1, 2. Ka suunaj Jesús teʼ kaʼanoʼ, ¿baʼax wal tu tuklaj u apostoloʼobeʼ?

U APOSTOLOʼOB Jesuseʼ tiaʼanoʼob tu Puʼukil le Olivooʼ, táan u paktikoʼob kaʼan. Táant u yilkoʼob bix piʼixik u amigoʼob tumen le múuyaloʼoboʼ (Bax. 1:9, 10). Kex dos años kaʼansaʼaboʼob, líiʼsaʼab u yóoloʼob yéetel nuʼuktaʼaboʼob tumen Jesús. Chéen baʼaleʼ beora tsʼoʼok u suut kaʼan Jesusaʼ, ¿baʼax ken u beetoʼob?

² Táanil tiʼ u bin Jesús kaʼaneʼ tu yaʼalajtiʼob: «Yaan a beetkabaʼex j-jaajkunajil tiʼ teen tu kaajil Jerusalén, tiʼ tuláakal u luʼumil Judea, Samaria bey xan tak tu maas náachil le Luʼumaʼ» (Bax. 1:8). ¿Bix ken u beetiloʼob le meyaj kʼubéentaʼabtiʼobaʼ? Jesuseʼ u yaʼalmiliʼ u kiliʼich muukʼ Dios kun áantkoʼobeʼ (Bax. 1:5). Chéen baʼaleʼ, ¿máax kun nuʼuktikoʼob utiaʼal u kʼaʼaytajoʼob tuláakal yóokʼol kaab? Le apostoloʼoboʼ u yojloʼob kaʼacheʼ Jéeobaeʼ meyajnaj wíinikoʼob tiʼ utiaʼal u nuʼuktik le israelitaʼoboʼ. Maʼ xaaneʼ ku tuklikoʼob wa yaan u yéeyik Jéeoba uláakʼ máax nuʼuktikoʼob.

3. 1) Maʼ sen úuch xiʼik Jesús teʼ kaʼanoʼ, ¿baʼax anchaj u beetik le apostoloʼob chúukpaj u yóoloʼoboʼ? 2) ¿Baʼax kʼáatchiʼiloʼob kun núukbil teʼ xookaʼ?

 ³ Maʼ sen úuch xiʼik Jesús teʼ kaʼanoʼ, le disipuloʼoboʼ tu xakʼaltoʼob le Kiliʼich Tsʼíiboʼ yéetel orarnajoʼob tiʼ Dios, ka tsʼoʼokeʼ tu yéeyoʼob Matías tu lugar Judas Iscariote utiaʼal u chukikoʼob doce u túulaloʼob (Bax. 1:15-26). ¿Baʼaxten jach kʼaʼabéet utiaʼaloʼob bey xan utiaʼal Jéeoba le baʼax tu beetoʼobaʼ? Le apostoloʼoboʼ tu tsʼáajoʼob cuenta kʼaʼabéet doce u túulaloʼob. * Jesuseʼ tu yéeyaj le apostoloʼoboʼ yéetel tu kaʼansoʼob utiaʼal u beetkoʼob junpʼéel meyaj jach kʼaʼanaʼan ichil u kaajal Dios. ¿Baʼax meyajil ken u beetoʼob? ¿Bix kaʼansaʼabikoʼob tumen Jéeoba yéetel Jesús utiaʼal u beetkoʼob? ¿Máax beetik bejlaʼa le meyaj tu beetoʼoboʼ? ¿Bix jeʼel ‹k-kʼaʼajsik le máaxoʼob nuʼuktik k-beel›, maases «le palitsil chúukaʼan u yóol yéetel yaan u naʼat[oʼ]»? (Heb. 13:7; Mat. 24:45.)

4. ¿Baʼax meyajil tu beetaj le apostoloʼob yéetel uláakʼ ancianoʼob yanoʼob Jerusalenoʼ?

