Jach kiʼimakchajak k-óol tiʼ Jéeoba
Jach kiʼimakchajak k-óol tiʼ Jéeoba
«Jach kiʼimakchajak a wóol tiʼ Jéeoba, letiʼ túuneʼ yaan u tsʼáaiktech baʼaxoʼob ku tsʼíiboltik a puksiʼikʼal.» (SALMO 37:4, Traducción del Nuevo Mundo, NM.)
1, 2. ¿Máax tiʼ u taal le jaajil kiʼimak óolaloʼ, yéetel Dabideʼ bix tu yeʼesil jach beyoʼ?
«KIʼ U YÓOLOʼOB le máaxoʼob ku kʼaj óoltikoʼob u yóotsilil u pixanoʼoboʼ [...]. Kiʼ u yóoloʼob le máaxoʼob okʼom u yóoloʼoboʼ [...]. Kiʼ u yóoloʼob le máaxoʼob ku meyajoʼob utiaʼal ka yanak jeetsʼel óolal ichil máakoʼob[oʼ].» Le tʼaanoʼobaʼ, yéetel uláakʼ seeis baʼaxoʼob tiaʼalaj Jesus ku taasik kiʼimak óolaleʼ, u jatsʼuts káajbal le jach kʼaj óolaʼan tseʼektaj tu beetaj teʼ puʼukoʼ; le tʼaanoʼobaʼ tsʼíibtaʼaboʼob tumen Máateo (San Mateo 5:3-11). Le baʼaxoʼob tiaʼalaj Jesusaʼ kieʼesik jeʼel u páajtal u yantaltoʼon kiʼimak óolaleʼ.
2 Upʼéel kʼaay tsʼíibtaʼan tumen le reey Dabid kuxlaj tu kaajil Íisraeloʼ kieʼeskeʼ tiʼ Jéeoba u taal le jaajil kiʼimak óolaloʼ. Le kʼaayaʼ kiaʼalik: «Jach kiʼimakchajak a wóol tiʼ Jéeoba, letiʼ túuneʼ yaan u tsʼáaiktech baʼaxoʼob ku tsʼíiboltik a puksiʼikʼal» (Salmo 37:4, NM). ¿Baʼaxoʼob jeʼel u beetik u jach kiʼimaktal k-óol kʼaj óoltik Jéeoba yéetel u yaʼab jatsʼuts moodoseʼ? K-ilik baʼaxoʼob u beetmaj Dioos yéetel baʼaxoʼob ken u beeteʼ, ¿bix jeʼel u yáantkoʼon utiaʼal k-kʼamik le «baʼaxoʼob ku tsʼíiboltik [k-puksiʼikʼaloʼ]»? Koʼoneʼex kaxtik u núukil ken k-il baʼax u kʼáat yaʼal le Salmo 37, u chichan xookil 1 tak 11.
Maʼ tsʼíiboltik baʼax ku beetkoʼob
3, 4. ¿Baʼax kʼaʼajsajil ku tsʼáaiktoʼon Dabid teʼ Salmo 37:1, yéetel baʼaxten maʼalob ka k-beet beyoʼ?
3 Kuxaʼanoʼon tiʼ «talam kʼiinoʼob», tuʼux jach yaʼab u beetaʼal baʼax kʼaas. Táan k-ilik u yúuchul le baʼax u yaʼalmaj Paabloaʼ: «Le máaxoʼob kʼasaʼanoʼoboʼ yéetel le ku tuusoʼoboʼ bíin xiʼikoʼob tiʼ kʼaas tak tu maas kʼaasil, táan u tuusoʼob yéetel táan u tuʼusuloʼob» (2 tiʼ Timoteo 3:1, 13). K-ilik bey jach táan u bin utsil tiʼe kʼasaʼanoʼoboʼ jach séeb jeʼel u táabsik k-tuukuleʼ yéetel jeʼel u beetik u náayal k-óoleʼ, bey xan jeʼel u náachkuntkoʼon tiʼ k-meyajtik Diooseʼ. Le oʼolal u tʼaaniloʼob u káajbal le Salmo 37 ku kʼaʼajsiktoʼon lelaʼ: «Maʼ a pʼuʼujul tu yoʼolal u siʼipil le kʼaakʼas máakoʼoboʼ, mix a tsʼíiboltik a beetik baʼax ku beetik le loolob máakoʼoboʼ».
