Unaj k-chaʼik nuʼuktaʼal tumen u Tʼaan Dios
Unaj k-chaʼik nuʼuktaʼal tumen u Tʼaan Dios
«A tʼaaneʼ x-tʼuchub sáas utiaʼalint in wook, yéetel ku sáasilkúuntik in beel.» (SALMO 119:105.)
1, 2. Óoliʼ tuláakal wíinikoʼobeʼ, ¿baʼaxten maʼ páajchajak u kaxkoʼob jeetsʼelil mix kiʼimak óolaliʼ?
MAʼ XAANEʼ yaan kʼiineʼ kʼaʼabéetchaj a kʼáatik tiʼ wa máax bix jeʼel a kʼuchul tiʼ upʼéel kúuchileʼ. Maʼ xaaneʼ naatsʼ yanech kaʼachi, baʼaleʼ maʼ jach a wojel wa letiʼe kúuchil ka kaxtikoʼ. Maʼ xaan xaneʼ saatlech kaʼachi yéetel kʼaʼabéetchaj a chʼaʼik yaanal bej. ¿Máasaʼ jach maʼalob úuchik a beetik le baʼax tu yaʼalajtech le máax tiʼ ta kʼáataj áantajoʼ? Jach beyoʼ, tumen letiʼeʼ u kʼaj óol le bejoʼ yéetel jeʼel u páajtal u yáantkech ka kʼuchkech teʼ tuʼux ka binoʼ.
2 Wíinikoʼobeʼ tsʼoʼok u máan yaʼab jaʼaboʼob táan u yilik u nuʼuktik u kuxtaloʼob chéen tu juunaloʼob. Baʼaleʼ, wa minaʼan u yáantaj Dios tiʼobeʼ bey saatloʼobeʼ, le oʼolal maʼ tu páajtal u kaxtikoʼob jeetsʼelil mix kiʼimak óolal. ¿Baʼaxten? Maas tiʼ dos mil quinientos jaʼaboʼob bejlaʼeʼ, le profeta Jeremíasoʼ tu yaʼalaj: «Xiibeʼ maʼ u yuumil u kuxtaliʼ, minaʼan u páajtalil u yéeyik bix ku bin j-xuʼulul [wa bix ken u nuʼukt u kuxtal]» (Jeremías 10:23). Le máax maʼatech u chaʼik u yáantaʼal u nuʼukt u kuxtal tumen máax u yojel bix unaj u beetaʼaleʼ, yaan u bin kʼaasil tiʼ. Bey túunoʼ, le wíinikoʼoboʼ jach kʼaʼabéet u tsʼaʼabal nuʼuktaj tiʼob.
3. ¿Baʼaxten chéen Jéeoba jeʼel u páajtal u nuʼuktik wíinikoʼobeʼ, yéetel baʼax ku yaʼalik u tsʼáaiktoʼon?
3 Chéen Jéeoba jeʼel u páajtal u tsʼáaiktoʼon le maʼalob tsolnuʼuk kʼaʼabéettoʼonoʼ. ¿Baʼaxten? Tumen chéen letiʼ u maas kʼaj óoloʼon. Maʼ chéen u yojel bix úuchik u saʼatal wíinikoʼobiʼ, u yojel xan baʼax kʼaʼabéettiʼob utiaʼal ka suunakoʼob tiʼ le maʼalob bejoʼ. Tsʼoʼoleʼ, Jéeobaeʼ letiʼe Máax beetmailoʼonoʼ, le oʼolaleʼ mantatsʼ u yojel baʼax maas jeʼel u taasiktoʼon utsileʼ (Isaías 48:17). Leten túuneʼ, jeʼel u páajtal k-creertik le baʼax ku yaʼalik Dios teʼ Salmo 32:8: «Bíin in tsʼáatech kaʼambesajiloʼob; bíin in tsʼáatech tsol xikinoʼob; bíin in weʼestech le bej unaj a bisikoʼ». Jach jaaj: le nuʼuktaj ku tsʼáaik Jéeobaoʼ letiʼ u maas maʼalobiloʼ. Baʼaleʼ ¿bix u nuʼuktikoʼon?
