1, 2. 1) ¿Baʼaxten yaan kʼiineʼ bey ku chʼóoptal máakeʼ? 2) ¿Baʼax k-ojel yoʼolal u Reino Dios?

MAʼ XAANEʼ tsʼoʼok a wilkeʼ kex yaʼab máakoʼob il u yúuchul junpʼéel baʼaleʼ, ken joʼopʼok u tʼaanoʼob tiʼ le baʼax úuchoʼ jejeláas baʼax ku yaʼalikoʼob. Bey xan wa juntúul máak ku yaʼalaʼaltiʼ tumen juntúul doctor baʼax kʼojaʼanil yaantiʼeʼ jeʼel u talamtal u kʼaʼajsik u maasil baʼaloʼob aʼalaʼabtiʼ ka tsʼoʼokoʼ. Yaan xan máakeʼ maʼ tu kaxtik u llaveʼob wa u lentes kex tiaʼan tu táaneʼ. ¿Baʼaxten ku yúuchul tiʼ máak lelaʼ? Le cientificoʼoboʼ ku yaʼalikoʼobeʼ ken u yóot u beet máak jejeláas baʼaloʼob tiʼ junpʼéeliliʼ súutukeʼ ku saʼatal u yóol wa bey ku chʼóoptaleʼ. Ku yaʼalaʼaleʼ u tsʼoʼomel máakeʼ maʼ tu béeytal u beetik jejeláas baʼaloʼob tiʼ junpʼéeliliʼ súutuk.

² Yaʼab máakoʼob xaneʼ bey chʼóopoʼobeʼ tumen maʼ tu tsʼáaikoʼob cuenta baʼax ku yeʼesik le baʼaxoʼob ku yúuchul way yóokʼol kaabaʼ. Maʼ xaaneʼ ku tsʼáaikoʼob cuenta desde tu jaʼabil 1914, jach kʼexpaj le yóokʼol kaabaʼ, baʼaleʼ maʼ u yojloʼob baʼaxteniʼ. Toʼoneʼ ikil k-xakʼalxoktik le Bibliaoʼ jeʼel u páajtal k-aʼalikeʼ u Reino Dioseʼ taal tu jaʼabil 1914, le jaʼab ka káaj u reinar Jesús teʼ kaʼanoʼ. Baʼaleʼ k-ojel xaneʼ maʼ láaj béeyak le baʼax k-kʼáatik tiʼ Diosaʼ: «Taalak a Reino, beetaʼak baʼax a kʼáat teʼ kaʼanoʼ bey xan way Luʼumeʼ» (Mat. 6:10). Utiaʼal u beetaʼal baʼax u kʼáat Dios way Luʼum jeʼex u beetaʼal teʼ  kaʼanoʼ yáax unaj u xuʼulsaʼal le kʼasaʼan yóokʼol kaabaʼ.

3. ¿Baʼax k-tsʼáaik cuenta ikil k-xakʼalxoktik u Tʼaan Dios?

³ Tumen mantatsʼ táan k-xakʼalxoktik u Tʼaan Dioseʼ k-tsʼáaik cuenta yaan profecíaʼob táan u béeytaloʼob bejlaʼeʼ. ¡Baʼaleʼ u maasil máakoʼobeʼ maʼ tu tsʼáaikoʼob cuenta! Letiʼobeʼ naayal u yóoloʼob yéetel u baʼalubaʼob le kuxtalaʼ le oʼolal maʼ tu yilkoʼob le baʼaxoʼob eʼesik tsʼoʼok u káajal u reinar Cristo desde tu jaʼabil 1914, yéetel maʼ kun xáantaleʼ yaan u xuʼulsik le yóokʼol kaabaʼ. Baʼaleʼ wa tsʼoʼok u xáantal joʼopʼok a meyajtik Dioseʼ maʼalob ka a tukle: «¿Kin wilik wa in naʼatik baʼax u kʼáat u yaʼal le baʼaxoʼob ku yúuchul way yóokʼol kaab jeʼex in beetik kaʼachoʼ?». Tak wa maʼ úuch joʼopʼok a meyajtik Dioseʼ, tukle: «¿Tiʼ baʼax maas chʼiikil in tuukul?». Jeʼel baʼaxak ka u núuk máakeʼ, koʼox ilik óoxpʼéel baʼax eʼesik le Rey yéeyaʼan tumen Diosoʼ yaan baʼax taʼaytak u beetik utiaʼal u beetaʼal baʼax u kʼáat Dios way Luʼumeʼ.

