¿Kʼaʼabéet wa u confesarkuba le máaxoʼob meyajtik Diosoʼ?

U confesarkuba máak tiʼ utúul sacerdoteeʼ, upʼéel baʼax jach suuk u beetaʼal tiʼ yaʼab iglesiaʼob. Baʼaleʼ tumen bejlaʼa yaʼab máaxoʼob ku beetkoʼob chéen baʼax u kʼáatoʼobeʼ, ¿yaan wa túun baʼax u biilal u confesarkuba máak?

MAʼ UPʼÉELILIʼ baʼax ku tuklaʼal yoʼolal lelaʼ. Jeʼex le periódico canadiense National Post, tʼaanaj tiʼ utúul máak ku yaʼalik jach talamchaj u confesartik tiʼ uláakʼ le baʼaxoʼob maʼ maʼalobtak u beetmoʼ. Baʼaleʼ letiʼeʼ ku yaʼalik xan: «Ken u yojéelt uláakʼ máak le baʼaxoʼob tsʼoʼok a beetik, ku orar ta wéetel yéetel ku yaʼaliktech baʼax unaj a beetkoʼ, jach ku beetik u líikʼil a wóol». Tsʼoʼoleʼ tiʼ upʼéel libro ku tʼaan xan tiʼ lelaʼ ku chíikpajal baʼax tu yaʼalaj utúul máak: «U confesartik máak u kʼeban tiʼ uláakʼeʼ upʼéel tiʼ le baʼaxoʼob jach maʼ maʼalobtak ku beetik le Iglesiaoʼ, tumen ku kʼaskúuntik le bix u yilik máak u beetaʼal baʼax kʼaasoʼ» (Bless Me, Father, for I Have Sinned [Bendecirteniʼ padre, tumen tsʼoʼok in kʼebantal]). Baʼaleʼ ¿baʼax ku yaʼalik le Biblia yoʼolal lelaʼ?

Le baʼax ku yaʼalik le Bibliaoʼ

Le ka tu tsʼáaj u Ley Dios tiʼ le israelitaʼoboʼ, tu yaʼalaj jach baʼax unaj u beetkoʼob ken lúubkoʼob tiʼ wa baʼax kʼebanil. Wa utúul máak ku kʼebantal tu contra uláakʼ máak bey xan wa ku beetik upʼéel baʼal ku bin tu contra u leyoʼob Dioseʼ, kʼaʼabéet kaʼach u confesartik tiʼ utúul u sacerdotei u chʼiʼibal Leví. Tsʼoʼoleʼ le sacerdoteoʼ ku kʼubik utúul kíimsbil baʼalcheʼ utiaʼal u saʼasaʼal le máax kʼebanchajoʼ (Levítico 5:1-6).

Ka máan yaʼab jaʼaboʼobeʼ, le profeta Natanoʼ tu tsolaj u nuʼuk tiʼ le rey David yoʼolal le baʼaloʼob maʼ maʼalobtak tu beetoʼ. Yoʼolal lelaʼ Davideʼ tu yaʼalaj: «Tsʼoʼok in [kʼebantal] tu táan Yuumtsil» (2 Samuel 12:13). Tsʼoʼoleʼ tu kʼáat óoltaj tiʼ Dios ka chʼaʼabak óotsilil tiʼ. ¿Bix áantaʼabik tumen le payalchiʼ tu beetoʼ? Davideʼ tu yaʼalaj: «Tin [waʼalaj] tiʼ teech tuláakal in kʼeban yéetel in kʼasaʼanil; tin tsʼáaj in wóol in [waʼal] tiʼ teech in kʼebanoʼob; Yuumtsil, teech túuneʼ ta saʼatsajoʼob ten» (Salmo 32:5; 51:1-4).

Ichil le múuchʼulil teʼ yáax siglooʼ le u yaʼalik máak u kʼebanoʼoboʼ, ku yilaʼal bey upʼéel baʼal ku taal tiʼ Dioseʼ. Santiago, u majan íitsʼin Jesús, yéetel utúul tiʼ le máaxoʼob nuʼuktik le múuchʼulil yaan Jerusalenoʼ tu yaʼalaj tiʼ le máaxoʼob tsaypachtik Cristooʼ: «[Aʼal] a kʼebaneʼex ta baatsileʼex, yéetel payalchiʼineneʼex ta baatsileʼex, utiaʼal ka tsʼaʼabak a toj óolaleʼex» (Santiago 5:16). ¿Baʼax kʼebaniloʼob unaj u confesartik le máaxoʼob meyajtik Diosoʼ, yéetel tiʼ máax?

