Jéeobaeʼ u yaabiltmaj le máaxoʼob kabal u yóoloʼoboʼ
Ilawil a natsʼkaba tiʼ Dios
Jéeobaeʼ u yaabiltmaj le máaxoʼob kabal u yóoloʼoboʼ
UTSʼÍIBOLTIK máak baʼax maʼ utiaʼaliʼ, u ketkuba yéetel u maasil yéetel u taaskuba nojbaʼalileʼ, letiʼe modosoʼob jach ku yilaʼal bejlaʼoʼ. Baʼaleʼ ¿ku náatsʼkoʼon wa tiʼ Dios le modosoʼob beyaʼ? Maʼatech. Jéeobaeʼ u kʼáat ka meyajtaʼak tumen máaxoʼob utsoʼob yéetel kabal u yóoloʼob. Koʼox ilik bix u yeʼesik le capítulo 12 tiʼ Numerosoʼ. Teʼelaʼ ku tʼaan tiʼ upʼéel baʼax úuch tu desiertoi Sinaí le maʼ úuch jóokʼok u kaajil Israel tu kaajil Egiptooʼ.
Le Bibliaoʼ ku yaʼalikeʼ Míriam yéetel Aaroneʼ «joʼopʼ u yaʼalikoʼob baʼal tiʼ Moisés» u yíitsʼinoʼob (versículo 1). Le ken u yaʼal le Biblia joʼopʼ u tʼaanoʼob tu contra Moisesoʼ, u kʼáat u yaʼal tu máan u tsikbaltoʼob baʼaloʼob maʼ jaajtak yoʼolaliʼ. Maʼ xaaneʼ Míriam káajs le aʼalaj baʼaloʼ, tumen letiʼ ku yáax chʼaʼachiʼitaʼal. Le talamilaʼ anchaj tumen tsʼoʼok u beel Moisés yéetel utúul cusita. ¿U pʼeek wa túun Míriam le baʼax úuchaʼ? ¿Sajak wa kaʼach u mixbaʼalkuntaʼal tumen utúul koʼolel táanxel luʼumil u taal?
U jaajileʼ yaan uláakʼ baʼax oʼolal anchaj le talamilaʼ tumen Míriam yéetel Aaroneʼ tu yaʼaloʼob: «Yuumtsileʼ maʼ tʼaanaj chéen tu yoʼolal Moisesiʼ; tsʼoʼok u tʼaan xan t-oʼolal» (versículo 2). Le baʼax jach u kʼáatoʼob kaʼachoʼ letiʼe ka tsʼaʼabak u maasil páajtalil yéetel ka eʼesaʼak tsiikil tiʼoboʼ.
Baʼaleʼ Moiseseʼ maʼ tu beetaj u cuentai le baʼaloʼob aʼalaʼab tu contraoʼ, tumen jeʼex u yaʼalik le Bibliaoʼ letiʼeʼ «juntúul jach kabal óolal máak teʼ luʼumaʼ» (versículo 3). * Letiʼeʼ chéen tu yilaj le baʼax ku yúuchloʼ tumen u yojleʼ Jéeobaeʼ táan u yilik tuláakal.
Le kʼaakʼas tʼaan ku beetik kaʼach Míriam yéetel Aaronoʼ, utiaʼal Dioseʼ tu contra ku beetaʼal. Tumen letiʼ yéeymil Moisés utiaʼal ka tʼaanak tu yoʼolal. Le oʼolal le ka tʼaanaj yéeteloʼobeʼ tu yaʼalaj bix u biskuba yéetel Moisés: «Kin tʼaan jeʼel bix u tsikbal juntúul máak tu táan u láakʼeʼ, [...] ¿baʼaxten ka táabaleʼex a waʼalikeʼex baʼal tiʼ?» (versículo 8). Le oʼolal úuchik u tʼaanoʼob kʼaas tu contra u yíitsʼnoʼoboʼ, u jaajileʼ tu contra Dios tʼaanajoʼob. Yoʼolal lelaʼ castigartaʼaboʼob.
Míriam le káajs u kʼaakʼas tʼaanoʼ tsaʼay lepra tiʼ. Ka tsʼoʼokeʼ Aaroneʼ tu yaʼalaj tiʼ Moisés ka u kʼáat tiʼ Dios ka áantaʼak. Chéen tukulteʼ Míriam le máax káajs u kʼaakʼastʼantik Moisesoʼ beoraaʼ yaan u kʼaʼabéettal u yáantaj tiʼ. ¿Baʼax túun tu beetaj Moisés? Kex chéen utéeniliʼ u yaʼalaʼal baʼax tu beetaj Moisés teʼ tsikbalaʼ, tu yeʼeseʼ jach uts, kabal u yóol yéetel chúukaʼan u yóol, le oʼolal tu kʼáataj tiʼ Jéeoba ka tsʼaʼakak Míriam. Yoʼolal lelaʼ utschaji, kex tu chʼaʼaj subtal tumen anchaj u yantal ich cuarentena siete kʼiinoʼob.
Le tsikbalaʼ ku yeʼesik le modosoʼob utstutʼaan yéetel le maʼ utstutʼaan Jéeobaoʼ. Wa k-kʼáat antal naatsʼ tiʼ Jéeobaeʼ maʼ unaj u yantaltoʼon modosoʼob jeʼex, u tsʼíiboltik máak baʼax maʼ utiaʼaliʼ, u ketkuba yéetel u maasil yéetel u taaskuba nojbaʼalil. Kʼaʼajaktoʼoneʼ Jéeobaeʼ u yaabiltmaj le máaxoʼob utsoʼob yéetel kabal u yóoloʼoboʼ. Letiʼeʼ ku yaʼalik: «Le kabal óoloʼoboʼ bíin utiaʼalintoʼob le luʼumaʼ, bíin kuxlakoʼob ichil nojoch jeetsʼel óolal» (Salmo 37:11; Santiago 4:6).
[Tsolajiloʼob]
^ xóot’ol 7 Le kabal óolaloʼ maʼ upʼéel modos ku mixbaʼalkúuntik máakiʼ, baʼaxeʼ ku yáantik máak utiaʼal ka chúukpajak u yóol u aktáant yéetel utiaʼal maʼ u sutik u jeel le baʼaxoʼob kʼaastak ku beetaʼal tiʼoʼ.