¿K-tsʼáaik wa u nib óolalil le bendicionoʼob k-kʼamkoʼ?

JÉEOBAEʼ tu jóoʼsaj le israelitaʼob tu kaajil Egiptooʼ. Teʼ kʼiin jeʼeloʼ letiʼobeʼ jach kiʼimakchaj u yóoloʼob, tumen mix máak jeʼel u yaʼaliktiʼob maʼ u adorartikoʼob Jéeobaeʼ (Éxo. 14:29–15:1, 20, 21). Baʼaleʼ jach séeb úuchik u kʼexpajal u tuukuloʼob ka joʼopʼ u tʼaanoʼob tu contra. Yoʼolal le bix kuxlikoʼob kaʼach teʼ desiertooʼ, jach séeb úuchik u tuʼubskoʼob le baʼaloʼob maʼalobtak tu beetaj Jéeoba tu yoʼolaloʼoboʼ. Le oʼolal tu yaʼaloʼob tiʼ Dios yéetel tiʼ Moisés: «¿Baʼax u biilal ta jóoʼsoʼon Egipto? ¿Utiaʼal a beetik k-kíimil teʼ [desiertoaʼ]? Minaʼantoʼon jaʼ mix janal[,] ¡tsʼoʼok u náakal k-óol tiʼ [maná,] le óotsil janalaʼ!» (Núm. 21:5).

Baʼaleʼ, ka máan kʼiineʼ rey Davideʼ maʼ bey úuchik u tuukuliʼ, letiʼeʼ tu yaʼalaj tiʼ Dios: «Teneʼ kin kʼubik in wóol tiʼ a yaakunaj; in puksiʼikʼaleʼ ku kiʼimakchajal u yóol, tumen techeʼ ka [salvartiken]. ¡Yaan in kʼaay tiʼ [Yuumtsil] tu yoʼolal le uts tsʼoʼok u beetik tenoʼ!» (Sal. 13:5, 6). Letiʼeʼ maʼ tuʼubtiʼ le jejeláas bix úuchik u salvartaʼaloʼ. Mantatsʼ tuukulnaj tiʼ le bix úuchik u yáantaʼaloʼ (Sal. 103:2). Jéeobaeʼ jach yaʼab baʼaxoʼob tsʼoʼok u beetik t-oʼolal, baʼaleʼ wa maʼ k-kanáantikbaeʼ jeʼel xan u tuʼubultoʼoneʼ. Junpʼéel baʼax jeʼel u yáantkoʼon utiaʼal maʼ u tuʼubultoʼoneʼ, letiʼe k-tuukul tiʼ le bendicionoʼob k-kʼamik teʼ kʼiinoʼobaʼ.

U biskuba máak yéetel Jéeoba

Le salmistaoʼ tu kʼayaj: «Yuumtsil[eʼ] ku maʼalob biskuba yéetel le máaxoʼob tsiki[koʼ]» (Sal. 25:14). ¿Máasaʼ jach jatsʼuts k-ilik le páajtalil ku tsʼáaiktoʼon kex chéen kʼeban wíinikoʼonoʼ? Baʼaleʼ yoʼolal le yaʼabkach meyajoʼob k-beetik sáamsamaloʼ, jeʼel u pʼáatal maʼ k-payalchiʼ tiʼ k-Taata yaan teʼ kaʼanoʼ. Le oʼolal unaj k-tuklik baʼax unaj k-beetik  utiaʼal maʼ u xuʼulul k-bisikba tu yéetel. Tumen k-amigo Jéeobaeʼ, u kʼáat ka k-eʼes k-kʼubik k-óol tiʼ letiʼ yéetel ka k-aʼaltiʼ baʼax sajakkúuntkoʼon bey xan baʼax chiʼichnakkúuntikoʼon (Pro. 3:5, 6; Fili. 4:6, 7). Le oʼolal jach maʼalob ka k-tukult bix le payalchiʼ k-beetik tiʼoʼ.

Paul, juntúul táankelem j-Jaajkunajeʼ, tuukulnaj tiʼ bix u beetik u payalchiʼ, ka tu tsʼáaj cuentaeʼ unaj u maas maʼalobkíintik. * Letiʼeʼ ku yaʼalik: «Tin wileʼ tsʼoʼok u suuktal in waʼalik chéen junpʼéeliliʼ baʼal». Ka tu kaxtaj baʼax ku yaʼalik le Índice de las publicaciones Watch Tower yoʼolal le payalchiʼoʼ, tu yileʼ ku chʼaʼchiʼitaʼal ciento ochenta payalchiʼob ichil le Bibliaoʼ. Le payalchiʼobaʼ ku yeʼesik jach bix tu yuʼubiluba le máaxoʼob meyajt Dios úuchjeakiloʼ. Pauleʼ ku yaʼalik: «Ka tuukulnajen tiʼ le payalchiʼobaʼ tin wilaj kʼaʼabéet in waʼalik jach baʼax kin wuʼuyik tin puksiʼikʼal. Bejlaʼeʼ jatsʼuts in wilik in payalchiʼ tiʼ letiʼ».