4, 5. ¿Bix u nuʼuktikoʼon u tʼaanoʼob Dios?
4 Ka orarnaj utúul salmista tiʼ Jéeobaeʼ, tu yaʼalaj: «A tʼaaneʼ x-tʼuchub sáas utiaʼalint in wook, yéetel ku sáasilkúuntik in beel» (Salmo 119:105). Le tsolnuʼukoʼob yéetel le kʼaʼajsajiloʼob ku tsʼáaik Diosoʼ tiʼ yanoʼob ichil le Bibliaoʼ, yéetel ku yáantkoʼon ka aktáant jeʼel baʼalak talamil ka yanaktoʼoneʼ. Le ken k-xok le Bibliaoʼ yéetel le ken k-chaʼa u nuʼuktikoʼoneʼ, k-ilik u béeytal ichil k-kuxtal le baʼax ku yaʼalik Isaías 30:21: «Bíin a wuʼuy u yúuchul tʼaan paachil tiʼ teech utiaʼal ka u yaʼal tiʼ teech: Way yaan le bejaʼ, xeeneʼex teʼelaʼ».
5 Baʼaleʼ le Salmo 119:105 ku yeʼesikeʼ u tʼaanoʼob Dioseʼ kaʼapʼéel bix u meyaj tiʼ toʼon. Yáaxeʼ, bey upʼéel sáasil utiaʼal k-ookeʼ. Wa le ken k-aktáant talamiloʼob k-chaʼik u nuʼuktikoʼon le baʼax ku yaʼalik le Bibliaoʼ, yaan k-chʼaʼa tukultik k-beetik baʼax utstutʼaan Dios yéetel maʼ ken k-lúubul tiʼ baʼaloʼob kʼaastak ku beetaʼal way yóokʼol kaabeʼ. U kaʼapʼéeleʼ, le kʼaʼajsajiloʼob ku tsʼáaik Diosoʼ ku sáasilkúuntikoʼob k-beel; ku yáantikoʼon ka k-yéey baʼaxoʼob unaj k-beetik utiaʼal ka yanaktoʼon le kuxtal minaʼan u xuul teʼ Paraíso u yaʼalmaj Dios u tsʼáaikoʼ. Wa sáasilkúuntaʼan maʼalob k-beeleʼ, jeʼel u páajtal k-ilik wa le baʼax k-beetikoʼ jeʼel u taasiktoʼon utsil wa maʼeʼ (Romailoʼob 14:21; 1 Timoteo 6:9; Apocalipsis 22:12). Koʼox ilik baʼaxten le u tʼaanoʼob Jéeoba yaan teʼ Bibliaoʼ bey upʼéel sáasil utiaʼal k-ookeʼ yéetel upʼéel sáasil utiaʼal k-beeleʼ.
Upʼéel «x-tʼuchub sáas utiaʼalint in wook»
6. ¿Bix jeʼel u meyajtoʼon u tʼaanoʼob Dios bey upʼéel sáasil utiaʼal k-ookeʼ?
6 Sáamsamal ku yantal k-chʼaʼatukultik k-beetik yaʼab baʼaloʼob. Jujumpʼéel tiʼ letiʼobeʼ maʼ talamtakoʼobiʼ, baʼaleʼ yaan kʼiineʼ k-aktáantik baʼaloʼob jeʼel u túulchʼinkoʼon k-beet baʼax kʼaaseʼ wa jeʼel xan u beetik maʼ u chúukpajal k-óol meyajt Dioseʼ. Utiaʼal k-aktáantik le baʼaloʼobaʼ, kʼaʼabéet tsʼoʼok kanik k-chʼaʼanuʼukt «baʼax le utsoʼ bey xan baʼax le kʼaasoʼ» (Hebreob 5:14). Jeʼex u bin k-maas kʼaj óoltik baʼax ku yaʼalik u Tʼaan Dios yéetel jeʼex u bin k-maas naʼatik le baʼax ku kaʼansikoʼ, bey ku bin u maas suuktaltoʼon k-chʼaʼatuklik beetik baʼaxoʼob utstutʼaan Jéeoba (Proverbios 3:21).
