Kʼaʼabéet k-náachkuntikba tiʼ le adoración maʼ kʼamaʼan tumen Diosoʼ
Kʼaʼabéet k-náachkuntikba tiʼ le adoración maʼ kʼamaʼan tumen Diosoʼ
«Yuumtsileʼ ku yaʼalik: Jóokʼeneʼex ichiloʼob yéetel tselabaʼexiʼ; maʼ a machikeʼex baʼal kʼaas.» (2 CORINTOILOʼOB 6:17.)
1. ¿Bix yanil yaʼab máakoʼob uts u puksiʼikʼaloʼob?
YAʼAB máakoʼob uts u puksiʼikʼaloʼobeʼ maʼ u yojloʼob u jaajil tiʼ Jéeobaiʼ mix u yojloʼob baʼax ku taal u kʼiinil tiʼ wíinikoʼobiʼ. Maʼ u yojloʼob u núukil le baʼaloʼob jach kʼaʼanantak ku kaʼansik le Bibliaoʼ, le oʼolal xaʼakʼpajaʼan u tuukuloʼob yéetel maʼ tu naʼatkoʼob yaʼab baʼaloʼob. Yaʼab tiʼ letiʼobeʼ ku creerkoʼob yéetel ku kʼiimbeskoʼob baʼaloʼob maʼ maʼalobtakoʼob tu táan Diosiʼ. Maʼ xaaneʼ k-vecinoʼob wa k-láakʼtsiloʼobeʼ ku creerkoʼob yaan upʼéel kúuchil tuʼux ku tóokaʼal le kʼasaʼanoʼoboʼ, ku creerkoʼob u kaʼansajil le Trinidadoʼ, ku tuklikoʼob yaan baʼax ku pʼáatal kuxaʼanil tiʼ máak ken kíimik wa ku creerkoʼob uláakʼ kaʼansajoʼob maʼ jaajtakiʼ.
2. ¿Baʼax ku beetaʼal tumen le máaxoʼob ku kaʼansajoʼob ichil le maʼ jaajil religionoʼoboʼ, yéetel baʼax ku beetkoʼob u tuklaʼal tumen yaʼab máakoʼob?
2 ¿Máax beetik u creertaʼal le baʼaloʼob maʼ jaajtakaʼ? Letiʼe maʼ jaajil religionoʼob yéetel le máaxoʼob ku kaʼansajoʼob ichiloʼoboʼ. Letiʼobeʼ ku kaʼanskoʼob baʼaloʼob ku binoʼob tu contra baʼax ku yaʼalik Dios (Marcos 7:7, 8). Yoʼolal lelaʼ yaʼab máakoʼobeʼ tsʼoʼok u beetaʼal u tuklikoʼob táan u adorarkoʼob Dios jeʼex unajeʼ, baʼaleʼ u jaajileʼ maʼ táan u beetkoʼobiʼ. Le religionoʼob maʼatech u kaʼanskoʼob u jaajiloʼ letiʼob tusmail le máakoʼoboʼ.
3. ¿Máax nuʼuktik le religionoʼob maʼatech u kaʼanskoʼob u jaajiloʼ, yéetel baʼax ku yaʼalik le Biblia tu yoʼolaloʼ?
3 Le religionoʼob maʼatech u kaʼanskoʼob u jaajiloʼ yaan utúul máax nuʼuktikoʼob. Le apóstol Pablooʼ tu yaʼalaj máaxiʼ: «U [diosil] le yóokʼol kaabaʼ tu éekʼjochʼeʼenkunsaj u naʼatoʼob utiaʼal maʼ u sáasjomeʼentaʼal tiʼob u sáasilil u maʼalob péektsil Cristo máax kiʼichkelem, máax xan u chíikbesajil Jajal Dios» (2 Corintoiloʼob 4:4). «U [diosil] le yóokʼol kaabaʼ», Satanás le u Kʼaasilbaʼaloʼ. Yéetel tu yáanal u kʼab yaan tuláakal le religionoʼob maʼatech u kaʼanskoʼob u jaajiloʼ. Pabloeʼ tu tsʼíibtaj: «Satanaseʼ ku chíikbesikuba bey jumpʼéel u ángel[il] sáasilileʼ. Le oʼolaleʼ [...] le máaxoʼob ku meyajtikoʼob Satanaseʼ ku chíikbesikubaʼob xan bey máakoʼob ku beetikoʼob baʼal utseʼ» (2 Corintoiloʼob 11:14, 15). Satanaseʼ ku beetik u yilaʼal bey maʼalob le baʼax kʼaasoʼ yéetel ku tusik le máakoʼob utiaʼal ka u creertoʼob baʼaloʼob maʼ jaajtakiʼ.
