U kaʼansajoʼob Jesús

Bix jeʼel u yantaltech le jaajil kiʼimak óolaloʼ

¿Baʼax kʼaʼabéet utiaʼal u yantaltoʼon le jaajil kiʼimak óolaloʼ?

▪ Le ka tu káajsaj u kaʼansaj Jesús teʼ sermón del monteoʼ, tu chʼaʼachiʼitaj le kiʼimak óolaloʼ. Letiʼeʼ tu yaʼalaj: «Kiʼimak u yóol le máaxoʼob ku yilkoʼob u kʼaʼabéetil u natsʼkubaʼob tiʼ Diosoʼ» (Mateo 5:3, NM). ¿Baʼax tu yóotaj u yaʼal Jesús yéetel lelaʼ?

Utiaʼal u páajtal u kuxtal máakeʼ kʼaʼabéet u chʼaʼik u yiikʼ, u janal yéetel u yukʼik jaʼ. Tak le baʼalcheʼob kʼaʼabéet le baʼaloʼob bey tiʼobaʼ. Baʼaleʼ utiaʼal u yantaltoʼon kiʼimak óolaleʼ kʼaʼabéet uláakʼ baʼal: k-naʼatik jach baʼax u biilal k-kuxtal. Yéetel chéen Dios jeʼel u yáantkoʼon k-naʼateʼ. Yoʼolal lelaʼ Jesuseʼ tu yaʼalaj: « Maʼ chéen yéetel waaj bíin kuxlak wíinikiʼ, baʼaleʼ tak yéetel tuláakal u tʼaan Jajal Dios» (Mateo 4:4). Bey túunoʼ le kiʼimak óolaloʼ, chéen jeʼel u yantaltoʼon wa k-ilik u kʼaʼananil k-meyajtik Dioseʼ. Yéetel chéen jeʼel u páajtal u yantaltoʼon wa k-natsʼikba tiʼ Jéeoba le «Dios kiʼimak u yóoloʼ» (1 Timoteo 1:11, NM). Tsʼoʼoleʼ letiʼeʼ ku yaʼalik u tsʼáaiktoʼon upʼéel baʼal jach kʼaʼanan utiaʼal u yantaltoʼon le kiʼimak óolaloʼ: u jatsʼuts páajtalil k-kuxtal tiʼ upʼéel luʼum tuʼux minaʼan talamiloʼob.

¿Bix úuchik u líiʼsaʼal u yóol u maasil tumen Jesús?

▪ Jesuseʼ tu yaʼalaj xan: «Kiʼ u yóoloʼob le máaxoʼob kabal u yóol u puksiʼikʼaloʼoboʼ, tumen bíin utiaʼaltoʼob le luʼumaʼ» (Mateo 5:5). Le úuchik a tsʼakik le kʼojaʼanoʼob yéetel u kaʼa kuxkíintik le kimenoʼoboʼ, Jesuseʼ tu yeʼesaj yaan upʼéel jatsʼuts baʼal ku taal u kʼiin. Le baʼax tu kaʼansoʼ jach tu tsʼáaj esperanza tiʼ le máakoʼoboʼ. Letiʼeʼ tu yaʼalaj: «Jajal Dioseʼ tu sen yaabiltaj le yóokʼol kaabaʼ, ka tu tsʼáaj u juntúuliliʼ Paal, utiaʼal tuláakal le máax ku yoksik u yóol tiʼeʼ maʼ u saʼatal, baʼaleʼ ka yanak kuxtal minaʼan u xuul tiʼ» (Juan 3:16). Utiaʼal u yantal kuxtal minaʼan u xuul tiʼ máak way Luʼumeʼ, kʼaʼabéet u tsʼáaik u fe tiʼ Dios yéetel u beetik baʼax utstutʼaan. ¡Chéen máans ta tuukul a kuxtal yéetel máaxoʼob utsoʼob yéetel tuʼux mix bikʼin kun chʼíijloʼob! Le oʼolal le Bibliaoʼ ku yaʼalikeʼ unaj u yantaltoʼon kiʼimak óolal yoʼolal le esperanza yaan toʼonoʼ (Romailoʼob 12:12). Baʼaleʼ Jesuseʼ tu yaʼalaj baʼax jeʼel u yáantkoʼon utiaʼal ka yanaktoʼon kiʼimak óolal teʼ kʼiinoʼobaʼ.