4, 5. 1) ¿Baʼax táan u beetik Jesús desde tu jaʼabil 1914? (Ilawil le dibujo yaan tu káajbal le xookaʼ.) 2) ¿Baʼax ku chíikbesik le óoxtúul máaxoʼob natʼmil le tsíiminoʼob ku binoʼob tu paach Jesusoʼ? 3) ¿Bix tsʼoʼok u béeytal le profecíaaʼ?

⁴ Tu jaʼabil 1914, Jesucristo, ku keʼetel yéetel juntúul máax u natʼmaj juntúul sak tsíimineʼ, tsʼaʼab junpʼéel corona tiʼ teʼ kaʼanoʼ yéetel ka tsʼoʼokeʼ jóokʼ tu séebaʼanil utiaʼal u tsʼáanchaʼatik le kʼasaʼan yóokʼol kaabaʼ (xok Apocalipsis 6:1, 2). Le profecía yaan teʼ capítulo 6 tiʼ Apocalipsisoʼ tu yaʼaleʼ ken káajak u nuʼuktaj u Reino Dioseʼ séebaʼan kun bin u maas kʼastal le yóokʼol kaabaʼ. Yaan u yantal baʼateltáambaloʼob, wiʼijil, kʼojaʼaniloʼob yéetel uláakʼ baʼaloʼob ku beetik u kíimil máak, le baʼaloʼobaʼ ku chíikbesik táan u máan le óoxtúul máaxoʼob natʼmil u tsiiminoʼob náatsʼ u binoʼob tiʼ Jesucristooʼ (Apo. 6:3-8).

⁵ Aʼalaʼabeʼ le baʼateltáambaloʼ yaan u luʼsik «jeetsʼelil» way «yóokʼol kaab[eʼ]», yéetel jach bey úuchikoʼ. Kex u yaʼalmaj le luʼumiloʼob u múul meyajoʼob utiaʼal u yantal jeetsʼeliloʼ, maʼ béeychajiʼ. Le Yáax Nojoch Baʼateltáambaloʼ jeʼel u páajtal u yaʼalaʼaleʼ letiʼe yáax junpʼéel tiʼ le nukuch baʼateltáambaloʼob luʼs le jeetsʼelil way Luʼumoʼ. Yéetel kex desde tu jaʼabil 1914 tsʼoʼok u yilaʼal u maas antal taakʼin yéetel yaʼab baʼaloʼob túumbentak ku beetik le cientificoʼoboʼ, láayliʼ ku pʼáatal minaʼan baʼal jaantbileʼ, lelaʼ ku beetik u yantal baʼateltáambaloʼob tiʼ tuláakal yóokʼol kaab. Tsʼoʼoleʼ ¿máax jeʼel u yaʼalik wa maʼ u millonesil máakoʼob ku kíimloʼob cada jaʼab yoʼolal le nukuch loobiloʼob yéetel le kʼaakʼas kʼojaʼaniloʼoboʼ? Kaʼacheʼ le baʼaloʼobaʼ maʼ tu yilaʼal tiʼ tuláakal yóokʼol kaab, maʼ mantatsʼ tu yúuchliʼ yéetel tak wa ku yúuchul kaʼacheʼ maʼ jach jeʼex bejlaʼaʼ. ¿Ka tsʼáaik cuenta wa baʼax ku yeʼesik leloʼ?

6. 1) ¿Máaxoʼob tu tsʼáajoʼob cuenta táan u béeytal baʼax ku yaʼalik le Bibliaoʼ? 2) ¿Baʼax taakchaj u beetkoʼob?