4. Le Ley tu tsʼáaj Jéeoba tiʼ le israelitaʼoboʼ, ¿baʼax ku yaʼalik kaʼach yoʼolal le máaxoʼob ku kaʼanskoʼob baʼaloʼob maʼ jaajtakoʼ?
4 Lelaʼ ku yáantkoʼon k-naʼat baʼaxten le Bibliaoʼ ku yeʼesik jach jumpuliʼ maʼ maʼalob baʼax ku beetik le religionoʼob maʼatech u kaʼanskoʼob u jaajiloʼ. Jeʼex u Ley Moiseseʼ ku yaʼalik kaʼach tiʼ le israelitaʼob ka u kanáantoʼob maʼ u yantal ichiloʼob mix máak ka u kaʼans baʼaloʼob maʼ jaajtakiʼ. Tuláakal máax ka joʼopʼok kaʼach u kaʼansik baʼaloʼob maʼ jaajtak bey xan wa ka joʼopʼok u yaʼalik ka adorartaʼak uláakʼ diosoʼobeʼ, kʼaʼabéet u kíimsaʼal kaʼachi, tumen tsʼoʼok u tʼaan tu contra Jéeoba. Tiʼ le israelitaʼoboʼ aʼalaʼabtiʼob ka u xuʼulsoʼob jeʼel baʼalak kʼaas ka yanak ichiloʼobeʼ (Deuteronomio 13:1-5). Jeʼex k-ilkoʼ, Jéeobaeʼ jach u pʼekmaj le religionoʼob maʼatech u kaʼanskoʼob u jaajiloʼ (Ezequiel 13:3).
5. ¿Tiʼ baʼax ku yaʼalaʼaltoʼon ka k-kanáantba?
5 Jeʼex Jéeobaeʼ, Jesucristo yéetel u apostoloʼobeʼ jach tu pʼektoʼob xan le religionoʼob maʼatech u kaʼanskoʼob u jaajiloʼ. Jesuseʼ tu yaʼalaj tiʼ u disipuloʼob: «Kanáantabaʼex tiʼ le tuus máakoʼob ku yaʼalikoʼob táan u tʼaanoʼob tu yoʼolal Jajal Dios. Ku taaloʼob tiʼ teʼex jeʼel bix j-tamanoʼobeʼ, baʼaleʼ tu puksiʼikʼaloʼobeʼ beyoʼob chakmoʼoleʼ» (Mateo 7:15; Marcos 13:22, 23). Pabloeʼ tu yaʼaleʼ «u nojoch jaatsʼ Jajal Dioseʼ kaʼan u taal tu yóokʼol tuláakal le máaxoʼob maʼ [toj] u kuxtaloʼob yéetel kʼasaʼanoʼoboʼ, máaxoʼob tu yoʼolal u kʼasaʼaniloʼobeʼ maʼ tu chaʼikoʼob u kʼaj óoltaʼal le jaajoʼ» (Romailoʼob 1:18). Bey túunoʼ jach kʼaʼanan ka k-uʼuy le baʼax ku yaʼalaʼaltoʼonaʼ yéetel ka k-náachkuntba tiʼ jeʼel máaxak ku kaʼansik baʼaloʼob maʼ jaajtakiʼ bey xan wa maʼ u kʼáat ka ojéeltaʼak baʼax ku yaʼalik le Bibliaoʼ (1 Juan 4:1).