⁴ Le apostoloʼoboʼ káaj u nuʼuktikoʼob le múuchʼulil teʼ Pentecostés tiʼ u añoil 33. Le Bibliaoʼ ku yaʼalikeʼ «Pedroeʼ waʼalaj yéetel le uláakʼ once apostoloʼoboʼ» ka joʼopʼ u kaʼanskoʼob baʼaloʼob jeʼel u salvartik u kuxtal yaʼab máakeʼ (Bax. 2:14, 15). Tu yoʼolal lelaʼ yaʼabeʼ tu beetuba cristianoil. Ka tsʼoʼokeʼ letiʼobeʼ «maʼ xuʼul u kaanbaloʼob tiʼ le apostoloʼoboʼ» (Bax. 2:42). Le apostoloʼoboʼ tu yiloʼob u meyaj maʼalob le taakʼin ku siʼibil teʼ múuchʼuliloʼ (Bax. 4:34, 35). Letiʼob xaneʼ tu kaʼansoʼob u kaajal Dios yéetel orarnajoʼob tu yoʼolal. Tu yaʼaloʼob: «Toʼoneʼ yaan k-kʼubik k-óol orar yéetel k-kaʼansik le baʼax ku yaʼalik Diosoʼ» (Bax. 6:4). Teʼ tuʼuxoʼob maʼ úuchuk kʼaʼaytajoʼ tu túuxtoʼob sukuʼunoʼob jach u yojloʼob u kaʼansoʼob baʼax ku yaʼalik Dios (Bax. 8:14, 15). Ka máan kʼiineʼ uláakʼ ancianoʼob yéeyaʼanoʼob utiaʼal u binoʼob kaʼaneʼ káaj u yáantkoʼob le apostoloʼob u nuʼuktoʼob le múuchʼuliloʼoboʼ. Bey túunoʼ le cuerpo gobernanteoʼ joʼopʼ u nuʼuktik le múuchʼuliloʼob yaan teʼ kʼiinoʼoboʼ (Bax. 15:2).

5, 6. 1) ¿Bix áantaʼabik le cuerpo gobernante tumen le kiliʼich muukʼoʼ? (Ilawil le dibujo yaan tu káajbal le xookaʼ.) 2) ¿Bix áantaʼabik le cuerpo gobernante tumen le angeloʼoboʼ? 3) ¿Bix úuchik u nuʼuktaʼal le cuerpo gobernante tumen u Tʼaan Diosoʼ?

⁵ Le cristianoʼob teʼ yáax siglooʼ u yojloʼob Jéeoba tsʼaamil Jesucristo utiaʼal nuʼuktik le cuerpo gobernanteoʼ. ¿Baʼaxten u yojloʼob? Yáaxeʼ letiʼe kiliʼich muukʼ áant le cuerpo gobernanteoʼ (Juan 16:13). Tuláakal le yéeyaʼanoʼoboʼ tu kʼamoʼob kiliʼich muukʼ, pero maases tu yáantaj le apostoloʼob yéetel le ancianoʼob yaan Jerusalén utiaʼal u nuʼuktajoʼob maʼaloboʼ. Jeʼex tu añoil 49, le kiliʼich muukʼoʼ tu nuʼuktaj le cuerpo gobernante utiaʼal u yilik baʼax kun beetbil tu yoʼolal le súutkʼuptajiloʼ. Le múuchʼuliloʼoboʼ tu kʼamoʼob le baʼax aʼalaʼabtiʼoboʼ. Yoʼolal lelaʼ «seguernaj u muʼukʼaʼantal u fejoʼob, yéetel cada kʼiin ku máaneʼ seguernaj u maas yaʼabtaloʼob» (Bax 16:4, 5). Teʼ carta túuxtaʼab tiʼ le múuchʼuliloʼoboʼ le sukuʼunoʼoboʼ béeychaj u yilkoʼob ku nuʼuktaʼal le cuerpo gobernante tumen u kiliʼich muukʼ Diosoʼ, tumen tu yeʼesoʼob yaabilaj yéetel fe (Bax. 15:11, 25-29; Gal. 5:22, 23).

