¡K-kʼamkeʼex yéetel kiʼimak óolal teʼ tu maas maʼalobil bejoʼ!
¡K-kʼamkeʼex yéetel kiʼimak óolal teʼ tu maas maʼalobil bejoʼ!
«Wa kuxaʼanoʼoneʼ [bey xan] wa kimenoʼoneʼ utiaʼaloʼon Yuumtsil.» (ROM. 14:8)
1. ¿Baʼax tu kaʼansaj Jesús maas maʼalob ka u beet máak?
BEJLAʼEʼ jejeláas bix jeʼel u kuxtal máakeʼ, baʼaleʼ Jéeobaeʼ u kʼáat ka kuxlakoʼon jeʼex u yaʼalikeʼ. U jaajileʼ maas maʼalob ka u beet máak le baʼaxoʼob ku yaʼalik teʼ Bibliaoʼ bey xan ka kaambalnak tiʼ Jesucristo, u Hijo. Letiʼeʼ tu kaʼansaj u disipuloʼob u adorartoʼob Jéeoba jeʼex u nuʼuktik le kiliʼich muukʼoʼ bey xan jeʼex utstutʼaaneʼ, tsʼoʼoleʼ tu yaʼalajtiʼob ka u kaʼansoʼob uláakʼ máakoʼob (Mat. 28:19, 20; Juan 4:24). Wa k-beetik le baʼax tu yaʼalaj Jesusoʼ, yaan k-kiʼimakkúuntik u yóol Jéeoba yéetel yaan u yáantkoʼon.
2. 1) ¿Baʼax tu beetaj yaʼab máakoʼob ka tu kʼaj óoltoʼob le maʼalob péektsil teʼ yáax siglooʼ? 2) ¿Baʼaxten le yáax cristianoʼoboʼ ku yaʼalaʼal tiaʼanoʼob kaʼach teʼ «Bejoʼ»?
2 «Tuláakal túun le máaxoʼob jach tu jaajil u kʼáatoʼob ka yanaktiʼob kuxtal minaʼan u xuuloʼ» ku kʼamikoʼob u jaajil yéetel ku yokjaʼob (Hch. 13:48, NM). Teʼ kʼiin ken okjaʼanakoʼoboʼ jeʼel páajtal k-aʼaliktiʼobeʼ: «¡K-kʼamkeʼex yéetel kiʼimak óolal teʼ tu maas maʼalobil bejoʼ!». Teʼ yáax siglooʼ u milesi máakoʼob tiʼ jejeláas kaajoʼobeʼ tu kʼamoʼob u jaajil yéetel okjaʼanajoʼob utiaʼal yeʼeskoʼob u kʼáat u meyajtoʼob Dios (Hch. 2:41). Le máakoʼobaʼ ku yaʼalaʼal kaʼacheʼ tiaʼanoʼob teʼ «Bejoʼ» (Hch. 9:2; 19:23, NM). Yoʼolal lelaʼ joʼopʼ u biskoʼob upʼéel kuxtal ku yeʼesik u fejoʼob tiʼ Jesucristo yéetel joʼopʼ u kuxtaloʼob jeʼex kuxlajikoʼ (1 Ped. 2:21).
3. 1) ¿Baʼaxten k-okjaʼ? 2) ¿Jaytúul máaxoʼob tsʼoʼok u yokjaʼ teʼ tu tsʼook diez jaʼaboʼobaʼ?
3 Teʼ tu tsʼook kʼiinoʼobaʼ, táan u kaʼansaʼal máakoʼob u kʼaj óoltoʼob Dios ich maas tiʼ doscientos treinta luʼumiloʼob yéetel uláakʼ kaajoʼob. Teʼ tu tsʼook diez jaʼaboʼobaʼ tsʼoʼok u yokjaʼ 2,700,000 utúulal máakoʼob, lelaʼ u kʼáat u yaʼaleʼ 5,000 utúulal cada semana. Letiʼobeʼ okjaʼanajoʼob tumen u yaabiltmoʼob Jéeoba yéetel u kʼáat u beetoʼob baʼax ku yaʼalik, tsʼoʼok u kʼaj óoltkoʼob yéetel u creerkoʼob le baʼax ku yaʼalik le Bibliaoʼ. U jaajileʼ minaʼan uláakʼ baʼax jeʼex le okjaʼoʼ, tumen ku yáantaj utiaʼal u káajal u biskuba máak yéetel Jéeoba. Tsʼoʼoleʼ ku yeʼesik jach k-kʼubik k-óol yaan u yáantkoʼon xíimbal mantatsʼ teʼ «bej» ku yeʼesiktoʼon, jeʼex úuchik u yáantik le máaxoʼob meyajt úuchjeakiloʼ (Isa. 30:21).
