Rosieʼ ku yaʼalik: «Bul kʼiin tin tuukul tiʼ in problemaʼob, yaan kʼiineʼ hasta kin tuklik baʼaloʼob maas kʼaastak jeʼel u yúuchleʼ». ¿Bix áantaʼabik tumen le Bibliaoʼ? Junpʼéel teksto áanteʼ Mateo 6:34: «Junpuliʼ maʼ a sen chiʼichnaktaleʼex yoʼolal u kʼiinil sáamal, tumen sáamaleʼ yaan xan u yantal baʼaloʼob jeʼel u beetik a chiʼichnaktaleʼexeʼ. Cada kʼiineʼ yaan yéetel le chiʼichnakiloʼob ku taaskoʼ». Rosieʼ ku yaʼalikeʼ le baʼax tu yaʼalaj Jesusaʼ le áant utiaʼal maʼ u sen chiʼichnaktal. Letiʼeʼ ku yaʼalik xan: «Jach yaʼab problemaʼob yaanten kaʼachi, tsʼoʼoleʼ kin sen tuukul tiʼ uláakʼ problemaʼob maʼ yanakteniʼ yéetel maʼ xaaneʼ mix bikʼin kun antaloʼob».

Yasmineʼ tu yuʼubaj xan maʼ tu xuʼulul u sen tuukul tiʼ baʼaxoʼob ku yúuchultiʼ. Letiʼeʼ ku yaʼalik: «Bul semana kin wokʼol yéetel yaan horaeʼ hasta maʼatech in wenel, le baʼaxoʼob maʼ maʼalobtak kin tuklikoʼ ku pʼatik minaʼan in wóol». ¿Bix áantaʼabik tumen le Bibliaoʼ? Letiʼeʼ áantaʼab tumen 1 Pedro 5:7, tuʼux ku yaʼalik: «Pʼateʼex tu kʼab [Dios] tuláakal le kuuch chiʼichnakkúuntikeʼexoʼ, tumen letiʼeʼ jach u tsʼaamaj u yóol u yáanteʼex». Yasmineʼ ku yaʼalik: «Maʼ xuʼul in orar tiʼ Jéeobaiʼ, ka máan kʼiineʼ tin wilaj bix u núukik in oración. Tin wuʼuyaj bey lukʼ junpʼéel nuxiʼ  kuuch tin wóokʼoleʼ. Yaan kʼiineʼ láayliʼ kin tuukul tiʼ baʼaloʼob maʼ maʼalobtakeʼ, baʼaleʼ tsʼoʼok in kanik bix unaj in aktáantkoʼob».

Juntúul x-chʼúupal ku kʼaabaʼtik Isabellaeʼ, ku yaʼalik: «In taataeʼ suuk u pʼatik tu tsʼook hora baʼax ku beetik, le oʼolal teen xaneʼ bey in beetkoʼ. Míin junpʼéel baʼax ku páakʼal tiʼ máak. Yaan horaeʼ maʼ tin jáan beetik le baʼaxoʼob kʼaʼabéetoʼ tumen maʼakʼolen, taak in jeʼelel wa taak in chaʼantik televisión. Jach maʼ maʼalob u suuktal tiʼ máak lelaʼ tumen ku beetik a maas chiʼichnaktal yéetel tu tsʼookeʼ mix tu jóokʼol maʼalobil baʼax ka beetik». Letiʼeʼ jach áantaʼab tumen le tekstoaʼ 2 Timoteo 2:15: «Beet tuláakal le ku páajtal utiaʼal ka u kʼamech Dios, jeʼel bix juntúul máak meeyjil minaʼan baʼax oʼolal u chʼaʼik suʼtaleʼ». Isabellaeʼ ku yaʼalik: «Teneʼ maʼ in kʼáat ka suʼlakchajak Jéeoba ikil in beetik tu tsʼook hora le meyaj u tsʼaamajtenoʼ».

Kelly xaneʼ ku yaʼalik: «Wa yaan junpʼéel meyaj kʼaʼabéet in kʼubikeʼ suuk in pʼatik tu tsʼook hora. Yoʼolal lelaʼ kin wokʼol, maʼatech in jach wenel yéetel yaʼab in chiʼichnaktal. Jach kʼaas u binten kaʼachi». Letiʼeʼ áantaʼab tumen baʼax ku yaʼalik Proverbios 13:16: «Le máax yaan u tuukuleʼ ku beetik baʼax tu beel, baʼaleʼ le maʼ naʼatoʼ ku babal tsikbaltik u neetsil». Letiʼeʼ ku yaʼalik baʼax tu kanaj tiʼ le tekstoaʼ: «Jach maʼalob ka yáax kulak máak u tukult baʼax ken u beete. Bejlaʼeʼ tin escritorioeʼ yaan junpʼéel libreta tuʼux kin tsʼíibtik baʼaxoʼob ken in beete, lelaʼ ku yáantken utiaʼal maʼ in pʼatik tu tsʼook hora tuláakal baʼal».

