Le bix jeʼel u beetkuba máak u hijo Dioseʼ

KEX óoliʼ treinta jaʼaboʼob tsʼoʼokok le baʼateʼel anchaj tu luʼumil Coreaoʼ, upʼéel programa tiʼ televisioneʼ tu yáantaj le máakoʼob u kaxtoʼob u láakʼtsiloʼob saʼatoʼob le ka úuch le baʼateloʼ. Yoʼolal le baʼax beetaʼabaʼ once mil máakoʼob tu kaʼa yilubaʼob yéetel u láakʼtsiloʼob; lelaʼ jach tu taasaj kiʼimak óolal tiʼob. Upʼéel u periódicoi Coreaeʼ, tu yaʼalaj: «Mix utéen ilaʼan tu kaajil Corea u sen okʼol yaʼab máakoʼob tumen jach kiʼimak u yóoloʼob».

Tu luʼumil Brasileʼ, utúul chaambal ku kʼaabaʼtik Cezareʼ, kʼuʼub utiaʼal u boʼotaʼal upʼéel pʼaax. Ka máan diez jaʼaboʼobeʼ letiʼeʼ jach kiʼimakchaj u yóol úuchik u kʼaj óoltik u maama, le oʼolaleʼ kex ayikʼal le máaxoʼob yéetel kajaʼan kaʼachoʼ, tu pʼatoʼobeʼ ka bin kajtal yéetel u maama.

Utúul máak úuch náachkuntaʼak tiʼ u familiaeʼ jach ku kiʼimaktal u yóol le ken u kaʼa yiluba tu yéeteloʼob. Le Bibliaoʼ ku yaʼalik bix úuchik u náachkuntaʼal wíinikoʼob tiʼ Dios, baʼaleʼ ku yeʼesik xaneʼ teʼ kʼiinoʼobaʼ yaʼab máaxoʼob táan u kaʼa natsʼkubaʼob tiʼ letiʼ. ¿Bix úuchik u náachkuntaʼal wíinik tiʼ Dios? ¿Baʼax unaj k-beetik utiaʼal k-antal naatsʼ tiʼ k-Taata?

Baʼax beet u náachtal wíinik tiʼ Dios

Le salmistaoʼ tu yaʼalaj tu yoʼolal Jéeoba: «Tiʼ teech yaan u sayabil le kuxtaloʼ» (Salmo 36:9). Jéeobaeʼ, utúul taatatsil yaan yaʼab u paalal. Ichil u paalaloʼobeʼ tiaʼan le wíinikoʼob yanoʼob way Luʼumeʼ yéetel le angeloʼob yanoʼob teʼ kaʼanoʼ.

Jeʼex úuchik u tsoʼolol teʼ xook máanikoʼ, le ka kʼebanchaj Adán, u yáax paal Dios way Luʼumeʼ, tu náachkuntaj wíinikoʼob tiʼ le Máax beetmailoʼoboʼ (Lucas 3:38). Yoʼolal le baʼax tu beetaʼ, letiʼeʼ pʼat maʼ u hijo Diosiʼ, bey xan le máaxoʼob maʼ síijkoʼob kaʼachoʼ. Jéeobaeʼ tu beetaj u tsʼíibtaʼal baʼax úuch le úuchik u kʼebankúuntkuba Adanoʼ: «Loolob wíinikeʼex, táaj kʼeecheleʼex, tsʼoʼok a pochʼikeʼex [Dios], maʼ ta náajmatikeʼex u paaliltikeʼex». Le wíinikoʼob túunoʼ «kʼeechel» yaniloʼob wa yaan kʼeban tu wíinkliloʼob; lelaʼ le náachkuntoʼob tiʼ Dios, le máax jach kiliʼich wa limpio tiʼ tuláakal baʼaloʼ (Deuteronomio 32:4, 5; Isaías 6:3). Tiʼ uláakʼ tʼaanoʼobeʼ, wíinikoʼobeʼ saʼatoʼob wa pʼat minaʼan u taataʼob (Efesoiloʼob 2:12).

 Le Bibliaoʼ ku yaʼalikeʼ le máaxoʼob minaʼanoʼob ichil u paaloʼob Diosoʼ u «enemigoʼo[b]» Dios (Romailoʼob 5:8, 10). Wíinikeʼ náach yanil tiʼ Dios, le oʼolal táan u muʼyaj tu yáanal u nuʼuktaj Satanás yéetel tu yoʼolal le talamiloʼob tu taasaj le kʼeban yanchajoʼ (Romailoʼob 5:12; 1 Juan 5:19). Utúul kʼeban wíinikeʼ, ¿jeʼel wa túun u páajtal u beetkuba utúul tiʼ u paalal Dioseʼ? ¿Jeʼel wa u kʼuchul u beetuba máak u paal Dios jeʼex Adán yéetel Eva le maʼ u kʼebankúuntubaʼoboʼ?