Jóoʼkoʼon tiʼ «le nojoch Babilonia[oʼ]»
6. Teʼ Bibliaoʼ, ¿baʼax ku yaʼalaʼal tu yoʼolal «le nojoch Babilonia[oʼ]»?
6 Tu libroi Apocalipsiseʼ, le religionoʼob maʼatech u kaʼanskoʼob u jaajiloʼ ku ketaʼaloʼob yéetel utúul x-kʼeban koʼolel kalaʼan jach yaan páajtalil tiʼ tu yóokʼol yaʼabach reinoʼob yéetel kaajoʼob. Ku yaʼalaʼaleʼ, le x-kʼeban koʼolelaʼ ku núupkʼebantal yéetel yaʼabach reyoʼob yéetel ku yaʼalaʼal xan kalaʼan yéetel u kʼiʼikʼel le máaxoʼob kʼamaʼanoʼob tumen Jéeobaoʼ (Apocalipsis 17:1, 2, 6, 18). Tu táan joʼolaleʼ tsʼíibtaʼan upʼéel kʼaabaʼ ku yeʼesik le jach kʼaakʼas kuxtal ku biskoʼ: «Nojoch Babilonia, u maama tuláakal x-núupkʼebanoʼob yéetel tuláakal le baʼax pʼekbeʼen [teʼ] yóokʼol kaaboʼ» (Apocalipsis 17:5).
7, 8. ¿Bix tsʼoʼok u núupkʼebantal le religionoʼob maʼatech u kaʼanskoʼob u jaajiloʼ, yéetel baʼax tsʼoʼok u yúuchul yoʼolal le baʼax ku beetkoʼobaʼ?
7 Teʼ Bibliaoʼ le baʼax ku yaʼalaʼal ku beetik le nojoch Babiloniaoʼ jach bey xan u beetaʼal tumen tuláakal le religionoʼob maʼatech u kaʼanskoʼob u jaajiloʼ. Kex le u milesi religionoʼob maʼ junmúuchʼ u meyajoʼobeʼ, baʼaleʼ jumpʼéeliliʼ bix u tuukuloʼob yéetel baʼax ku beetkoʼob. Jeʼex le x-kʼeban koʼolel ku yaʼalaʼal tu libroi Apocalipsisoʼ, le religionoʼob maʼatech u kaʼanskoʼob u jaajiloʼ jach yaan u páajtaliloʼob yóokʼol le gobiernoʼoboʼ. Jeʼex utúul atantsil ku tusik u yíicham yéetel yaanaleʼ, le religionoʼob maʼatech u kaʼanskoʼob u jaajiloʼ tsʼoʼok u núupkʼebantaloʼob ikil u yantal baʼax u yiloʼob yéetel yaʼabach gobiernoʼob. Le disipulo Santiagooʼ tu tsʼíibtaj: «¡Núupkʼeban máakeʼex! ¿Maʼ wa a wojeleʼexeʼ u bisikuba máak yéetel yóokʼol kaabeʼ ku beetikuba u [enemigo] Jajal Dios? Jeʼel máaxak ka u tsʼáa u yóol u beetikuba u amigo yóokʼol kaabeʼ ku sutkuba u [enemigo] Jajal Dios» (Santiago 4:4).
8 Le religionoʼob maʼatech u kaʼanskoʼob u jaajiloʼ ikil u táakbeskubaʼob ichil le baʼaloʼob ku beetik le gobiernoʼoboʼ tsʼoʼok u beetkoʼob u yantal yaʼab muʼyajiloʼob. Utúul máak africai jach ku tʼaan tiʼ política ku kʼaabaʼtik Xolela Mangcu tu yaʼaleʼ, «jach yaʼab máak tsʼoʼok u kíimsaʼaloʼob ikil u táakbeskuba le religión ichil le politicaoʼ». Maʼ úuch xaneʼ upʼéel periodicoeʼ tu yaʼalaj: «Le baʼateloʼob maas nuuktak tuʼux ku kíimil yaʼab máakoʼoboʼ [...] tiʼ jach táakaʼan le religionoʼ». U millonesi máakoʼob tsʼoʼok u kíimloʼob tiʼ baʼateloʼob tuʼux u yoksmuba le religionoʼoboʼ. Le nojoch Babiloniaoʼ tsʼoʼok tak u chʼaʼapachtik yéetel u kíimsik yaʼab tiʼ le máaxoʼob meyajtik Diosoʼ, le oʼolal jeʼel u páajtal u yaʼalaʼal tsʼoʼok u káaltal yéetel u kʼiʼikʼeloʼobeʼ (Apocalipsis 18:24).