¿Baʼaxten kʼaʼabéet u yokjaʼ máak?
4, 5. Aʼal baʼax utsiloʼob ku kʼamik le máaxoʼob ku yokjaʼoboʼ.
4 ¿Kux túun teech? Maʼ xaaneʼ tsʼoʼok a wojéeltik máax Dios, tsʼoʼok a beetik jujumpʼéel kʼeexoʼob ichil a kuxtal yéetel maʼ xaaneʼ, kex maʼ okjaʼanakecheʼ ka jóokʼol kʼaʼaytaj. Wa beyoʼ jach maʼalob baʼax táan a beetik. Baʼaleʼ ¿tsʼoʼok wa a waʼalik tiʼ Jéeoba ich payalchiʼ táan a kʼubik a kuxtal tiʼ yéetel táan a tuklik a wokjaʼ? Jeʼex tsʼoʼok a naʼatik teʼ Bibliaoʼ, le baʼax maas unaj u beetik máakoʼ maʼ chéen u kaxtik u yutsiliʼ mix u bin tu paach taakʼiniʼ, baʼaxeʼ u tsʼáaik nojbeʼenil tiʼ Jéeoba (xokaʼak Salmo 148:11-13; Luc. 12:15). Tsʼoʼoleʼ wa ka wokjaʼeʼ yaan a kʼamik yaʼab utsiloʼob. ¿Máakalmáak jujumpʼéel tiʼ le utsiloʼobaʼ?
5 Wa ka chʼaʼatuklik a wokjaʼeʼ, maas yaan u yantal u beelal a kuxtal, yaan u kiʼimaktal a wóol, tumen a wojel táan a beetik baʼax utstutʼaan Dios (Rom. 12:1, 2). Le kiliʼich muukʼoʼ jeʼel u yáantkech a weʼes jatsʼuts modos jeʼex le fe yéetel le jeetsʼel óolaloʼ (Gal. 5:22, 23). Dioseʼ yaan u yuʼubik a payalchiʼ yéetel yaan u yáantkech a tsʼáa ichil a kuxtal le baʼax ka kanik teʼ Bibliaoʼ. Yaan a meyajtik Dios yéetel kiʼimak óolal, yaan a maas tsʼáaik a fe tiʼ le kuxtal minaʼan u xuuloʼ, tsʼoʼoleʼ ken a kʼub a kuxtal tiʼ Jéeoba yéetel ken okjaʼanakecheʼ ka weʼesik a kʼáat a beetaba J-jaajkunajil tiʼ letiʼ (Isa. 43:10-12).
6. ¿Baʼax k-eʼesik ken okjaʼanakoʼon?
6 Ken okjaʼanakoʼoneʼ k-eʼesik tsʼoʼok k-kʼubik k-kuxtal tiʼ Jéeoba yéetel tsʼoʼok u tiaʼalintkoʼon. Pabloeʼ tu yaʼalaj: «Mix juntúul tiʼ toʼon kuxaʼan chéen utiaʼal tu juunal, mix ku kíimil utiaʼal tu juunal. Tumen wa kuxaʼanoʼoneʼ, kuxaʼanoʼon utiaʼal Yuumtsil, wa k-kíimileʼ, k-kíimil utiaʼal Yuumtsil. Bey túunoʼ, wa kuxaʼanoʼoneʼ [bey xan] wa kimenoʼoneʼ utiaʼaloʼon Yuumtsil» (Rom. 14:7, 8). Dioseʼ u tsʼaamajtoʼon u jatsʼuts páajtalil k-yéeyik baʼax k-kʼáat beete. Ken k-chʼaʼatukult k-xíimbal tu beeloʼobeʼ k-eʼesik k-yaabiltmaj, lelaʼ ku beetik u kiʼimaktal u yóol (Pro. 27:11). Ken okjaʼanakoʼoneʼ, maʼ chéen k-eʼesik tsʼoʼok k-kʼubik k-kuxtal tiʼ Jéeobaiʼ, baʼaxeʼ k-eʼesik k-kʼamik bey k-Reyeʼ yéetel k-eʼesik táan k-tsʼáaikba tu tséel u gobernación (Hch. 5:29, 32). Jéeoba túuneʼ ku tsʼáaikuba t-tséel (xokaʼak Salmo 118:6). Tsʼoʼoleʼ le okjaʼoʼ ku yáantkoʼon k-kʼam utsiloʼob bejlaʼeʼ bey xan teʼ kʼiinoʼob ku taaloʼ.