«Janal [...] tu yorail»

Uláakʼ bendición ku tsʼáaiktoʼon Dioseʼ letiʼe baʼaloʼob jatsʼutstak ku kaʼansiktoʼonoʼ. Le oʼolal k-tsʼáaik nojbeʼenil tiʼ «yéetel u kiʼimak óolalil [k-]puksiʼikʼal» (Isa. 65:13, 14). Baʼaleʼ unaj k-kanáantikba, tumen maʼ k-kʼáat ka xuʼuluk u kiʼimaktal k-óol yoʼolal le baʼaxoʼob ku tsʼáaiktoʼonoʼ. Wa ka joʼopʼok k-uʼuyik le baʼaxoʼob ku yaʼalik le máaxoʼob tsʼoʼok u pʼatkoʼob u kaajal Jéeobaoʼ, jeʼel u xaʼakʼbesikoʼob k-tuukuleʼ yéetel jeʼel u beetkoʼob u xuʼulul k-kʼamik yéetel kiʼimak óolal le kaʼansaj ku keʼetel yéetel «janal [...] tu yorail» ku tsʼaʼabaltoʼon tumen «le palitsil chúukpajaʼan u yóol yéetel yaan u naʼat[oʼ]» (Mat. 24:45-47).

Lelaʼ bey úuchik tiʼ André, juntúul máax úuch joʼopʼok u meyajtik Jéeoba kaʼachi. Letiʼeʼ tu tukleʼ maʼ kʼaas ka u yil tiʼ Internet kex chéen u súutuk le baʼaxoʼob ku yaʼalik le máaxoʼob u pʼatmoʼob u kaajal Jéeobaoʼ. Letiʼeʼ ku yaʼalik: «Ka káaj in xokikeʼ tu beetoʼob in tuklik bey jaajtak le baʼaxoʼob ku yaʼalikoʼoboʼ. Ka joʼopʼ in maas xokikeʼ joʼopʼ in tuklik maas maʼalob ka jóoʼken ichil u kaajal Jéeoba. Baʼaleʼ ka joʼopʼ in maas tuukul tiʼ le baʼaxoʼob ku yaʼalikoʼob tu contra u j-jaajkunajoʼob Jéeobaoʼ, tin tsʼáaj cuentaeʼ chéen jach yaan u naʼatoʼob utiaʼal u tuusoʼob. Letiʼobeʼ chéen ku yéeyikoʼob baʼax ku yaʼalikoʼob utiaʼal u beetkoʼob u tuklaʼal “bey jaajtak” baʼax ku yaʼalikoʼobeʼ. Ka tin chʼaʼtuklaj u seguer in xokik le jóoʼsaʼaniloʼoboʼ yéetel in bin teʼ muchʼtáambaloʼoboʼ. Tu séebaʼanileʼ tin tsʼáaj cuenta maas maʼalob le baʼax ku kaʼansik u kaajal Jéeobaoʼ». U maʼalobileʼ Andreeʼ suunaj ichil u kaajal Jéeoba.

Tuláakal le «sukuʼunoʼoboʼ»

Uláakʼ junpʼéel bendición ku taal tiʼ Jéeobaeʼ, letiʼe k-antal ichil junpʼéel nojoch familia yaan tiʼ tuláakal le yóokʼol kaab ku múuchʼ meyaj yéetel ku yeʼesik yaabilajoʼ (Sal. 133:1). Le oʼolal Pedroeʼ tu yaʼalaj: «Yaabilteʼex le sukuʼunoʼoboʼ» (1 Ped. 2:17). Teʼ múuchʼuliloʼ ku yeʼesaʼaltoʼon yaabilaj yéetel k-áantaʼal  tumen máaxoʼob bey k-taata, k-maama, k-sukuʼunoʼob yéetel k-kiikoʼob (Mar. 10:29, 30).

Baʼaleʼ yaan baʼaloʼob jeʼel u beetik u yantal talamil toʼon yéetel le sukuʼunoʼoboʼ. Maʼ xaaneʼ séeb jeʼel k-kʼuuxil yoʼolal le baʼaxoʼob maʼ maʼalobtak ku beetik u maasiloʼ yéetel jeʼel u joʼopʼol k-tʼaan kʼaas tu contraʼobeʼ. Wa k-ilik táan u joʼopʼol u yúuchultoʼon beyaʼ, jach maʼalob ka kʼaʼajaktoʼoneʼ Jéeobaeʼ u yaabiltmaj tuláakal le máaxoʼob meyajtik kex yaan kʼiin ku beetkoʼob baʼax maʼ maʼalobiʼ. Tsʼoʼoleʼ maʼ unaj xan u tuʼubultoʼoneʼ «wa k-aʼalik minaʼan k-kʼebaneʼ, táan k-tusikba t-juunal, yéetel le jaajoʼ minaʼan tiʼ toʼon» (1 Juan 1:8). Le oʼolal maʼalob ka k-beet le baʼax ku yaʼalik le tekstoaʼ: «Yanakteʼex chowak óolalil ta baatsileʼex, yéetel paklan [perdonartabaʼex]» (Col. 3:13).