4 Le raadio, le téelebision yéetel le perioodikoʼoboʼ ku sen eʼeskoʼobtoʼon le senkech baʼaloʼob kʼaastak kiúuchul sáamsamaloʼ: tsikbeʼen máakoʼob ku yookoloʼob maʼatech u kʼaʼaloʼob, kʼaakʼas máakoʼob ku beetkoʼob loob tiʼ máaxoʼob maʼ tu páajtal u beetkoʼob mix baʼal, máakoʼob ku kíimsik u yéet máakiloʼob maʼatech u chuʼukloʼob wa u kʼalaʼaloʼob. Maʼ u kʼaʼalal máaxoʼob beetik le baʼaloʼobaʼ, jeʼel u beetik k-tsʼíikil yéetel k-chiʼichnaktaleʼ. K-ilik bey táan u bin utsil tiʼe kʼasaʼan máakoʼoboʼ jeʼel u beetik u taaktal k-kuxtal jeʼex kuxlikoʼoboʼ. Baʼaleʼ, ¿yaan wa baʼax k-jóoʼsik wa ka tsʼíikilnakoʼon? K-tsʼíiboltik le maʼalob baʼaloʼob yantiʼe kʼasaʼanoʼoboʼ, ¿yaan wa u beetik u kʼexpajal baʼax ku páaʼkoʼob? Maʼ, maʼatan. Yéetel maʼ unaj k-tsʼíikiliʼ. Koʼox ilik baʼaxten.
5. ¿Baʼaxten ku keʼetel le kʼasaʼan máakoʼob yéetel le xíiwoʼ?
5 Dabideʼ kiaʼaliktoʼon: «Tumen séebaʼan u tijiloʼob jeʼel bix u tijil le suʼukoʼ; ¡ku kíimiloʼob jeʼel bix u kíimil le xíiwoʼ!» (Salmo 37:2.) Xíiw jach yaʼaxeʼ jatsʼuts u yilaʼal, baʼaleʼ séebaʼan u tijil yéetel u kíimil. Bey xan u yúuchul yéetel le kʼasaʼan máakoʼoboʼ. U ayikʼaliloʼobeʼ maʼatech u xáantal. Ken kíimkoʼobeʼ mix baʼal u biilal tiʼob le baʼax u yokoltmoʼoboʼ. Yéetel ku kʼuchul u kʼiinil u boʼotkoʼob tuláakal le baʼax u beetmoʼoboʼ. Bey tiaʼalij Paablo: «Tumen u boʼolil le kʼebanoʼ kíimil» (Tiʼ Romailoʼob 6:23). Bey túunoʼ, le kʼasaʼan máakoʼoboʼ yaan u kʼuchul u kʼiinil u kʼamkoʼob u «boʼolil» le baʼax u beetmoʼoboʼ. ¡Jach túun mix baʼal maʼalob ku taasik le kuxtal beyoʼ! (Salmo 37:35, 36; 49:16, 17.)
6. ¿Baʼax ku kaʼansiktoʼon le Salmo 37:1, 2?
6 ¿Unaj wa túun k-tsʼíikil yoʼolal le ayikʼalil yantiʼe kʼasaʼanoʼob chéen utiaʼal u chan súutukoʼ? Le baʼax ku kaʼansiktoʼon le yáax kaʼapʼéel chichan xookoʼob tiʼ le Salmo 37 letiʼ lelaʼ: Maʼ unaj k-chaʼik u náachkuntkoʼon tiʼ Jéeoba le k-ilik táan u bin utsil tiʼe kʼasaʼanoʼoboʼ. Unaj tsʼáaik k-óol béeykunt baʼax k-chʼaʼatukulmaj yéetel k-tuukul tiʼ le utsiloʼob k-kʼamik tiʼ Dioosoʼ (Proverbios 23:17).
«Kʼub a wóol tiʼ Yuumtsil yéetel beet le baʼax utsoʼ»
7. ¿Baʼaxten kʼaʼabéet k-kʼubik óol tiʼ Jéeoba?
