Le angeloʼoboʼ ku yáantkoʼob le máaxoʼob meyajtik Diosoʼ

«¿Maʼ wa tuláakal le angeloʼoboʼ [espirituʼob] ku meyajtikoʼob Jajal Dios, túuxtaʼanoʼob utiaʼal u yáantoʼob le máaxoʼob bíin u kʼamoʼob le [salvacionoʼ]?» (HEB. 1:14)

1. ¿Baʼaxten jach ku líiʼsik k-óol le baʼax ku yaʼalik Mateo 18:10 yéetel Hebreob 1:14?

 UTÉENJEAKILEʼ, Jesucristoeʼ tu ketaj u disipuloʼob yéetel «mejen paalaloʼob» yéetel tu yaʼalaj mix máak unaj u beetik u tʼóochpajloʼob, tumen le angeloʼob kanáantikoʼoboʼ «tiʼ yanoʼob mantatsʼ tu táan [u] Taata yaan teʼ kaʼanoʼ» (Mat. 18:10). Apóstol Pablo xaneʼ tu yaʼalaj yoʼolal le angeloʼoboʼ: «¿Maʼ wa tuláakal le angeloʼoboʼ [espirituʼob] ku meyajtikoʼob Jajal Dios, túuxtaʼanoʼob utiaʼal u yáantoʼob le máaxoʼob bíin u kʼamoʼob le [salvacionoʼ]?» (Heb. 1:14). Le tekstoʼobaʼ jach ku líiʼsik k-óol tumen ku yeʼesikeʼ Jéeobaeʼ ku yáantkoʼon yéetel u angeloʼob. ¿Baʼax uláakʼ ku kaʼansik le Biblia yoʼolal le angeloʼoboʼ? ¿Bix u yáantkoʼonoʼob? ¿Yéetel baʼax jeʼel u páajtal k-kanik tiʼ letiʼobeʼ?

2, 3. ¿Baʼax jejeláas meyajil ku beetik le angeloʼoboʼ?

² Tiʼ Jéeobaeʼ yaan u millonesi angeloʼob, letiʼobeʼ yaan páajtalil tiʼob yéetel ku «tsʼoʼokbesi[koʼob] baʼaxoʼob ku yaʼalik» (Sal. 103:20; xokaʼak Apocalipsis 5:11). Le angeloʼobaʼ tsʼaʼan u páajtalil tiʼob u chʼaʼatuklikoʼob baʼax ken u beetoʼob, tsʼaʼan u páajtalil tiʼob u yeʼeskoʼob jatsʼuts modos jeʼex Jéeobaeʼ. Cada u jaats tiʼ le angeloʼoboʼ tsʼaʼan upʼéel meyaj u beetoʼob. Utúul tiʼ letiʼobeʼ arcángel Miguel, lelaʼ letiʼe kʼaabaʼ tsʼaʼan tiʼ Jesús teʼ kaʼanoʼ (Dan. 10:13; Jud. 9). Letiʼeʼ «u yáaxil tiʼ tuláakal baʼax yaan». Letiʼ «le Tʼaan», wa le Máax bisik u tʼaan Diosoʼ, yéetel letiʼe Máax áant Jéeoba utiaʼal u beetik tuláakal baʼaloʼ (Col. 1:15-17; Juan 1:1-3).

³ Yáanal u nuʼuktaj le arcangeloʼ ku meyaj le serafinoʼoboʼ, letiʼobeʼ ku kʼaʼaytikoʼob u kiliʼichil Jéeoba yéetel ku yilkoʼob ka pʼáatak limpioi u kaajal. Yéetel yáanal xan u nuʼuktajeʼ ku meyaj le querubinoʼoboʼ, letiʼobeʼ ku yilik u yeʼeskoʼob chéen Jéeoba unaj u gobernar (Gén. 3:24; Isa. 6:1-3, 6, 7). Le u maasil angeloʼoboʼ ku beetkoʼob jejeláas meyajoʼob utiaʼal u tsʼoʼokbesaʼal baʼax u kʼáat Jéeoba (Heb. 12:22, 23).