Cristinaeʼ ku yaʼalik: «In wíichameʼ tu pʼaten yéetel kantúul in mejen paalal». ¿Bix áantaʼabik tumen le Bibliaoʼ? Proverbios 17:17, ku yaʼalik: «Juntúul [amigo] uts u bisikuba mantatsʼeʼ, tu kʼiiniloʼob yaj óoleʼ bey juntúul a sukuʼuneʼ». Letiʼeʼ tu kaxtaj u yáantaj uláakʼ máaxoʼob meyajtik Dios. ¿Bix úuchik u yáantaʼal? Letiʼeʼ ku yaʼalik: «In amigoʼobeʼ jach tu yáantenoʼob, yanoʼobeʼ tu taasoʼobten flores yéetel janal. Tiʼ le óoxtéen anchaj k-bin kajtal táanxel tuʼuxoʼ, yanchaj yaʼab k-amigoʼob jach tu yáantoʼonoʼob. Tsʼoʼoleʼ yaan xan máax áanten in kaxt meyaj. In amigoʼobeʼ mix juntéen tu pʼatenoʼob tin juunal».

Diana, le máax tsʼoʼok k-yáax tʼaan tiʼeʼ, tu yuʼububa xan tu juunal. Letiʼeʼ ku yaʼalik bix tu yuʼubiluba le ka tsʼoʼok u sen úuchul baʼaloʼob tiʼoʼ: ‹Tin wuʼuyaj bey náach yanilen tiʼ u maasileʼ yéetel táan in wilik baʼax ku beetkoʼob, baʼaleʼ teneʼ chéen tin juunal in wuʼuyikinba›. Junpʼéel teksto áanteʼ Salmo 68:6: «[Dioseʼ] ku tsʼáaik tiʼ le máaxoʼob chéen tu juunoʼoboʼ, kúuchil tuʼux u kajtaloʼob». Letiʼeʼ ku yaʼalik: «In wojel Dioseʼ maʼ chéen ku tsʼáaik junpʼéel tuʼux u kajtal máakiʼ, baʼaxeʼ ku beetik k-antal ichil máaxoʼob u yaabiltmoʼob, tuʼux k-uʼuyik kanáantaʼanoʼon yéetel yaabiltaʼanoʼon. Chéen baʼaleʼ utiaʼal in biskinba yéetel u maasileʼ yáax táanil unaj in natsʼkinba tiʼ Dios. Le Salmo 37:4, jach tu yáanten in beet lelaʼ, teʼeloʼ ku yaʼalik: ‹Yaabilt Yuumtsil yéetel muumun óolal, letiʼ túuneʼ bíin u tsʼáatech u tsʼíibolal a puksiʼikʼal›».

Dianaeʼ ku yaʼalik: «Tin tsʼáaj cuenta jach unaj in natsʼkinba tiʼ Jéeoba. Mix máak maas jeʼel u kanáantken jeʼex letiʼeʼ. Tin beetaj junpʼéel lista tiʼ le baʼaxoʼob jeʼel in beetik utiaʼal u yantalten uláakʼ amigoʼob ku meyajtikoʼob Jéeobaoʼ. Tin kanaj in wil baʼax maʼalob ku beetik u maasil yéetel maʼ in beetik u cuentail le baʼaxoʼob maʼ maʼalob ku beetkoʼoboʼ».

U jaajileʼ le máaxoʼob meyajtik Jéeobaoʼ láayliʼ kʼeban máakoʼob jeʼex u maasileʼ, ku yantal xan problemaʼob tiʼob. Baʼaleʼ le máaxoʼob ku tsʼáaikoʼob ichil u kuxtaloʼob baʼax ku yaʼalik le Bibliaoʼ ku yilik u yáantkoʼob u maasil cada ken béeyak. U yantaltech amigoʼob beyaʼ jach jeʼel u yáantkecheʼ. Kux túun wa yaantoʼon junpʼéel nojoch kʼojaʼanil wa tsʼoʼok u kíimil juntúul máax k-yaabiltmaj, ¿láayliʼ wa jeʼel u yáantkoʼon le Bibliaoʼ?