7 Dabideʼ kiaʼaliktoʼon: «Kʼub a wóol tiʼ Yuumtsil [Jéeoba] yéetel beet le baʼax utsoʼ» (Salmo 37:3a). Ken jach yanaktoʼon chiʼichnakiloʼob, wa tak saajkiloʼobeʼ, jach kʼaʼabéet k-kʼubik óol tiʼ Jéeoba tumen letiʼeʼ ku páajtal u chúukaʼan kanáantik k-oksaj óolal. Moiseseʼ tu tsʼíibtaj: «Le máax kajakbal tu yáanal u boʼoyil Aj Sen Kaʼanaleʼ tiʼ yaan tu yáanal u kanan le Máax yaan tuláakal páajtalil tiʼoʼ» (Salmo 91:1). Wa chan saajkoʼon ikil u sen yaʼabtal u beetaʼal baʼaloʼob kʼaastak way Luʼumeʼ, kʼaʼabéet k-maas natsʼikba tu yiknal Jéeoba utiaʼal k-kaxtik áantaj. Jeʼex ken sáayak k-ook k-tsʼáaik u nib óolalil tiʼ utúul k-áamigo ku yilik u yáantkoʼon utiaʼal k-xíimbaleʼ, bey xan kʼaʼabéetiltoʼon u yáantaj Jéeoba utiaʼal k-ilik k-kuxtal yéetel chúukaʼan óolal (Isaías 50:10).
8. Le k-táakpajal teʼ meeyjil kaʼansajoʼ, ¿bix jeʼel u yáantkoʼon utiaʼal maʼ u lúubul k-óol wa k-ilik táan u bin utsil tiʼe kʼasaʼanoʼoboʼ?
8 K-ilik kaxtik le máakoʼob taak u kaambaloʼob yéetel k-ilik áantkoʼob utiaʼal ku kanoʼob tubeel baʼaxoʼob u tukulmaj u beetik Jéeobaoʼ upʼéel u tsʼaakil utiaʼal maʼ u lúubul k-óol wa k-ilik táan u bin utsil tiʼe kʼasaʼanoʼoboʼ. Tumen táan u maas yaʼabtal u beetaʼal baʼaloʼob kʼaastak way Luʼumeʼ, kʼaʼabéet k-maas tsʼáaik k-óol áant uláakʼ máakoʼob. Paabloeʼ tiaʼalaj: «Maʼ u tuʼubulteʼex a beetikeʼex uts yéetel a paklan áantikabaʼex; tumen leloʼobaʼ letiʼ le siibaloʼob uts tu tʼaan Kʼuoʼ». Le maas nojoch «uts» jeʼel u páajtal k-beetkoʼ, letiʼe k-bisik u maʼalob tsikbalil le Reeino tiʼ uláakʼ máakoʼoboʼ. Le meeyjil kʼaʼaytaj k-beetkoʼ upʼéel baʼal jach kʼambeʼen tu táan Dioos (Tiʼ Hebreob 13:15, 16; Tiʼ Galaciailoʼob 6:10).
9. Tsol baʼax u kʼáat yaʼal Dabid yéetel le tʼaan «kajlen teʼ luʼumaʼ».
9 Dabideʼ kiaʼalik xan: «Kajlen teʼ luʼumaʼ yéetel eʼes chúukaʼan óolal tiʼ tuláakal baʼal» (Salmo 37:3b, NM). Tu kʼiiniloʼob Dabideʼ le «luʼumaʼ» letiʼe luʼum u yaʼalmaj Jéeoba u tsʼáaik tiʼ Íisraeloʼ. Le táan kaʼach u góobernar Sáalomonoʼ, le luʼum tuʼux kajaʼan le íisraelitaʼoboʼ ku káajal tu luʼumil Daan tak tu luʼumil Ber-seeba (1 Reyes 4:25). Bejlaʼaʼ xaneʼ, jeʼel tuʼuxak kajaʼanoʼoneʼ, táan k-páaʼtik yéetel kiʼimak óolal u kʼuchul u kʼiinil u suʼutul páaraisoi tuláakal le Luʼumaʼ, upʼéel yóokʼol kaab tuʼux kun antal toj kuxtal. Baʼaleʼ, bey maʼ kʼuchuk u kʼiiniloʼoʼ, Diooseʼ u tsʼaamaj yaʼab baʼaloʼob utiaʼal u kanáantik k-oksaj óolal (Isaías 65:13, 14).