7. Aʼal bix jeʼel u taaktal u jóokʼol utúul sukuʼun xíimbal yéetel u yéet meyajoʼob maʼ j-jaajkunajoʼobeʼ.
7 Wa teech utúul nojoch máakech táan a wilik a jach kiʼimakkúuntik u yóol Jéeobaeʼ, jach maʼalob baʼax ka beetik (Proverbios 27:11). Baʼaleʼ koʼox aʼalikeʼ, jujuntúul tiʼ a wéet meyajoʼobeʼ ku tsʼáaikoʼobtech upʼéel boleto utiaʼal a bin a chaʼant báaxal bola. Letiʼobeʼ utstutʼaan u bisikubaʼob ta wéetel yéetel u kʼáatoʼob ka a máans upʼéel maʼalob súutukil tu yéeteloʼob le ken tsʼoʼokok a meyajeʼex. Maʼ xaaneʼ ka tuklikeʼ letiʼobeʼ maʼalob máakoʼob. Tsʼoʼoleʼ, bey maʼ tu biskoʼob upʼéel kʼaakʼas kuxtaleʼ. ¿Baʼax ken a beete? ¿Kʼaas wa ka xiʼikech tu yéeteloʼob? ¿Bix jeʼel u yáantikech le Biblia a chʼaʼatukult baʼax maʼaloboʼ?
8. ¿Baʼax ku yaʼalik le Biblia yoʼolal bix unaj k-ilik le máaxoʼob maʼ tu meyajkoʼob Diosoʼ?
8 Koʼox ilik jujumpʼéel baʼaxoʼob ku yaʼalik le Bibliaoʼ. Upʼéeleʼ letiʼe baʼax ku yaʼalik 1 Corintoiloʼob 15:33: «Le kʼaakʼas éet xíimbaloʼoboʼ ku kʼaskúuntikoʼob le maʼalob kuxtaloʼ». Le tekstoaʼ, ¿ku yaʼalik wa toʼon jach upuliʼ maʼ unaj k-bisikba yéetel le máaxoʼob maʼ tu meyajkoʼob Diosoʼ? Maʼatech. Tumen tak le apóstol Pablooʼ tu yeʼesaj yaabilaj tiʼ tuláakal máak, tak tiʼ le máaxoʼob maʼ u tsʼaamaj u fejoʼob tiʼ Cristooʼ (1 Corintoiloʼob 9:22). Toʼon u disipuloʼon Cristoeʼ unaj k-eʼesik yaabilaj tiʼ u maasil máakoʼob, kex yaan tiʼ letiʼob yaanal baʼax ku creerkoʼob (Romailoʼob 10:13-15). U jaajileʼ, ¿bix jeʼel «k-beetik uts tiʼ tuláakal» máak wa k-náachtal tiʼ le máaxoʼob kʼaʼabéet áantajtiʼoboʼ? (Galaciailoʼob 6:10.)
9. ¿Baʼax u jelaʼanil u yeʼesik máak u yutsil tiʼ utúul u yéet meyaj tiʼ ka u jach bisuba tu yéetel?