⁶ U kaʼapʼéel, le angeloʼoboʼ tu yáantoʼob le cuerpo gobernanteoʼ. Por ejemploeʼ juntúul angeleʼ tu yaʼalaj tiʼ Cornelio ka u túuxt tʼanbil apóstol Pedro. Ka tsʼoʼok u kʼaʼaytaj Pedro tiʼ Cornelio bey xan tiʼ u láakʼtsiloʼobeʼ, le xiiboʼoboʼ tu kʼamoʼob kiliʼich muukʼ kex maʼ súutkʼuptaʼanoʼobiʼ. Cornelioeʼ letiʼe yáax  máak kʼuch u beetuba cristiano kex maʼ judíoiʼ. Ka tu yojéeltaj le apostoloʼob yéetel uláakʼ sukuʼunoʼob le baʼax úuchaʼ, tu tsʼáajoʼob cuenta letiʼe baʼax u kʼáat Diosoʼ. Le oʼolal tu kʼamoʼob teʼ múuchʼulil le máaxoʼob maʼ judíoʼob yéetel maʼ súutkʼuptaʼanoʼoboʼ (Bax. 11:13-18). Lelaʼ ku yeʼesiktoʼoneʼ le angeloʼoboʼ tu yáantoʼob le cuerpo gobernante utiaʼal u nuʼuktikoʼob le kʼaʼaytajoʼ (Bax. 5:19, 20). U yóoxpʼéel, le cuerpo gobernanteoʼ tu chaʼaj u nuʼuktaʼaloʼob tumen u Tʼaan Dios. Letiʼobeʼ meyajnajtiʼob u Tʼaan Dios utiaʼal u yilkoʼob wa maʼalob baʼax ku creertikoʼob bey xan bix unaj u nuʼuktaʼal le múuchʼuliloʼ (Bax. 1:20-22; 15:15-20).

7. ¿Baʼaxten k-aʼalik Jesús nuʼukt le sukuʼunoʼob teʼ yáax siglooʼ?

⁷ Kex jach nojoch meyaj tsʼaʼab u beet teʼ múuchʼulil le sukuʼunoʼob táakaʼanoʼob ichil le cuerpo gobernanteoʼ, u yojloʼobeʼ Jesús nuʼuktikoʼob. ¿Baʼaxten k-aʼalik lelaʼ? Tumen apóstol Pabloeʼ tu yaʼaleʼ Cristoeʼ tu yéeyaj «jujuntúul máakoʼob bey apostoloʼobeʼ». Tu yaʼalaj xaneʼ Cristo «u poolil» wa u nojchil le múuchʼuliloʼ (Efe. 4:11, 15). Le disipuloʼoboʼ maʼ kʼaj óoltaʼaboʼob yéetel u kʼaabaʼ juntúul tiʼ le apostoloʼoboʼ, baʼaxeʼ ‹aʼalaʼabtiʼob cristianoʼob, lelaʼ úuch yáanal u nuʼuktaj Dios› (Bax. 11:26). Pabloeʼ u yojel kaʼacheʼ kʼaʼabéet u seguertikoʼob baʼax ku yaʼalik le Biblia jeʼex tu beetil le apostoloʼob yéetel uláakʼ sukuʼunoʼob nuʼuktik le múuchʼuliloʼ. Tu yaʼalaj: «Baʼaleʼ in kʼáat ka a wojéelteʼexeʼ u pool le xiiboʼ Cristo». Ichileʼ táakaʼan tak le cuerpo gobernanteoʼ. Tu yaʼalaj xan: «U pool Cristoeʼ Dios» (1 Cor. 11:2, 3). Jeʼex k-ilkoʼ Jéeoba yéeymil Jesucristo, u Hijo, utiaʼal u nuʼuktik le múuchʼuliloʼ.

8, 9. ¿Baʼax nojoch meyajil tu beetaj sukuʼun Russell?

⁸ Desde 1870, Charles Taze Russell yéetel jujuntúul u yéet meyajoʼobeʼ káaj u yilkoʼob wa táan u adorartikoʼob Dios jeʼex u yaʼalik le Bibliaoʼ, bey xan bix jeʼel u yáantkoʼob u maasil u beetoʼob beyoʼ. Tsʼoʼoleʼ káaj u yáantkoʼob xan le máaxoʼob tʼanik jejeláas idiomaʼoboʼ. Utiaʼal lelaʼ tu añoil 1884, tu jóoʼsoʼob u permisoil tu táan gobierno utiaʼal u meyajtiʼob le kʼaabaʼ Zionʼs Watch Tower Tract Societyoʼ, ka túun tsʼaʼab sukuʼun Russell utiaʼal nuʼuktik. * Letiʼeʼ jach tu xakʼaltaj tubeel le Bibliaoʼ, maʼ sajakchaj u yaʼal maʼ jaaj le baʼaxoʼob ku kaʼansik le Iglesiaoʼ. Tu yaʼaleʼ le Bibliaoʼ maʼatech u yaʼalik wa yaan baʼax ku pʼáatal kuxaʼanil tiʼ máak ken kíimik mix tech u kaʼansik wa Dioseʼ junpʼéel Trinidad. Tu kanaj xaneʼ ken suunak Cristoeʼ maʼ tun ilbil, yéetel tu añoil 1914 «ken tsʼoʼokok le kʼiinoʼob tsʼaʼan tiʼ le kaajoʼoboʼ» (Luc. 21:24). Sukuʼun Russelleʼ tu xupaj u tiempo, u muukʼ yéetel u taakʼin utiaʼal u kaʼansik u jaajil tiʼ uláakʼ máakoʼob. Jeʼex k-ilkoʼ Jéeoba yéetel Jesús yéey le sukuʼun Russell utiaʼal u nuʼuktik u kaajal teʼ kʼiinoʼoboʼ.