4. 1)¿Bix tu yuʼubiluba le angeloʼob le ka beetaʼab le Luʼumaʼ? 2) ¿Baʼax jeʼel u yúuchul kaʼach wa ka u chʼaʼatukult u meyajkoʼob Dios k-yáax taataʼobeʼ?

⁴ Le angeloʼoboʼ jach kiʼimakchaj u yóoloʼob le ka beetaʼab le jatsʼuts Luʼumaʼ yéetel áantajnajoʼob utiaʼal u beetaʼal u maasil baʼaloʼob utiaʼal ka béeyak u kuxtal wíinik way Luʼumeʼ (Job 38: 4, 7). Jéeobaeʼ tu beetaj wíinik «jumpʼíit [maas] kabal tiʼ le angeloʼoboʼ», baʼaleʼ tumen tu beetaj jeʼex letiʼeʼ ku páajtal u yeʼesik jatsʼuts modos (Heb. 2:7; Gén. 1:26). Wa ka u chʼaʼatukult kaʼach Adán yéetel Eva u meyajkoʼob Dioseʼ, bejlaʼa kaʼach kuxaʼanoʼob yéetel u paalaloʼob teʼ Paraísooʼ yéetel bejlaʼa láayliʼ táakaʼanoʼob ichil u familia Jéeobaeʼ.

5, 6. ¿Baʼax tu beetaj utúul ángel, yéetel baʼax tu beetaj Dios tu yoʼolal?

⁵ Le angeloʼoboʼ péeknaj wal u yóoloʼob le ka tu tsʼáajuba tu contra Dios utúul tiʼ letiʼobiʼ. Le angelaʼ pʼáat maʼ utstutʼaan u adorartik Diosiʼ ka joʼopʼ u tsʼíiboltik ka adorartaʼak letiʼ. Letiʼeʼ tu tsʼáaj naʼatbil maʼ maʼalob bix u gobernar Jéeobaiʼ yéetel taakchaj u gobernar letiʼ. Bey úuchik u beetkuba Satanasiloʼ, lelaʼ u kʼáat u yaʼaleʼ «máax ku tsʼáaikuba tu contra uláakʼ». Yéetel le tuus tu yáax beetoʼ, tu beetaj xan u tsʼáaikuba Adán yéetel Eva tu contra Dios (Gén. 3:4, 5; Juan 8:44).

⁶ Tu séebanileʼ Jéeobaeʼ tu pʼis óoltaj Satanás ka tu yaʼalajtiʼ: «Teech yéetel le koʼoleloʼ yaan in beetik a pʼektikabaʼex, bey kun úuchul xan tiʼ a chʼiʼibal yéetel u chʼiʼibal letiʼ. U chʼiʼibal letiʼeʼ yaan u kiimbesikech ta pool, teech xaneʼ yaan a chiʼik u tuunkuy» (Gén. 3:15). Le yáax profecíaaʼ ku yeʼesikeʼ yaan u pʼektikuba Satanás yéetel le «koʼoleloʼ». Le koʼoleloʼ, ku chíikbesik tuláakal le angeloʼob yanoʼob teʼ kaʼan ku keʼetloʼob yéetel utúul atantsil jach yaabiltaʼan tumen Jéeobaoʼ. Kex le baʼax tu yaʼalaj Jéeoba pʼáat ichil u «taʼakbil» baʼaloʼob yéetel jujumpʼíitil úuchik u bin u naʼataʼaleʼ, ku yeʼesik jach yaan u béeytal le baʼax u tukulmoʼ. Jéeobaeʼ tu yéeyaj utúul tiʼ u angeloʼob utiaʼal ka u xuʼuls tiʼ le máaxoʼob ku tsʼáaikubaʼob tu contraoʼ yéetel utiaʼal ka u muchʼ tu kaʼatéen «tuláakal baʼal, le yanoʼob kaʼanoʼ bey xan le yanoʼob luʼumoʼ» (Efe. 1:8-10).

