaxoʼob tsʼoʼok u yantal u jaʼabiloʼoboʼ. T-kanaj k-il le máaxoʼob tsʼoʼok u yantal u jaʼabiloʼob bey k-taataʼobeʼ, k-maamaʼobeʼ, k-tíoʼob yéetel tíaʼob.

 Le ka tu tsʼáajten siete jaʼaboʼobeʼ, kíim in taata. Le oʼolal binoʼon kajtal Mapoon, lelaʼ tiaʼan kaʼach óoliʼ 150 kilómetros u náachil tiʼ u xamanil Aurukun, yéetel teʼelaʼ láayliʼ kajaʼan xan máaxoʼob sijnaloʼob Australiaeʼ. Cinco jaʼaboʼob kʼuchkoʼoneʼ tin kanaj in kanáant tsíimnoʼob yéetel waakxoʼob. Tin kanaj in beet in vaqueroi yéetel tak ka tu tsʼáajten óoliʼ 50 jaʼaboʼobeʼ láayliʼ kin meyaj tiʼ yaʼab haciendaʼob utiaʼal in kaxtik in kuxtaleʼ. Baʼaleʼ kaʼanaʼantsil u beetaʼal le meyajaʼ, tsʼoʼoleʼ tumen jach yaʼab in káaltal kaʼacheʼ káaj u yantalten yaʼab talamiloʼob.

Upʼéel kʼiin kalaʼaneneʼ, ka jóokʼen tiʼ upʼéel hotel táan u bin in takchalankileʼ, jéentantaʼaben tumen upʼéel camión jach chich u taal. Anchaj u tsʼaʼabalten terapias kaʼapʼéel jaʼab utiaʼal in wutstal. Baʼaleʼ maʼ béeychaj in kaʼa beetik in vaqueroiliʼ.

BIX TU KʼEXIL IN KUXTAL LE BIBLIAOʼ: Teʼ kʼiinoʼob táan u tsʼaʼabalten terapiasoʼ, utúul in amigaeʼ tu taasajten le revistaʼob La Atalaya yéetel ¡Despertadoʼ! Baʼaleʼ maʼ tu jach áantenoʼobiʼ tumen maʼ jach in wojel xookiʼ. Ka tsʼoʼok u máan kʼiineʼ bin u xíimbalten utúul nojoch máak 83 u jaʼabil. Kʼajaʼanteneʼ teʼ kʼiin jeʼeloʼ jach ooxol, ka tin waʼalajtiʼ ka okok yéetel tin tsʼáaj upʼéel vaso síis jaʼ u yukʼe. Letiʼeʼ tu tsʼáajten publicacionoʼob ku tʼaanoʼob tiʼ le Bibliaoʼ, yéetel tu yaʼalaj jeʼel u suut u tsolten le baʼaxoʼob ku yaʼalikoʼ. Bey úuchik u káajal in xokik le Bibliaoʼ. Jujumpʼíitileʼ tin tsʼáaj cuentaeʼ wa in kʼáat in beet baʼax u kʼáat Dioseʼ unaj in kʼexik bix in kuxtal yéetel in modos.

U jaajileʼ maʼ chéen chʼaʼabil úuchik in kʼexik bix in kuxtaliʼ. Tumen kex táan kaʼach in xook yéetel le nojoch máakoʼ teneʼ, chéen kin beetik tumen in maamaeʼ tu kaʼansajten unaj in weʼesik tsiikil tiʼ le máaxoʼob tsʼoʼok u yantal u jaʼabiloʼoboʼ. Tsʼoʼoleʼ teneʼ maʼ jach in kʼáat kaʼach in kʼub in kuxtal in meyajt Diosiʼ, mix in beetkimba u j-jaajkunaj Jéeoba. Kin tuklik kaʼacheʼ táanil kʼaʼabéet in láaj kanik le baʼax ku yaʼalik le Bibliaoʼ.

Baʼaleʼ utúul in wéet meyajeʼ tu yáanten in wil maʼ bey unaj in tuukuloʼ. Letiʼeʼ utúul u j-jaajkunaj Jéeoba kaʼachi yéetel tu yaʼalajten ka in xok Colosailoʼob 1:9, 10. Teʼeloʼ ku yaʼalik tiʼ le máaxoʼob meyajtik Dios ka seguernak u «kʼaj óolti[koʼob] maas maʼalob Jajal Dios». Yéetel le tekstoʼobaʼ in wéet meyajoʼ tu yáanten in wil mix bikʼin kun xuʼulul k-kaambal, le oʼolaleʼ maʼ unaj kaʼach in chaʼik u máan yaʼab tiempoiʼ.

Ka káaj in bin teʼ muchʼtáambaloʼob ku beetik u J-jaajkunajoʼoboʼ, jach táaj jatsʼuts tin wilil, tumen yaan máakoʼob jejeláas u chʼiʼibaloʼob táan u múul meyajtikoʼob Dios. Tumen jach u yaabiltmubaʼobeʼ, tin tuklaj: «Lelaʼ letiʼe religión kaʼansik u jaajiloʼ». Tu jaʼabil 1985 túuneʼ okjaʼanajen.

LE UTSILOʼOB TSʼOʼOK U TAASIKTENOʼ: Bejlaʼeʼ tsʼoʼok u maas maʼalobtal in xook, yéetel cada semanaeʼ kin máansik yaʼab horaʼob táan in wáantik uláakʼ máakoʼob u xokoʼob yéetel u kanoʼob baʼax ku yaʼalik le Bibliaoʼ. Tsʼoʼoleʼ le in amiga tu taasajten le revistaʼob La Atalaya yéetel ¡Despertadoʼ! káaj xan u xokik le Bibliaoʼ yéetel okjaʼanaji, bejlaʼeʼ le x-chʼúupal jeʼeloʼ in watan. Jach ku taasiktoʼon kiʼimak óolal k-áantik uláakʼ máakoʼob sijnaloʼob Australia u kʼaj óoltoʼob Jéeoba Dios.

[Tsolajiloʼob]

[U tsolajil le oochel teʼ táan juʼun 21]

Jach ku taasiktoʼon kiʼimak óolal k-áantik uláakʼ máakoʼob sijnaloʼob Australia u kʼaj óoltoʼob Jéeoba Dios