Táan u muʼuchʼul le paalaloʼob náachkuntaʼanoʼob tiʼ Diosoʼ

Tu yoʼolal u nojoch yaabilajeʼ, Jéeobaeʼ yaan baʼax tu beetaj utiaʼal u yáantik le kʼeban wíinikoʼob yaabiltmailoʼ (1 Corintoiloʼob 2:9). Le apóstol Pablooʼ ku yaʼalik: «Jajal Dioseʼ táan u beetik u kaʼa biskuba tuláakal yóokʼol kaab tu yéeteleʼ tu yoʼolal Cristo, maʼ táan u beetik u cuentail u kʼeban máakoʼob» (2 Corintoiloʼob 5:19). Teʼ xook máanikoʼ tsolaʼabeʼ Jéeobaeʼ tu kʼubaj Jesucristo utiaʼal u salvartikoʼon tiʼ le kʼebanoʼ (Mateo 20:28; Juan 3:16). Le apóstol Juanoʼ tu yaʼalaj yoʼolal Dios: «Ileʼex bukaʼaj u yaabiltmajiloʼon Jajal Dios le Taataoʼ, ikil ku páajtal u yaʼalaʼal toʼoneʼ u paalaloʼon Jajal Dios» (1 Juan 3:1). Bey túunoʼ, tuláakal le máaxoʼob ku beetkoʼob le baʼax ku yaʼalik Diosoʼ, ku páajtal u kaʼa natsʼkubaʼob tiʼ letiʼ.

Kex u paalaloʼob Dios way Luʼum yaan u múuchʼ meyajoʼobeʼ, le Bibliaoʼ ku yaʼalikeʼ kaʼa jaats yaniloʼob. Efesoiloʼob 1:10 ku yaʼalik: «Tiʼ le baʼax tukultaʼan kun úuchulaʼ, yéetel yaan u yúuchul le ken kʼuchuk u kʼiinileʼ, Jajal Dioseʼ yaan u nupik yáanal u páajtalil Cristoeʼ tuláakal baʼal, le yanoʼob kaʼanoʼ bey xan le yanoʼob luʼumoʼ». ¿Baʼaxten tu tukultaj u beetik Dios beyoʼ?

Le u jóoʼsik kaʼa jaats tiʼ u paalal Jéeoba way Luʼumaʼ ku yáantaj utiaʼal ka múul meyajnakoʼob. U paalaloʼob Dioseʼ jach yaʼaboʼob beyoʼob upʼéel nojoch kaajeʼ. Tiʼ cada kaajeʼ ku yéeyaʼal junmúuchʼ máakoʼob utiaʼal ka gobernarnakoʼob, yéetel beyoʼ ka jóoʼsaʼak u yutsil u gobiernoʼob tumen le kaajoʼ. U jaajileʼ mix upʼéel gobierno tsʼoʼok u taasik jeetsʼelil, baʼaleʼ Dioseʼ tsʼoʼok u tsʼáaik upʼéel maʼalob gobierno utiaʼal yutsil u paalaloʼob. Le yáax jaats tiʼ u paalal Dios wa le baʼaloʼob «yanoʼob kaʼan» ku yaʼalik le Bibliaoʼ, letiʼe máaxoʼob ku yéeyaʼaloʼob way Luʼum tumen Dios utiaʼal ka xiʼikoʼob gobernar teʼ kaʼanoʼ. Desde teʼ kaʼanoʼ yaan u gobernarkoʼob le Luʼumaʼ (Apocalipsis 5:10).

U paalal Dios kun pʼáatloʼob way Luʼumeʼ

Le baʼaloʼob «yanoʼob luʼum» táan u muchʼkíintaʼal tumen Jéeobaoʼ, letiʼe u millonesi máakoʼob tiʼ jejeláas tuʼuxoʼob kun pʼáatloʼob kuxtal way Luʼumeʼ. Jeʼex utúul taatatsil jach yaan u yaabilajeʼ, Jéeobaeʼ táan u kaʼansiktiʼob ka u yaabiltubaʼob yéetel ka múul meyajnakoʼob kex jejeláas tuʼux u taaloʼob. Tiʼ tuláakal máak ku yaʼalaʼal: «Bisabaʼex tu kaʼatéen yéetel Jajal Dios»; lelaʼ ku yaʼalaʼal tak tiʼ le máaxoʼob ku beetkoʼob baʼaloʼob kʼaastakoʼ (2 Corintoiloʼob 5:20).

¿Baʼax kun úuchul tiʼ le máaxoʼob maʼ ken u yóot u bisubaʼob yéetel Diosoʼ? Utiaʼal ka yanak jeetsʼelil yéetel kiʼimak óolal tiʼ u paalaloʼobeʼ, Jéeobaeʼ yaan u taasik u «kʼiinil le pʼis óoloʼ, le[tiʼe] ken xuʼulsaʼakoʼob le máaxoʼob kʼasaʼanoʼoboʼ» (2 Pedro 3:7). Dioseʼ yaan u xuʼulsik le máakoʼob kʼasaʼanoʼob yanoʼob way Luʼumeʼ. ¡Lelaʼ yaan u beetik u kiʼimaktal u yóol le máaxoʼob beetik baʼax utstutʼaanoʼ! (Salmo 37:10, 11.)