7. ¿Baʼax tu beetaj u jaats angeloʼob tu kʼiiniloʼob Noé, yéetel baʼax tu beetaj Jéeoba tiʼob?

⁷ Tu kʼiiniloʼob Noeeʼ, u jaats tiʼ le angeloʼoboʼ «tu pʼatajoʼob u kajtaliloʼob» teʼ kaʼanoʼ yéetel tu sutubaʼob wíinikil utiaʼal ka kajlakoʼob yéetel le koʼoleloʼoboʼ (Jud. 6; Gén. 6:1-4). Le beetikeʼ Jéeobaeʼ tu tsʼáajoʼob ich éekʼjochʼeʼenil. Jeʼex u yaʼalik Pabloeʼ le angeloʼob yéetel Satanasaʼ suunajoʼob «kʼaakʼas [espirituiloʼob]»; letiʼobeʼ jach u pʼekmoʼob le máaxoʼob meyajtik Diosoʼ (Efe. 6:11-13; 2 Ped. 2:4).

¿Bix u yáantkoʼon le angeloʼoboʼ?

8, 9. ¿Bix tsʼoʼok u meyaj tiʼ Jéeoba le angeloʼob utiaʼal u kanáantik le máaxoʼob meyajtikoʼ?

⁸ Le angeloʼoboʼ tu yáantoʼob yaʼab tiʼ le máaxoʼob meyajt Dios úuchjeakiloʼ, jeʼex Abraham, Jacob, Moisés, Josué, Isaías, Daniel, Pedro, Juan yéetel Pablo, tu yáantoʼob tak Jesús. Tʼaanajoʼob xan tiʼ le xuʼulsajiloʼob tu taasaj Diosoʼ, tiʼ le profecíaʼob yéetel tiʼ le baʼaxoʼob unaj u beetik máak, jeʼex le yanoʼob tu Ley Moisesoʼ (2 Rey. 19:35; Dan. 10:5, 11, 14; Hch. 7:53; Apo. 1:1). Tumen chúukaʼan le Biblia yantoʼonoʼ, bejlaʼeʼ maʼ kʼaʼabéet u taal utúul ángel u yaʼaltoʼon baʼax u kʼáat Diosiʼ (2 Tim. 3:16, 17). Baʼaleʼ letiʼobeʼ láayliʼ táan u beetkoʼob baʼax u kʼáat Dioseʼ yéetel kex maʼatech u yilaʼaloʼobeʼ, táan u yáantkoʼob le máaxoʼob meyajtik Diosoʼ.

⁹ Le Bibliaoʼ ku yaʼalikeʼ «u ángel le Yuumtsiloʼ ku kanáantik yéetel ku tokik le máaxoʼob tsiki[koʼ]» (Sal. 34:7; 91:11, LSM). Tumen Satanás u yaʼalmaj mix máak jeʼel u chúukpajal u yóol u meyajt Dios wa ka u aktáant talamileʼ, Jéeobaeʼ ku chaʼiktiʼ ka u túunt u yóol le máaxoʼob meyajtikoʼ (Luc. 21:16-19). Baʼaleʼ, wa tsʼoʼok k-eʼesik chúukaʼan k-óol meyajt Dioseʼ, letiʼeʼ maʼ ken u chaʼa u túuntaʼal k-óol maas tiʼ le bukaʼaj ku páajtal k-muʼyajtikoʼ (xokaʼak 1 Corintoiloʼob 10:13). Wa Jéeoba ku yilik kʼaʼabéeteʼ, jeʼel u túuxtik u angeloʼob utiaʼal u yáantoʼoneʼ. Jeʼex utéenjeakileʼ tu salvartoʼob Sadrac, Mesac, Abednego, Daniel yéetel Pedro. Baʼaleʼ le angeloʼoboʼ maʼ tu salvartoʼob Esteban yéetel Santiago tiʼ le máaxoʼob pʼekmiloʼoboʼ (Dan. 3:17, 18, 28; 6:22; Hch. 7:59, 60; 12:1-3, 7, 11). ¿Baʼaxten? Tumen jejeláas baʼax táakaʼan ichil le talmil tu aktáantoʼoboʼ. Lelaʼ bey xan úuch tiʼ jujuntúul sukuʼunoʼob kʼaʼaloʼob tumen le naziʼoboʼ, kex tu chaʼaj Jéeoba u kíimsaʼal jujuntúul tiʼ letiʼobeʼ, u maas yaʼabileʼ maʼ tu chaʼaj u kíimsaʼaloʼobiʼ.

