«¿Jeʼel wa a chʼaʼiktoʼon junpʼéel fotoeʼ?»

Ka tsʼoʼok u kaʼapʼéel kʼiinil u asamblea tiʼ distritoeʼ, Josué, ku meyaj tu najil Betel yaan tu luʼumil Mexicoeʼ, jóokʼ xíimbal yéetel uláakʼ sukuʼunoʼob tu noj kaajil Querétaro. Javier yéetel Maru, u yatan, ku taaloʼob Colombiaeʼ, tu kʼáatoʼobtiʼ wa jeʼel u chʼaʼiktiʼob junpʼéel fotoeʼ. Tumen maʼalob bix u vestirmiluba Josué yéetel u amigoʼob yéetel yaan u gafetoʼobeʼ, Javier yéetel Marueʼ tu kʼáatoʼobtiʼob wa taaloʼob utiaʼal u kʼiinbesajil u tsʼoʼokbal u xookoʼob wa tiʼ uláakʼ kʼiinbesaj. Josueeʼ tu tsolajtiʼobeʼ taaloʼob tiʼ junpʼéel asamblea tiʼ u j-jaajkunajoʼob Jéeoba, ka tu invitartoʼob utiaʼal ka xiʼikoʼob tu kʼiinil domingo.

Javier yéetel Marueʼ tu yaʼaloʼobtiʼeʼ maʼ ken u yuʼububaʼob maʼalob wa ka xiʼikoʼobiʼ, tumen chéen u nookʼil xíimbal u taasmoʼob. Kex beyoʼ Josueeʼ tu tsʼáaj u kʼaabaʼ tiʼob yéetel u numeroil u telefonoil u najil Betel.

Ka tsʼoʼok u máan kanpʼéel mesoʼobeʼ Javier yéetel Marueʼ tu tʼanoʼob Josué utiaʼal u yaʼalikoʼobtiʼ binoʼob teʼ asambleaoʼ yéetel u kʼáatoʼob ka xíimbaltaʼakoʼob tumen u j-jaajkunajoʼob Jéeoba tu noj kaajil México. Tu séebaʼanileʼ káaj u tsʼaʼabal xook tiʼob yéetel le Bibliaoʼ yéetel káaj u binoʼob teʼ muchʼtáambaloʼoboʼ. Diez meses tiʼ leloʼ ka káaj u jóokʼloʼob kʼaʼaytaj. Ka máan kʼiineʼ binoʼob kajtal Toronto (Canadá), teʼeloʼ seguernaj u kaanbaloʼob tiʼ Dios yéetel okjaʼanajoʼob.

Junpʼéel kʼiineʼ túuxtaʼab junpʼéel carta tiʼ Josué tumen Javier utiaʼal u yaʼaliktiʼ baʼax péeks u xok le Bibliaoʼ. Javiereʼ tu yaʼalajtiʼ: «Táanil tiʼ k-bin teʼ asambleaoʼ, teen yéetel in wataneʼ tsʼokaʼaniliʼ k-tuklik kʼaʼabéettoʼon u nuʼuktaj Dioseʼ. Tumen jach maʼalob a líiʼsmilabaʼexeʼ, t-tukle jach maʼalob le baʼax ku kaʼansaʼal teʼ asambleaoʼ. Teʼ asambleaoʼ jatsʼuts úuchik k-ilik le bix u modos le máaxoʼob yanoʼoboʼ bey xan bix úuchik k-áantaʼal utiaʼal k-kaxtik tuʼux ken kutal yéetel k-kaxtik le tekstoʼoboʼ. Mix máak jelaʼan úuchik u yilkoʼon yoʼolal bix k-nookʼ».

Le baʼax tu beetaj Josueoʼ ku yeʼesik jach jaaj le baʼax tu yaʼalaj rey Salomonoʼ: «Pakʼ a wiʼinaj tu jaʼatskabil, pakʼ xan tu yoknaj kʼiin, tumen mix bikʼin bíin ojéeltaʼak máakalmáak bíin maʼalob jóokʼokiʼ, wa le ta yáax pakʼajoʼ, wa le ta pachal pakʼajoʼ, wa tu kaʼapʼéelal bíin maʼalobchajak» (Ecl. 11:6). ¿Jeʼel wa xan u páajtal a pakʼik le iʼinaj, wa a invitartik uláakʼ máakoʼob utiaʼal ka xiʼikoʼob tiʼ junpʼéel asamblea wa utiaʼal u yuʼuboʼob junpʼéel tsoltʼaan? Maʼ u tuʼubultoʼoneʼ, Jéeobaeʼ jeʼel u yáantkoʼon utiaʼal k-natsʼik uláakʼ máakoʼob ichil u kaajal, jeʼex Javier yéetel Maru, utiaʼal u maas kʼaj óoltikoʼobeʼ (Isa. 55:1).

[Foto yaan teʼ táan juʼun 32]

Le yáax yaan x-tsʼíikoʼ Alejandro Voeguelin, ken tsʼoʼokkeʼ Maru Pineda, Alejandro Pineda, Javier Pineda yéetel Josué Ramírez tu najil Betel México