9. U libroi Apocalipsiseʼ, ¿bix u yeʼesik jach pʼektaʼan tumen Jéeoba le religionoʼob minaʼan u jaajil tiʼoboʼ?
9 Jéeobaeʼ jach u pʼekmaj le religionoʼob minaʼantiʼob u jaajiloʼ, lelaʼ bey u yeʼesik le baʼax kun úuchul tiʼ le nojoch Babiloniaoʼ. Apocalipsis 17:16 ku yaʼalik: «Le diez u tsʼíitil baakoʼob ta wilaj tiʼ le nojoch baʼalcheʼoʼ yaan u pʼektikoʼob le x-núupkʼeban koʼoleloʼ, yaan xan u xúumpʼattikoʼob tu juunal yéetel [yaan u pʼatikoʼob] chaknuul; yaan u jaantikoʼob u bakʼel u wíinklil yéetel yaan u tóokikoʼob tiʼ kʼáakʼ». Yáaxeʼ, utúul nojoch baʼalcheʼiʼ, ku kíimsik yéetel ku jaantik u bakʼel, tsʼoʼoleʼ ku tóokaʼal u yalaʼ u wíinklil. Maʼ kun xáantaleʼ u gobiernoiloʼob le yóokʼol kaabaʼ bey ken u beetiloʼob tiʼ le religionoʼob minaʼan u jaajil tiʼoboʼ. Dios kun ilik ka úuchuk beyoʼ (Apocalipsis 17:17). Le nojoch Babilonia wa tuláakal le religionoʼob minaʼan u jaajil tiʼoboʼ, xotʼkʼíintaʼanoʼob utiaʼal ka xuʼulsaʼaktiʼob. Le nojoch Babilonia túunaʼ «mix bikʼin bíin ilaʼak tu kaʼatéen» (Apocalipsis 18:21).
10. ¿Bix unaj k-ilik le religionoʼob minaʼan u jaajil tiʼoboʼ?
10 Le máaxoʼob meyajtikoʼob Jéeobaoʼ, ¿bix unaj u yilkoʼob le nojoch Babiloniaoʼ? Le Bibliaoʼ jach tʼáalkab u yaʼalik: «Jóokʼeneʼex tiʼ le kaajoʼ, utiaʼal maʼ a táakpajaleʼex tiʼ u kʼebanoʼob yéetel utiaʼal maʼ a chukpachtaʼaleʼex tumen u núumyajoʼob» (Apocalipsis 18:4). Le máaxoʼob maʼ u kʼáatoʼob ka xuʼulsaʼakoʼobeʼ unaj u séeb jóoʼloʼob ichil le religionoʼob maʼatech u kaʼanskoʼob u jaajiloʼ. Le ka kuxlaj way Luʼumeʼ, Jesucristoeʼ tu yaʼaleʼ teʼ tu tsʼook kʼiinoʼobaʼ yaʼab máakoʼob ken u yaʼaloʼob u disipuloʼob, baʼaleʼ maʼ ken u yeʼesoʼob wa jaaj (Mateo 24:3-5). Tiʼ letiʼobeʼ, Jesuseʼ yaan u yaʼalik: «Mix bikʼin [tin] kʼaj óolteʼex; ¡tselabaʼex tin táan, teʼex ta beetajeʼex baʼaloʼob kʼaastak!» (Mateo 7:23). Jeʼex túun k-ilkoʼ le Rey Jesucristooʼ mix baʼal yaan u yil yéetel le religionoʼob minaʼan u jaajil tiʼoboʼ.
¿Bix jeʼel k-náachkuntikba tiʼobeʼ?
11. ¿Baʼax unaj k-beetik utiaʼal k-náachkuntikba tiʼ le adoración maʼ kʼamaʼan tumen Diosoʼ?