¿Unaj wa u confesarkuba máak?

Tumen láaj kʼeban máakoʼoneʼ, u suukileʼ maʼatech k-tuklik tubeel baʼax k-beetik wa k-aʼalik tu contra u maasil (Romailoʼob 3:23). ¿U kʼáat wa túun u yaʼaleʼ unaj k-confesartik tuláakal baʼax k-beetik tiʼ utúul máax nuʼuktik upʼéel religión?

U jaajileʼ jeʼel baʼaxak kʼebanileʼ ku beetik u yaatal u yóol Dios, baʼaleʼ letiʼeʼ ku chʼaʼiktoʼon óotsilil yéetel u yojel k-beetik baʼaloʼob maʼ jach maʼalobtakiʼ tumen kʼeban wíinkoʼon. Le salmistaoʼ tu yaʼalaj: «Wa ka tsʼáa a wich tiʼ le kʼasaʼaniloʼ, ¿máax jeʼel u pʼáatal waʼalakbal ta táaneʼ? Baʼaleʼ tiʼ teech [k-kʼamik] saʼatsaʼaj siʼipil, utiaʼal ka k-tsikech»  (Salmo 130:3, 4). Bey túunoʼ, ¿baʼax unaj k-beetik wa yaan hora k-beetik wa k-aʼalik wa baʼax tu contra u maasil? Kʼaʼajaktoʼoneʼ ichil le payalchiʼ tu kaʼansaj Jesús tiʼ u disipuloʼoboʼ tu kʼáataj tiʼ Dios: «Saʼates toʼon k-kʼeban, tumen toʼon xaneʼ k-saʼatsik tuláakal máakoʼob ku beetiktoʼon kʼaas» (Lucas 11:4). Dioseʼ jach jeʼel u perdonartiktoʼon le baʼaxoʼob maʼ maʼalobtak k-beetik wa k-kʼáatik tu kʼaabaʼ Jesusoʼ (Juan 14:13, 14).

Baʼaleʼ Jesuseʼ tu yaʼaleʼ yaan upʼéel baʼax kʼaʼabéet k-beetik: kʼaʼabéet k-perdonartik tuláakal le máaxoʼob «ku beetiktoʼon kʼaas[oʼ]». Le apóstol Pablooʼ tu yaʼalaj xan tiʼ le yáax cristianoʼoboʼ: «Yanakteʼex yaakunaj yéetel chʼaʼa óotsilil ta baatsileʼex, yéetel saʼasabaʼex ta baatsileʼex jeʼel bix Jajal Dios tu saʼasajeʼex tiʼ Cristoeʼ» (Efesoiloʼob 4:32). Bey túunoʼ ken k-perdonart le baʼaloʼob ku beetaʼal t-contraoʼ, Dioseʼ ku perdonartik xan le baʼaxoʼob maʼ maʼalobtak k-beetkoʼ.

Baʼaleʼ ¿kux túun le kʼebanoʼob jeʼex le ookoloʼ, le u tuus máak tu yóoliliʼoʼ, le núupkʼeban yéetel le u káaltal máakoʼ? Le máaxoʼob beetik le baʼaloʼobaʼ táan u binoʼob tu contra u Ley Dios le oʼolaleʼ ku kʼebantaloʼob tu táan. ¿Baʼax unaj u beetaʼal ken úuchuk le baʼaloʼobaʼ?

¿Máax tiʼ unaj k-confesartikba?

Chéen Dios jeʼel u páajtal u perdonartik le baʼaxoʼob maʼ maʼalobtak k-beetik tu contraoʼ, tiʼ mix máak u tsʼaamaj u páajtalil u beetik. Le Bibliaoʼ ku yaʼalik: «Wa [k-aʼalik] k-kʼebanoʼobeʼ, jeʼel u páajtal k-alab óoltikeʼ, Jajal Dioseʼ yaan u beetik baʼax toj; bíin u saʼates k-kʼebanoʼob yéetel bíin u pʼoʼon tiʼ tuláakal kʼaas» (1 Juan 1:9). Baʼaleʼ, ¿máax tiʼ unaj k-confesartik k-kʼebanoʼob?