⁶ Yaʼab máakoʼobeʼ naayal u yóoloʼob kaʼach yéetel le Yáax Nojoch Baʼateltáambal bey xan yéetel le gripe españolaoʼ. Baʼaleʼ le sukuʼunoʼob yéeyaʼanoʼoboʼ jach táan u páaʼtkoʼob kaʼach ka tsʼoʼokok tu jaʼabil 1914 «le kʼiinoʼob tsʼaʼan tiʼ le kaajoʼoboʼ» (Luc. 21:24). Maʼ u jach ojloʼob baʼax kun úuchul kaʼachiʼ, baʼaleʼ u yojloʼobeʼ le baʼax kun úuchul tu jaʼabil 1914, ku yeʼesik yaan u yantal junpʼéel nojoch kʼeex ichil u Reino Dios. Ka tu tsʼáajoʼob cuenta táan u béeytal le profecíaʼoboʼ joʼopʼ u kʼaʼaytikoʼob yéetel x-maʼ saajkil tsʼoʼok u káajal u reinar Dios. Yoʼolal le baʼax tu kʼaʼaytoʼoboʼ joʼopʼ u chʼaʼpachtaʼaloʼob, tumen maʼ chéen tiʼ junpʼéeliliʼ luʼum chʼaʼpachtaʼaboʼobeʼ maas chíikpaj táan u béeytal le profecíaʼoboʼ. Teʼ jaʼaboʼob seguernaj xanoʼ le máaxoʼob maʼ tu kʼamkoʼob u Reino Diosoʼ tu chʼaʼpachtoʼob máaxoʼob meyajtik Jéeoba yéetel tu tsʼáajoʼob leyoʼob maʼ maʼalobtak tu  contraʼobiʼ. Tsʼoʼoleʼ beetaʼab loob tiʼob, kʼaʼaloʼob cárcel, yaan aʼalaʼab ka jiʼichʼik u kaaliʼ, ka tsʼoʼonok wa ka kúulchʼaktaʼak u kaal (Sal. 94:20; Apo. 12:15).

7. ¿Baʼaxten u maas yaʼabil le máakoʼoboʼ maʼ tu tsʼáaikoʼob cuenta baʼax ku yeʼesik le baʼaxoʼob ku yúuchloʼ?

⁷ Kex yaʼab baʼaxoʼob eʼesik tsʼoʼok u káajal u nuʼuktaj u Reino Dios teʼ kaʼanoʼ, ¿baʼaxten u maas yaʼabil le máakoʼoboʼ maʼatech u tsʼáaikoʼob cuenta? ¿Baʼaxten maʼ tu tsʼáaikoʼob cuentaeʼ le baʼaxoʼob ku yúuchloʼ ku yeʼesik táan u béeytal le profecíaʼob úuch joʼopʼok u yaʼalik le máaxoʼob meyajtik Diosoʼ? ¿Maʼ wa ta tʼaan chéen ku beetkoʼob u cuentail le baʼaxoʼob ku páajtal u yilkoʼoboʼ? (2 Cor. 5:7.) ¿Chʼiikil wa u beetoʼob baʼax uts tu tʼaanoʼob le oʼolal maʼ tu tsʼáaikoʼob cuenta baʼax ku beetik Dios? (Mat. 24:37-39.) ¿Chéen wa naayal u yóoloʼob yéetel baʼax ku beetaʼal tu yóokʼol kaab Satanás? (2 Cor. 4:4.) Utiaʼal u páajtal k-ilik baʼax táan u beetik u Reino Dioseʼ unaj u yantaltoʼon fe yéetel k-creertik kex maʼ tu páajtal k-ilik. ¡Jach kiʼimak k-óol tumen k-tsʼáaik cuenta baʼax táan u yúuchul!

8-10. 1) ¿Baʼaxoʼob eʼesik táan u béeytal baʼax ku yaʼalik 2 Timoteo 3:1 tak 5? 2) ¿Baʼaxoʼob eʼesik táan u bin u maas kʼastal le yóokʼol kaabaʼ?