⁹ Sukuʼun Russelleʼ maʼ u kʼáat kaʼach ka ilaʼak bey juntúul máak jach especialeʼ. Tu añoil 1896, tu tsʼíibteʼ letiʼ yéetel u yéet meyajoʼobeʼ maʼ u kʼáatoʼob ka nojbeʼenkúuntaʼakoʼob tumen wíinikiʼ. Maʼ u kʼáatoʼob ka tratartaʼakoʼob bey máaxoʼob jach especialoʼobeʼ, mix u kʼáatoʼob kaʼach ka usartaʼak u kʼaabaʼob utiaʼal u kʼaj óoltaʼal le máaxoʼob meyajtik Diosoʼ. Sukuʼun Russelleʼ tu yaʼalaj: «Lelaʼ maʼ u meyaj chéen wíinikiʼ».

10. 1) ¿Baʼax añoil ka tu yéeyaj Jesús le palitsil chúukaʼan u yóol yéetel yaan u naʼatoʼ? 2) Tsol baʼaxten bejlaʼeʼ le Cuerpo Gobernanteoʼ maʼ junpʼéeliliʼ yéetel le Sociedad Watch Toweroʼ.

¹⁰ Tu añoil 1919, óoxpʼéel jaʼab kíimik sukuʼun Ruselleʼ, Jesuseʼ tu yéeyaj «le palitsil chúukaʼan u yóol yéetel yaan u naʼat[oʼ]». ¿Baʼaxten tu beetaj? Utiaʼal u tsʼáaik ‹janal  jach tu yorail› tiʼ le máaxoʼob meyajtik Diosoʼ (Mat. 24:45). Teʼ kʼiinoʼob jeʼeloʼ u chan múuchʼ sukuʼunoʼob yéeyaʼanoʼob ku meyajoʼob Brooklyn, Nueva Yorkeʼ, letiʼob tsʼáaik le janal tiʼ le máaxoʼob tsaypachtik Jesusoʼ. Le kʼaabaʼ «cuerpo gobernanteoʼ» káaj u chíikpajal teʼ publicacionoʼob tu añoil 1940. Teʼ kʼiinoʼoboʼ le sukuʼunoʼob yanoʼob ichil le cuerpo gobernanteoʼ letiʼob nuʼuktik xan le Watch Tower Bible and Tract Society of Pennsylvaniaoʼ. Chéen baʼaleʼ tu añoil 1971, tsʼaʼab yaanal sukuʼunoʼob meyaj teʼ Sociedad Watch Toweroʼ. Ka pʼáateʼ u meyaj le Cuerpo Gobernanteoʼ jach chéen u tsʼáaik kaʼansaj. Le Sociedad Watch Toweroʼ pʼáateʼ chéen letiʼe kʼaabaʼ registrartaʼan tu táan gobierno utiaʼal u béeytal u meyajoʼ. Desde teʼ kʼiinoʼoboʼ káaj u táakpajal ichil le Cuerpo Gobernante uláakʼ sukuʼunoʼob yéeyaʼanoʼob kex maʼatech u meyajoʼob ichil le Sociedad Watch Toweroʼ. Bejlaʼeʼ tak le sukuʼunoʼob yaan ichil «uláakʼ tamanoʼob» ku meyajoʼob ichil le Sociedad Watch Toweroʼ, bey xan ichil le uláakʼ kʼaabaʼob (wa corporaciones) ku meyaj tiʼ le organización registrartaʼan tu táan gobiernooʼ. Yoʼolal le kʼeex beetaʼabaʼ le Cuerpo Gobernanteoʼ bejlaʼeʼ maases ku yilik u tsʼáaik kaʼansaj yéetel nuʼuktaj (Juan 10:16; Bax. 6:4). U Pʼíich Tulumil Kanan 15 tiʼ julio tiʼ 2013, tu yaʼaleʼ «le palitsil chúukaʼan u yóol yéetel yaan u naʼat[oʼ]» letiʼe junmúuchʼ sukuʼunoʼob táakaʼanoʼob ichil le Cuerpo Gobernanteoʼ.