9 Chéen baʼaleʼ, u yeʼesik máak u yutsil tiʼ u yéet meyajeʼ maʼ u kʼáat u yaʼal ka u jach bisuba tu yéeteliʼ. Lelaʼ bey u yeʼesik uláakʼ teksto tiʼ le Bibliaoʼ. Apóstol Pabloeʼ tu yaʼalaj tiʼ le cristianoʼoboʼ: «Maʼ a nupkabaʼex yéetel máaxoʼob maʼ tu yoksaj óoloʼoboʼ» (2 Corintoiloʼob 6:14). ¿Baʼax u kʼáat u yaʼal le tʼaan «maʼ a nupkabaʼex[oʼ]»? Yaan Bibliaʼobeʼ ku sutkoʼob «maʼ a wilik a múul xíimbaleʼex» wa «maʼ a biskabaʼex yéetel máaxoʼob ku beetkoʼob baʼal kʼaas». ¿Tak tuʼux unaj u náakal u bisikuba máak yéetel utúul u yéet meyaj? ¿Bix u yilaʼal wa tsʼoʼok u káajal u «nupkuba» máak yéetel máax maʼ tu meyajtik Dios? Le Bibliaoʼ, jeʼel u yáantkech a chʼaʼatukult baʼax unaj a beetikeʼ.
10. 1) ¿Bix tu yéeyil Jesús máaxoʼob ken u amigotoʼob? 2) ¿Baʼax kʼáatchiʼiloʼob jeʼel u yáantkoʼon k-chʼaʼatukult tubeel yéetel máaxoʼob ken k-jach bisbaeʼ?
10 Tuukulnakoʼon tiʼ baʼax tu beetaj Jesús, letiʼeʼ desde ka beetaʼab wíinikoʼobeʼ joʼopʼ u yaabiltkoʼob (Proverbios 8:31). Le ka taal xan way Luʼumeʼ, tu jach bisuba maʼalob yéetel u disipuloʼob (Juan 13:1). Letiʼeʼ tu yeʼesaj «yaakunaj» tak tiʼ utúul wíinik jelaʼan bix u adorartik Dios (Marcos 10:17-22). Chéen baʼaleʼ, Jesuseʼ jach tu yéeyaj maʼalob máaxoʼob ken u amigotoʼob, letiʼeʼ maʼ tu jach bisuba yéetel mix máak maʼ u kʼáat u tsʼáa u yóol u meyajt Diosiʼ. Utéenjeakileʼ, letiʼeʼ tu yaʼalaj: «Teʼexeʼ in amigoʼex wa ka beetikeʼex le baʼax kin waʼalikteʼexoʼ» (Juan 15:14). Maʼ xaaneʼ techeʼ jach maʼalob a biskaba yéetel utúul a wéet meyaj, baʼaleʼ tukle: «Letiʼeʼ, ¿jeʼel wa u yóotik u beet baʼax ku kaʼansik Jesuseʼ? ¿Jach wa taak u kʼaj óoltik Jéeoba, le máax aʼalaʼab tumen Jesús unaj k-adorartikoʼ? ¿Ku bisik wa upʼéel maʼalob kuxtal jeʼex teen táan in meyajtik Dioseʼ?» (Mateo 4:10). U núukil le kʼáatchiʼobaʼ yaan a wilik ken tsikbalnakech yéetel a wéet meyajoʼob bey xan ken a wil baʼax ken u yaʼaloʼob wa baʼax ken u beetoʼob ken u yiloʼob jach ka tsʼáaik ichil a kuxtal le baʼax kun kaʼansik le Bibliaoʼ.
11. ¿Bey tiʼ baʼaxoʼob unaj k-chaʼik nuʼuktaʼal tumen u tʼaanoʼob Dioseʼ?