Ken tsʼoʼokokeʼ yaan u yantal jeetsʼelil ich mil jaʼaboʼob, teʼ kʼiinoʼob jeʼeloʼ tuláakal le máax ken u yeʼes u yaabilaj tiʼ Dioseʼ, jujumpʼíitil kun lukʼul le kʼeban tu wíinklil tak ken pʼáatak jeʼex yanik Adán kaʼacheʼ. Tak le kimenoʼob kun kaʼa kuxkíintbiloʼoboʼ (Juan 5:28, 29; Apocalipsis 20:6; 21:3, 4). Bey ken u béeykuntil Dios le baʼax u yaʼalmaʼ: «Tuláakal baʼax beetaʼaneʼ yaan u toʼokol tiʼ le palitsililoʼ yéetel tiʼ le xuʼulsajiloʼ, utiaʼal ka yanak baʼal u yil tiʼ u nojbeʼen  jáalkʼabtajil u paalaloʼob Jajal Dios» (Romailoʼob 8:21).

Le bix jeʼel k-kaʼa natsʼikba tu yiknal k-Taataoʼ

Cézar yéetel u milesi coreanoʼob t-aʼalaj tu káajbal le xookaʼ yaan baʼax tu beetoʼob utiaʼal u kaʼa yilkubaʼob yéetel u láakʼtsiloʼob. Le coreanoʼoboʼ yanchaj u binoʼob teʼ programa beetaʼab teʼ televisionoʼ, Cézar xaneʼ tu pʼataj le máaxoʼob maʼ u taataʼoboʼ. Teech xaneʼ, maʼ xaaneʼ yaan baʼax unaj a beetik utiaʼal ka a bisaba yéetel Jéeoba Dios, a Taata yaan teʼ kaʼanoʼ yéetel utiaʼal ka yanakech ichil u paalaloʼob. ¿Baʼax unaj a beetik?

Utiaʼal ka a natsʼaba tiʼ Dioseʼ unaj a xokik le Bibliaoʼ, beyoʼ yaan u yantal a fe tiʼ letiʼ yéetel tiʼ le baʼaxoʼob ken u beetoʼ. Yaan a wilkeʼ tuláakal le baʼax ku kaʼansik Diosoʼ utiaʼal a wutsil. Unaj xan a kʼamik le tsolnuʼukoʼob ku tsʼáaikoʼ, tumen le Bibliaoʼ ku yaʼalik: «Jajal Dioseʼ táan u [yilkeʼex] beyeʼex u paalaloʼobeʼ, ¿yaan wa paal maʼ táan u tojkíintaʼal tumen u taata?» (Hebreob 12:7).

Ken a beet tuláakal lelaʼ yaan u kʼexpajal bix a kuxtal. Le Bibliaoʼ ku yaʼalik «unaj [k-] túumbenkunsaʼaleʼex [...] tiʼ [k-]tuukuleʼex» yéetel unaj búukintkeʼex «le túumben wíinikoʼ beetaʼan jeʼel bix u kʼáat Jajal Dioseʼ yéetel ku chíikbesaʼal yéetel jumpʼéel kuxtal tu jaajil toj yéetel Kiliʼich» (Efesoiloʼob 4:23, 24). Ken tsʼoʼokokeʼ unaj k-beetik le baʼax ku yaʼalik apóstol Pedroaʼ: «Jeʼel bix paalaloʼob ku yuʼubikoʼob tʼaaneʼ maʼ a kuxtaleʼex jeʼel bix u nuʼuktik le tsʼíibolaloʼob yanteʼex kaʼach maʼiliʼ a kʼaj óolteʼex Jajal Diosoʼ» (1 Pedro 1:14).

Ilawil a natsʼkaba tiʼ a sukuʼunoʼob

Cezareʼ ka tu kʼaj óoltaj u maamaeʼ, kiʼimakchaj u yóol ka tu yilaj yaan xan utúul u sukuʼun yéetel utúul u kiik. Bey xan teech ken a natsʼaba tiʼ a Taata yaan teʼ kaʼanoʼ, yaan a wilkeʼ le máaxoʼob ku meyajkoʼob Diosoʼ a sukuʼunoʼob yéetel a kiikoʼob. Jeʼel bix u bin a maas biskaba tu yéeteloʼobeʼ yaan a kʼuchul a jach yaabiltoʼob (Beetaʼanoʼob [Hechos] 28:14, 15; Hebreob 10:24, 25).

Táan a invitartaʼal utiaʼal ka natsʼaba tu yiknal a Taata bey xan tiʼ a sukuʼunoʼob. Jeʼel u jach kiʼimaktal a wóol jeʼex Cézar yéetel le u milesi coreanoʼob tu kaʼa muchʼubaʼob yéetel u láakʼtsiloʼoboʼ.

[U tsolajil le oochel teʼ táan juʼun 8]

Cézar yéetel u maama, le yaan 19 jaʼaboʼob tiʼoʼ

[U tsolajil le oochel teʼ táan juʼun 10]

Ilawil a natsʼkaba tiʼ Dios