Xook 124 Tiʼ Galaad

Le misioneroʼoboʼ ku keʼetloʼob yéetel sáakʼoʼob

TULÁAKAL le sukuʼunoʼob ku meyajoʼob tu Najil Betel yaan Estados Unidoseʼ, cada seis meses ku invitartaʼaloʼob utiaʼal u kʼiimbesaʼal u tsʼoʼokol le xook ku beetaʼal tiʼ le Escuela Bíblica tiʼ Galaad tiʼ le Watchtoweroʼ. Tu kʼiinil 8 tiʼ marzo tiʼ 2008, tu muchʼuba 6,411 sukuʼunoʼob taaloʼob tiʼ treinta luʼumiloʼob utiaʼal u kʼiimbesaʼal u tsʼoʼokol le xook 124.

Stephen Lett, utúul sukuʼun táakaʼan ichil le Cuerpo Gobernanteoʼ, tu káajsaj le kʼiimbesajil yéetel le tsoltʼaan ku kʼaabaʼtik «Múul meyajneneʼex yéetel le máaxoʼob yéeyaʼanoʼob ku keʼetloʼob yéetel sáakʼoʼoboʼ». Tu libroi Apocalipsis 9:1-4, ku yaʼalaʼaleʼ le yéeyaʼanoʼob utiaʼal u binoʼob kaʼan tu chʼaʼajoʼoltoʼob u meyajkoʼob Jéeoba tu jaʼabil 1919, ku keʼetloʼob yéetel yaʼab sáakʼoʼob. Tiʼ le j-xoknáaloʼoboʼ kʼaʼajsaʼabtiʼobeʼ tumen táakaʼanoʼob ichil le «uláakʼ tamanoʼob[oʼ]», tsʼoʼok u káajal u meyajoʼob yéetel le u múuchʼ sáakʼoʼobaʼ (Juan 10:16).

Lon Schilling, utúul tiʼ le máaxoʼob yanoʼob ichil le Comité tiʼ Sucursal tiʼ Estados Unidosoʼ, tu máansaj le tsoltʼaan ku kʼaabaʼtik «Le íichamtsil yéetel le atantsiloʼ unaj u paklan áantikubaʼob». Utiaʼal u yeʼesik tiʼ le xoknáaloʼob kʼaʼabéet u beetikoʼob beyoʼ, le sukuʼunaʼ tʼaanaj tiʼ Aquila yéetel Priscila (wa Prisca), u yatan; letiʼobeʼ tu meyajtoʼob Jéeoba teʼ yáax siglooʼ (Rom. 16:3, 4). Tu jach aʼalajtiʼob kʼaʼabéet u kanikoʼob múul meyaj yéetel u jach yaabilkubaʼob utiaʼal u tsʼoʼokbeskoʼob le meyaj tsʼaʼantiʼoboʼ. Cada ken tʼaanak le Biblia tiʼ Aquilaoʼ ku chʼaʼachiʼitik xan Priscila, u yatan, leloʼ ku yeʼesikeʼ Pablo yéetel le sukuʼunoʼob teʼ yáax siglooʼ tu yiloʼob jach u yaabiltmubaʼob yéetel tuláakal tuʼux ku múul binoʼob. Le misioneroʼob xanoʼ unaj u múul kʼaʼaytajoʼob, u múul payalchiʼob, u múul xookoʼob yéetel u múul aktáantikoʼob le talamiloʼob ku yantal teʼ tuʼux kun kʼaʼaytajoʼoboʼ, wa u paklan áantikubaʼob (Gén. 2:18).

Le uláakʼ tsoltʼaan ku kʼaabaʼtik «Unaj k-eʼesik utsil jeʼex Jéeoba» máansaʼab tumen Guy Pierce, uláakʼ sukuʼun táakaʼan ichil le Cuerpo Gobernanteoʼ. Tu yaʼaleʼ, le máax ku yeʼesik u yutsileʼ maʼ chéen ku kanáantik maʼ u beetik baʼax maʼ maʼalobiʼ, baʼaxeʼ ku yilik u beetik baʼax maʼalob. U jaajileʼ, chéen Jéeoba jach nojoch bix u yeʼesik u yutsil. Le utsil yéetel le yaabilaj ku yeʼesiktoʼon Diosoʼ le péekskoʼon k-beet jeʼex letiʼeʼ yéetel k-eʼesik k-utsil tiʼ u maasil. Utiaʼal u tsʼoʼokoleʼ, le sukuʼun Pierceoʼ tu yaʼalaj tiʼ le j-xoknáaloʼoboʼ: «Teʼexeʼ tsʼoʼok a weʼesikeʼex jach utseʼex. K-páaʼtik ka seguernak a weʼesikeʼex a wutsileʼex jeʼex Dioseʼ yéetel maʼ u xuʼulul a beetkeʼex jeʼel tuʼuxak ka túuxtaʼakeʼex tumen Jéeobaeʼ».