11 Toʼoneʼ k-náachkuntikba tiʼ le religionoʼob minaʼan u jaajil tiʼoboʼ tumen maʼ t-kʼamik u kaʼansajoʼob. Lelaʼ u kʼáat yaʼaleʼ maʼatech k-ilik mix k-uʼuyik le baʼaloʼob ku máansaʼal tumen le religionoʼob tiʼ radio yéetel tiʼ televisiónoʼ, mix xan k-xokik revistaʼob wa libroʼob ku yaʼalikoʼob baʼaloʼob maʼ jaajtak tu yoʼolal Dios yéetel tu yoʼolal le Bibliaoʼ (Salmo 119:37). Leloʼ u kʼáat u yaʼal xan maʼatech k-bin tiʼ kʼiimbesajoʼob wa tiʼ uláakʼ baʼaloʼob ku beetaʼal tumen le religionoʼob minaʼan u jaajil tiʼoboʼ. Jeʼex túun k-ilkoʼ, toʼoneʼ maʼatech k-táakpajal tiʼ mix baʼal yaan yil yéetel le adoración maʼ kʼamaʼan tumen Diosoʼ (1 Corintoiloʼob 10:21). Wa k-beetik le baʼax ku yaʼalaʼaltoʼonaʼ maʼ ken k-chaʼa «[k-]bisaʼaleʼex tumen le máaxoʼob u kʼáat u [tusoʼonoʼob] yéetel luʼumkabil tuukuloʼoboʼ bey xan yéetel tʼaanoʼob chéen kuneloʼoboʼ; tumen letiʼobeʼ maʼ táan u chʼaʼikoʼob u muu[kʼoʼob] tiʼ Cristo, baʼaleʼ tiʼ u kaʼansaj máakoʼob yéetel tiʼ yóokʼol kaabil tuukuloʼob» (Colosailoʼob 2:8).
12. Wa yaan máax u kʼáat u beetuba j-jaajkunaj tiʼ Jéeobaeʼ, ¿baʼax kʼaʼabéet u beetik?
12 Wa yaan máax u kʼáat u beetuba j-jaajkunaj tiʼ Jéeoba, baʼaleʼ tiaʼan u kʼaabaʼ ichil yaanal religioneʼ, ¿baʼax kʼaʼabéet u beetik? Maʼ xaaneʼ chéen unaj u túuxtik upʼéel juʼun tuʼux ku yaʼalik táan u jóoʼskuba ichil le religión jeʼeloʼ. Kʼaʼabéet u yilik maʼ u yantal jach mix baʼal u yil yéetel upʼéel religión maʼatech u kaʼansik u jaajil. Tuláakal baʼax ken u beeteʼ unaj u yeʼesik tiʼ le religión tuʼux yaan kaʼachoʼ yéetel tiʼ tuláakal máak, jach tsʼoʼok u jóokʼol tiʼ le religión jeʼeloʼ.
13. ¿Bix u yeʼesik le Biblia unaj k-náachkuntikba tiʼ le adoración maʼ kʼamaʼan tumen Diosoʼ?
13 Le apóstol Pablooʼ tu tsʼíibtaj: «Maʼ a nupkabaʼex yéetel máaxoʼob maʼ tu yoksaj óoloʼoboʼ. Tumen ¿baʼax yaan u [yil] baʼax toj yéetel baʼax kʼaas? ¿Wa bix jeʼel u páajtal u bisikuba le sáasiloʼ yéetel le éekʼjochʼeʼeniloʼ? ¿Bix jeʼel u páajtal u yantal keet tuukul tiʼ Cristo yéetel Satanaseʼ? ¿Wa bix jeʼel u páajtal u múuchʼ yantal juntúul j-oksaj óol yéetel juntúul minaʼan oksaj óol tiʼeʼ? ¿Jeʼel wa u páajtal u yantal baʼal u yil u templo Jajal Dios yéetel le beetbil [diosoʼoboʼ]? [...] Le oʼolaleʼ Yuumtsileʼ ku yaʼalik: Jóokʼeneʼex ichiloʼob yéetel tselabaʼexiʼ; maʼ a machikeʼex baʼal kʼaas, bey túunoʼ teneʼ jeʼel in kʼamikeʼexeʼ» (2 Corintoiloʼob 6:14-17). Le baʼax ku yaʼalik le tekstoaʼ k-beetik ken k-náachkuntba tiʼ le adoración maʼ kʼamaʼan tumen Diosoʼ. Baʼaleʼ le baʼax tu yaʼalaj Pabloaʼ, ¿u kʼáat wa túun u yaʼal kʼaʼabéet náachtal tiʼ tuláakal le máaxoʼob yanoʼob ichil le religionoʼob minaʼan u jaajil tiʼoboʼ?