Ann, juntúul x-lóoʼbayan chʼúupaleʼ, anchaj u muʼyaj utiaʼal u yilik junpʼéel bendición u yantal máak ichil u kaajal Jéeoba. Jeʼex le xiʼipal suunaj tu yotoch tsikbaltaʼab tumen Jesús tiʼ junpʼéel kettʼaaneʼ, le x-chʼúupalaʼ tu pʼataj u kaajal Jéeoba, baʼaleʼ ka máan kʼiineʼ tuukulnaj tubeeleʼ ka suunaji (Luc. 15:11-24). ¿Baʼax kʼuch u naʼate? Letiʼeʼ ku yaʼalik: «Desde ka suunajeneʼ maas in yaabiltmaj le sukuʼunoʼob kex yaan kʼiin ku beetkoʼob baʼax maʼ maʼalobiʼ. Kaʼacheʼ séeb in waʼalik baʼal tiʼob, baʼaleʼ bejlaʼeʼ mix baʼal ken u beet in náachtal tiʼ letiʼob. Le múuchʼuliloʼ ku keʼetel yéetel junpʼéel paraíso. Maʼ unaj k-pʼatik chéen utiaʼal ka xiʼikoʼon tu paach le baʼaxoʼob ku tsʼáaik le kʼasaʼan yóokʼol kaabaʼ».

Mantatsʼ unaj k-tsʼáaik u nib óolalil le bendicionoʼob k-kʼamkoʼ

Le baʼaxoʼob jatsʼutstak ken u beet u Reino Diosoʼ jach maʼalobtak. ¿Máasaʼ jach kiʼimakchaj k-óol le ka t-yáax uʼuyaj baʼaxoʼob ken u beet u Reino Dios? Maʼ xaaneʼ t-beetaj jeʼex le máak tu konaj «tuláakal baʼal [yaantiʼ]» utiaʼal u manik «junpʼéel [perla] yaʼab u tojol[oʼ]» (Mat. 13:45, 46). ¿Xuʼul wa u jatsʼutstal u yilik le baʼax jach yaʼab u tojoloʼ? Le Bibliaoʼ maʼatech u yaʼalik wa xuʼuli. Toʼon xaneʼ maʼ unaj u xuʼulul k-páaʼtik yéetel kiʼimak óolal le baʼaxoʼob jatsʼutstak kun ilbil maʼ kun xáantaloʼ (1 Tes. 5:8; Heb. 6:19).

Tuukulnakoʼon tiʼ Jean, letiʼeʼ tsʼoʼok maas tiʼ sesenta jaʼaboʼob joʼopʼok u meyajtik Jéeoba. Letiʼeʼ ku yaʼalik: «Junpʼéel baʼax ku yáantken utiaʼal ka tuukulnaken tiʼ le Reinooʼ letiʼe in tsikbaltik tiʼ uláakʼ máakoʼoboʼ. Jach ku kiʼimaktal in wóol ken in wil bix u yuʼubkuba le máakoʼob ken u naʼatoʼob baʼax le Reinooʼ. Yéetel ken in wil bix u kʼeʼexel u kuxtal le máakoʼob tumen le baʼax ku yaʼalik le Bibliaoʼ, kin tuklik: “Jach túun jatsʼuts le baʼaxoʼob k-kʼaʼaytikoʼ”».

Jeʼex túun k-ilkoʼ, jach yaan baʼax oʼolal k-tsʼáaik u nib óolalil tiʼ Dios yoʼolal le bendicionoʼob ku tsʼáaiktoʼonoʼ. Bejlaʼeʼ k-muʼyajtik talamiloʼob jeʼex le chʼaʼpachtajil, le kʼojaʼaniloʼoboʼ, le chʼíijiloʼ, le u jach lúubul u yóol máakoʼ, u kíimil juntúul máax jach k-yaabiltmaj wa yoʼolal le óotsililoʼ. Baʼaleʼ k-ojel le baʼaloʼobaʼ maʼ kun xáantal ken luʼsaʼakoʼob. Teʼ túumben luʼumoʼ, u Reino Dioseʼ yaan u luʼsik tuláakal le baʼaxoʼob beetik k-muʼyajoʼ (Apo. 21:4).

Baʼaleʼ le maʼ kʼuchuk le kʼiin jeʼeloʼ, unaj k-tuukul tiʼ le bendicionoʼob ku tsʼáaiktoʼonoʼ, jeʼex tu beetil le salmista ka tu yaʼalaj le tʼaanoʼobaʼ: «Yuumtsil in [Dios], yaʼabkach le jakʼ óol meyajoʼob ta beetajtechoʼ, yaʼab a chʼaʼ óotsilil tiʼ toʼon. ¡Mix baʼal ku ketkuba ta wéetel! In kʼáat in kʼaʼaytoʼob, ka tʼaanaken tu yoʼolaloʼob, baʼaleʼ sen yaʼab, minaʼan u xookil» (Sal. 40:5).

[Tsolajiloʼob]

[U tsolajil le oochel teʼ táan juʼun 18]

Jéeobaeʼ ku yáantkoʼon utiaʼal k-aktáantik le talamiloʼoboʼ