Kaʼans a paalaleʼex

¿Baʼaxten maʼ séeb tsʼaʼak Lázaro tumen Jesusiʼ?

JESUSEʼ tiaʼan kaʼach tuláakʼ juntséel u áalkab jaʼil Jordaneʼ yéetel táant u yojéeltik kʼojaʼan Lazaroeʼ. Teʼ súutukoʼ Jesuseʼ náach yanil tiʼ Betania, le tuʼux kajaʼan Lázaro yéetel u kiikoʼob ku kʼaabaʼtikoʼob, Marta yéetel María. Kex náacheʼ letiʼobeʼ tu túuxtoʼob aʼalbil tiʼ Jesús kʼojaʼan Lázaro, utiaʼal ka u tsʼake. Tumen u yojloʼobeʼ Jesuseʼ tsʼokaʼaniliʼ u tsʼakik uláakʼ máakoʼob xaneʼ (Mateo 8:5-13; Juan 11:1-3).

Baʼaleʼ Jesuseʼ maʼ tu jáan ilaj u tsʼakik Lazaroiʼ. Le Bibliaoʼ ku yaʼalikeʼ «pʼat uláakʼ kaʼapʼéel kʼiin teʼ tuʼux yaan kaʼachoʼ» (Juan 11:6). ¿A kʼáat wa a wojéelt baʼaxten tu beetaj Jesús leloʼ? *... Koʼox ilik baʼax uláakʼ úuchi.

Ka tsʼoʼok u máan kaʼapʼéel kʼiineʼ Jesuseʼ yojliliʼ tsʼoʼok u kíimil Lazaroeʼ, le oʼolaleʼ ku yaʼalik tiʼ u apostoloʼob: «Koʼoneʼex Judea tu kaʼatéen». Jach jakʼaʼan u yóoloʼob, le oʼolaleʼ ku yaʼalikoʼob: «Maʼ úucheʼ u judíoiloʼob le kúuchiloʼ tu yóoltajoʼob u muruxtuntechoʼob, ¿táan wa túun a bin tu kaʼatéen teʼeloʼ?». Jesuseʼ ku yaʼaliktiʼob: «K-amigo Lazaroeʼ táan u wenel, baʼaleʼ bin in kaʼaj in wajse».

Le apostoloʼoboʼ ku kaʼa aʼalikoʼob: «Yuumtsil, wa táan u weneleʼ, u kʼáat u yaʼaleʼ táan u maʼalobtal». Jesuseʼ ku yaʼalik túun tiʼob: «Lazaroeʼ tsʼoʼok u kíimil». Tsʼoʼoleʼ ku yaʼalik tiʼob upʼéel baʼal ku beetik u xaʼakʼpajal u tuukuloʼob: «Ku kiʼimaktal in wóol tumen maʼ anjien teʼeloʼ, tumen beyoʼ uts a tiaʼal teʼex [...]. Baʼaleʼ koʼoneʼex tu yiknal».

Tomás, utúul tiʼ u apostoloʼoboʼ, ku yaʼalik tiʼ u maasiloʼob: Koʼoneʼex tak toʼon kex ka kíimsaʼakoʼon. U yojloʼobeʼ le máaxoʼob pʼekmil Jesusoʼ, yaan u kaxtikoʼob bix jeʼel u kíimskoʼobeʼ yéetel maʼ xaaneʼ tak letiʼob kun kíimsbiloʼob. Baʼaleʼ kex beyoʼ ku binoʼob tu yéetel. Ku tsʼoʼokol u máan kaʼapʼéel kʼiineʼ kʼuchoʼob teʼ kaaj tuʼux kajakbal kaʼach Lazarooʼ, le kaajaʼ óoxpʼéel kilometroʼob yanil tiʼ Jerusalén (Juan 11:7-18).

¿A wojel wa baʼaxten maʼ tu yóotaj Jesús séeb kʼuchliʼ?... Jesuseʼ tsʼokaʼaniliʼ u kaʼa kuxkíintik uláakʼ máakoʼobeʼ, baʼaleʼ maʼ xáanak kíimkoʼob ka tu kaʼa kuxkíintoʼobiʼ (Lucas 7:11-17, 22; 8:49-56). Baʼaleʼ ka kʼuch Jesús tuʼux kajaʼan kaʼach Lazaroeʼ tsʼoʼok u máan kampʼéel kʼiinoʼob muʼukuk. Le oʼolaleʼ mix máak jeʼel u páajtal u yaʼalik wa maʼ jach kimen Lazaroiʼ.