11. ¿Bix u meyaj le Cuerpo Gobernanteoʼ?

¹¹ Le Cuerpo Gobernanteoʼ ku muchʼkuba cada semana utiaʼal u tsikbaltik yéetel u chʼaʼtuklik baʼax ken u beete. Lelaʼ ku yáantaj utiaʼal u múuchʼ meyaj (Pro. 20:18). Mix juntúul tiʼ le sukuʼunoʼob yaan ichil le Cuerpo Gobernante u maas nojchiloʼ. Cada añoeʼ ku kʼeʼexel le sukuʼun nuʼuktik le muchʼtáambal ku beetkoʼoboʼ (1 Ped. 5:1). Lelaʼ bey xan u beetaʼal ichil le seis comités yaan tiʼ le Cuerpo Gobernanteoʼ. Mix juntúul tiʼ letiʼob ku yuʼubikuba u maas nojchil ichiloʼob. Wa maʼ u múuchʼ yaniloʼobeʼ táakaʼanoʼob ichil le ‹uláakʼ palitsiloʼob› ku kʼamkoʼob kaʼansaj yéetel nuʼuktaj tiʼ le palitsil chúukaʼan u yóol yéetel yaan u naʼatoʼ.

12. ¿Baʼax ken k-il beoraaʼ?

¹² Le sukuʼunoʼob yanoʼob ichil le Cuerpo Gobernanteoʼ j-kʼeban máakoʼob yéetel maʼ juntaatsʼ u yaʼalaʼaltiʼob tumen Jéeoba baʼax ken u beetoʼobiʼ. Yaan horaeʼ ku kʼaʼabéettal u kʼexkoʼob junpʼéel nuʼuktaj ku tsʼáaikoʼob wa le bix u naʼatkoʼob junpʼéel kaʼansajoʼ, tumen ku tsʼáaikoʼob cuenta maʼ bey u kaʼansik le Bibliaoʼ. Jeʼex le libro Áantaj utiaʼal u xakʼalxook u j-jaajkunajoʼob Jéeobaoʼ ku taasik le joʼol xook «Kaʼansajoʼob tsʼoʼok u maas naʼataʼal». Jesuseʼ tu yaʼalaj yaan u tsʼaʼabaltoʼon le janal kʼaʼabéettoʼon tumen le «palitsil[oʼ]». ¿Bix túun jeʼel k-ojéeltik «máax jach tu jaajil le palitsil chúukaʼan u yóol yéetel yaan u naʼat[oʼ]»? (Mat. 24:45.) ¿Baʼax eʼesik le Cuerpo Gobernanteoʼ letiʼe palitsil tu yaʼalaj Jesusoʼ? Koʼox ilik óoxpʼéel baʼal áant le cuerpo gobernante tu kʼiinil le apostoloʼoboʼ.

13. ¿Bix áantaʼabik le Cuerpo Gobernante tumen le kiliʼich muukʼoʼ?

