U kʼaabaʼ. Letiʼeʼ ku yaʼalik: «Teneʼ Jéeobaen, letiʼe in kʼaabaʼoʼ» (Isaías 42:8). Teʼ Bibliaoʼ kex siete mil u téenel ku chíikpajal u kʼaabaʼiʼ. Chéen baʼaleʼ tiʼ yaʼab bibliaʼobeʼ tsʼoʼok u luʼsaʼal u kʼaabaʼiʼ yéetel tu lugareʼ chéen ku tsʼaʼabal «Yuumtsiliʼ». Dioseʼ u kʼáat ka k-bisba tu yéetel, le oʼolal u kʼáat ka k-tʼan tu kʼaabaʼ (Salmo 105:1).

Uláakʼ bix kʼaj óolaʼanil. Ichil le Bibliaoʼ tiʼ Jéeobaeʼ ku yaʼalaʼaltiʼ Dios, le Dios yaan tuláakal páajtalil tiʼoʼ, Taata, le Máax beetmil tuláakal baʼaloʼoboʼ, Yuumtsil wa kiʼichkelem Yuum. Teʼ Biblia xanoʼ yaan jejeláas oracionoʼob tuʼux ku chʼaʼchiʼitaʼal u kʼaabaʼ bey xan junpʼéel tiʼ le bix kʼaj óolaʼaniloʼ (Daniel 9:4).

 Bix letiʼ. Dioseʼ juntúul espíritu (Juan 4:24). Le Bibliaoʼ ku yaʼalikeʼ «mix juntéen ilaʼak tumen mix máak» (Juan 1:18). Tsʼoʼoleʼ ku yaʼalik xaneʼ ku kiʼimaktal u yóol wa k-beetik baʼax maʼalob yéetel ku yaatal u yóol wa k-beetik baʼax kʼaas (Salmo 78:40, 41; Proverbios 11:20).

U jatsʼuts modos. Dioseʼ mix máak jelaʼan u paktik, kex jeʼel tuʼuxak u taaleʼ (Hechos 10:34, 35). Letiʼeʼ «ku chʼaʼik óotsilil yéetel jach uts, maʼatech u séeb pʼuʼujul yéetel nojoch u yaabilaj, tsʼoʼoleʼ mantatsʼ ku beetik baʼax ku yaʼalik» (Éxodo 34:6, 7). Chéen baʼaleʼ tiʼ tuláakal u jatsʼuts modoseʼ yaan kanpʼéel maas chíikaʼan u yilaʼaloʼobiʼ.

Poder. Jéeobaeʼ letiʼe «Dios jach táaj yaan u poderoʼ». Lelaʼ ku yeʼesikeʼ jeʼel u béeykuntik tuláakal le baʼaxoʼob u yaʼalmoʼ (Génesis 17:1).

Naʼatil. Mix máak yaan u naʼat jeʼex Dioseʼ. Le oʼolal le Bibliaoʼ ku yaʼalikeʼ Dioseʼ chéen letiʼe «máax jach tu jaajil yaan u naʼatoʼ» (Romanos 16:27).

Justicia. Dioseʼ mantatsʼ ku beetik baʼax toj. «Perfecto baʼax ku beetik» yéetel «mix juntéen ken u beet baʼax kʼaas» (Deuteronomio 32:4).

Yaabilaj. Le Bibliaoʼ ku yaʼalikeʼ «Dioseʼ yaabilaj» (1 Juan 4:8). K-ilik túuneʼ letiʼeʼ maʼ chéen yaan u yaabilajiʼ. Tuláakal baʼax ku beetkeʼ ku beetik yoʼolal u yaabilaj, lelaʼ jach ku taasiktoʼon yaʼab utsiloʼob.

Ku biskuba yéetel máak. Dioseʼ k-Taata yaan teʼ kaʼanoʼ (Mateo 6:9). Wa yaan k-fe tiʼeʼ jeʼel k-bisikba maʼalob tu yéeteleʼ (Salmo 25:14). Dioseʼ u kʼáat ka orarnakoʼon tiʼ utiaʼal k-natsʼikba tu yiknal. Tsʼoʼoleʼ u kʼáat ka k-tsikbalttiʼ tuláakal baʼax chiʼichnakkúuntikoʼon tumen letiʼeʼ jach taak u yáantkoʼon (Santiago 4:8; 1 Pedro 5:7).