Le utsiloʼob k-kʼamik ikil k-yantal ichil u kaajal Jéeobaoʼ
7-9. 1) ¿Baʼax tu yaʼalaj Jesús ken u kʼam le máaxoʼob ku pʼatik tuláakal baʼax yantiʼob utiaʼal u tsaypachtikoʼoboʼ? 2) ¿Bix u béeytal le baʼax tu yaʼalaj Jesús teʼ Marcos 10:29 yéetel 30?
7 Utéenjeakileʼ Pedroeʼ tu yaʼalaj tiʼ Jesús: «Yuumtsil toʼoneʼ t-pʼataj tuláakal baʼax yantoʼoneʼ ka taaloʼon ta paach. ¿Baʼax túun kun antaltoʼon?» (Mat. 19:27). Letiʼeʼ u kʼáat kaʼach u yojéelt baʼax ken u kʼamoʼob teʼ kʼiinoʼob ku taaloʼ. U jaajileʼ letiʼobeʼ tu pʼatoʼob yaʼab baʼaloʼob utiaʼal ka maas páajchajak u kʼaʼaytkoʼob le Reinooʼ (Mat. 4:18-22). ¿Baʼax túun aʼalaʼabtiʼob tumen Jesús?
8 Jeʼex u yaʼalik u Evangelioi Marcoseʼ, Jesuseʼ tu yaʼalajtiʼob yaan u yantaloʼob ichil yaʼab máaxoʼob bey u sukuʼunoʼobeʼ: «Jeʼel máaxak ka u pʼat u yotoch, wa u sukuʼunoʼob, wa u kiikoʼob, wa u taata, wa u maama, wa u yatan, wa u paalaloʼob, wa u luʼumoʼob tin woʼolaleʼ wa tu yoʼolal le u maʼalob péektsilil le toksajiloʼ, yaan u kʼamik way yóokʼol le luʼum tiʼ le kʼiinoʼobaʼ ciento u téenel [maas] yaʼabil: Najoʼob, sukuʼunoʼob, kiikoʼob, maamaʼob, paalal yéetel luʼumoʼob, kex yéetel chʼaʼapachtajiloʼob; yéetel tiʼ le [kʼiinoʼob] ku taaloʼ yaan u kʼamik kuxtal minaʼan u xuul» (Mar. 10:29, 30). Jach jeʼex tu yaʼalil Cristooʼ, teʼ yáax siglooʼ yanchaj disipuloʼob jeʼex Lidia, Áquila, Priscila yéetel Gayo, tu kʼamoʼob uláakʼ máaxoʼob meyajt Dios tu yotochoʼob bey jach u sukuʼunoʼob, kiikoʼob yéetel u maamaʼobeʼ (Hch. 16:14, 15; 18:2-4; 3 Juan 1, 5-8).
