Maʼalob péektsiloʼob ich 500 tʼaanoʼob

YOʼOLAL le baʼateʼel anchaj tu luʼumil Ruandaoʼ u múuchʼ máakoʼob ku suttʼaanoʼobeʼ púutsʼoʼob. Úuchik u púutsʼloʼobeʼ tu pʼatoʼob tuláakal baʼax yaan tiʼob kaʼachi. Baʼaleʼ páajchaj u biskoʼob u mejen computadoraʼob. ¿Baʼaxten kʼaʼabéetchaj u bisik u computadoraʼob? Tumen le kun meyajtiʼob utiaʼal u seguer u sutikoʼob le revistaʼob yéetel le libroʼob ku tʼaanoʼob tiʼ le Biblia ich kiniaruandaoʼ.

Tu noojolil u luʼumil Asiaeʼ utúul x-chʼúupaleʼ, maʼ tu séeb pʼatik u suttʼaan yéetel u computadora kex tsʼoʼok u yáakʼabtal. Tsʼoʼoleʼ tumen tsʼoʼok u kaʼanal, ooxol yéetel láaj hora tu bin le corrienteoʼ, maʼ chéen chʼaʼabil u meyajiʼ, kex beyoʼ maʼ tu pʼatik. ¿Baʼaxten? Tumen beyoʼ séeb kun imprimirtbil le revistaʼob yéetel le libroʼob ku sutkoʼ.

Tuláakal le máaxoʼob ku suttʼaanoʼoboʼ 2,300 utúulaloʼob, letiʼobeʼ táan u meyajoʼob tiʼ 190 jejeláas tuʼuxoʼob tiʼ tuláakal yóokʼol kaab. Le xiiboʼob yéetel le koʼoleloʼob ku táakpajloʼob teʼ suttʼaanoʼ, yaan kex 20 wa tak 90 jaʼab tiʼob. Letiʼobeʼ ku beetkoʼob le meyajaʼ utiaʼal ka naʼataʼak ich 500 jejeláas tʼaanoʼob le baʼaloʼob maʼalobtak ku kaʼansik le Bibliaoʼ (Apocalipsis 7:9).

Utiaʼal jejeláas makoʼob

Teʼ tu tsʼook jaʼaboʼobaʼ le suttʼaan ku beetik u j-jaajkunajoʼob Jéeobaoʼ (testigos de Jehová) táan u bin u maas yaʼabtal. Tu jaʼabil 1985, le revista La Atalaya kʼaj óolaʼan ich maya U Pʼíich Tulumil Kananoʼ, ku jóoʼsaʼal ich 23 jejeláas tʼaanoʼob. Bejlaʼeʼ le revistaaʼ ku jóoʼsaʼal ich 176 tʼaanoʼob, tsʼoʼoleʼ tumen u puul u láaj jóoʼloʼobeʼ ku béeychajal xan u xoʼokol igual tiʼ tuláakal yokʼol kaab.

Ichil le 176 tʼaanoʼoboʼ, cincuenta upʼéeleleʼ minaʼan uláakʼ publicación jóoʼsaʼan, chéen le revista U Pʼíich Tulumil Kananoʼ. ¿Baʼaxten? Tumen yaʼab empresaʼobeʼ ku tuklikoʼobeʼ chéen yaan u peʼertik u taakʼinoʼob wa ka u jóoʼsoʼob libroʼob wa revistaʼob. Baʼaleʼ u j-jaajkunajoʼob Jéeobaeʼ maʼ bey u tuukuloʼobiʼ. Letiʼobeʼ u kʼáatoʼob ka xoʼokok le baʼax ku yaʼalik le Biblia tumen tuláakal máakoʼ. Le revistaʼob yéetel le libroʼob ku beetkoʼob utiaʼal ka xoʼokok tuláakal tuʼuxoʼ ku béeytal yéetel taakʼin ku tsʼáaikoʼob letiʼoboʼ (2 Corintoiloʼob 8:14).

Baʼaleʼ ¿ku taasik wa utsiloʼob u beetaʼal le meyajaʼ? Yaʼab máaxoʼob jach ku kiʼimaktal u yóoloʼob ken u kanoʼob le baʼax ku kaʼansik le Biblia ichil u tʼaanoʼoboʼ. Maʼ úucheʼ utúul koʼoleleʼ tu kʼamaj U libroi tsikbaliloʼob tiʼ le Bibliaoʼ ich mískito, * upʼéel tʼaan maʼ úuch joʼopʼok u beetaʼal libroʼob yéetel revistaʼobiʼ, yéetel ku tʼaʼanal tumen 200,000 máakoʼob tu luʼumil Nicaragua. Le ka tsʼaʼab le libro tiʼ le koʼolelaʼ teʼ yaan u pastori u iglesia tu yiknaleʼ, tumen jach jatsʼuts ilaʼabik le libro tumen le pastoroʼ tu kʼáatajtiʼ. Baʼaleʼ le koʼolelaʼ kex aʼalaʼab u tsʼaʼabal 20 kilos café tiʼ tu yoʼolal le librooʼ, maʼ tu yóotiʼ.

