Ilawil a natsʼkaba tiʼ Dios

«Le Jajal Dios ku kiʼimakkúuntik k-óol mantatsʼoʼ»

2 Corintoiloʼob 1:3, 4

BEJLAʼEʼ yaʼab baʼaxoʼob beetik u chiʼichnaktal yéetel u lúubul u yóol máak. Teʼ súutukoʼob beyoʼ, maʼ xaaneʼ ku joʼopʼol k-tuklik máax jeʼel u yáantkoʼoneʼ. Apóstol Pabloeʼ tiʼ 2 Corintoiloʼob 1:3, 4, tu yaʼaleʼ yaan utúul máax jach jeʼel u yáantkoʼoneʼ: Jéeoba Dios.

Le versículo 3 ku yaʼalikeʼ Jéeobaeʼ letiʼe «Taata ku chʼaʼik tiʼ toʼon óotsililoʼ». ¿Baʼax u kʼáat u yaʼal lelaʼ? Le tekstoaʼ ich griegoeʼ, ku tsʼáaik xan naʼatbil Dioseʼ ku yuʼubik le baʼax k-muʼyajtikoʼ. * Le oʼolaleʼ jujuntúul máaxoʼob jach kaʼanchajaʼan u xookoʼobeʼ ku yaʼalikoʼobeʼ le tekstoaʼ jeʼel xan u páajtal u suʼutul «le Taatatsil jach ku yilik baʼax ku yúuchultoʼonoʼ» wa «le Taatatsil jach ku tuukul t-oʼolaloʼ». Tsʼoʼoleʼ Dioseʼ maʼ chéen «ku chʼaʼik tiʼ toʼon óotsilil[iʼ]», baʼaxeʼ ku yilik u yáantkoʼon. ¿Máasaʼ leloʼ ku péekskoʼon utiaʼal ka k-maas natsʼba tiʼ letiʼ?

Pabloeʼ tu yaʼalaj xaneʼ Jéeobaeʼ letiʼe «Jajal Dios ku kiʼimakkúuntik k-óol mantatsʼoʼ». Utúul máak u xokmaj baʼax u kʼáat u yaʼal u tʼaaniloʼob le Bibliaoʼ, ku yaʼalikeʼ le tʼaan griego ku suʼutul «kiʼimakkúuntik k-óol» u kʼáat u yaʼal: «U yáantaʼal wa u líiʼsaʼal u yóol utúul máax jach lubaʼan u yóol wa táan u máansik upʼéel talamil». Le libro The Interpreterʼs Bible, ku yaʼalik: «Ken kiʼimakkúuntaʼak u yóol utúul máax ku muʼyajeʼ bey táan u tsʼaʼabaltiʼ u muukʼil utiaʼal u aktáantik le talamil yantiʼoʼ».

Baʼaleʼ maʼ xaaneʼ jeʼel k-tuklikeʼ: «¿Bix u kiʼimakkúuntik k-óol Dios? ¿Bix u tsʼáaiktoʼon u muukʼil utiaʼal k-aktáantik le muʼyajiloʼ?». Maases ku beetik yéetel le Bibliaoʼ bey xan yéetel le páajtalil u tsʼaamajtoʼon utiaʼal k-orar tiʼoʼ. Pabloeʼ tu yaʼaleʼ yoʼolal «le kiʼimak óolal k-ilik teʼ tsʼíiboʼoboʼ», Dioseʼ ku tsʼáaiktoʼon esperanza. Upʼéel tiʼ le utsiloʼob ku taasiktoʼon k-orar yéetel u jaajil k-óol tiʼ Diosoʼ, letiʼe u yantaltoʼon «le jeetsʼel óolal» ku kanáantik k-puksiʼikʼal yéetel k-tuukuloʼ (Romailoʼob 15:4; Filiposiloʼob 4:7).

¿Tiʼ baʼax súutukiloʼob jeʼel u kiʼimakkúuntik k-óol Jéeobaeʼ? Pabloeʼ ku yaʼalik: «Jajal Dioseʼ ku kiʼimakkúuntik k-óol tiʼ tuláakal k-mukʼyajoʼob» (2 Corintoiloʼob 1:4). Le oʼolaleʼ jeʼel baʼalak chiʼichnakil, talamil wa muʼyajil ka yanaktoʼoneʼ, Dioseʼ yaan u tsʼáaiktoʼon u muukʼil utiaʼal ka chúukpajak k-óol aktáante. ¿Máasaʼ jach ku taasiktoʼon kiʼimak óolal k-ojéeltik leloʼ?

Baʼaleʼ maʼ chéen tiʼ toʼon ku taasik utsiliʼ. Jeʼex tu yaʼalil Pabloeʼ Dioseʼ ku kiʼimakkúuntik k-óol «utiaʼal ka páatak k-kiʼimakkúuntik u yóol le máaxoʼob ku mukʼyajoʼoboʼ, ikil k-tsʼáaiktiʼob le kiʼimak óolal u tsʼaamajtoʼon Jajal Diosoʼ». U jaajileʼ le baʼax ku beetik Jéeoba t-óolaloʼ ku péekskoʼon k-chʼaʼa óotsilil tiʼ u maasil yéetel k-áantkoʼob.

Jeʼex tsʼoʼok k-ilkoʼ, Jéeobaeʼ letiʼe «Jajal Dios ku kiʼimakkúuntik k-óol mantatsʼoʼ». Baʼaleʼ leloʼ maʼ u kʼáat u yaʼal wa jach bejlaʼa ken u luʼs tuláakal le baʼaxoʼob beetik k-muʼyajoʼ. K-ojleʼ letiʼeʼ yaan u kiʼimakkúuntik k-óol yéetel yaan u tsʼáaiktoʼon u muukʼil utiaʼal k-aktáantik le talamiloʼ. Dioseʼ jach ku chʼaʼiktoʼon óotsilil, le oʼolal jach unaj k-nojbeʼenkúuntik yéetel k-kiʼikiʼtʼantik.

[Tsolajiloʼob]