⁸ Le u bin u maas kʼastal máakoʼ uláakʼ baʼax eʼesik taʼaytak u káajal u nuʼuktaj u Reino Dios way Luʼumeʼ. Tsʼoʼok óoliʼ cien jaʼaboʼob joʼopʼok u yilaʼal le baʼax ku yaʼalik 2 Timoteo 3:1 tak 5, tsʼoʼoleʼ jeʼex u máan le kʼiinoʼoboʼ maas chíikaʼan u yilaʼal tuláakal tuʼux. ¿Chíikaʼan wa a wilik? Koʼoneʼex ilik jujunpʼéel baʼax eʼesik táan u yúuchul (xok 2 Timoteo 3:1, 13).

⁹ Wa k-ketik le baʼax kʼaas u yilaʼal tu jaʼabiloʼob 1940 yéetel 1950 yéetel le baʼaxoʼob ku beetaʼal bejlaʼaʼ, yaan k-tsʼáaik cuenta tsʼoʼok u maas kʼastal baʼax ku beetaʼal tuʼux ku meyaj máak, le náaysaj óolaloʼoboʼ, le deporteʼoboʼ yéetel le modaoʼ. Mantatsʼ táan u beetaʼal loob yéetel u núupkʼebantal máak. Yaan jujuntúul máakoʼobeʼ ku ketlanoʼob utiaʼal u yilaʼal máax maas kʼasaʼan, maas ku núupkʼebantal wa maas maʼ tu chʼaʼik óotsilil. Yaan baʼaloʼob ku tuklaʼal kʼaastak maʼ unaj máansaʼal teʼ televisión tu jaʼabiloʼob 1950, bejlaʼeʼ ku máansaʼal utiaʼal chaʼantbil tumen  tuláakal le familiaoʼ. Yaʼab máakoʼobeʼ ku tsʼáaikoʼob cuentaeʼ le homosexualoʼoboʼ jach ku táakpajloʼob tiʼ le baʼaloʼob utiaʼal chaʼantbiloʼ, tiʼ le modaoʼ yéetel ku yeʼeskoʼob bix u kuxtaloʼob utiaʼal u kʼaʼamal tumen u maasil. ¡Jach kiʼimak k-óol tumen k-ojel baʼax ku tuklik Dios yoʼolal leloʼ! (Xok Judas 14, 15.)

¹⁰ Wa k-ketik xan le bix u kuxtal le táankelmoʼob tu jaʼabiloʼob 1950 yéetel le bix u kuxtaloʼob bejlaʼaʼ k-tsʼáaik cuenta tsʼoʼok u maas kʼastal. Le taatatsiloʼob kaʼachoʼ ku chiʼichnaktaloʼob wa ka joʼopʼok u tsʼuʼutsʼ chamal u paalaloʼob, wa ku yukʼikoʼob cerveza yéetel wa kʼaas bix u yóokʼotoʼob. Bejlaʼeʼ sáamsamal k-uʼuyik noticiaʼob jeʼex lelaʼ: juntúul xiʼipal 15 jaʼaboʼob yaantiʼeʼ joʼopʼ u tsʼonik u yéet xookoʼob, kaʼatúul tu kíimsiʼ yéetel 13 u túulaleʼ chéen úuch loob tiʼob. U jaats táankelem paalal kalaʼanoʼobeʼ tu kíimsoʼob juntúul chan x-chʼúupal nueve jaʼaboʼob yaantiʼ yéetel tu sen beetoʼob loob tiʼ u taata yéetel u primo. Ku yaʼalaʼaleʼ teʼ tu tsʼook diez jaʼaboʼobaʼ letiʼe táankelmoʼob beet u táanchumuk tiʼ le bukaʼaj loob beetaʼab tiʼ junpʼéel u luʼumil Asiaoʼ. ¿Yaan wa máax jeʼel u páajtal u yaʼalik maʼ táan u maas kʼastal le yóokʼol kaabaʼ?