«Kuxleneʼex yéetel naʼatil»
14. ¿Jach wa jumpuliʼ maʼ unaj k-tsikbal yéetel le máaxoʼob maʼ kʼamaʼan u adoracionoʼob tumen Diosoʼ? Tsol baʼaxten bey a núukikoʼ.
14 ¿U kʼáat wa túun u yaʼal jach jumpuliʼ maʼ ken k-tsikbal yéetel le máaxoʼob maʼ kʼamaʼan u adoracionoʼob tumen Diosoʼ? ¿Unaj wa k-náachkuntikba tiʼ máaxoʼob maʼ j-jaajkunajoʼobiʼ? Maʼatech, tumen upʼéel tiʼ le kaʼapʼéel maas nojoch leyoʼoboʼ, ku yaʼalik: «Yaabilt a láakʼ jeʼel bix ka yaabiltkabaeʼ» (Mateo 22:39). U jaajileʼ k-eʼesik yaabilaj tiʼ k-éet wíinikiloʼob ken k-kʼaʼayt le maʼalob péektsil tiʼoboʼ, ken k-kaʼanstiʼob baʼax ku yaʼalik le Bibliaoʼ yéetel ken k-eʼestiʼob kʼaʼabéet u náachkuntikubaʼob tiʼ le adoración maʼ kʼamaʼan tumen Diosoʼ.
15. Ken u yaʼal le Biblia maʼ yóokʼol kaabiloʼonoʼ, ¿baʼax u kʼáat u yaʼale?
15 Kex k-kʼaʼaytik le maʼalob péektsil tiʼ k-éet wíinikiloʼobeʼ, toʼoneʼ «maʼ yóokʼol kaabi[loʼoniʼ]» (Juan 15:19). Le tʼaan «yóokʼol kaab» ku chíikpajal teʼelaʼ u kʼáat u yaʼal tuláakal le máaxoʼob náachchajaʼanoʼob tiʼ Diosoʼ (Efesoiloʼob 4:17-19; 1 Juan 5:19). Toʼoneʼ maʼ táakaʼanoʼon tiʼ le yóokʼol kaabaʼ, tumen maʼatech k-tʼaan mix t-kuxtal jeʼex u máakiloʼobeʼ (1 Juan 2:15-17). Tsʼoʼoleʼ, tumen le Biblia ku yaʼalik «le kʼaakʼas éet xíimbaloʼoboʼ ku kʼaskúuntikoʼob le maʼalob kuxtaloʼ», toʼoneʼ k-kanáantik maʼ k-kaxtik amigos ichil máaxoʼob maʼatech u kuxtaloʼob jeʼex u yaʼalik le Bibliaoʼ (1 Corintoiloʼob 15:33). Ken u yaʼal le Biblia maʼ yóokʼol kaabiloʼoneʼ, u kʼáat u yaʼal maʼatech k-táakpajal tiʼ «u kʼaakʼas baʼaloʼobil le yóokʼol kaabaʼ» (Santiago 1:27). Le oʼolaleʼ, k-náachkuntikba tiʼ le yóokʼol kaabaʼ maʼ u kʼáat u yaʼal wa maʼ ken k-tsikbal yéetel mix máak maʼatech u meyajtik Jéeobaiʼ (Juan 17:15, 16; 1 Corintoiloʼob 5:9, 10).
16, 17. ¿Bix unaj k-tratartik le máaxoʼob maʼatech u meyajtkoʼob Jéeobaoʼ?