10. Kex ku yáantkoʼon Jéeoba yéetel u angeloʼobeʼ, ¿bix uláakʼ jeʼel u yáantkoʼoneʼ?

¹⁰ Le Bibliaoʼ maʼ tu yaʼalik wa yaan utúul ángel  kanáantik cada utúul tiʼ toʼon. Baʼax k-ojleʼ «wa k-kʼáatik wa baʼax jeʼel bix utstutʼaaneʼ, letiʼeʼ ku yuʼubikoʼon» (1 Juan 5:14). Lelaʼ ku yeʼesiktoʼoneʼ, Jéeobaeʼ jeʼel u túuxtik utúul ángel utiaʼal ka u yáantoʼoneʼ, baʼaleʼ yaan kʼiineʼ yaanal bix jeʼel u yáantkoʼoneʼ. Maʼ xaaneʼ jeʼel u péeksik utúul sukuʼun utiaʼal ka u líiʼs k-óol wa utiaʼal ka u yáantoʼoneʼ. Wa maʼ xaaneʼ, jeʼel u tsʼáaiktoʼon naʼatil yéetel muukʼ utiaʼal k-aktáantik upʼéel talamil «bey jeʼel bix jumpʼéel kʼiʼix chʼiikil» t-wíinklil ku meyaj tiʼ Satanás utiaʼal u beetik k-muʼyajeʼ (2 Cor. 12:7-10; 1 Tes. 5:14).

Le baʼaxoʼob tu beetaj le angeloʼob yoʼolal Jesusoʼ

11. 1) ¿Bix úuchik u yáantaʼal Jesús tumen le angeloʼoboʼ? 2) ¿Baʼax tu yeʼesaj Jesús le úuchik u chúukpajal u yóol u meyajt Diosoʼ?

¹¹ Koʼoneʼex ilik bix meyajnajik tiʼ Jéeoba le angeloʼob le ka taal Jesús way Luʼumeʼ. Le angeloʼoboʼ tu kʼaʼaytoʼob tsʼoʼok u síijil, tu yaʼaloʼob tsʼoʼok u kaʼa kuxtal yéetel jejeláas bix úuchik u yáantkoʼob. Jeʼex le taʼaytak u maʼachal utiaʼal kíimsbiloʼ, líiʼsaʼab u yóol tumen utúul ángel. Baʼaleʼ le angeloʼoboʼ maʼ tu beetoʼob mix baʼal utiaʼal maʼ u kíimsaʼaliʼ (Mat. 28:5, 6; Luc. 2:8-11; 22:43). ¿Baʼaxten? Tumen utiaʼal u béeytal baʼax u tukulmaj Jéeobaeʼ, Jesuseʼ unaj u kʼubik u kuxtal; beyoʼ tu yeʼeseʼ utúul máak minaʼan u kʼebaneʼ jeʼel u chúukpajal u yóol u meyajt Dios kex ka kʼuchuk kíimsbileʼ. Le oʼolal Jéeobaeʼ tu kaʼa kuxkíintaj yéetel tu tsʼáajtiʼ upʼéel kuxtal maʼ tu páajtal u xuʼulsaʼal, tu tsʼáaj xan tiʼ «tuláakal páajtalil» bey xan ka yanak tuláakal le angeloʼob yáanal u nuʼuktajoʼ (Mat. 28:18; Hch. 2:32; 1 Ped. 3:22). Tuláakal lelaʼ tu yeʼeseʼ Jesuseʼ letiʼ u «chʼiʼibal» le «koʼoleloʼ» (Gén. 3:15; Gal. 3:16).