11. ¿Baʼaxten yaʼab máakeʼ maʼ tu tsʼáaik cuenta wa táan u bin u maas kʼastal le yóokʼol kaabaʼ?

¹¹ Jach jaaj le baʼax tu yaʼalaj apóstol Pedroaʼ: «Tu tsʼook kʼiinoʼobeʼ yaan u taal j-pʼaʼastaj máakoʼob táan u yaʼalikoʼob baʼal jeʼex u túulchʼintaʼaloʼob tumen u tsʼíibolaloʼobeʼ, yéetel yaan u yaʼalikoʼob: «¿Baʼax túun úuch yéetel le u taalbal Cristo aʼalaʼanoʼ? Tumen desde le kʼiin ka kíim k-úuchben láakʼtsiloʼobeʼ, tuláakal le baʼaloʼoboʼ láayliʼ bey yaniloʼob jeʼex tu káajbal yóokʼol kaabeʼ» (2 Ped. 3:3, 4). ¿Baʼaxten ku tuukuloʼob beyoʼ? Tumen wa jujunpʼíitil u kʼexpajal junpʼéel baʼaleʼ maʼ tu tsʼáaik cuenta máak. Wa ku jáan kʼexpajal u modos juntúul máax k-jach bisikba tu yéeteleʼ séebaʼan k-ilik. Baʼaleʼ tumen jujunpʼíitil u bin u maas kʼastal baʼax ku beetik le máakoʼob way yóokʼol kaabaʼ maʼatech k-jach tsʼáaik cuenta, baʼaleʼ maʼ u kʼáat u yaʼal wa mix baʼal ku yúuchliʼ.

12, 13. 1) ¿Baʼaxten maʼ unaj u lúubul k-óol ken k-il baʼax ku yúuchul way yóokʼol kaabeʼ? 2) ¿Baʼax ku yeʼesik le u pʼáatal istikyaj u máansik u kuxtal máak jeʼex tu yaʼalil Pablooʼ?

¹² Apóstol Pabloeʼ tu yaʼaleʼ «tu tsʼook kʼiinoʼobeʼ [...] istikyaj ken u máansil u kuxtal máak» (2 Tim. 3:1). Baʼaleʼ maʼ tu yaʼalaj wa junpuliʼ maʼ kun béeytal u kuxtal máakiʼ, le oʼolal maʼ unaj k-sajaktal yéetel u lúubul k-óoliʼ. Yéetel u yáantaj Jéeoba, u kiliʼich muukʼ yéetel le múuchʼuliloʼ jeʼel u béeytal k-aktáantik jeʼel baʼaxakeʼ. Jeʼel u béeytal u chúukpajal k-óol k-meyajt Dioseʼ. «Le páajtalil ku píitmáan tiʼ u muukʼ wíinikoʼ» tiʼ Dios u taal, maʼ tiʼ toʼoniʼ (2 Cor. 4:7-10).

¹³ Utiaʼal u káajsik u profecía Pablo tu yoʼolal u tsʼook kʼiinoʼobeʼ meyajnajtiʼ le tʼaan: «ojéelte». Lelaʼ ku yeʼesikeʼ yaan u béeytal le baʼax tu yaʼalaj ka tsʼoʼokoʼ. Le oʼolal jeʼel u páajtal k-aʼalikeʼ yaan u bin u maas kʼastal le yóokʼol kaabaʼ tak ken xuʼulsaʼak tumen Jéeoba. Yoʼolal baʼax ku yúuchleʼ tsʼoʼok k-tsʼáaik cuentaeʼ ken joʼopʼok u kʼastal baʼax ku beetaʼaleʼ ku bin kʼaasil tiʼ máak wa tiʼ nukuch luʼumiloʼob. Bejlaʼa xaneʼ tsʼoʼok u maas kʼastal bix u kuxtal máak. Maʼ xaaneʼ yaʼab máakeʼ maʼ tu tsʼáaik cuenta baʼax u kʼáat u yaʼal leloʼ, baʼaleʼ u jaajileʼ le u bin u maas kʼastal le yóokʼol kaab káaj desde 1914, ku yeʼesik u Reino Dioseʼ taʼaytak u yutskíintik baʼax ku yúuchul.