Le sukuʼun Michael Burnett, utúul misionero kaʼach yéetel maʼ sen úuch tsʼaʼabak tiʼ u jatsʼuts páajtalil u kaʼansaj teʼ Escuela Bíblica tiʼ Galaadoʼ, tu máansaj le tsoltʼaan ku kʼaabaʼtik «Jumpʼéel chíikulal ta táan pooleʼex». Le bix úuchik u jóoʼsaʼal le israelitaʼob tu luʼumil Egiptooʼ unaj kaʼach u pʼáatal bey «jumpʼéel u chíikulal [...] [tu] táan poolal[oʼobe]», wa maʼ unaj u tuʼubultiʼob kaʼach le baʼax tu beetaj Jéeoba tu yoʼolaloʼoboʼ (Éxo. 13:16). Tiʼ le j-xoknáaloʼoboʼ aʼalaʼab xan tiʼob maʼ u  tuʼubsikoʼob le baʼax tu kanoʼob teʼ Escuela tiʼ Galaadoʼ, baʼaxeʼ ka yanaktiʼob bey «jumpʼéel u chíikulal [...] [tu] táan poolal[oʼobeʼ]». Le sukuʼun Burnettoʼ tu yaʼalaj xaneʼ le misioneroʼoboʼ unaj u yeʼesikoʼob kabal óolal, maʼ unaj u tuklikoʼob wa tuláakal baʼal u yojloʼobiʼ yéetel unaj u meyajtiʼob le baʼax ku yaʼalik le Biblia utiaʼal u yutskíintkoʼob jeʼel baʼalak talamil ka yanaktiʼob yéetel u yéet misioneroiloʼob wa yéetel uláakʼ máakoʼobeʼ (Mat. 5:23, 24).

Mark Noumair, utúul sukuʼun úuch joʼopʼok u kaʼansaj Galaadeʼ, tu máansaj le tsoltʼaan ku kʼaabaʼtik «¿Baʼax kʼaayil kun beetbil ta woʼolal?». Úuchileʼ suuk u beetaʼal kʼaayoʼob utiaʼal u kʼiimbesaʼal upʼéel baʼateʼel tsʼoʼok u ganartaʼal. Ichil upʼéel tiʼ le kʼaayoʼobaʼ, aʼalaʼabeʼ u chʼiʼibal Rubén, Dan yéetel Asereʼ maʼ tu yóotoʼob bin baʼateliʼ tumen sajakchajoʼob, baʼaleʼ maʼalob úuchik u yúuchul tʼaan tiʼ u chʼiʼibal Zabulón tumen maʼ tu chʼaʼajoʼob saajkil utiaʼal u binoʼobiʼ (Jue. 5:16-18). Bejlaʼa  xaneʼ, le sukuʼunoʼoboʼ bey ku beetkoʼob kʼaayoʼob ku tʼaanoʼob maʼalob tiʼ le baʼaxoʼob k-beetkoʼ. Ken k-beet tuláakal le ku páajtal utiaʼal k-beetik baʼax u kʼáat Dios yéetel k-chaʼik u nuʼuktikoʼon u kaajaleʼ, maʼ chéen k-kiʼimakkúuntik u yóol Jéeobaiʼ, baʼaxeʼ k-eʼesik tiʼ le sukuʼunoʼob ku yuʼubikoʼob le «kʼaay» bix unaj u beetkoʼob xanoʼ.

Ichil le baʼaxoʼob tu beetoʼob le táan u kaʼansaʼaloʼoboʼ, le j-xoknáaloʼob anchajoʼob teʼ xook 124 tiʼ Galaadoʼ tu máansoʼob tres mil horaʼob táan u kʼaʼaytajoʼob. Teʼ tsoltʼaan ku kʼaabaʼtik «Nuʼuktaʼanoʼon tumen u kiliʼich muukʼ Dios», máansaʼab tumen le sukuʼun Sam Roberson ku meyaj teʼ Departamento tiʼ Escuelas Teocraticasoʼ, tu yaʼalaj tiʼ le j-xoknáaloʼob ka u tsikbaltoʼob yéetel ka u yeʼesoʼob jujumpʼéel baʼaloʼob úuchtiʼob le táan u kʼaʼaytajoʼoboʼ. Ka tsʼoʼokeʼ, le sukuʼun Patrick LaFranca, utúul tiʼ le sukuʼunoʼob yanoʼob ichil le Comité tiʼ Sucursal tiʼ Estados Unidosoʼ, tu kʼáataj u chiʼ jujuntúul misioneroʼob yanoʼob tiʼ jejeláas luʼumiloʼob. Le j-xoknáaloʼob túunoʼ tu tsʼáajoʼob u nib óolalil yoʼolal le baʼax aʼalaʼabtiʼoboʼ.