9 Le baʼax tu yaʼalaj Jesusoʼ jach táan u béeytal teʼ kʼiinoʼobaʼ. Yaʼab sukuʼunoʼob jeʼex le misioneroʼob, betelitaʼob, le sukuʼunoʼob ku taaloʼob táanxel luʼumiloʼ tsʼoʼok u pʼatik u «luʼumoʼob» wa baʼaxoʼob yantiʼob utiaʼal u maas táakpajloʼob u kʼaʼaytoʼob le Reino jejeláas tuʼuxoʼ. Yanoʼob xaneʼ tsʼoʼok u pʼatik u yotochoʼob yéetel tsʼoʼok u kanikoʼob kuxtal chéen yéetel upʼíit baʼal. Yaʼab utéeneleʼ k-uʼuyik u tsikbaltikoʼob bix u yáantaʼaloʼob tumen Jéeoba yéetel bix kiʼimakil u yóoloʼob ikil u meyajtikoʼob (Hch. 20:35). U jaajileʼ tuláakal le máaxoʼob tsʼoʼok u yokjaʼoboʼ jeʼel u páajtal u tsʼáaikoʼob «táanil u [reino] Jajal Dios yéetel le toj kuxtal utstutʼaan» u múuchʼ yéetel le sukuʼunoʼob tiʼ tuláakal le yóokʼol kaabaʼ (Mat. 6:33).
Le utsiloʼob ku taasik u yantal máak «yáanal u boʼoyil» Jéeobaoʼ
10, 11. ¿Baʼax le «u boʼoyil» Jéeobaoʼ, yéetel bix jeʼel k-yantal yáanaleʼ?
10 U kʼubik u kuxtal máak tiʼ Jéeoba yéetel u yokjaʼeʼ ku tsʼáaik u páajtalil u yantal máak «yáanal u boʼoyil» Jéeoba (xokaʼak Salmo 91:1). Lelaʼ letiʼe bix u kanáantikoʼon Jéeoba tiʼ le baʼaxoʼob jeʼel u beetik k-náachtal tiʼ letiʼoʼ. Baʼaleʼ le máaxoʼob maʼatech u meyajtkoʼob Diosoʼ maʼ u kʼaj óoloʼob le tuʼux ku kanáantik máakoʼ. Wa k-beetik le baʼax t-aʼalaj le ka t-kʼubaj k-kuxtal tiʼ Jéeoba yéetel wa k-kʼubik k-óol tiʼ letiʼeʼ, bey ka k-aʼaltiʼ: «¡Teech in taʼakbesaj, in toksajil, in [Dios] máax tiʼ yaan in wóol!» (Sal. 91:2). Beyoʼ Jéeobaeʼ yaan u kanáantikoʼon (Sal. 91:9). ¿Máasaʼ minaʼan uláakʼ baʼax maas maʼalob tiʼ lelaʼ?
11 Toʼoneʼ ku páajtal k-yantal yáanal «u boʼoyil» Jéeoba tumen tsʼoʼok u tsʼáaik u páajtalil k-amigotik. Lelaʼ ku káajal ken k-kʼub k-kuxtal tiʼ letiʼ bey xan ken okjaʼanakoʼon; tsʼoʼoleʼ k-maas bisikba tu yéetel ken k-xok le Bibliaoʼ, ken payalchiʼinakoʼon bey xan ken k-beet baʼaxoʼob utstutʼaan (Sant. 4:8). Tumen Jesús jach u kʼaj óol Jéeobaeʼ, letiʼeʼ ku yeʼesiktoʼon bix unaj k-bisikba tu yéetel. Letiʼeʼ mantatsʼ ku kʼubik u yóol tiʼ u Taata (Juan 8:29). Maʼ u tuʼubultoʼoneʼ Dioseʼ u kʼáat yéetel jeʼel u páajtal u yáantkoʼon k-tsʼoʼokbes le baʼax t-aʼalajtiʼ ka t-kʼubaj k-kuxtal tiʼoʼ (Ecl. 5:4). Le bix u kanáantikoʼon utiaʼal maʼ u xuʼulul k-meyajtikoʼ ku yeʼesik jach u yaabiltmoʼon yéetel u kʼáat ka k-meyajt mantatsʼ.
Le utsiloʼob ku taasik u yantal máak ichil u kaajal Diosoʼ
12, 13. 1) ¿Baʼaxten ku keʼetel le bix yaniloʼon yéetel upʼéel paraísooʼ? 2) ¿Bix túun jeʼel k-áantik le máaxoʼob maʼ úuch joʼopʼok u meyajtkoʼob Jéeobaoʼ?