10. ¿Baʼax utsiloʼob ku taasiktoʼon k-beetik tuláakal baʼal yéetel «chúukaʼan óolal»?
10 ¿Baʼax utsiloʼob k-jóoʼsik ikil k-beetik tuláakal baʼal yéetel «chúukaʼan óolal»? Upʼéel jatsʼuts tʼaan ku taal tiʼ Diooseʼ kiaʼaliktoʼon: «Máax ku beetik wa baʼax yéetel chúukaʼan óolaleʼ, yaan u kʼamik yaʼab utsiloʼob» (Proverbios 28:20, NM). Jeʼel tuʼuxak kajaʼanoʼoneʼ, Jéeobaeʼ ku tsʼáaiktoʼon u boʼolil ikil k-kʼaʼaytik yéetel chúukaʼan óolal u maʼalob tsikbalil le Reeino tiʼ tuláakal máakoʼ. Fraank yéetel Roose, u yataneʼ, tsʼoʼok kuáarenta jaʼaboʼob túuxtaʼak u beet u táanilkunsajiloʼob tiʼ upʼéel kaaj tu xamanil Eskoosia; ka kʼuchoʼobeʼ mix máak ku xookiʼ, tak le ku xookoʼob kaʼachoʼ, tu xuloʼob. Lelaʼ maʼ tu beetaj u lúubul yóoloʼobiʼ, letiʼobeʼ káaj u kʼaʼaytajoʼob yéetel u yáantkoʼob le máakoʼob ka u tsaypachtoʼob Kriistooʼ. Bejlaʼa túuneʼ teʼ kaajoʼ yaan upʼéel nojoch múuchʼuliliʼ. Lelaʼ kieʼeskeʼ, tumen chúukpaj u yóoloʼobeʼ, Jéeobaeʼ tu beetaj u bin utsil tiʼob. Fraankeʼ tiaʼalaj: «Le maas nojoch utsil tsʼoʼok k-kʼamkoʼ, letiʼe yaniloʼon tak bejlaʼa ichil u jaajiloʼ yéetel k-meyajtik Jéeoba». Ken k-beet tuláakal baʼal yéetel «chúukaʼan óolaleʼ», k-kʼamik yaʼab utsiloʼob yéetel nojoch baʼal k-ilik le utsiloʼobaʼ.
«Jach kiʼimakchajak a wóol tiʼ Jéeoba»
11, 12. 1) ¿Bix u kiʼimaktal k-óol tiʼ Jéeoba? 2) Ken k-xok le Biibliaoʼ, ¿baʼax unaj k-ilik beetik, yéetel baʼax utsiloʼob ken u taastoʼon?
11 Utiaʼal maʼ u xuʼulul k-bisikba yéetel Jéeoba, bey xan utiaʼal maʼ u jáawal k-páaʼtaj tiʼ letiʼeʼ, kʼaʼabéet maʼ u tuʼubultoʼon le tʼaanaʼ: «Jach kiʼimakchajak a wóol tiʼ Jéeoba» (Salmo 37:4a, NM). ¿Bix jeʼel k-beetkeʼ? Kʼaʼabéet k-ilik kaambal tiʼ Jéeoba, maʼ unaj k-chʼíikil tuukul chéen tiʼ baʼax kiúuchultoʼoniʼ, kex jeʼel bukaʼaj talmileʼ. Lelaʼ yaan u béeytal wa k-xokik mantatsʼ u Tʼaan Dioos (Salmo 1:1, 2). ¿Ku taasik wa toʼon kiʼimak óolal k-xokik le Biibliaoʼ? Wa táan k-xokik utiaʼal k-maas kaambal tiʼ Jéeobaeʼ yaan u taasiktoʼon kiʼimak óolal. Le oʼolaleʼ, ken k-xok upʼéel teekstoeʼ, maʼalob ka jeʼelkoʼon u súutuk utiaʼal ka k-tukult baʼax ku kaʼansiktoʼon tiʼ Jéeoba. Maʼalob xan ka k-natsʼ juʼun yéetel laapis t-iknal, beyoʼ ken jeʼelkoʼon tukult baʼax ku kaʼansiktoʼon le teekstooʼ, jeʼel u páajtal k-tsʼíibtik baʼax tʼaaniloʼob ku kʼaʼajsiktoʼon upʼéel tiʼ u jatsʼuts moodos Diooseʼ. Ichil uláakʼ saalmoeʼ, Dabideʼ tiaʼalaj: «Ka kʼambeʼenchajak tiʼ teech in tʼaanoʼob yéetel in tuukuloʼob, Yuumtsil u kúuchil in taʼakbesikimba, in aj toksajil xan» (Salmo 19:14). Jéeobaeʼ jach ku kiʼimaktal u yóol ka k-xok u Tʼaan, yéetel wa k-beetikeʼ yaan u taasiktoʼon kiʼimak óolal.