Le u tsʼook tsoltʼaan ku kʼaabaʼtik «Maʼ u tuʼubulteʼexeʼ le baʼaloʼob ku yilaʼaloʼoboʼ jach taʼaytak u xuʼululoʼob», máansaʼab tumen Anthony Morris, utúul sukuʼun táakaʼan xan ichil le Cuerpo Gobernanteoʼ. Le Bibliaoʼ ku yaʼaliktoʼon ka tuukulnakoʼon mantatsʼ tiʼ le utsiloʼob u yaʼalmaj Dios u tsʼáaiktoʼonoʼ yéetel maʼ k-chiʼichnaktal yoʼolal le talamiloʼob k-aktáantikoʼ (2 Cor. 4:16-18). Teʼ yóokʼol kaabaʼ jach yaʼab k-ilik u loobiltaʼal máak, u yantal óotsilil, kʼasaʼanil, kʼojaʼanil yéetel kíimil, yéetel maʼ xaaneʼ yaan k-aktáantik jujumpʼéel tiʼ le talamiloʼobaʼ. Baʼaleʼ wa mantatsʼ k-kʼaʼajsik maʼ kun xáantal ken xuʼulsaʼak tiʼ le baʼaloʼobaʼ, yaan u muʼukʼaʼantal k-fe yéetel maʼ kun jáawal k-meyajtik Dios.

Ka tsʼoʼok u láaj kʼubik u diplomaʼobeʼ, utiaʼal u líiʼsik u yóol le túumben misioneroʼoboʼ, le sukuʼun Lettoʼ tu yaʼalajtiʼob: «Wa mantatsʼ k-kaxtik u yáantaj Jéeobaeʼ, mix baʼal ken u beet u xuʼulul k-meyajtik». Tu yaʼalajtiʼob ka meyajnakoʼob jeʼex le sáakʼoʼoboʼ, maʼ u xuʼulul u kʼubik u yóol u meyajtoʼob Jéeoba, mantatsʼ ka u yaabiltoʼob yéetel ka u beetoʼob baʼax u kʼáat.

[U tsolajil le oochel teʼ táan juʼun 30]

[U tsolajil le oochel teʼ táan juʼun 30]

BAʼALOʼOB YAAN YIL YÉETEL LE J-XOKNÁALOʼOBOʼ

[U tsolajil le oochel teʼ táan juʼun 30]

Tiʼ 7 luʼumil u taaloʼob • Tiʼ 16 luʼumil kun binoʼob

Le j-xoknáaloʼoboʼ 56 utúulaloʼob • Kex a 33.8 jaʼab yantiʼob • Kex 18.2 jaʼab okjaʼanakoʼob

Kex 13.8 jaʼab káajak u beetik u precursoriloʼob

[U tsolajil le oochel teʼ táan juʼun 30]

[U tsolajil le oochel teʼ táan juʼun 31]

Xook 124 tiʼ le Escuela Bíblica tiʼ Galaad tiʼ le Watchtoweroʼ

[U tsolajil le oochel teʼ táan juʼun 31]

U filai le sukuʼunoʼob yéetel le kiikoʼoboʼ ku káajal desde táanil tak paachil, u kʼaabaʼobeʼ tsolaʼanoʼob x-tsʼíik tak x-noʼoj.

[U tsolajil le oochel teʼ táan juʼun 31]

1) Nicholson, T.; Main, H.; Senge, Y.; Snape, L.; Vanegas, C.; Pou, L. 2) Santana, S.; Oh, K.; Lemaitre, C.; Williams, N.; Alexander, L. 3) Woods, B.; Stainton, L.; Huntley, E.; Álvarez, G.; Cruz, J.; Bennett, J. 4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. 5) Lemaitre, W.; Harris, A.; Wells, C.; Rodgers, S.; Durrant, M.; Senge, J. 6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. 7) Zuroski, M.; Rodgers, G.; Diemmi, D.; Nicholson, L.; Álvarez, C.; Snape, J. 8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. 9) Cruz, P.; Degandt, B.; Williams, D.; Wells, S.; Alexander, D.; May, M.

[U tsolajil le oochel teʼ táan juʼun 32]

Le Escuela tiʼ Galaadoʼ tiʼ yaan teʼ Centro Educativo tiʼ le Watchtoweroʼ