12 Le u kʼubik u kuxtal máak yéetel u yokjaʼoʼ ku tsʼáaik u páajtalil u yantal máak ichil upʼéel kúuchil ku keʼetel yéetel upʼéel paraíso. ¿Baʼaxten túun ku keʼetel yéetel upʼéel paraíso? Tumen yantoʼon jeetsʼelil yéetel Jéeoba bey xan yéetel u maasil sukuʼunoʼob (Sal. 29:11; Isa. 54:13). Lelaʼ maʼ tu páajtal u keʼetel yéetel le baʼaxoʼob ku tsʼáaik le yóokʼol kaabaʼ. Lelaʼ maases ku yilaʼal teʼ asamblea internacionaloʼoboʼ, teʼeloʼ ku muchʼkuba sukuʼunoʼob ku taaloʼob tiʼ jejeláas luʼumiloʼob, jejeláas tʼaaniloʼob, jejeláas razaʼob; tuláakloʼobeʼ ku biskubaʼob yéetel yaabilaj.
13 ¿Máasaʼ maʼ bey kuxlik le máaxoʼob maʼatech u meyajtkoʼob Diosoʼ? (Xokaʼak Isaías 65:13, 14.) Le kʼaʼaytajoʼ ku tsʼáaiktoʼon u jatsʼuts páajtalil k-invitartik uláakʼ máakoʼob utiaʼal ka oojkoʼob teʼ paraísoaʼ. Tsʼoʼoleʼ nojoch baʼal k-ilik k-áantik le máaxoʼob maʼ úuch joʼopʼok u meyajtkoʼob Jéeoba utiaʼal u maas maʼalobkíint u kʼaʼaytajoʼoboʼ. Yéetel wa le ancianoʼob ku yaʼalikoʼob toʼonoʼ, jeʼel u páajtal k-áantkoʼob jeʼex áantaʼabik Apolos tumen Áquila yéetel Priscilaeʼ, letiʼobeʼ tu tsoloʼob «tʼáalkab u bejiloʼob Jajal Dios tiʼ» (Hch. 18:24-26).
Maʼ k-xulik k-kaambal tiʼ Jesús
14, 15. ¿Baʼaxten maʼ unaj u xuʼulul k-kaambal tiʼ Jesusiʼ?
14 Ken tsʼoʼokok u yokjaʼ máakeʼ unaj u seguer u kaambal tiʼ Jesús. ¿Baʼaxten? Tumen táanil tiʼ u taal way Luʼumeʼ, tu máansaj u milesi jaʼaboʼob táan u múul meyaj yéetel u Taata (Pro. 8:22, 30). Letiʼeʼ u yojel maas maʼalob ka u beet máak baʼax ku yaʼalik Dios yéetel ka u kʼaʼayt le maʼalob péektsiloʼ (Juan 18:37). U yojel xaneʼ ikil u beetik baʼax ku yaʼalik Jéeobaeʼ yaan u muʼyaj yéetel yaan u kíimsaʼal (Mat. 20:18, 19; Heb. 4:15). Tsʼoʼoleʼ u yojleʼ wa ka u beet chéen baʼax u kʼáateʼ yaan u kaxtik chéen u yutsil yéetel yaan u náachtal tiʼ Dios. Yéetel le bix kuxlajikoʼ tu yeʼesaj bix unaj u chúukpajal u yóol máak u meyajt Jéeoba.
15 Le ka tsʼoʼok u yokjaʼ Jesuseʼ, Satanaseʼ tu yóotaj u beet u xuʼulul u xíimbal tu beeloʼob u Taata, baʼaleʼ letiʼeʼ maʼ tu xulaj u beetkiʼ (Mat. 4:1-11). Lelaʼ ku yeʼesiktoʼoneʼ jeʼel u béeytal u chúukpajal k-óol meyajt Dios kex jeʼel baʼaxak ka u beet le Kʼaasilbaʼaloʼ. Le Kʼaasilbaʼaloʼ maases ku chʼaʼapachtik le máaxoʼob taʼaytak u yokjaʼoboʼ bey xan le maʼ úuch okjaʼanakoʼoboʼ (1 Ped. 5:8). ¿Bix túun u chʼaʼapachkoʼob? Ku beetik u líikʼil tu contraʼob le u láakʼtsiloʼob maʼ u jach kʼaj óoloʼob le meyaj k-beetkoʼ. Baʼaleʼ kex táan k-chʼaʼapachtaʼaleʼ jeʼel u páajtal k-núukik le kʼáatchiʼob ku beetkoʼoboʼ, k-tsʼáaik u yojéeltoʼob le maʼalob péektsiloʼ bey xan k-eʼesik jatsʼuts modos jeʼex le tsiikiloʼ yéetel k-ilik maʼ k-baʼateltʼaan tu yéeteloʼob (1 Ped. 3:15). Beyoʼ le máaxoʼob uʼuyikoʼonoʼ yaan u kʼamkoʼob yaʼab utsiloʼob (1 Tim. 4:16).
