«Kaneʼex a tsʼaʼex nib óolal»

Le Bibliaoʼ mantatsʼ u kʼaʼajsik tiʼ le máaxoʼob meyajtik Diosoʼ ka u kan u tsʼaʼob nib óolal. Salmo 92:1 ku yaʼalik: «Yuumtsil [Jéeoba], ¡bukaʼaj maʼalobil u tsʼaʼabaltech nib óolal!». Le apóstol Pablo xanoʼ tu yaʼalaj: «Kaneʼex a tsʼaʼex nib óolal» (Col. 3:15).

Tuláakloʼoneʼ, jach yaan baʼax oʼolal unaj k-tsʼáaik nib óolal. Robert Emmons, utúul profesor tiʼ le Universidad tiʼ California yaan tu noj kaajil Daviseʼ, tu yaʼalaj: «Tsʼoʼok u yilaʼaleʼ le u tsʼáaik máak nib óolaloʼ jach ku yáantaj utiaʼal ka u aktáant talamiloʼob jeʼex le u sen chiʼichnaktal máakoʼ yéetel ku líiʼsik u yóol máak».

Le revista Time tu yaʼalaj xan: «Le máakoʼob ku yaʼalikoʼob u yojel u tsʼaʼob nib óolaloʼ [...] maʼatech u yuʼubikoʼob wa jach kaʼanaʼanoʼob yéetel mantatsʼ kiʼimak u yóoloʼob, maʼatech u jach chiʼichnaktaloʼob yéetel maʼatech u jach lúubul u yóoloʼob jeʼex u maasil máakoʼob yoʼolal le nukuch talamiloʼoboʼ».

Baʼaleʼ le Bibliaoʼ ku yaʼalikeʼ «tiʼ u tsʼook jaʼaboʼobeʼ» yaʼab máakeʼ «bíin tsʼuʼutchajkoʼob» yéetel maʼ ken «u tsʼaʼob nib óolal» (2 Tim. 3:1- 5). Toʼon k-meyajtik Dioseʼ ¿baʼax unaj k-beetik utiaʼal maʼ u yúuchultoʼon beyaʼ? Jéeobaeʼ ku yaʼalik: «Teen Yuumtsil a [Dios]; teen kaʼambesik tiʼ teech baʼax unaj a beetik utiaʼal a wutsil, teen eʼesik tiʼ teech, tuʼux bejil unaj a bin» (Isa. 48:17). Wa k-tsʼoʼokbesik baʼax ku yaʼalik Dioseʼ maʼ kun antaltoʼon le talamiloʼob ku yantal tiʼ le máaxoʼob chéen ku binoʼob tu paach u kʼaakʼas tsʼíibolaloʼoboʼ. Tsʼoʼoleʼ, jach k-ojel Jéeobaeʼ ku chʼaʼik en cuentai baʼax k-beetik yéetel yaan u tsʼáaiktoʼon yaʼab utsiloʼob tu yoʼolal (Heb. 6:10). Le oʼolaleʼ unaj k-tsʼáaik «nib óolal tiʼ Yuumtsil» Jéeoba yoʼolal le utsiloʼobaʼ (Sal. 107:8).