Jeʼel jaypʼéel jaʼab yantiʼ máakeʼ jeʼel u páajtal u meyajtik Dioseʼ

Tu kʼiinil 19 tiʼ diciembre tiʼ 2009 okjaʼanaj juntúul maamatsil yéetel u hija tu noj kaajil Málaga (tu noojol España); tu kaʼatúulaloʼobeʼ ku kʼaabaʼtikoʼob Ana. Teʼ jaʼab jeʼeloʼ okjaʼanaj 2,352 juntúulal máakoʼob tu luʼumil España, baʼaleʼ le kaʼatúul koʼoleloʼobaʼ ku beetkoʼob u tuukul máak. ¿Baʼaxten? Tumen le maamatsiloʼ yaan 107 jaʼaboʼob tiʼ yéetel le hijatsiloʼ 83.

¿Baʼax péeksoʼob u kʼub u kuxtaloʼob tiʼ Jéeoba yéetel ka okjaʼanakoʼob? Tu káajbal u jaʼabil 1970, invitartaʼab le hijatsil tu Xookil Libroil Múuchʼulil tumen juntúul kiikoʼ. Anaeʼ yaʼab juntéenel bin teʼ muchʼtáambaloʼ, baʼaleʼ yoʼolal u meyajeʼ maʼ béeychaj u maas meyajtik Diosiʼ.

Kex diez jaʼaboʼob tiʼ lelaʼ, jujuntúul tiʼ u paalaleʼ joʼopʼ u xokikoʼob le Bibliaoʼ ka okjaʼanajoʼob. Ka máan kʼiineʼ áantaʼab tumen Mari Carmen, u hija utiaʼal ka utsak tu yich tu kaʼatéen le baʼax ku kaʼansik le Bibliaoʼ, yéetel ka u yóot ka tsʼaʼabak xook tiʼ. U abuela Mari Carmeneʼ maʼ xáanchaj ka tu yóotaj ka tsʼaʼabak xook tiʼ yéetel le Bibliaoʼ. Bey túunoʼ diez juntúulal ichil le familia tsʼoʼok u kʼamik le baʼax ku kaʼansik le Bibliaoʼ.

Teʼ kʼiin ka okjaʼanaj le kaʼatúul Anaʼobaʼ jach kiʼimakchaj u yóoloʼob. Le maamatsiloʼ tu yaʼalaj: «Jéeobaeʼ jach uts tin wéetel tumen tu chaʼaj in kʼaj óoltik». U hijaeʼ ku yaʼalik xan: «In kʼáat in meyajt Jéeoba, in beet baʼax ku yaʼalik yéetel in táakpajal teʼ kʼaʼaytaj tak tuʼux ku páajtal, tak ken kʼuchuk le Paraísooʼ».

Junpʼéel baʼal jach jatsʼuts u yilik le kaʼatúul kiik kimen u yíichamoʼobaʼ letiʼe u binoʼob teʼ muchʼtáambaloʼoboʼ. Juntúul anciano tiʼ le múuchʼulil tuʼux yanoʼoboʼ, ku yaʼalik: «Mix juntéen ku pʼáatal maʼ u taaloʼob teʼ muchʼtáambaloʼoboʼ, yéetel mantatsʼ u líiʼsmubaʼob utiaʼal u táakpajloʼob tiʼ u Xookil U Pʼíich Tulumil Kanan.

Le baʼax ku beetkoʼoboʼ ku kʼaʼajsiktoʼon Ana, juntúul koʼolel kimen u yíicham, le Bibliaoʼ ku yaʼalikeʼ «maʼatech u jóokʼol [teʼ templooʼ], baʼaleʼ yéetel kʼiin yéetel áakʼab táan kaʼach u meyajtik Yuumtsil yéetel suʼukʼin yéetel payalchiʼ». Tumen mantatsʼ tiaʼan teʼ templooʼ páajchaj u yilik Jesús tu chichnil (Luc. 2:36-38). Kex yaan 84 jaʼaboʼob tiʼeʼ, maʼ xuʼuluk u meyajtik Jéeoba tumen jach chʼijaʼaniʼ, lelaʼ bey xan u beetik le kaʼatúul Anaʼob teʼ kʼiinoʼobaʼ.

¿Yaan wa a láakʼtsiloʼob jeʼel u yóotikoʼob u yuʼuboʼob le baʼax ku kaʼansik le Bibliaoʼ? ¿Tsʼoʼok wa a kʼaʼaytik le maʼalob péektsil tiʼ juntúul nojoch máak u kʼáat u kan u jaajil yoʼolal Dios? Maʼ xaaneʼ jeʼel u beetkoʼob jeʼex le kaʼatúul kiikoʼob tsʼoʼok k-aʼalikaʼ, tumen jeʼel jaypʼéel jaʼab yantiʼ máakeʼ jeʼel u páajtal u meyajtik Jéeoba, le u jaajil Diosoʼ.

[U tsolajil le oochel teʼ táan juʼun 25]

«Jéeobaeʼ jach uts tin wéetel tumen tu chaʼaj in kʼaj óoltik»

[U tsolajil le oochel teʼ táan juʼun 25]

«In kʼáat in meyajt Jéeoba tak ken kʼuchuk le Paraísooʼ»