Tumen chéen Jéeoba perdonartik le kʼebanoʼoboʼ, unaj k-confesartikba tiʼ letiʼ. Lelaʼ bey tu beetil le rey Davidoʼ. Baʼaleʼ, ¿yaan wa uláakʼ baʼax unaj u beetaʼal? Le Bibliaoʼ ku yaʼalik: «Le oʼolaleʼ kʼex a tuukuleʼex yéetel suuneneʼex tiʼ Jajal Dios, utiaʼal ka lukʼsaʼak a kʼebaneʼex. Bey túunoʼ Yuumtsileʼ ku páajtal u túuxtik tiʼ teʼex maʼalob kʼiinoʼob» (Beetaʼanoʼob [Hechos] 3:19). Maʼ chéen yaan yéetel ka k-tsʼáa cuenta yéetel ka k-aʼal tsʼoʼok k-kʼebantaliʼ, baʼaxeʼ unaj k-beetik tuláakal le ku páajtal utiaʼal k-pʼatik le baʼax kʼaas t-beetoʼ. Kex maʼ chéen chʼaʼabil u beetaʼal lelaʼ, yaan baʼax jeʼel u yáantkoʼoneʼ, ¿baʼaxiʼ?

Jeʼex tsʼoʼok k-ilkoʼ Santiagoeʼ tu yaʼalaj tiʼ le yáax cristianoʼoboʼ: «[Aʼal] a kʼebaneʼex ta baatsileʼex, yéetel payalchiʼineneʼex ta baatsileʼex, utiaʼal ka tsʼaʼabak a toj óolaleʼex». Tsʼoʼoleʼ tu yaʼalaj: «Le payalchiʼ ku beetaʼal yéetel kʼub óolal tumen juntúul máak utseʼ jach nojoch u páajtalil» (Santiago 5:16). Le «máak uts» ku chʼaʼachiʼitaʼal teʼ tekstoaʼ maʼ xaaneʼ utúul tiʼ u nuukiloʼob le múuchʼulil wa utúul anciano jeʼex u chíikpajal teʼ versículo 14 tiʼ le capítulo 5 tiʼ Santiagooʼ. ¿Máax le ancianoʼobaʼ? Ichil le múuchʼuliloʼ yaan máaxoʼob úuch joʼopʼok u meyajtkoʼob Dios yéetel tsʼaʼanoʼob utiaʼal u yáantkoʼob le máaxoʼob u kʼáatoʼob ka perdonartaʼakoʼob tumen Diosoʼ. U jaajileʼ letiʼobeʼ maʼ tu páajtal u perdonarkoʼob upʼéel kʼeban tu beetaj máak tu contra Dios, tumen maʼ tsʼaʼan u páajtalil u beetkoʼobiʼ. * Baʼaleʼ le ancianoʼobaʼ jeʼel u páajtal u tsolnuʼuktikoʼob yéetel u disciplinarkoʼob le máax kʼebanchaj utiaʼal ka u yil maʼ maʼalob le baʼax tu beetoʼ yéetel ka arrepentirnak (Galaciailoʼob 6:1).

¿Baʼaxten unaj k-confesartik k-kʼebanoʼob?

Ken lúubuk máak tiʼ upʼéel kʼebaneʼ, kex chichan wa kex nojcheʼ, ku beetik u pʼáatal maʼ u  biskuba maʼalob yéetel u maasil mix yéetel Dios. Tu yoʼolal lelaʼ maʼ xaaneʼ ku jach chiʼichnaktal wa ku lúubul u yóol. Lelaʼ ku yúuchul tumen Dioseʼ u tsʼaamajtoʼon upʼéel conciencia (Romailoʼob 2:14, 15). ¿Baʼax jeʼel u páajtal k-beetik wa ku chiʼichnaktal k-concienciaeʼ?

Koʼoneʼex kaʼa ilik u libroi Santiago, tuʼux ku yaʼalik: «¿Yaan wa máax kʼojaʼan? Unaj u tʼanik u nuukiloʼob le [múuchʼuliloʼ], utiaʼal ka payalchiʼinakoʼob tu yoʼolal yéetel utiaʼal ka jiʼikʼabtaʼak yéetel aceite tu kʼaabaʼ Yuumtsil. Le ken payalchiʼinakoʼon yéetel oksaj óolaleʼ, le kʼojaʼanoʼ yaan u tojtal u yóol, yéetel yaan u líikʼsaʼal tumen Yuumtsil; yéetel wa kʼebanchajaʼaneʼ yaan u [saʼatsaʼal]» (Santiago 5:14, 15).