11 Yaan tiʼ uláakʼ baʼaxoʼob jeʼel u meyajtoʼon le Biblia bey upʼéel sáasil utiaʼal k-ookeʼ. Tukulteʼ utúul sukuʼun minaʼan meyaj tiʼeʼ ku yaʼalaʼal tiʼ jeʼel u tsʼaʼabal upʼéel meyaj u beeteʼ. Baʼaleʼ, wa ku kʼamikeʼ yaan u kʼaʼabéettal u meyaj yaʼab tiempo yéetel yaan u pʼáatal maʼ tu bin muchʼtáambal, maʼ tun jóokʼol kʼaʼaytaj mix u beetik uláakʼ baʼaloʼob yaan yil yéetel u adorartaʼal Dios (Salmo 37:25). Tukult xaneʼ uláakʼ utúul sukuʼuneʼ jach ku taaktal u chaʼantik peliculaʼob tuʼux ku beetaʼal baʼaloʼob maʼ u utstutʼaan Diosiʼ (Efesoiloʼob 4:17-19). Maʼ xaaneʼ, uláakʼ sukuʼuneʼ séeb u jáan pʼuʼujul yoʼolal baʼaxoʼob maʼ jach maʼalobtak ku beetik le sukuʼunoʼoboʼ (Colosailoʼob 3:13). Tiʼ le baʼaxoʼob tsʼoʼok aʼalikaʼ unaj k-chaʼik nuʼuktaʼal tumen u Tʼaan Dios bey upʼéel x-tʼuchub sáas utiaʼal k-ookeʼ. Wa k-beetik baʼax ku yaʼalik le Bibliaoʼ, jeʼel u páajtal k-aktáantik jeʼel baʼalak talamil ichil k-kuxtaleʼ, tumen u Tʼaan Dioseʼ «maʼalob xan utiaʼal kaʼansaj, utiaʼal kʼeyaj, utiaʼal tojkinaj yéetel utiaʼal tsol xikin tiʼ jumpʼéel toj kuxtal» (2 Timoteo 3:16).
«Ku sáasilkúuntik in beel»
12. ¿Baʼaxten ku yaʼalaʼal u tʼaanoʼob Dioseʼ bey upʼéel sáasil utiaʼal k-beeleʼ?
12 Tu libroiʼ Salmo 119:105 ku yaʼalaʼal xaneʼ u tʼaanoʼob Dioseʼ ku sáasilkúuntkoʼob k-beel. Toʼoneʼ k-ojel baʼax ku taal u kʼiin u yúuchul, tumen le Bibliaoʼ ku tsolik baʼaxten ku yúuchul baʼaloʼob kʼaastak way Luʼumeʼ yéetel ku yaʼaliktoʼon bix kun xuʼulul. Bey túunoʼ, toʼoneʼ k-ojel kuxaʼanoʼon «tiʼ u tsʼook jaʼaboʼob» le kʼasaʼan yóokʼol kaabaʼ (2 Timoteo 3:1-5). K-ojéeltik baʼax ku taal u kʼiin u yúuchleʼ unaj u péekskoʼon k-il bix táan k-kuxtal bejlaʼeʼ. Le apóstol Pedrooʼ tu yaʼalaj: «Tumen tuláakal bíin xuʼulsaʼak beyoʼ bey túunoʼ yéetel bukaʼaj kʼub óolal yéetel kiliʼichil unaj a kuxtaleʼex. Páaʼteʼex yéetel séebkunteʼex u kʼuchbal u kʼiinil Jajal Dios» (2 Pedro 3:11, 12).
13. ¿Bix jeʼel k-eʼesik creertik kuxaʼanoʼon tu tsʼook kʼiinoʼobeʼ?
13 Le bix k-kuxtal yéetel bix k-tuukuloʼ unaj u yeʼesik jach tu jaajil k-creertikeʼ «le yóokʼol kaaboʼ táan u bin u xuʼulul yéetel tuláakal le kʼaakʼas tsʼíibolaloʼob yaan tu yóokʼoloʼ» (1 Juan 2:17). Le tsolnuʼukoʼob ku tsʼáaik le Bibliaoʼ jeʼel u yáantkoʼon k-chʼaʼatukult bix jeʼel k-maas meyajtik Dioseʼ. Jesuseʼ tu yaʼalaj: «Kaxteʼex táanil u [reino] Jajal Dios yéetel le toj kuxtal utstutʼaan letiʼoʼ, tuláakal túun le baʼaloʼobaʼ bíin tsʼaʼabakteʼex xan» (Mateo 6:33). Jach ku kiʼimakkúuntik k-óol k-ilik yaʼab xiʼipalal yéetel yaʼab chʼúupalaleʼ ku creerkoʼob le baʼax ku yaʼalik le tekstoaʼ, tumen ku tsʼáaik u yóoloʼob u maas meyajtoʼob Dios. Yaan xan j-jaajkunajoʼobeʼ, yaan oraeʼ tuláakal upʼéel familiaeʼ, ku binoʼob kajtal tiʼ uláakʼ luʼumil tuʼux maas kʼaʼabéet j-kʼaʼaytajoʼobiʼ.
