¿Máasaʼ yaan horaeʼ le ken kíimik u láakʼtsil wa máaxeʼ ku pʼáatal maʼ t-kaxtik bix jeʼel k-áantikeʼ? Yaan horaeʼ maʼ t-kaxtik baʼax ken k-aʼale wa baʼax ken k-beete. Chéen baʼaleʼ yaan baʼaxoʼob jeʼel u páajtal k-beetkeʼ.

Yaan horaeʼ chéen kʼaʼabéet k-bin k-láakʼint le máax kíim u láakʼtsiloʼ yéetel k-aʼaliktiʼ yaachajaʼan k-óol xan yoʼolal le baʼax úuchoʼ. Yaan kʼiineʼ tak chéen ka a saludart wa ka a méekʼ le máax yaachajaʼan u yóoloʼ jeʼel a weʼesik táan a tuukul tu yoʼolaleʼ. Wa taak u tsikbaleʼ maʼalob ka a chʼenxikinte. U maas kʼaʼanaʼanileʼ k-áantik le familiaoʼ, maʼ xaaneʼ tiʼ u beetaʼal janal, u kanáantaʼal le mejen paalaloʼoboʼ, wa tiʼ uláakʼ baʼaxoʼob kʼaʼabéet u beetaʼal táanil tiʼ u muʼukul le kimenoʼ. Wa k-beetik beyaʼ jach nojoch bix jeʼel k-áantaj kex maʼ k-aʼalik mix baʼaleʼ.

Maʼ xaaneʼ ken máanak kʼiineʼ jeʼel u taaktal a tʼaan tiʼ a láakʼtsil kíimoʼ, a tsikbaltik bix u modos kaʼachi wa junpʼéel jatsʼuts baʼax úuchtiʼ. Wa ka beetik beyaʼ maʼ xaaneʼ jeʼel tak u kiʼimaktal a wóoleʼ. Koʼox ilik baʼax úuch tiʼ Pam, tsʼoʼok seis años kíimik Ian, u yíicham. Ku yaʼalik: «Tsikbaltaʼabten  baʼaxoʼob maʼalobtak tu beetaj in wíicham. Yaan tiʼ le baʼaloʼobaʼ hasta mix in wojel kaʼachiʼ. Lelaʼ ku kiʼimakkúuntik in wóol».

Yaan especialistaʼob aʼalikeʼ chéen le táant u kíimil u láakʼtsil máak jach ku yilaʼal u yáantaʼaloʼ, pero ken máanak kʼiineʼ tumen ku kaʼa suut u amigoʼob u atendertoʼob uláakʼ baʼaloʼobeʼ ku xuʼulul u yáantaʼal. Le oʼolaleʼ maʼ u tuʼubultoʼon k-bin xíimbalt le máax kíim u láakʼtsiloʼ. * Yaʼab máax kimen wa máax tiʼeʼ ken u tsikbalt bix u yuʼubikubaeʼ ku líikʼil u yóol, maases wa tsʼoʼok u xáantal bey u yuʼubikubaoʼ.

Koʼox ilik baʼax úuch tiʼ Kaori, juntúul x-chʼúupal japonil kíim u maama, yéetel 15 meses úuchuk lelaʼ kíim xan u kiik. Letiʼeʼ maʼ pʼaʼat tumen amigoʼobiʼ. Ritsuko, juntúul u amiga maas yaan u jaʼabileʼ, tu yaʼalaj tiʼ Kaorieʼ jeʼel u kanáantik bey u hijaeʼ. Kaorieʼ ku yaʼalik: «U jaajileʼ maʼ utschaj tiʼ tʼaan le baʼax tu yaʼaloʼ. Minaʼan uláakʼ jeʼex in maamaeʼ, mix máak jeʼel u jeelintikeʼ. Baʼaleʼ yoʼolal bix tu tratartilen Ritsukoeʼ kʼuchen in wil bey in maamaeʼ. Cada semanaeʼ k-múul jóokʼol kʼaʼaytaj yéetel k-bin muchʼtáambal. Ku invitarken in wukʼ junpʼíit té, ku taasik in woʼoch yéetel ku tsʼíibtikten cartaʼob bey xan mejen tarjetas. Jach jatsʼuts u modos yéetel tu líiʼsaj in wóol, le oʼolal kʼuchen in wil bey in maamaeʼ».

Tsʼoʼok doce años kíimik u maama Kaori. Bejlaʼeʼ letiʼ yéetel u yíichameʼ u tsʼaamaj u yóol u meyajtoʼob Dios. Kaorieʼ ku yaʼalik: «Ritsukoeʼ tak bejlaʼa ku tuukul tin woʼolaleʼ. Cada ken suunaken xíimbal tin kaajaleʼ, kin bin in xíimbalte tumen uts tin tʼaan in máansik tiempo tu yéetel».

Uláakʼ máax jach áantaʼabeʼ Poli, juntúul koʼolel u j-jaajkunaj Jéeoba kajaʼan Chipre. Sozos, u yíichameʼ jach jatsʼuts u modos yéetel maʼalob u kanáantik kaʼach le múuchʼuliloʼ. Suuk kaʼach u invitartik janal tu yotoch le paalaloʼob kimen u taataʼoboʼ bey xan le viudaʼoboʼ (Santiago 1:27). Chéen baʼaleʼ kíim le yaan 53 años tiʼ yoʼolal junpʼéel tumor tu cerebrooʼ. Polieʼ ku yaʼalik: «In wíichameʼ jach u yaabiltmen kaʼachi, treintitrés años kuxlaj tin wéetel tak ka kíimi».

Ka tsʼoʼok u kíimil u yíicham Polieʼ bin kajtal Canadá yéetel Daniel, juntúul u hijo de 15 años. Teʼeloʼ káaj u muchʼkubaʼob yéetel u j-jaajkunajoʼob Jéeoba. Polieʼ ku yaʼalik: «Le túumben amigoʼob anchajtoʼon teʼ múuchʼuliloʼ maʼ u yojloʼob baʼax táan k-aktáantikiʼ. Kex beyoʼ tu líiʼsoʼob k-óol yéetel tu yáantoʼonoʼob. Lelaʼ jach tu yáantaj in hijo teʼ súutuk maas kʼaʼabéet u papaoʼ. Le máaxoʼob nuʼuktik le múuchʼuliloʼ jach tu yáantoʼob Daniel. Juntúul tiʼ letiʼobeʼ suuk u invitartik utiaʼal ka xiʼikoʼob báaxal bola». Bejlaʼeʼ Poli yéetel u hijoeʼ maʼalob yaniloʼob.

Jeʼex túun k-ilkoʼ yaʼab bix jeʼel k-áantik yéetel k-líiʼsik u yóol le máaxoʼob ku kíimil wa máax tiʼoboʼ. Le Bibliaoʼ ku líiʼsik xan k-óol yéetel junpʼéel jatsʼuts esperanza.