14-16. ¿Máakalmáak u yóoxpʼéel baʼax eʼesik taʼaytak u taal u Reino Dios?

¹⁴ U yóoxpʼéel baʼax oʼolal jeʼel u páajtal k-aʼalik naatsʼ yanil le xuʼulsajiloʼ, letiʼe baʼax tsʼoʼok u yúuchul ichil u kaajal Diosoʼ. Jeʼex táanil tiʼ u káajal u nuʼuktaj u Reino Dios teʼ kaʼanoʼ, u múuchʼ sukuʼunoʼob yéeyaʼanoʼobeʼ jach u kʼubmaj u yóol u meyajtoʼob Dios kaʼachi. ¿Baʼax tu beetoʼob ka tu yiloʼob maʼ béeychaj tu jaʼabil 1914 jujunpʼéel tiʼ le  baʼaxoʼob ku tuklikoʼoboʼ? U maas yaʼabil tiʼ letiʼobeʼ maʼ xuʼul u meyajtikoʼob Jéeobaiʼ. Kex túuntaʼab u yóoloʼob yéetel chʼaʼpachtaʼab u maas yaʼabil tiʼ letiʼob, wa maʼ tuláakloʼobeʼ, chúukpaj u yóoloʼob tak ka kíimoʼob.

¹⁵ Teʼ profecía tu yaʼalaj Jesús yoʼolal u tsʼoʼokol tiʼ le yóokʼol kaabaʼ, tu yaʼalaj: «Le generacionaʼ junpuliʼ maʼ kun máan táanil tiʼ u yúuchul tuláakal le baʼaloʼobaʼ» (xok Mateo 24:33-35). K-ojleʼ le ka tu yaʼalaj Jesús «le generacionaʼ», táan u tʼaan tiʼ kaʼa jaats sukuʼunoʼob yéeyaʼanoʼob. Le yáax jaatsoʼ tu yiloʼob baʼax úuch tu jaʼabil 1914 yéetel tu naʼatoʼobeʼ teʼ jaʼab káaj u reinar Cristooʼ. Lelaʼ u kʼáat u yaʼaleʼ le yáax jaatsoʼ maʼ chéen kuxlajoʼob tu jaʼabil 1914, baʼaxeʼ yéeyaʼaboʼob yéetel kiliʼich muukʼ bey u paalal Dios teʼ jaʼab jeʼeloʼ wa táanil tiʼ (Rom. 8:14-17).

¹⁶ Ichil u kaʼa jaats «le generacionaʼ» táakaʼan le yéeyaʼanoʼob kuxlajoʼob tiʼ junpʼéeliliʼ tiempo yéetel le yáax jaatsoʼ. Lelaʼ u kʼáat u yaʼaleʼ yéeyaʼaboʼob yéetel kiliʼich muukʼ táanil tiʼ u kíimil le yéeyaʼanoʼob táakaʼanoʼob ichil le yáax jaatsoʼ. Le oʼolaleʼ ichil ‹le generación› tu yaʼalaj Jesusoʼ maʼ táakaʼan tuláakal le yéeyaʼanoʼob kuxaʼanoʼob teʼ kʼiinoʼobaʼ. Bejlaʼeʼ le yéeyaʼanoʼob táakaʼanoʼob ichil le u kaʼa jaatsoʼ tsʼoʼok u yantal u jaʼabiloʼob. Baʼaleʼ le baʼax u yaʼalmaj Jesús tsʼíibtaʼan tiʼ Mateo 24:34, ku yeʼesiktoʼoneʼ «le generacionaʼ junpuliʼ maʼ kun máan» táanil tiʼ u káajal le nojoch muʼyajiloʼ, le oʼolaleʼ yaan jujuntúul tiʼ le yanoʼob ichil le kaʼa jaatsoʼ kuxaʼanoʼob way Luʼum ken kʼuchuk le kʼiin jeʼeloʼ. Lelaʼ ku yeʼesiktoʼoneʼ taʼaytak u xuʼulsaʼal le kʼasaʼan máakoʼob tumen Jesucristo, u Reyil u Reino Dios, utiaʼal u yantal le túumben luʼumoʼ (2 Ped. 3:13).