12 ¿Bix jeʼel u taasiktoʼon kiʼimak óolal k-xook yéetel k-tuukul tiʼ le baʼax k-xokikoʼ? Unaj k-ilik maas kʼaj óoltik Jéeoba yéetel bix u meyaj. Le liibroʼob El hombre más grande de todos los tiempos yéetel Acerquémonos a Jehová * ku yáantkoʼon k-beet lelaʼ. Dabideʼ ku jaajkúuntik tiʼ máax uts: «[Jéeobaeʼ] yaan u tsʼáaiktech baʼaxoʼob ku tsʼíiboltik a puksiʼikʼal» (Salmo 37:4b, NM). Maʼ xaaneʼ, áapostol Juaneʼ, tumen u yojel lelaʼ, tu tsʼíibtaj: «Yaan toʼon kʼub óolal tiʼ Kʼu [wa Dioos], tumen k-ojel wa k-kʼáatik wa baʼax jeʼel bix uts tu tʼaaneʼ, letiʼeʼ ku yuʼubikoʼon. Jeʼel bix k-ojel Kʼu ku yuʼubik k-payalchiʼobeʼ, bey xan k-ojel tsʼoʼok u yantal toʼon le baʼax tsʼoʼok k-kʼáatik tiʼoʼ» (1 San Juan 5:14, 15).
13. Maʼ úuch tak bejlaʼeʼ, ¿tak tuʼux tsʼoʼok u kʼuchul u kʼaʼaytaʼal u péektsilil le Reeinooʼ?
13 Baʼax maas taasiktoʼon kiʼimak óolal tiʼ k-meyajtik Dioos yéetel chúukaʼan óolaleʼ letiʼe k-ilik táan u kaʼa suʼutul tsiikil tiʼ u noj jalaʼachiloʼ (Proverbios 27:11). ¿Maʼ wa tu taasiktoʼon kiʼimak óolal k-ojéeltik k-sukuʼunoʼobeʼ táan u jach kʼaʼaytajoʼob teʼ tuʼux maʼatech u chaʼabal kaʼach tumen le gobieernoʼoboʼ? Maʼiliʼ kʼuchuk u xuul le yóokʼol kaabaʼ, táan xan k-páaʼtik ilik tuʼuxoʼob maas kun chaʼabil tumen le gobieernoʼoboʼ. Yaʼab j-jaakunajoʼob tiʼ Jéeoba kajaʼanoʼob tu chikʼinil le yóokʼol kaabaʼ jach ku tsʼáaik yóoloʼob kʼaʼaytaj tiʼ le j-xoknáaloʼoboʼ, tiʼ le máaxoʼob puutsʼloʼob tu luʼumoʼoboʼ yéetel tiʼ le máaxoʼob bijaʼanoʼob kajtal táanxel luʼum tuʼux ku chaʼabal u yéeyik máak u réelijioneʼ. Jach k-páaʼtik yéetel u jaajil k-óol ken suunak le máakoʼob tu luʼumoʼoboʼ maʼ u jáawal u beetkoʼob u juul u sáasilil le jaaj teʼ tuʼux bey maʼ tu páajtal u kʼuchul kaʼach u juuloʼ (San Mateo 5:14-16).
«Tsʼáa a kuxtal tu kʼab Yuumtsil»
14. ¿Baʼax eʼesik jach jeʼel u páajtal k-kʼubik óol tiʼ Jéeobaeʼ?