Jesuseʼ maʼ Diosiʼ. Minaʼan uláakʼ máax jeʼex Jesuseʼ, tumen chéen letiʼ beetaʼab tumen Dios sin ke u yáantaʼal tumen mix máak. Le oʼolal teʼ Bibliaoʼ ku yaʼalaʼaltiʼ «u Paal Dios» (Juan 20:31). Jéeobaeʼ tu beetaj Jesús, u yáax paal, tsʼoʼoleʼ tu kʼubéentajtiʼ ka u beet tuláakal le baʼaxoʼob yanoʼob teʼ kaʼanoʼ bey xan way Luʼumeʼ (Proverbios 8:30, 31; Colosenses 1:15, 16).

 Jesuseʼ mix juntéen tu yaʼalaj wa letiʼeʼ Dios. Tu yaʼalaj: «Teen le máax ku tʼaan tu yoʼolaloʼ, tsʼoʼoleʼ letiʼ túuxtmilen» (Juan 7:29). Le táan u tsikbal yéetel María, juntúul máax tsaypachtikoʼ, Jesuseʼ tu yaʼalaj yoʼolal Jéeoba: «Táan in bin tu yiknal in Taata, máax a Taataʼex xan, in Dios yéetel a Dioseʼex xan» (Juan 20:17). Ka kíim Jesuseʼ, Jéeobaeʼ tu kaʼa kuxkíintaj utiaʼal ka suunak teʼ kaʼanoʼ, kulaj tu x-noʼoj kʼab Dios yéetel tsʼaʼab páajtalil tiʼ (Mateo 28:18; Hechos 2:32, 33).

Jesuseʼ jeʼel u yáantkech a natsʼaba tiʼ Dioseʼ

Taal way Luʼum utiaʼal u kaʼansik bix u modos u Taata. Jéeobaeʼ tu yaʼalaj yoʼolal Jesús: «Lelaʼ in Hijo, jach in yaabiltmaj; uʼuyeʼex u tʼaan» (Marcos 9:7). Jesuseʼ jach u kʼaj óol tubeel u Taata. Letiʼeʼ tu yaʼalaj: «Chéen le Paal kʼaj óoltmil máax le Taataoʼ. Le máakoʼoboʼ chéen jeʼel u kʼaj óoltikoʼob le Taata wa ku kaʼansaʼaloʼob tumen le Paaloʼ» (Lucas 10:22).

Jach maʼalob u yeʼesik bix u modos u Taata. Jesuseʼ mantatsʼ tu yeʼesaj bix u modos u Taata, le oʼolal tu yaʼalaj: «Le máax tsʼoʼok u yilkeneʼ tsʼoʼok xan u yilik le Taataoʼ» (Juan 14:9). Le baʼaxoʼob tu yaʼalaj yéetel tu beetoʼ tu yeʼesaj Dioseʼ u yaabiltmaj le máakoʼoboʼ, lelaʼ tu beetaj u natsʼkubaʼob tu yiknal. Jesuseʼ tu yaʼalaj: «Teen le bejoʼ, teen le jaajoʼ yéetel teen le kuxtaloʼ. Mix máak ku náatsʼal tu yiknal le Taata wa maʼ tin woʼolaloʼ» (Juan 14:6). Tsʼoʼoleʼ tu yaʼalaj xan: «Le máaxoʼob jach tu jaajil táan u adorarkoʼob le Taataoʼ yaan u adorarkoʼob yéetel le jaajil ku taal tiʼ letiʼoʼ bey xan yáanal u nuʼuktaj u espíritu santo. U jaajileʼ le Taataoʼ táan u kaxtik le máakoʼob beyaʼ utiaʼal ka adorartaʼak» (Juan 4:23). ¿Máasaʼ jatsʼuts baʼax ku beetik Dios? Letiʼeʼ táan u kaxtik máakoʼob taak u kankoʼob u jaajil jeʼex techoʼ.