16 ¿Bix unaj k-tratartik le máaxoʼob maʼatech u meyajtkoʼob Jéeobaoʼ? Pabloeʼ tu yaʼalaj tiʼ le sukuʼunoʼob yanoʼob Colosaoʼ: «Yéetel le yaanal máakoʼoboʼ kuxleneʼex yéetel naʼatil, maʼ a chaʼikeʼex u binteʼex le kʼiinoʼob chéen beyoʼ. Tʼaaneneʼex mantatsʼ yéetel utsil, a kiʼikúunseʼex a tʼaaneʼex yéetel taʼab, utiaʼal ka a wojéelteʼex bix u náajmal a núukkeʼex u tʼaan jujuntúul» (Colosenses 4:5, 6, LTN). Le apóstol Pedrooʼ tu tsʼíibtaj xan: «Tsiikilteʼex Cristo [...]. Mantatsʼ [a] nuʼuktmabaʼex utiaʼal a núukikeʼex tiʼ tuláakal ka u kʼáatoʼob a chiʼex tu yoʼolal le alab óolal yaan tiʼ teʼexoʼ, baʼaleʼ beeteʼex yéetel kabal óolal bey xan yéetel tsiikil» (1 Pedro 3:15). Pablo xaneʼ tu yaʼaleʼ le cristianoʼoboʼ maʼ unaj «u tʼaanoʼob kʼaas tu yoʼolal mix máak, maʼ u kaxan baʼateloʼob, baʼaleʼ ka kuxlakoʼob yéetel utsil puksiʼikʼal, mantatsʼ ka u yeʼesoʼob kabal óolal tu táan tuláakal máak» (Tito 3:2).
17 Toʼon k-meyajtik Jéeobaeʼ maʼ unaj k-beetik kʼasaʼanil tiʼ mix máakiʼ mix xan unaj k-taasikba maas maʼaloboʼon tiʼ letiʼobiʼ. Ken tʼaanakoʼon tiʼ le máakoʼob yaanal u religionoʼoboʼ maʼatech k-aʼalik tʼaanoʼob jeʼel u beetik u tsʼíikiloʼobeʼ. Baʼaxeʼ k-eʼesik maʼalob modos tiʼob, kex ka u yaʼaloʼobtoʼon baʼal wa tak ka u pochʼoʼonoʼob (Colosailoʼob 4:6; 2 Timoteo 2:24).
«Tʼilkúuns ta tuukul le maʼalob kaʼansaj[oʼ]»
18. ¿Bix yanil le máaxoʼob ku kaʼa sutoʼob tiʼ le adoración maʼ kʼamaʼan tumen Diosoʼ?
18 Wa tsʼoʼok k-kʼaj óoltik le u jaajil ku kaʼansik le Bibliaoʼ jach subtsil ka suunakoʼon tukaʼaten tiʼ le adoración maʼ kʼamaʼan tumen Diosoʼ. Le Bibliaoʼ ku yaʼaliktoʼon baʼax jeʼel u yúuchultoʼon wa ka k-beet lelaʼ: «Le máaxoʼob tsʼoʼok u kʼaj óoltikoʼob k-Yuumtsil [...] Jesucristoeʼ yéetel tsʼoʼok u púutsʼuloʼob [...] tiʼ u kʼasaʼaniloʼob yóokʼol kaabeʼ, wa ku tsʼoʼokoleʼ ku chaʼikoʼob u woʼoltaloʼob tu kaʼatéen tumen le baʼaloʼobaʼ yéetel ku tsʼáanchaʼataʼaloʼob tumenoʼobeʼ, [maas] kʼaas u pʼáataloʼob tiʼ le yaniloʼob kaʼachoʼ. [...] Baʼaleʼ tsʼoʼok u yúuchul tiʼobeʼ jach jeʼel bix ku yaʼalik le tʼaanaʼ: Le peekʼoʼ ku suut tiʼ le baʼax tu xéeajoʼ, yéetel le x-leech táant u pʼoʼoboloʼ ku suut u balkʼesuba tiʼ le luukʼoʼ» (2 Pedro 2:20-22).
19. ¿Baʼaxten jach kʼaʼanan ka k-kanáantba tiʼ jeʼel baʼalak jeʼel u náachkuntkoʼon tiʼ le adoración kʼamaʼan tumen Diosoʼ?