14 ¡Jach ku líiʼsik k-óol ojéeltik jeʼel u páajtal u luʼsaʼal k-chiʼichnakiloʼobeʼ, bey xan le baʼaxoʼob beetik k-muʼyajoʼ! ¿Bix túun? Dabideʼ kiaʼalik bixi: «Tsʼáa a kuxtal tu kʼab Yuumtsil [wa Jéeoba]; kʼub óolnen tiʼ, letiʼ túuneʼ bíin u yáantech» (Salmo 37:5.) Le baʼax tsʼoʼok u yúuchul tiʼ k-sukuʼunoʼoboʼ kieʼeskeʼ Jéeobaeʼ maʼatech u pʼáatal maʼ u yáantik máak (Salmo 55:22). Le sukuʼunoʼob ku meyajoʼob bey j-táanilkunsajoʼoboʼ, le sukuʼunoʼob xíimbaltik le múuchʼuliloʼoboʼ, le míisioneroʼoboʼ wa le ku meyajoʼob Beteloʼ, tsʼoʼok u yilkoʼob jach jeʼel u páajtal kʼubik k-óol tiʼ Jéeobaeʼ. ¿Baʼaxten maʼ ta tsikbal yéeteloʼob utiaʼal ka a wuʼuy bix tsʼoʼok u yáantaloʼob tumen Jéeoba? Letiʼobeʼ jeʼel u yaʼalkoʼobtech baʼaxoʼob uchaʼantiʼob ku yeʼesik kex táan u máansik máak talmileʼ, Jéeobaeʼ mix utéen ku pʼáatal maʼatech u tsʼáaik áantaj. Letiʼeʼ mantatsʼ ku tsʼáaik le baʼax kʼaʼabéet tiʼ máak utiaʼal u kuxtaloʼ (Salmo 37:25; San Mateo 6:25-34).
15. ¿Bix u léembal le maʼalob baʼaloʼob ku beetik u kaajal Dioosoʼ?
15 Wa k-jach kʼubik k-óol tiʼ Jéeobaeʼ, yaan k-ilik jach jaaj baʼax kiaʼalik le salmiistaaʼ: «Bíin u beet u léembal a wutsil bey xan a tojil jeʼel bix u léembal le kʼiin chúumuk kaʼanoʼ» (Salmo 37:6). Kex yaan kʼiin ku yaʼalaʼal baʼaloʼob maʼ jaajtak yoʼolal le j-jaajkunajoʼoboʼ, Diooseʼ ku beetik u yilaʼal tumen le máakoʼob uts u puksiʼikʼaloʼoboʼ, le meeyjil kaʼansaj k-beetkoʼ táan k-beetik yoʼolal k-yaabilaj tiʼ Jéeoba yéetel tiʼ k-éet máakiloʼob. Le maʼalob baʼaloʼob k-beetkoʼ maʼ tu páajtal u taʼakaʼal, kex yaʼab máakoʼob taak u beetkoʼob ka ilaʼak bey maʼ maʼalobtakeʼ. Jéeobaeʼ ku tsʼáaiktoʼon áantaj utiaʼal k-aktáantik kʼuuxiloʼob yéetel chʼaʼapachtajiloʼob. Lelaʼ le beetik u yilaʼal tumen tuláakal máak le maʼalob baʼaloʼob ku beetik u kaajal Dioosoʼ, jeʼex u yilaʼal u léembal le kʼiin tu chúumuk kaʼanoʼ (1 San Pedro 2:12).
«Jetsʼlen [...] [páaʼt] yéetel chúukaʼan óolal»
16, 17. Jeʼex u yeʼesik le Salmo 37:7, ¿baʼax jach kʼaʼabéet k-beetik bejlaʼeʼ, yéetel baʼax oʼolal?
