ASTROLOGÍA. Yaʼab máakeʼ ku creerkeʼ según bix yanik le estrellaʼob le kʼiin ka síijoʼoboʼ bey xan kun bintiʼoboʼ, le oʼolal ku xokikoʼob le horóscopoʼob utiaʼal u yojéeltikoʼob bix kun bintiʼob, baʼax unaj u beetkoʼob utiaʼal u bin utsil tiʼob wa utiaʼal maʼ u yantaltiʼob problemas.

J-MEENIL. Yaʼab máakeʼ suuk u bin yiknal j-meen tumen taak u yojéeltik bix kun bintiʼ wa baʼax unaj u beetik utiaʼal maʼ u beetaʼaltiʼob kʼaas. U yojéeltikoʼob baʼax ku taal u kʼiineʼ le áantkoʼob u yiloʼob baʼax unaj u beetkoʼob utiaʼal u bin utsil tiʼob.

U KʼIINBESAʼAL LE KIMENOʼOBOʼ. Yaan máakeʼ ku yaʼalikeʼ kʼaʼabéet u kʼiinbesaʼal le kimenoʼoboʼ bey xan u adorartaʼal jejeláas diosoʼob utiaʼal ka u kanáantoʼob máak. Van, * juntúul koʼolel kajaʼan Vietnameʼ, ku yaʼalik: «Kaʼansaʼabteneʼ wa kin kʼiinbesik le kimenoʼoboʼ yaan u bintoʼon utsil teʼ kʼiinoʼobaʼ bey xan maas táanil».

REENCARNACIÓN. Yaan máaxeʼ ku creerkeʼ kex jeʼel jaytéen ka kíimik máakeʼ yaan u kaʼa síijil wa u kaʼa kuxtal tiʼ yaanal wíinklil. Le bix kun bintiʼob kéen kaʼa síijkoʼoboʼ ku depender tiʼ le baʼaxoʼob tu beetoʼoboʼ.

Yaʼab máakeʼ kex u yojel chéen supersticióneʼ ku xokik u horóscopo yéetel ku bin utiaʼal ka jóoʼsaʼak u suerte tumen taak u yojéeltik bix jeʼel u bin utsil tiʼeʼ.

Le baʼax ku beetik le máakoʼobaʼ, ¿jach wa tu jaajil ku yáantaj utiaʼal u bintiʼob utsil?

Koʼox ilik baʼax úuch tiʼ Hào, kajaʼan Vietnam. Letiʼeʼ tu kaxtaj u yáantaj le astrologíaoʼ, le j-meenoʼoboʼ yéetel ku kʼiinbesik le kimenoʼoboʼ. ¿Bix túun biniktiʼ? Letiʼeʼ ku yaʼalik: «Bin quiebrail in negocio, yaʼabchaj in pʼaax, anchajten problemas yéetel in watan, tu tsʼookeʼ pʼáat hasta maʼ taak u seguer in kuxtaliʼ».

Qiuming, kajaʼan Taiwáneʼ ku creertik kaʼach le astrologíaoʼ, le reencarnaciónoʼ, le destinooʼ, le j-meenoʼoboʼ yéetel tu kʼiinbesaj le kimenoʼoboʼ. Ka máan kʼiineʼ tu yaʼalaj: «Tin tsʼáaj cuenta maʼ jaaj le baʼax kin creerkoʼ. Tin wileʼ le horóscopooʼ yaʼab u kʼeʼekʼexik baʼax ku yaʼalik yéetel ku fallar baʼax ku yaʼalik. Le máaxoʼob ku yaʼalikoʼob xan ku reencarnaroʼoboʼ wa maʼ kʼajaʼantiʼob baʼax u beetmoʼobeʼ, ¿bix jeʼel u yojéeltikoʼob baʼax unaj u beetkoʼob utiaʼal u bintiʼob utsileʼ?».

Hào, Qiuming yéetel uláakʼ máakoʼobeʼ tsʼoʼok u tsʼáaikoʼob cuentaeʼ le destinooʼ, le astrologíaoʼ, u kʼiinbesaʼal le kimenoʼob yéetel le reencarnaciónoʼ maʼ tu yáantaj utiaʼal ka xiʼik utsil tiʼ máak. ¿U kʼáat wa túun u yaʼaleʼ jach mix baʼal jeʼel u páajtal k-beetik utiaʼal u bintoʼon utsileʼ?

Yaʼab máakoʼobeʼ ku tuklikoʼobeʼ utiaʼal u bintiʼob utsileʼ kʼaʼabéet u kaʼantal u xookoʼob wa u ayikʼaltaloʼob. Pero ¿bix ta tʼaan u yuʼubikuba le máaxoʼob beetik beyoʼ?