12. ¿Bix jeʼel u yantaltoʼon upʼéel «maʼalob tuukul» jeʼex Jesuseʼ?

¹² Jesuseʼ u yojel maʼ maʼalob ka u túunt u yóol Jéeoba chéen utiaʼal u yilik wa jeʼel u kanáantaʼaleʼ (xokaʼak Mateo 4:5-7). Toʼoneʼ unaj k-beetik jeʼex Jesuseʼ yéetel unaj k-bisik «jumpʼéel kuxtal ich maʼalob tuukul». Kex k-ojel yaan u kanáantkoʼon Jéeoba ken k-aktáant chʼaʼapachtajileʼ, maʼ unaj k-tsʼáaik k-kuxtal tu táan kíimiliʼ (Tito 2:12).

Le baʼax k-kanik tiʼ le angeloʼoboʼ

13. ¿Baʼax ku kaʼansiktoʼon 2 Pedro 2:9-11 yoʼolal le angeloʼoboʼ, yéetel bix jeʼel k-beetik jeʼex letiʼoboʼ?

¹³ Apóstol Pedroeʼ, le ka tu tsolnuʼuktaj le máaxoʼob «maʼ saajkoʼob u pochʼoʼob» le máaxoʼob yéeyaʼanoʼob tumen Jéeobaoʼ, tʼaanaj tiʼ baʼax ku beetik le angeloʼoboʼ. Kex jach tsʼaʼan páajtalil tiʼobeʼ ku yeʼeskoʼob kabal óolal yéetel tumen ku yeʼeskoʼob tsiikil tiʼ Jéeobaeʼ, maʼatech u juzgarkoʼob mix máak (xokaʼak 2 Pedro 2:9-11). Toʼon xaneʼ maʼ unaj k-máan juzgart u maasiliʼ, baʼaxeʼ unaj k-eʼesik tsiikil tiʼ le máaxoʼob tsʼaʼan u nuʼuktoʼob le múuchʼuliloʼ yéetel unaj k-pʼatik tu kʼab Jéeoba le baʼax kʼaas ku beetaʼaltoʼonoʼ, tumen letiʼ le maas Nojoch Juezoʼ (Rom. 12:18, 19; Heb. 13:17).

14. ¿Baʼax k-kanik tiʼ le kabal óolal ku yeʼesik le angeloʼoboʼ?

¹⁴ Koʼoneʼex ilik uláakʼ bix u yeʼeskoʼob kabal óolal le angeloʼoboʼ. Jeʼex ka kʼáataʼab bix u kʼaabaʼobeʼ, jujuntúul tiʼ letiʼobeʼ maʼ tu yóotaj u yaʼaloʼobiʼ (Gén. 32:29; Jue. 13:17, 18). Le Bibliaoʼ  ku yaʼalikeʼ yaan u millonesi angeloʼob, baʼaleʼ chéen ku yaʼalik u kʼaabaʼ kaʼatúuliʼ: Miguel yéetel Gabriel. Beyoʼ maʼ tu tsʼaʼabaltiʼob le nojbeʼenil unaj u tsʼaʼabal chéen tiʼ Jéeobaoʼ (Luc. 1:26; Apo. 12:7). Utéenjeakileʼ, le ka xolaj apóstol Juan tu táan utúul ángel utiaʼal ka u adorarteʼ, le angeloʼ tu yaʼalajtiʼ: «Maʼ a beetik leloʼ; tumen teneʼ u palitsilen Jajal Dios jeʼel bix techeʼ yéetel jeʼel bix a sukuʼunoʼob[eʼ]» (Apo. 22:8, 9). Jeʼex túun k-ilkoʼ chéen Jéeoba unaj k-adorartik yéetel chéen tiʼ letiʼ unaj k-payalchiʼ (xokaʼak Mateo 4:8-10).