16 Dabideʼ kiaʼalik: «Jetsʼlen tu táan le Yuumtsiloʼ; [páaʼt] yéetel chúukaʼan óolal ka u yáantech. Maʼ a kʼuuxil tu yoʼolal le máax ku bin utsil tiʼ way yóokʼol kaabaʼ, mix tu yoʼolal le máax ku patik tu pool u beetik loolob baʼaloʼob[oʼ]» (Salmo 37:7). Teʼelaʼ, Dabideʼ ku yeʼesik kʼaʼabéet k-páaʼtik yéetel chúukaʼan óolal le baʼax ken u beet Jéeobaoʼ. Maʼ unaj k-kʼuuxil tumen maʼ kʼuchuk u kʼiinil u xuʼulsaʼal le kʼasaʼan yóokʼol kaabaʼ. U jaajileʼ, Jéeobaeʼ, maas jach táaj nojoch u chʼaʼaj óotsilal yéetel u chúukaʼan óolal tiʼ le bukaʼaj k-tuklik yaan tiʼ kaʼachoʼ. Wa k-ilik kʼaʼaytik u Reeino Dioos maʼiliʼ taalak u xuul le yóokʼol kaabaʼ, táan k-eʼesik xan chúukaʼan k-óol (San Marcos 13:10). Beooraaʼ maʼ u tieempoi utiaʼal ka k-jáan beet upʼéel baʼal maʼ k-tukulmaj tu beeliʼ tumen leloʼ jeʼel u luʼsiktoʼon le kiʼimak óolaloʼ yéetel jeʼel u náachkuntkoʼon tiʼ Diooseʼ; kʼaʼabéet k-ilik k-maas muʼukʼaʼankúuntik k-oksaj óolal utiaʼal maʼ k-chaʼik u kʼaskúuntaʼal k-tuukul tumen u yóokʼol kaab Sáatanas. Bejlaʼeʼ, jach kʼaʼabéet k-kanáantik maʼ k-núupkʼebantal, wa maʼeʼ yaan u pʼáatal maʼ k-kʼaʼamal tumen Jéeoba. Le oʼolaleʼ, kʼaʼabéet k-luʼsik t-pool kʼaakʼas tuukuloʼob yéetel kʼaʼabéet k-ilik maʼ k-lúubul tiʼ baʼax kʼaas yéetel utúul koʼolel wa yéetel utúul xiib (Tiʼ Colosailoʼob 3:5).
17 Dabideʼ ku kʼaʼajsiktoʼon: «Pʼat le pʼuʼujuloʼ, xúumpʼat le kʼuuxiloʼ; tumen leloʼ ku talam kʼaskúuntik le baʼaloʼoboʼ. Tu jaajileʼ le loolob máakoʼoboʼ bíin tojolchʼintaʼakoʼob, baʼaleʼ le máaxoʼob ku kʼub óolaloʼob tiʼ Yuumtsileʼ [wa Jéeobaeʼ] bíin u tiaʼalintoʼob le luʼumaʼ» (Salmo 37:8, 9). Beyoʼ, jeʼel u páajtal k-tsʼíiboltik páaʼtik u kʼiinil u xuʼulsaʼal tumen Jéeoba tuláakal le baʼaloʼob kʼaastak ku beetaʼal way Luʼumeʼ bey xan le máaxoʼob beetkoʼ. Le kʼiin jeʼelaʼ jach taʼaytak u kʼuchul.
«Ichil jumpʼíit kʼiin»
18, 19. ¿Bix u líiʼsik k-óol Salmo 37:10?
18 «Ichil jumpʼíit kʼiineʼ yaan u minaʼantal loolob máakoʼob; kex bukaʼaj ka a beet utiaʼal a kaxantikoʼobeʼ maʼ bíin suunakech a nuptáantoʼob.» (Salmo 37:10.) ¡Le tʼaanoʼobaʼ jach ku líiʼsik k-óol tumen táan u náatsʼal u xuul le yóokʼol kaabaʼ, bey xan tiʼ tuláakal le baʼaloʼob ku beetik le máakoʼob u náachkuntmubaʼob tiʼ Jéeobaoʼ! Tuláakal gobieerno tsʼaʼan tumen máakeʼ jach mix upʼéel jóokʼok maʼalobiliʼ. Bejlaʼeʼ táan u náatsʼal u kʼiinil u kaʼa tsʼáaik u gobieerno Jéeoba way Luʼumeʼ: u Reeino tu kʼab Jéesukriisto; le Reeinoaʼ yaan u góobernartik tuláakal le Luʼumaʼ yéetel yaan u xuʼulsik tuláakal u gobieerno máakoʼob (Daniel 2:44).