 Ichil le diez jaʼaboʼob tsʼoʼok u máanoʼoboʼ tsʼoʼok u suʼutul libroʼob yéetel revistaʼob ku tʼaanoʼob tiʼ le Biblia ich maas tiʼ quince tʼaanoʼob ku beetaʼal tu luʼumil Mexicooʼ, ichil leloʼobaʼ táakaʼan maya, náhuatl yéetel tsotsil. Yoʼolal lelaʼ le múuchʼuliloʼob ich péeksajkʼab tʼaan yéetel ichil le tʼaanoʼobaʼ tsʼoʼok u maas yaʼabtal, tiʼ 72 múuchʼuliloʼob yaan kaʼacheʼ bejlaʼeʼ tsʼoʼok u chukik 1,200. Leloʼ ku chíikbesikeʼ Dioseʼ táan u beetik u kʼaʼamal le maʼalob péektsil ku kʼaʼaytik u j-jaajkunajoʼob Jéeobaoʼ (1 Corintoiloʼob 3:5-7).

Upʼéel libro tsʼoʼok u suʼutul ich 80 tʼaanoʼob

Bejlaʼeʼ u j-jaajkunajoʼob Jéeobaeʼ ku imprimirkoʼob tu túulisil wa chéen táanchumuk tiʼ le Traducción del Nuevo Mundo de las Santas Escrituras, ich 80 tʼaanoʼoboʼ. ¿Baʼax ku tuklik yaʼab máakoʼob yoʼolal le meyaj ku beetaʼalaʼ? Ka tʼaanaj utúul J-jaajkunaj sudafricano yoʼolal le Biblia yaan ich tsuanaoʼ, tu yaʼalaj: «¡Jach tsʼoʼok u yáantken! Tumen séeb u naʼataʼal baʼax ku yaʼalikeʼ jach utstinwich in xokik. Lelaʼ yaan u yáantken utiaʼal maʼ u xuʼulul in xokik u Tʼaan Dios». Uláakʼ utúul J-jaajkunaj kajaʼan Mozambiqueeʼ tu yaʼalaj: «Yantoʼon uláakʼ publicacionoʼob ich tsonga, baʼaleʼ minaʼantoʼon kaʼach le Bibliaoʼ. Lelaʼ bey ka kíilbanak yéetel ka léembanak kaʼach le cháakoʼ, baʼaleʼ maʼ tu kʼáaxal u jaʼil. Le ka anchajtoʼon le Traducción del Nuevo Mundo ich tsongaoʼ bey kʼáaxal tu beetaj túun le jaʼoʼ».

Le máaxoʼob sutik bey xan le máaxoʼob beetik u kʼuchul tiʼ uláakʼ máakoʼob le baʼaxoʼob ku yaʼalik le Bibliaoʼ táan u beetkoʼob le baʼax ku yaʼalik upʼéel úuchben profecíaoʼ. Le profecíaaʼ Jesús aʼalmil: «U maʼalob péektsil le [reinooʼ] bíin tseʼektaʼak tiʼ tuláakal yóokʼol kaab, utiaʼal ka kʼaj óoltaʼak tumen tuláakal kaajoʼob; letiʼ túun ken taalak u xuul» (Mateo 24:14).

[Tsolajiloʼob]

[U tsolajil le oochel teʼ táan juʼun 15]

TRADUCCIÓ DEL ULÁAKʼ

NUEVO MUNDO PUBLICACIONOʼOB

Tu túulisil wa

tu táanchumukil

80 2010 500 2010

36 2000

13 1990 200 1990

190 1980

7 1970 165 1970

125 1960

1 1950 88 1950

LE JAYPʼÉEL TʼAANOʼOB SUTAʼANOʼ

[U tsolajil le oochel teʼ táan juʼun 15]

2,300 máaxoʼob ku suttʼaanoʼob ich 500 jejeláas tʼaanoʼob

BENÍN

ESLOVENIA

ETIOPÍA

GRAN BRETAÑA