15. ¿Bix u yeʼesik le angeloʼob jach yaan u pacienciaʼoboʼ?

¹⁵ Le angeloʼob xanoʼ jach yaan u pacienciaʼob. Letiʼobeʼ jach taak u kʼaj óoltkoʼob u taʼakbil baʼaloʼob Dios. Le Bibliaoʼ ku yaʼalik: «Le baʼaloʼobaʼ tak le angeloʼob u kʼáat u yiloʼoboʼ» (1 Ped. 1:12). Baʼaleʼ yaan jujumpʼéel tiʼ u taʼakbil baʼaloʼob Dios mix letiʼob u naʼatoʼob. Le oʼolaleʼ, ku páaʼtkoʼob ka eʼesaʼak tiʼ le múuchʼulil tumen Dios le u «jejeláasil naʼat» yantiʼoʼ (Efe. 3:10, 11).

16. ¿Baʼax ku kanik le angeloʼob tiʼ bix k-uʼuyik tʼaanoʼ?

¹⁶ Le Bibliaoʼ ku yaʼalikeʼ le máaxoʼob meyajtik Dios táan u máanskoʼob talamiloʼ «bey [j-]tsʼaa chaʼanoʼob» tiʼ le angeloʼoboʼ (1 Cor. 4:9). Letiʼobeʼ ku yilkoʼob le modos yantoʼonoʼ yéetel ku kiʼimaktal u yóoloʼob ken u yiloʼob chúukaʼan k-óol k-meyajt Dios. Jach ku kiʼimaktal xan u yóoloʼob ken arrepentirnak wa máax (Luc. 15:10). Le angeloʼoboʼ ku yilkoʼob le baʼaloʼob maʼalobtak ku beetik le kiikoʼoboʼ. Le Bibliaoʼ ku yaʼalikeʼ le koʼoleloʼ «unaj u yantal tu yóokʼol u pooleʼ jumpʼéel u chíikulal tiʼ yaan yáanal u páajtalil [u] yíichameʼ tu yoʼolal le angeloʼoboʼ» (1 Cor. 11:3, 10). Lelaʼ ku yeʼesiktoʼoneʼ le angeloʼoboʼ ku kiʼimaktal u yóoloʼob ken u yiloʼob le atantsiloʼob yéetel u maasil máaxoʼob meyajtik Dioseʼ ku tsʼáaikubaʼob yáanal u nuʼuktaj le máaxoʼob tsʼaʼan páajtalil tiʼoboʼ. Le angeloʼoboʼ ku yilkoʼob bix k-uʼuyik tʼaan yéetel ku yilkoʼob u beetkoʼob xan beyoʼ.

Le angeloʼoboʼ ku yáantajoʼob teʼ kʼaʼaytajoʼ

17, 18. ¿Baʼaxten k-aʼalik táan k-áantaʼal tumen le angeloʼob teʼ kʼaʼaytajoʼ?

¹⁷ Le angeloʼoboʼ tsʼoʼok u yáantajoʼob tiʼ yaʼab baʼaxoʼob yaan yil yéetel «u kʼiinil Yuumtsil». Ichil leloʼobaʼ táakaʼan le ka káaj u gobernar le Reino tu jaʼabil 1914, bey xan le ka jóoʼsaʼab Satanás yéetel u kʼasaʼan angeloʼob tumen «Miguel  yéetel u angeloʼob» (Apo. 1:10; 11:15; 12:5-9). Le apóstol Juanoʼ tu yilaj utúul «ángel táan u xikʼnal chúumuk le kaanoʼ yantiʼeʼ le maʼalob péektsil minaʼan u xuuloʼ utiaʼal u [kʼaʼayt] tiʼ le máaxoʼob kajaʼanoʼob luʼumoʼ». Le angeloʼ ku yaʼalik: «Chʼaʼex sajakil tiʼ [Dios] yéetel nojbeʼenkúunteʼex u kʼaabaʼ, tumen tsʼoʼok u kʼuchul u kʼiinil u pʼis óol. [Adorarteʼex] le máax beet le kaʼanoʼ, le luʼumoʼ, le kʼáaʼnáaboʼ, bey xan le sayaboʼoboʼ» (Apo. 14:6, 7). U jaajileʼ le Kʼaasilbaʼaloʼ jach u kʼáat u xuʼuls u kʼaʼaytaʼal le maʼalob péektsiloʼ, baʼaleʼ k-ojel yaan k-áantaʼal tumen le angeloʼoboʼ (Apo. 12:13, 17).