Maʼ k-pʼatik mix bikʼin le bej maas maʼaloboʼ
16, 17. 1) ¿Baʼaxoʼob ku yaʼalik Deuteronomio 30:19 yéetel 20 jach kʼaʼabéet k-beetik utiaʼal k-kʼamik le kuxtaloʼ? 2) ¿Bix eʼesaʼabik tumen Jesús, Juan yéetel Pablo u kʼaʼananil u beetik máak le baʼax ku yaʼalik Deuteronomiooʼ?
16 Kex mil quinientos jaʼaboʼob táanil tiʼ u taal Jesús way Luʼumeʼ, Moiseseʼ tu yaʼalaj tiʼ u kaajil Israel ka u yéey le u maas maʼalobil bej yaan teʼ kʼiinoʼob jeʼeloʼ. Tu yaʼalajtiʼob: «Kin tsʼáaik le kaʼan yéetel le luʼum utiaʼal jaajkunajil ta wóokʼoleʼex, tsʼoʼok in tsʼáaik a yéeyeʼex kuxtal yéetel kíimil, bey xan kiʼtʼaan yéetel loolobtʼaan. Yéeyeʼex túun le kuxtal utiaʼal ka kuxlakeʼex yéetel a chʼiʼibaleʼexoʼ; yaabilteʼex Yuumtsil a [Dioseʼex], uʼuyajtʼanteʼex, maʼ a kʼexikeʼex» (Deu. 30:19, 20). Kex u kaajil Israel maʼ chúukpaj u yóol u meyajt Dioseʼ le óoxpʼéel baʼaloʼob tu yaʼalaj Moisés ka u beetoʼoboʼ maʼ kʼexpajiʼ. Jesús yéetel uláakʼ máaxoʼob meyajt Dioseʼ tu yaʼaloʼob xan u kʼaʼananil u beetaʼal.
17 Le yáax upʼéeloʼ ku yaʼalik: «Yaabilteʼex Yuumtsil», utiaʼal lelaʼ kʼaʼabéet k-beetik tuláakal le baʼaxoʼob ku yaʼalikoʼ (Mat. 22:37). U kaʼapʼéeloʼ ku yaʼalik: «Uʼuyajtʼanteʼex». Lelaʼ k-beetik ken k-xok le Bibliaoʼ yéetel ken tsʼáa ichil k-kuxtal le baʼax k-kankoʼ (1 Juan 5:3). Le oʼolaleʼ jach kʼaʼabéet k-bin tiʼ tuláakal le muchʼtáambaloʼoboʼ, tumen tiʼ ku tsoʼolol le baʼax ku yaʼalik le Bibliaoʼ (Heb. 10:23-25). Yéetel u yóoxpʼéeloʼ ku yaʼalik: «Maʼ a kʼexikeʼex» Jéeoba. Jeʼel baʼaxak ka úuchkeʼ, unaj u k-tsʼáaik k-fe tiʼ letiʼ yéetel unaj u seguer k-tsaypachtik u Hijo (2 Cor. 4:16-18).
18. 1) ¿Baʼax aʼalaʼab tu jaʼabil 1914 yoʼolal u jaajiloʼ? 2) ¿Bix k-uʼuyikba yoʼolal le baʼaxoʼob tsʼoʼok k-kʼaj óoltikoʼ?