17. ¿Baʼax ku yeʼesiktoʼon le baʼaxoʼob tsʼoʼok k-ilkoʼ?

¹⁷ ¿Baʼax ku yeʼesiktoʼon le bix u béeytal le óoxpʼéel profecía tsʼoʼok k-ilkoʼ? Jesuseʼ tu yaʼaleʼ mix máak u yojel u kʼiinil yéetel u yorail ken taalak le xuʼulsajiloʼ (Mat. 24:36; 25:13). Baʼaleʼ k-ojleʼ ‹u kʼiinil k-ajal› jeʼex tu yaʼalil Pabloeʼ (xok Romailoʼob 13:11). Kuxaʼanoʼon tu tsʼook kʼiinoʼob. Wa k-jach ilik le profecíaʼob bey xan baʼax táan u beetik Jéeoba yéetel Jesuseʼ maʼ tu páajtal k-aʼalik wa mix baʼal eʼesik táan u náatsʼal u kʼiinil u xuʼulsaʼal le kʼasaʼan yóokʼol kaabaʼ.

18. ¿Baʼax kun úuchul tiʼ le máaxoʼob maʼ tu kʼamkoʼob u Reino Diosoʼ?

¹⁸ Le máaxoʼob maʼ tu kʼamkoʼob le nojoch páajtalil tsʼoʼok u tsʼaʼabal tiʼ Jesucristo, le máax natʼmil le sak tsíiminoʼ, maʼ kun xáantal ken u kʼamoʼob maʼ maʼalob baʼax tu beetoʼobiʼ. Maʼ kun páajtal u púutsʼloʼob tiʼ le xuʼulsajoʼ. Teʼ kʼiinoʼoboʼ yaʼab máakoʼobeʼ tu kikilankiloʼob ken u yaʼaloʼob: «¿Máax túun jeʼel u páajtal u pʼáatal waʼatalileʼ?» (Apo. 6:15-17). Le kʼáatchiʼaʼ ku núukaʼal teʼ capítulo 7 tiʼ Apocalipsisoʼ. Le máaxoʼob kun pʼáatal «waʼatalil» teʼ kʼiin jeʼeloʼ letiʼe yéeyaʼanoʼoboʼ bey xan le máaxoʼob táan u páaʼtik u pʼáatloʼob kuxtal way Luʼumeʼ, tumen maʼalob yaniloʼob tu táan Dios. Ken tsʼoʼokkeʼ le «yaʼabkach máakoʼob» táakaʼanoʼob ichil le uláakʼ tamanoʼoboʼ yaan u salvarkubaʼob ken kʼuchuk le nojoch muʼyajiloʼ yéetel yaan u yookloʼob teʼ túumben yóokʼol kaaboʼ (Apo. 7:9, 13-15).

19. ¿Baʼax ku páaʼtik le máaxoʼob ku tsʼáaikoʼob cuenta táan u béeytal le profecíaʼob eʼesik naatsʼ yanil le xuʼulsajiloʼ?

¹⁹ Wa k-jach ilik táan u béeytal le profecíaʼob teʼ kʼiinoʼobaʼ, maʼ kun saʼatal k-óol yéetel u baʼalubaʼob u yóokʼol kaab Satanás mix xan ken k-pʼáatal bey chʼóopoʼon utiaʼal maʼ k-tsʼáaik cuenta baʼax ku chíikbesik le baʼaxoʼob ku yúuchloʼ. Maʼ kun xáantaleʼ Cristoeʼ yaan u chúukaʼan tsʼáanchaʼatik le kʼasaʼan yóokʼol kaab teʼ Armagedonoʼ (Apo. 19:11, 19-21). ¡Jach túun jatsʼuts baʼax k-páaʼtik! (Apo. 20:1-3, 6; 21:3, 4.)