¹⁸ Teʼ kʼiinoʼobaʼ, le angeloʼoboʼ maʼatech u yaʼalkoʼobtoʼon máax uts u puksiʼikʼal, jeʼex le ka aʼalaʼab tiʼ Felipe tumen utúul ángel ka xiʼik tu yiknal le etiopíailoʼ (Hch. 8:26-29). Baʼaleʼ, le baʼaxoʼob uchaʼan tiʼ yaʼab sukuʼunoʼoboʼ ku yeʼesikeʼ kex maʼatech k-ilik le angeloʼoboʼ, ku yáantkoʼonoʼob teʼ kʼaʼaytajoʼ bey xan utiaʼal k-kaxtik le máaxoʼob «yéeyaʼanoʼob utiaʼal ka yanaktiʼob kuxtal minaʼan u xuuloʼ» (Hch. 13:48). * Kex beyoʼ, toʼoneʼ kʼaʼabéet k-ilik táakpajal mantatsʼ teʼ kʼaʼaytajoʼ yéetel k-kaxtik le máaxoʼob u kʼáat u adorartoʼob Dios jeʼex utstutʼaanoʼ (Juan 4:23, 24).

19, 20. ¿Bix u yáantaj le angeloʼob teʼ kʼiinoʼob jach taʼaytak u xuʼulsaʼal le yóokʼol kaabaʼ?

¹⁹ Jesuseʼ tu yaʼaleʼ ken kʼuchuk u kʼiinil u «xuʼulul yóokʼol kaab[eʼ]», le angeloʼoboʼ yaan u «jumpáaykunt[koʼob] le máaxoʼob kʼasaʼanoʼoboʼ, tiʼ le máaxoʼob utsoʼoboʼ» (Mat. 13:37-43, 49). Le angeloʼob xanoʼ ku yáantajoʼob utiaʼal u muʼuchʼul yéetel u sellartaʼal le máaxoʼob yéeyaʼanoʼob utiaʼal u binoʼob kaʼanoʼ (xokaʼak Mateo 24:31; Apo. 7:1-3). Tsʼoʼoleʼ yaan u yáantkoʼob Jesús le ken u jats le tamanoʼob tiʼ le chivoʼoboʼ (Mat. 25:31-33,46, NM).

²⁰ «Le kʼiin ken chíikpajak Yuumtsil Jesús teʼ kaʼanoʼ yéetel u muʼukʼaʼan angeloʼobeʼ» yaan u xuʼulsaʼal tiʼ «le máaxoʼob maʼ tu kʼaj óolt[oʼob] Jajal Diosoʼ mix tu yuʼub[oʼob] u maʼalob péektsil k-Yuumtsil Jesucristo[iʼ]» (2 Tes. 1:6-10). Tiʼ upʼéel náayeʼ, apóstol Juaneʼ tu yilaj Jesús yéetel u angeloʼob u natʼmoʼob sak tsíiminoʼob yéetel u líiʼsmubaʼob utiaʼal u xuʼulskoʼob tiʼ le kʼasaʼan máakoʼoboʼ (Apo. 19:11-14).

21. ¿Baʼax ken u beet tiʼ Satanás yéetel u kʼasaʼan angeloʼob le ángel chʼaʼamil «u llavei le jach taamkach chʼeʼen» bey xan «jumpʼéel cadena[oʼ]»?