Teʼelaʼ táan u tʼaan tiʼ baʼax unaj u beetik le ancianoʼob utiaʼal u yáantik le sukuʼunoʼob u maas natsʼubaʼob tiʼ Diosoʼ. Letiʼobeʼ maʼ chéen tsʼaʼanoʼob utiaʼal ka u yuʼuboʼob u confesarkuba máakiʼ, baʼaxeʼ yojloʼobeʼ yaan u yáantkoʼob le «máax kʼojaʼan» wa le máax tsʼoʼok u kʼebantal utiaʼal «u tojtal u yóol[oʼ]». Koʼox ilik kaʼapʼéel tiʼ le baʼaxoʼob ku yaʼalik Santiagooʼ

Yáaxeʼ koʼox ilik baʼax u kʼáat u yaʼal «ka jiʼikʼabtaʼak yéetel aceite». Teʼelaʼ táan u tʼaan tiʼ bix u yáantik máak le Bibliaoʼ. Le apóstol Pablooʼ tu yaʼaleʼ «u tʼaan Jajal Dioseʼ kuxaʼan yéetel yaan u páajtalil [...] yéetel ku jóokʼesik tiʼ sáasil u tuukuloʼob yéetel baʼaxoʼob u kʼáat u beet le puksiʼikʼaloʼ»; lelaʼ u kʼáat u yaʼaleʼ le baʼax ku yaʼalikoʼ ku kʼuchul tu maas taamil k-puksiʼikʼal (Hebreob 4:12). Yéetel le Bibliaoʼ, le ancianoʼoboʼ jeʼel u páajtal u yáantkoʼob le sukuʼunoʼob tsʼoʼok u kʼebantaloʼoboʼ. ¿Bix u beetkoʼob? Ken u yáantoʼob le sukuʼunoʼob yéetel le Biblia utiaʼal ka u yiloʼob baʼax beet u yantal le talamil tiʼobaʼ yéetel u yilkoʼob baʼax ken u beetoʼob utiaʼal u kaʼa antaloʼob maʼalob tu táan Dios.

Santiagoeʼ tu yaʼalaj xan le tʼaanoʼobaʼ: «Ken payalchiʼinakoʼon yéetel oksaj óolal». Yáaxeʼ kʼaʼabéet k-kʼaʼajsikeʼ le oración ku beetik le ancianoʼoboʼ maʼatech u beetkoʼob u kʼexpajal bix kun meyaj tiʼ Dios u justicia. Baʼaleʼ Dios, máax u kʼáat u perdonartoʼon tu yoʼolal u kuxtal Jesús tu kʼuboʼ, ku yilik bey upʼéel baʼal jach kʼaʼabéet u beetaʼaleʼ (1 Juan 2:2). Dioseʼ jach u kʼáat u yáant le máax jach ku yaatal u yóol yéetel ku «ku yeʼesik tsʼoʼok u kʼexik u kuxtaloʼ» (Beetaʼanoʼob 26:20).

Baʼaleʼ upʼéel baʼaxten jach kʼaʼanan k-confesartik le kʼebanoʼob k-beetik tu contra k-éet máakil wa tu contra Diosoʼ, tumen k-kʼáat antal maʼalob tu táan. Jesuseʼ tu yaʼaleʼ utiaʼal ka k-meyajt Dios yéetel upʼéel maʼalob concienciaeʼ, yáax unaj k-utskíintik le talamiloʼob ku yantaltoʼon yéetel u maasiloʼ (Mateo 5:23, 24). Proverbios 28:13 ku yaʼalik xan: «Máax ku muklik kʼebaneʼ, maʼ bíin xiʼik utsil tiʼiʼ; baʼaleʼ máax ku [yaʼalik] yéetel ku pʼatikeʼ bíin saʼatsaʼak u siʼipil». Bey túunoʼ wa k-eʼesik kabal óolal yéetel k-kʼáatik tiʼ Jéeoba ka u perdonartoʼoneʼ, letiʼeʼ yaan u perdonartkoʼon yéetel yaan u tsʼáaiktoʼon yaʼab utsiloʼob (1 Pedro 5:6).

[Tsolajiloʼob]

[U tsolajil le oochel teʼ táan juʼun 23]

Dioseʼ jeʼel u perdonarkoʼon wa k-kʼáatik tiʼ tu kʼaabaʼ Jesuseʼ

[U tsolajil le oochel teʼ táan juʼun 24]

Upʼéel baʼaxten jach kʼaʼanan k-confesartik k-kʼebanoʼobeʼ, tumen k-kʼáat antal maʼalob tu táan Dios