 ¿Baʼax tu yaʼalaj Jesús jeʼel u taasiktoʼon kiʼimak óolaleʼ?

▪ Jesuseʼ tu tsʼáaj tsolnuʼukoʼob tu yoʼolal bix unaj u biskuba máak yéetel u maasil, bix unaj u yilaʼal le tsʼoʼokol beeloʼ, bix unaj u yilaʼal le ayikʼaliloʼoboʼ yéetel tʼaanaj xan tiʼ jatsʼuts modosoʼob jeʼex le kabal óolaloʼ (Mateo 5:21-32; 6:1-5, 19-34). Wa k-beetik le baʼaxoʼob tu kaʼansoʼ yaan u yantaltoʼon kiʼimak óolal.

Koʼoneʼex ilik baʼax tu yaʼalaj yoʼolal u yeʼesik u yutsil máak (Beetaʼanoʼob [Hechos] 20:35). Utéenjeakeʼ Jesuseʼ tu yaʼalaj: «Ken a beet jumpʼéel kʼiimbesajeʼ, tʼan le óotsiloʼoboʼ, le nuumoʼoboʼ, le móochoʼoboʼ yéetel le chʼóopoʼoboʼ. Beyoʼ bíin kiʼimakchajak a wóol, tumen letiʼobeʼ maʼ tu páajtal u boʼotikechoʼob, baʼaleʼ techeʼ bíin a kʼam a boʼolil tu kʼiinil u kaʼapúut kuxtal le máaxoʼob utsoʼoboʼ» (Lucas 14:13, 14). Jeʼex k-ilkoʼ le kiʼimak óolaloʼ ku taal tiʼ u kaxtik máak u yutsil u maasil.

¿Baʼax jeʼel u maas taasiktoʼon kiʼimak óolaleʼ?

▪ K-áantik u maasileʼ ku taasik kiʼimak óolal. Baʼaleʼ u meyajtaʼal Dioseʼ, maas jeʼel u taasik kiʼimak óolaleʼ. Jesuseʼ tu yaʼaleʼ le kiʼimak óolalaʼ maʼ tu keʼetel yéetel le ku yuʼubik le taatatsiloʼob yoʼolal wa baʼax ku beetik u paalaloʼoboʼ. Utéenjeakeʼ «juntúul koʼolel[eʼ] tu kʼaʼam aʼalaj ichil le máakoʼoboʼ: ¡Kiʼ yóol le koʼolel tu síijsajechoʼ yéetel tu tséentajechoʼ! Baʼaleʼ letiʼeʼ tu yaʼalaj: ¡[Maas] kiʼimak yóol le máaxoʼob ku yuʼubikoʼob yéetel ku beetikoʼob baʼax ku yaʼalik Jajal Dios!» (Lucas 11:27, 28).

Jesuseʼ jach kiʼimak u yóol kaʼach ikil u beetik baʼax ku yaʼalik u Taata, ichil lelaʼ táakaʼan u tsʼáaik ojéelbil yaan u yantal kuxtal minaʼan u xuul. Le oʼolaleʼ le ka tsʼoʼok u tsolik tiʼ utúul koʼolel lelaʼ, tu yaʼalaj: «In janaleʼ in beetik u yóolal le máax túuxtenoʼ» (Juan 4:13, 14, 34). Toʼon xaneʼ yaan u kiʼimaktal k-óol wa k-beetik baʼax utstutʼaan Dios: k-kaʼansik le baʼax ku yaʼalik le Biblia tiʼ uláakʼ máakoʼoboʼ.

Utiaʼal a wojéeltik u maasileʼ ilawil u yáax xookil le libroaʼ ¿Baʼax jach tu jaajil ku kaʼansik le Bibliaoʼ?, beetaʼan tumen u j-jaajkunajoʼob Jéeoba.

[U tsolajil le oochel teʼ táan juʼun 16]

Utiaʼal u yantaltoʼon kiʼimak óolaleʼ kʼaʼabéet k-naʼatik jach baʼax u biilal k-kuxtal