María Isabeleʼ juntúul chan x-chʼúupal u tsʼaamaj u yóol kʼaʼaytaj kajaʼan San Bernardo, junpʼéel kaaj yaan tu luʼumil Chile. Letiʼ yéetel u familiaeʼ tiʼ u taaloʼob tiʼ junpʼéel chʼiʼibal ku kʼaabaʼtik mapuche, tsʼoʼoleʼ yéetel kiʼimak óolal tsʼoʼok u yáantajoʼob utiaʼal u yantal junpʼéel múuchʼulil ich mapudungún, le tʼaan u yojloʼoboʼ, kʼaj óolaʼan xan bey mapucheeʼ.

Le ka aʼalaʼab yaan u beetaʼal le Kʼaʼajsajil úuchik u kíimil Cristo ich mapudungún yéetel tsʼoʼok u beetaʼal 2,000 invitacionoʼob ich mapudunguneʼ, María Isabeleʼ tu kʼáataj bix jeʼel u tʼoxik xaneʼ. Tu kʼaʼajsaj baʼax u xokmaj yoʼolal uláakʼ paalaloʼob j-Jaajkunajoʼob kʼaʼaytajnajoʼob tiʼ u yéet xookoʼob bey xan tiʼ u profesoroʼob. Tʼaanaj yéetel u taataʼob, ka aʼalaʼabtiʼ ka u tukult bix jeʼel u tʼoxik le invitacionoʼob tu escuelaoʼ. ¿Baʼax túun tu beetaj?

Yáaxeʼ tu kʼáataj wa jeʼel u chaʼabal u tsʼáaik junpʼéel invitación tu jool le escuelaoʼ. Le máaxoʼob nuʼuktik le escuelaoʼ tu yaʼaloʼob jeʼel u béeytaleʼ yéetel tu yaʼaloʼob jach maʼalob le baʼax taak u beetkoʼ. Junpʼéel kʼiin tu yorail u máansaʼal listaeʼ le directoroʼ tu voceartaj le invitacionoʼ.

Tsʼoʼoleʼ María Isabeleʼ tu kʼáataj permiso tiʼ le profesoroʼob utiaʼal u máan tiʼ tuláakal le salonoʼoboʼ. Ka aʼalaʼab jeʼel u páajtaleʼ tu kʼáataj tiʼ u yéet xookoʼob wa yaan tiʼ letiʼob ku taaloʼob tiʼ le chʼiʼibal mapucheoʼ. María Isabeleʼ ku yaʼalik: «Tin tukleʼ tiʼ tuláakal le escuelaoʼ yaan kex diez wa quince máaxoʼob ku taaloʼob tiʼ le chʼiʼibal mapucheoʼ, baʼaleʼ maas yaʼab bakáan yaniʼ. ¡Tin tʼoxaj 150 invitacionoʼob!».

Juntúul koʼolel tu yilaj le invitación tu jool le escuelaoʼ, tu kʼáataj máax jeʼel u tsoliktiʼ u maasileʼ. Chéen tukult bix pʼáatik u yich le ka bisaʼab yiknal juntúul chan x-chʼúupal yaan chéen 10 jaʼaboʼob tiʼ. María Isabeleʼ, táan u sak cheʼej ka tu yaʼalaj: «Táan u páaʼtik kaʼach juntúul máax maas nojoch». Ka tsʼoʼok u tsʼáaiktiʼ junpʼéel invitación yéetel u tsoliktiʼ jujunpʼéel baʼaleʼ, tu kʼáataj tiʼ le koʼolel tuʼux kajaʼanoʼ utiaʼal ka xiʼik yéetel u taataʼob u xíimbalte, beyoʼ ku béeytal u tsikbaltiktiʼ u maasil yoʼolal u Reino Dios. Le koʼoleloʼ bin teʼ Kʼaʼajsajil yéetel uláakʼ 26 máaxoʼob ku taaloʼob teʼ chʼiʼibal mapucheoʼ. Chéen tukult bix kiʼimakil u yóol le 20 u túulal máaxoʼob ku kʼaʼaytajoʼob ich mapudungun le ka tu yiloʼob le jaytúul máaxoʼob binoʼ. ¡Le chan grupooʼ bejlaʼeʼ junpʼéel múuchʼulil táan u nojochtal!

Kex jeʼel jaypʼéel jaʼab yaantoʼoneʼ, ¿jeʼel wa xan u páajtal k-invitartik k-éet xookoʼob wa k-éet meyajoʼob utiaʼal u binoʼob teʼ Kʼaʼajsajil, tiʼ junpʼéel tsoltʼaan wa tiʼ junpʼéel asamblea tiʼ distrito? Teʼ jóoʼsaʼaniloʼoboʼ, jeʼel k-ilik experienciaʼob ken u yáantoʼon k-il baʼax jeʼel k-beetik utiaʼal u bintoʼon utsileʼ. Tsʼoʼoleʼ unaj k-kʼáatik tiʼ Jéeoba ka u tsʼáatoʼon u kiliʼich muukʼ utiaʼal maʼ k-sajaktal tʼaan tiʼ letiʼ (Luc. 11:13). Wa k-tuklik bix jeʼel k-beetkeʼ, maʼ xaaneʼ yaan xan u jaʼakʼal k-óol ken k-il bukaʼaj utsiloʼob ku taasik.