14. Upʼéel familiaeʼ, ¿baʼax tu beetaj utiaʼal u maas meyajtik Dios?
14 Tuukulnakoʼon tiʼ upʼéel familia ku meyajtik Dios kajaʼanoʼob kaʼach Estados Unidos, baʼaleʼ binoʼob kajtal República Dominicana utiaʼal u kʼaʼaytajoʼob tiʼ upʼéel kaaj tuʼux kajaʼan 50,000 máakoʼobiʼ. Teʼ múuchʼulil tuʼux binoʼoboʼ yaan ciento treinta utúulul j-kʼaʼaytajoʼobiʼ, baʼaleʼ tiʼ u Kʼiimbesajil u kíimil Cristo beetaʼab 12 tiʼ abril tiʼ 2006, tu muchʼuba 1,300 máakoʼobiʼ. Teʼ kaaj jeʼeloʼ, jeʼel u páajtal k-aʼalikeʼ «le paakʼaloʼoboʼ, [...] tsʼoʼok u kʼantaloʼob utiaʼal jochbil», le oʼolal chéen cinco meses káajak u meyajoʼob teʼeloʼ, le familiaoʼ káaj u tsʼáaikoʼob xook tiʼ treinta máakoʼob (Juan 4:35). Le taatatsiloʼ ku yaʼalik: «Treinta utúulul sukuʼunoʼob tsʼoʼok u taaloʼob áantaj teʼ múuchʼuliloʼ. Veinte utúulaloʼobeʼ tiʼ u taaloʼob Estados Unidoseʼ, yéetel u maasiloʼoboʼ tiʼ u taaloʼob Bahamas, Canadá, España, Italia, yéetel Nueva Zelandaeʼ. Le ken kʼuchkoʼobeʼ jach taak u kʼaʼaytajoʼob, yéetel tsʼoʼok u jach líiʼskoʼob u yóol le sukuʼunoʼob yanoʼob teʼ múuchʼuliloʼ».
15. ¿Baʼax utsiloʼob tsʼoʼok a kʼamik ikil a tsʼáaik táanil u Reino Dios?
15 U jaajileʼ, maʼ tuláakal sukuʼunoʼob jeʼel u páajtal u binoʼob áantaj tiʼ uláakʼ luʼumileʼ. Baʼaleʼ le sukuʼunoʼob ku páajtal u beetikoʼobeʼ jeʼel u kʼamikoʼob yaʼab utsiloʼobeʼ. Jeʼel tuʼuxak kajaʼanecheʼ, unaj u kiʼimaktal a wóol ikil a meyajtik Jéeoba yéetel tuláakal a muukʼ. Wa ka tsʼáaik táanil le Reino ichil a kuxtaloʼ, Jéeobaeʼ ku yaʼalik yaan u láalik «yaʼab ayikʼalil» ta wóokʼol (Malaquías 3:10).
Utsiloʼob ku taasik k-chaʼik nuʼuktaʼal tumen Jéeoba
16. ¿Baʼax utsiloʼob ku taasiktoʼon k-chaʼik nuʼuktaʼal tumen u tʼaanoʼob Dios?