19 Kʼaʼabéet k-kanáantikba tiʼ jeʼel baʼalak jeʼel u náachkuntkoʼon tiʼ le adoración kʼamaʼan tumen Diosoʼ. Kʼaʼajaktoʼoneʼ, lelaʼ upʼéel baʼal jach jeʼel u yúuchultoʼon wa maʼ k-kanáantikbaeʼ. Le apóstol Pablooʼ tu yaʼalaj: «Kiliʼich pixaneʼ jach tʼáalkab ku yaʼalikeʼ tiʼ le tsʼook kʼiinoʼoboʼ yaan tsʼeʼetsʼek bíin u tselubaʼob tiʼ le oksaj óolaloʼ, utiaʼal u binoʼob tu paach [...] tuusoʼob yéetel utiaʼal u yuʼubikoʼob kaʼansajoʼob tiʼ kʼaakʼas pixanoʼob u taaloʼob» (1 Timoteo 4:1). Bejlaʼeʼ kuxaʼanoʼon «tiʼ le tsʼook kʼiinoʼob» tu yaʼalaj apóstol Pablooʼ. Le máaxoʼob maʼ tu náachkuntikubaʼob tiʼ le adoración maʼ kʼamaʼan tumen Diosoʼ jeʼel u «jíiltaʼaloʼob tumen u yiikʼal jeʼel máakalmáak túumben kaʼansajileʼ» yéetel jeʼel u «lúubuloʼob beyoʼ tiʼ le tuus ku beetikoʼob le táabsaj wíinikoʼob u kʼáat u bisoʼonoʼob tiʼ u bejiloʼob le kʼaasoʼ» (Efesoiloʼob 4:13, 14).
20. ¿Bix jeʼel k-kanáantikba utiaʼal maʼ k-táakpajal tiʼ mix baʼal yaan yil yéetel le religionoʼob maʼatech u kaʼanskoʼob u jaajiloʼ?
20 ¿Bix jeʼel k-kanáantikba utiaʼal maʼ k-táakpajal tiʼ mix baʼal yaan yil yéetel le religionoʼob maʼatech u kaʼanskoʼob u jaajiloʼ? Tuukulnakoʼon tiʼ tuláakal le baʼax u tsʼaamajtoʼon Jéeobaoʼ. Letiʼeʼ u tsʼaamajtoʼon le Bibliaoʼ (2 Timoteo 3:16, 17). Tiʼ letiʼ xaneʼ ku meyaj «le palitsil chúukpajaʼan u yóol yéetel yaan u naʼat», utiaʼal u tsʼáaiktoʼon nuʼuktajoʼ (Mateo 24:45). Jeʼex u bin k-maas kaambaleʼ yaan u maas taaktal k-jaantik «le chichich [janal] utiaʼal le máaxoʼob tsʼoʼok u nukuch wíiniktaloʼoboʼ» yéetel yaan u taaktal k-muchʼikba utiaʼal k-maas kanik baʼax ku yaʼalik Dios (Hebreob 5:13, 14; Salmo 26:8). Le oʼolaleʼ, koʼoneʼex ilik k-jóoʼsik u yutsil tuláakal le baʼaxoʼob ku tsʼáaiktoʼon Jéeoba utiaʼal ka k-tʼilkúuns t-tuukul «le maʼalob kaʼansaj» tsʼoʼok k-kʼamikoʼ (2 Timoteo 1:13). Wa k-beetik beyaʼ yaan k-náachkuntikba tiʼ le adoración maʼ kʼamaʼan tumen Diosoʼ.
¿Baʼax ta kanaj?
• ¿Baʼax «le nojoch Babilonia[oʼ]»?
• ¿Baʼax unaj k-beetik utiaʼal k-náachkuntikba tiʼ le religionoʼob maʼatech u kaʼanskoʼob u jaajiloʼ?
• ¿Tiʼ baʼaxoʼob unaj k-kanáantikba utiaʼal maʼ k-náachtal tiʼ le adoración kʼamaʼan tumen Diosoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 22]
¿A wojel wa baʼaxten ku ketaʼal «le nojoch Babilonia» yéetel utúul x-kʼeban koʼoleloʼ?
[U tsolajil le oochel teʼ táan juʼun 23]
«Le nojoch Babilonia[oʼ]» xotʼkʼíintaʼan utiaʼal ka xuʼulsaʼak
[U tsolajil le oochel teʼ táan juʼun 25]
Kʼaʼabéet k-eʼesik «kabal óolal [...] yéetel tsiikil» tiʼ le máaxoʼob yaanal u religionoʼoboʼ