²¹ Juan xaneʼ tu yilaj «juntúul ángel táan u yéemel tiʼ kaʼan yéetel u llavei le jach taamkach chʼeʼenoʼ, yéetel jumpʼéel cadena tu kʼab». Le angelaʼ letiʼe arcángel Migueloʼ, le máax kun kʼaxik le Kʼaasilbaʼal junmúuchʼ yéetel u kʼasaʼan angeloʼob utiaʼal ka u puloʼob teʼ jach taamkach chʼeʼenoʼ. Baʼaleʼ ken tsʼoʼokok le Mil Jaʼaboʼob kun Gobernar Cristooʼ, yaan u jáalkʼabtaʼaloʼob ichil upʼíit kʼiin; le máaxoʼob túun tsʼoʼok u pʼáatal minaʼan kʼeban tiʼoboʼ yaan u túuntaʼal u yóoloʼob. Le ken tsʼoʼokokeʼ Satanás yéetel le máaxoʼob tu tsʼáajubaʼob tu contra Diosoʼ yaan u xuʼulsaʼaloʼob (Apo. 20:1-3, 7-10; 1 Juan 3:8). Teʼ kʼiin jeʼeloʼ mix máak ken u kaʼa tsʼáauba tu contra Jéeoba.

22. 1) ¿Bix kun áantaj le angeloʼob tiʼ le baʼaxoʼob ku taal u kʼiiniloʼ? 2) ¿Bix k-uʼuyikba yoʼolal le meyaj ku beetik le angeloʼoboʼ?

²² Maʼ kun xáantaleʼ le kʼasaʼan yóokʼol kaabaʼ yaan u xuʼulsaʼal, baʼaleʼ le máaxoʼob meyajtik Diosoʼ yaan u salvartaʼaloʼob. Le angeloʼoboʼ jach nojoch bix kun áantajoʼob le ken u nojbeʼenkúunt u kʼaabaʼ Jéeoba yéetel le ken u béeykunt le baʼax u tukulmaj utiaʼal le Luʼumaʼ bey xan utiaʼal wíinik. Jeʼex k-ilkoʼ «tuláakal le angeloʼoboʼ [espirituʼob] ku meyajtikoʼob Jajal Dios, túuxtaʼanoʼob utiaʼal u yáantoʼob le máaxoʼob bíin u kʼamoʼob le [salvacionoʼ]». ¿Máasaʼ jach unaj k-tsʼáaik nib óolal tiʼ Jéeoba ikil u tsʼáaik u angeloʼob utiaʼal ka u yáantoʼon k-beet baʼax utstutʼaan yéetel ka yanaktoʼon le kuxtal minaʼan u xuuloʼ?

[Tsolajiloʼob]

¿Baʼax jeʼel a núukikeʼ?

• ¿Jaypʼéel clase angeloʼob yaan?

• ¿Baʼax tu beetaj jujuntúul angeloʼob tu kʼiiniloʼob Noé?

• ¿Bix u yáantkoʼon Dios yéetel le angeloʼoboʼ?

• ¿Baʼax meyajiloʼob táan u beetik le angeloʼob bejlaʼoʼ?

[U kʼáatchiʼiloʼob le xookoʼ]

[U tsolajil le oochel teʼ táan juʼun 21]

Le angeloʼoboʼ ku beetkoʼob baʼax ku yaʼalik Dios yéetel kiʼimak óolal

[U tsolajil le oochel teʼ táan juʼun 23]

Jeʼex áantaʼabik Daniel tumen le angeloʼoboʼ, jeʼel xan u yáantkoʼonoʼob wa bey u kʼáat Diosoʼ

[U tsolajil le oochel teʼ táan juʼun 24]

Maʼ unaj k-chʼaʼik saajkiliʼ, tumen le angeloʼoboʼ táan u yáantkoʼonoʼob teʼ kʼaʼaytajoʼ

[U tsolajil le oochel teʼ táan juʼun 24]

Luʼum: NASA photo