16 Jeʼex tsʼoʼok ilkoʼ, u tʼaanoʼob Jéeobaeʼ kaʼapʼéel bix u nuʼuktikoʼon. Yáaxeʼ, bey upʼéel sáasil utiaʼal k-ookeʼ, tumen ku yáantkoʼon k-beet baʼax maʼalob yéetel ku yáantkoʼon k-chʼaʼatukult tubeel baʼax ken k-beete. U kaʼapʼéeleʼ, u Tʼaan Dioseʼ ku sáasilkúuntik k-beel, utiaʼal u páajtal k-ilik maas maʼalob le bej unaj k-bisikoʼ. Lelaʼ ku yáantkoʼon k-beet le baʼax tu yaʼalaj Pedroaʼ: «Tukulteʼex maʼalob baʼax kan a beeteʼex, yéetel sáasilchajak a naʼateʼex. Tsʼaʼex tuláakal a [esperanzaʼex] tiʼ le siibal utsil bíin tsʼaʼabakteʼex le ken chíikpajak Jesucristooʼ» (1 Pedro 1:13).
17. ¿Bix jeʼel u yáantkoʼon u xookil le Bibliaoʼ utiaʼal k-chaʼik u nuʼuktikoʼon Jéeobaoʼ?
17 U jaajileʼ Jéeoba tsʼáaiktoʼon nuʼuktaj. Baʼaleʼ ¿yaan wa k-chaʼik ka u nuʼuktoʼon? Utiaʼal a naʼatik tubeel baʼax ku yaʼalikeʼ, tsʼáa a wóol a xok le Biblia sáamsamaloʼ. Tuukulnen tiʼ le baʼax ka xokikoʼ, ilawil baʼax u kʼáat Jéeoba ka a beete yéetel tukult bix jeʼel a tsʼáaik ichil a kuxtal le baʼax ku yaʼalik le Bibliaoʼ (1 Timoteo 4:15). Tsʼoʼoleʼ, meyajnaktech maʼalob a tuukul le ken a chʼaʼatukult baʼax ken a beete (Romailoʼob 12:1).
18. ¿Baʼax utsiloʼob k-kʼamik le ken k-chaʼa u nuʼuktikoʼon u Tʼaan Dios?
18 Wa k-chaʼik tiʼ le Biblia ka u sáasilkunt k-beel yéetel ka u nuʼuktoʼoneʼ, yaan k-chʼaʼatuklik beetik baʼax maʼalob. Toʼoneʼ k-ojleʼ u Tʼaan Jéeobaeʼ «ku beetik u yantal naʼat tiʼ le máax óotsil u naʼat[oʼ]» (Salmo 19:7). Tsʼoʼoleʼ, le ken k-chaʼa u nuʼuktikoʼon le Bibliaoʼ, ku yantaltoʼon jeetsʼelil yéetel kiʼimak óolal, tumen táan k-beetik baʼax u kʼáat Jéeoba (1 Timoteo 1:18, 19). Tsʼoʼoleʼ, wa sáamsamal k-chaʼik u nuʼuktikoʼon Dioseʼ, letiʼeʼ yaan u tsʼáaiktoʼon le maas nojoch siibaloʼ: le kuxtal minaʼan u xuuloʼ (Juan 17:3).
¿Kʼajaʼan wa tech?
• ¿Baʼaxten jach kʼaʼabéet k-chaʼik nuʼuktaʼal tumen Jéeoba?
• ¿Baʼaxten ku yaʼalaʼaleʼ u tʼaanoʼob Dioseʼ bey upʼéel sáasil utiaʼal k-ookeʼ?
• U tʼaanoʼob Dioseʼ, ¿bix u sáasilkúuntkoʼob k-beel?
• ¿Bix ken u yáantiloʼon u xookil le Biblia utiaʼal ka k-chaʼa u nuʼuktikoʼon Dios?
[U kʼáatchiʼiloʼob le xookoʼ]
[U tsolajil le oochel teʼ táan juʼun 18]
¿Tak tuʼux unaj u náakal u biskuba máak yéetel utúul u yéet meyaj?
[U tsolajil le oochel teʼ táan juʼun 19]
Le bix k-kuxtaloʼ, ¿ku yeʼesik wa táan k-tsʼáaik táanil u Reino Dios?
[U tsolajil le oochel teʼ táan juʼun 20]
U amigoʼob Jesús kaʼacheʼ chéen máaxoʼob ku meyajkoʼob Jéeoba