19 Jeʼel bukaʼaj ka k-kaxteʼ, maʼ ken k-il mix utúul «loolob máak» teʼ túumben yóokʼol kaab yáanal u Reeino Dioosoʼ. Teʼ kʼiinoʼob jeʼeloʼ, le máax ken u tsʼáauba tu koontra Jéeobaeʼ tu séebaʼanil kun xuʼulsbil tiʼ. Teʼeloʼ, tuláakal máax kun xuʼulul u yuʼubik u tʼaan Diooseʼ, maʼ kun chaʼabil u pʼáatliʼ. Tumen tuláakal máak kun taaktal u kiʼimakkúuntik yóol Jéeobaeʼ, maʼ ken k-sajaktal u beetaʼaltoʼon kʼaas: maʼ kun kʼaʼabéetchajal káandadoʼob, mix traankaʼob, mix baʼal xan kun beetik u xuʼulul k-kʼubik óol tiʼ Dioos yéetel mix baʼal xan kun kʼaskúuntik le jach nojoch kiʼimak óolal kun antaltoʼonoʼ (Isaías 65:20; Miqueas 4:4; 2 San Pedro 3:13).
20, 21. 1) ¿Máax le «j-kabal óoloʼob» kiaʼalik Salmo 37:11, yéetel tuʼux ku kaxtkoʼob «nojoch jeetsʼel óolal»? 2) Wa k-beetik jeʼex Jéesukriistoeʼ ¿baʼax utsiloʼob ken k-kʼame?
20 Teʼ kʼiin jeʼeloʼ, «le j-kabal óoloʼoboʼ bíin u tiaʼalintoʼob le luʼumaʼ» (Salmo 37:11a). Le «j-kabal óoloʼoboʼ» letiʼe máaxoʼob ku chúukpajal u yóol u páaʼtoʼob ka luʼsaʼak tumen Jéeoba tuláakal le kʼaas tsʼoʼok u beetaʼaltiʼoboʼ. «Bíin kuxlakoʼob ichil nojoch jeetsʼel óolal.» (Salmo 37:11b.) Bejlaʼaʼ xaneʼ jach yaan jeetsʼelil ichil u kaajal Dioos, le jeetsʼelilaʼ ku keʼetel yéetel upʼéel páaraiso.
21 Kex láayliʼ ku yúuchultoʼon baʼaloʼob ku beetik k-muʼyajeʼ, k-paklan áantikba yéetel k-líiʼsik u yóol le jach lubaʼan u yóoloʼoboʼ; lelaʼ ku yáantaj utiaʼal ka yanak le kiʼimak óolal suuk u yilaʼal ichil u kaajal Dioosoʼ. Le nuxiboʼoboʼ ku yáantkoʼonoʼob yéetel yaabilaj utiaʼal maʼ k-náachtal tiʼ Jéeoba —yaan tak kʼiineʼ ku yáantkoʼonoʼob tiʼ baʼax kʼaʼabéettoʼon, jeʼex le yaan yil yéetel janal wa nookʼoʼ—, lelaʼ ku yáantkoʼon k-muʼyajt baʼaxoʼob kiúuchultoʼon ikil táan k-bisik upʼéel toj kuxtal (1 tiʼ Tesalonicailoʼob 2:7, 11; 1 San Pedro 5:2, 3). ¡Jach túun jatsʼuts le jeetsʼelil yantoʼonoʼ! Yéetel táan k-páaʼtik xan le kuxtal minaʼan u xuul kun ilbil teʼ páaraiso jach naatsʼ yaniloʼ. Le oʼolaleʼ, koʼoneʼex beetik jeʼex Jéesukriisto, le Dabid maas nojochoʼ; u kʼub óolal tiʼ Jéeobaeʼ le áant ka u chúukaʼan meyajt Dioos taak tu xuul u kuxtal (1 San Pedro 2:21). Wa k-beetik beyoʼ, yaan u kiʼimaktal k-óol mantatsʼ yéetel yaan k-kiʼikiʼtʼantik le máax tiʼ jach ku kiʼimaktal k-óoloʼ: Jéeoba k-Dioos.
[Tsolajiloʼob]
^ xóot’ol 12 Beetaʼanoʼob tumen u j-jaajkunajoʼob Jéeoba.
[U kʼáatchiʼiloʼob le xookoʼ]
[U tsolajil le oochel teʼ táan juʼun 26]
¿Baʼax jeʼel a núukikeʼ?
• ¿Baʼaxoʼob tsʼoʼok k-kanik teʼ Salmo 37:1, 2?
• ¿Bix jeʼel u jach kiʼimaktal k-óol tiʼ Jéeobaeʼ?
• ¿Baʼax eʼesik jeʼel u páajtal k-kʼubik óol tiʼ Jéeobaeʼ?