18 U beetik máak baʼax ku yaʼalik le Bibliaoʼ jach ku taasik utsiloʼob. Tu jaʼabil 1914, le revista The Watch Tower 15 tiʼ diciembre tiʼ 1914, táan juʼun 377 yéetel 378, tu yaʼalaj: «¿Maʼ wa tiaʼanoʼon ichil upʼéel kaaj tuʼux yaan kiʼimak óolal yéetel ku yilaʼal yaʼab utsiloʼobiʼ? ¿Maʼ wa jaaj maʼatech k-pʼaʼatal tumen Diosiʼ? Le oʼolaleʼ wa yaan máax u kʼaj óol upʼéel bej maas maʼalobeʼ xiʼikiʼ. Wa yaan tiʼ teʼex ku kaxtik upʼéel tuʼux maas maʼalobeʼ u beet uts u yaʼaliktoʼon. Toʼoneʼ maʼ k-kʼaj óol uláakʼ tuʼux ku yilaʼal tak chéen upʼíit tiʼ le baʼaloʼob jatsʼutstak tsʼoʼok k-kanik ichil u Tʼaan Diosoʼ. [...] Mix upʼéel tʼaanil yéetel mix upʼéel u nuʼukul tsʼíib jeʼel u páajtal u yeʼesik le jeetsʼelil, le kiʼimak óolal yéetel le utsiloʼob tsʼoʼok u taasiktoʼon k-kʼaj óoltik u jaajil yoʼolal Diosoʼ. U naʼat Dios, u justicia, u muukʼ yéetel u yaabilajeʼ ku tsʼáaiktoʼon tuláakal le baʼaxoʼob taak k-ojéeltik tiʼ Dios ichil k-puksiʼikʼaloʼ. Toʼoneʼ tsʼoʼok k-kʼuchul yiknal le baʼax k-kaxtikoʼ. Minaʼan uláakʼ baʼax maas k-kʼáat jeʼex ka k-maas kʼaj óolt Diosoʼ». Toʼoneʼ jach k-tsʼáaik u nib óolalil tiʼ Dios yoʼolal bix u yáantkoʼon k-naʼat u jaajiloʼ. Bejlaʼeʼ maas yaan baʼax oʼolal u kiʼimaktal k-óol ikil k-xíimbal teʼ «sáasil» ku tsʼáaik Jéeobaoʼ (Isa. 2:5; Sal. 43:3; Pro. 4:18).
19. ¿Baʼaxten unaj u yokjaʼ le máaxoʼob táan u beetkoʼob le baʼax ku yaʼalik Jéeobaoʼ?
19 Wa a kʼáat xíimbal tu «sáasil» Jéeoba, baʼaleʼ maʼ okjaʼanakecheʼ, chʼaʼatukult a séeb beetik. Ilawil a beetik tuláakal le baʼaxoʼob ku kʼáataʼal utiaʼal ka páajchajak a wokjaʼoʼ, beyoʼ jeʼel a weʼesik táan a tsʼáaik u nib óolalil tiʼ Jéeoba yéetel tiʼ Jesús yoʼolal tuláakal le baʼaxoʼob tsʼoʼok u beetkoʼob ta woʼolaloʼ. Tsʼáa tiʼ Dios le baʼax maas koʼoj yantechoʼ: a kuxtal. Eʼes a kʼáat a beet baʼax ku yaʼalik yéetel a kʼáat a tsaypacht u Hijo (2 Cor. 5:14, 15). U jaajileʼ minaʼan uláakʼ bej maas maʼalob tuʼux jeʼel u bin máakeʼ.
¿Baʼax jeʼel a núukikeʼ?
• ¿Baʼax u kʼáat u yaʼal u yokjaʼ máak?
• ¿Baʼax utsiloʼob ku kʼamik le máaxoʼob ku kʼubik u kuxtaloʼob tiʼ Jéeoba yéetel ku yokjaʼoboʼ?
• ¿Baʼaxten jach unaj k-kaambal tiʼ Jesús?
• ¿Baʼax jeʼel u yáantkoʼon utiaʼal maʼ k-pʼatik le maas maʼalob bejoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 25]
Ken okjaʼanakoʼoneʼ k-eʼesik tsʼoʼok k-yéeyik le u maas maʼalobil bejoʼ
[U tsolajil le oochel teʼ táan juʼun 26]
¿Tiaʼanech wa «yáanal u boʼoy[il]» Jéeobaeʼ?