Le ka tu yojéeltaj Marta táan u kʼuchul Jesús teʼ kaajoʼ, bin áalkabil u yile. Letiʼeʼ ku yaʼaliktiʼ: «Yuumtsil wa ka yanakech wayeʼ, maʼ tu kíimil kaʼach in sukuʼuneʼ». Utiaʼal u líiʼsik yóoleʼ, ku yaʼaliktiʼ: «A sukuʼuneʼ yaan u kaʼa kuxtal». Marta túuneʼ ku suut tu yotocheʼ yéetel ku yaʼalik tiʼ María, u kiik: «Le j-kaʼambesajoʼ wayaneʼ yéetel tu túuxtaj tʼanbilech».

U vecinoʼob yéetel u amigoʼoboʼ ku yilkoʼob u jóokʼol María yéetel tumen ku tuklikoʼob táan u bin teʼ tuʼux muʼuk u sukuʼunoʼ ku binoʼob tu paach. Baʼaleʼ letiʼeʼ bin u yil Jesús. Le ka tu yilaj táan u yokʼol María bey xan  le máaxoʼob láakʼintikoʼ Jesuseʼ joʼopʼ u yokʼol xan. Tsʼoʼoleʼ ku binoʼob teʼ tuʼux muʼuk Lazarooʼ yéetel kex makaʼan yéetel upʼéel nojoch tuuncheʼ Jesuseʼ ku yaʼalik: «Lukʼeseʼex le tuunichoʼ». Baʼaleʼ Martaeʼ ku yaʼalik: «Yuumtsil, tsʼoʼok u tuʼutal u book, tumen tsʼoʼok kamp’éel k’iin muʼukuk».

Baʼaleʼ le máakoʼoboʼ ku beetkoʼob baʼax ku yaʼalik Jesús yéetel ku luʼskoʼob le tuunichoʼ. Letiʼ túuneʼ ku orar tiʼ Dioseʼ yéetel ku tsʼáaik u nib óolalil tiʼ ikil u tsʼáaik u páajtalil u kaʼa líiʼsik Lázaro. Tsʼoʼoleʼ ku kʼaʼam aʼalik: «¡Lázaro, jóokʼen teʼeloʼ!». ¿Baʼax túun ku yúuchul? Lazaroeʼ ku jóokʼol. Tumen «kʼaxaʼantak u kʼaboʼob bey xan u yookoʼob yéetel u tsíitsilal nookʼoʼob[eʼ]», Jesuseʼ ku yaʼalik: «Wachʼeʼex ka chaʼex u bin» (Juan 11:19-44).

¿Ka naʼatik wa baʼaxten maʼ tu séeb áantaj Jesús u amigooʼ?... Tumen beyoʼ jeʼel u páajtal kaʼach u maas eʼesik u nojoch páajtalil Jéeoba u Taataoʼ. Jesuseʼ tu kanaj u yéey u súutukil utiaʼal u yáantik, yéetel yoʼolal lelaʼ yaʼab máaxoʼob joʼopʼ u meyajtik Dios (Juan 11:45). ¿Yaan wa baʼax jeʼel u páajtal a kanik teech tiʼ le baʼax tu beetaj Jesusoʼ?...

Kex teech maʼ tu páajtal a kaʼa kuxkíintik mix máak jeʼex tu beetil Jesuseʼ, jeʼel u páajtal a yéeyik u súutukil utiaʼal a tsikbaltik tiʼ uláakʼ máakoʼob le baʼaxoʼob jatsʼutstak tsʼoʼok u beetik Diosoʼ yéetel le ken u beet maʼ kun xáantaloʼ. Maʼ xaaneʼ lelaʼ jeʼel u páajtal a tsikbaltik tiʼ a wéet xookoʼobeʼ wa tiʼ a maestroʼob. Jeʼel u páajtal xan a aprovechartik a tʼaan tiʼ le baʼaxoʼob ken u beet u Reino Dios ken kʼaʼabéetchajak a tʼaan tu táan a wéet xookoʼoboʼ. Beyaʼ yaan a wáantik uláakʼ máakoʼob u kʼaj óoltoʼob Jéeoba, le máax yaan u páajtalil yéetel ku tsʼíiboltik u kaʼa kuxkíint le máaxoʼob k-yaabiltmaj tsʼoʼok u kíimloʼoboʼ.

[Tsolajiloʼob]

KʼÁATCHIʼOB:

▪ ¿Baʼaxten maʼ séeb tsʼaʼak Lázaro tumen Jesusiʼ?

▪ ¿Baʼaxten tu yaʼalaj Tomás jeʼel kaʼach u kíimsaʼaloʼob xan wa ka u láakʼintoʼob Jesuseʼ?

▪ ¿Máax tsʼáa u páajtalil tiʼ Jesús utiaʼal u kaʼa kuxkíintik Lázaro?

▪ ¿Baʼax jeʼel u páajtal a kanik tiʼ le baʼax tu beetaj Jesusoʼ?