¹³ Letiʼe kiliʼich muukʼ áant le Cuerpo Gobernanteoʼ. Le kiliʼich muukʼoʼ le áant le Cuerpo Gobernante u naʼat le kaʼansajoʼob maʼ jach naʼataʼak kaʼachoʼ. Jeʼex le kaʼansajoʼob tsʼoʼok u maas naʼataʼal aʼalaʼab teʼ xóotʼol doceoʼ, chéen wíinikeʼ maʼ tu páajtal u naʼatik mix u tsolik «le taamtam baʼaloʼob ku taal tiʼ Diosoʼ» (xok 1 Corintoiloʼob 2:10). Le Cuerpo Gobernanteoʼ tu yuʼububa jeʼex Pablo le ka tu tsʼíibtaj: «Le baʼaloʼobaʼ k-tsolik, maʼ yéetel le tʼaanoʼob ku kaʼansik le wíinikoʼob yaan u  naʼatoʼoboʼ, baʼaxeʼ yéetel le tʼaanoʼob ku kaʼansik le kiliʼich muukʼoʼ» (1 Cor. 2:13). Máan u cientosil años yaanal baʼax ku creertaʼal yéetel maʼatech u nuʼuktaʼal u kaajal Dios jeʼex unajeʼ. ¿Baʼaxten desde 1919, ka káaj u maas naʼataʼal baʼax ku yaʼalik le Bibliaoʼ? Tumen Dios áant le Cuerpo Gobernante yéetel u kiliʼich muukʼoʼ.

14. Jeʼex u yaʼalik Apocalipsis 14:6 yéetel 7, ¿bix u yáantaʼal le Cuerpo Gobernante yéetel u kaajal Dios tumen le angeloʼoboʼ?

¹⁴ Le angeloʼoboʼ ku yáantkoʼob le Cuerpo Gobernanteoʼ. Le Cuerpo Gobernanteoʼ tsʼaʼan u nuʼukt le kʼaʼaytaj ku beetik le maas tiʼ ocho millones j-Jaajkunajoʼoboʼ. ¿Baʼaxten tsʼoʼok u bin utsil tiʼob? Tumen táan u yáantaʼaloʼob tumen le angeloʼoboʼ (xok Apocalipsis 14:6, 7). Yaʼab u téeneleʼ letiʼe angeloʼob nuʼuktik le sukuʼunoʼob utiaʼal ka tsikbalnakoʼob yéetel juntúul máak jach táant u kʼáatik u yáantaj Dioseʼ. * Yaan tuʼuxoʼobeʼ kex maʼ uts tu tʼaan le máakoʼob ka tsikbaltaʼak baʼax ku yaʼalik Diosoʼ táan u yaʼabtal le sukuʼunoʼoboʼ. Lelaʼ chéen ku béeychajal yéetel u yáantaj le angeloʼoboʼ.

15. ¿Baʼaxten le Cuerpo Gobernanteoʼ maʼ bey jeʼex u nuuktakil u maasil le religionoʼoboʼ? Aʼal junpʼéel baʼax eʼesik.

¹⁵ Letiʼe Biblia nuʼuktik le Cuerpo Gobernanteoʼ (xok Juan 17:17). Koʼox ilik baʼax úuch 1973. U Pʼíich Tulumil Kanan 15 tiʼ octubre tiʼ 1973 ich españoleʼ tu yaʼalaj: «¿Jeʼel wa u páajtal u yokjaʼ juntúul máak maʼ xuʼuluk u tsʼuʼutsʼik chamaleʼ?». Le baʼaxoʼob ku kaʼansik  le Bibliaoʼ ku yeʼesikeʼ maʼ tu páajtal. Le revistaoʼ tu chʼaʼchiʼitaj jejeláas tekstoʼob yéetel tu tsoleʼ juntúul máax maʼ u pʼat u tsʼuʼutsʼeʼ unaj u expulsartaʼal (1 Cor. 5:7; 2 Cor. 7:1). Tu yaʼaleʼ lelaʼ maʼ chéen wíinik aʼalikiʼ, baʼaxeʼ «Dios aʼalik teʼ Biblia ka beetaʼakoʼ». Jujuntúul sukuʼunoʼobeʼ ku talamtal u yilik u beetkoʼob baʼax ku yaʼalik le Bibliaoʼ, kex beyoʼ ku nuʼuktik u kuxtaloʼob tu yéetel. Maʼ úucheʼ junpʼéel libro ku tʼaan tiʼ religión jóoʼsaʼab Estados Unidoseʼ, tu yaʼaleʼ le máaxoʼob nuʼuktik le religionoʼoboʼ mantatsʼ ku xakʼaltikoʼob le baʼaxoʼob ku kaʼanskoʼob utiaʼal u yilkoʼob wa láayliʼ maʼalob u kʼaʼamleʼ. Wa ku yilkoʼob tsʼoʼok u kʼexpajal baʼax ku creertaʼaleʼ ku kʼexkoʼob xan baʼax ku kaʼanskoʼob. Chéen baʼaleʼ le Cuerpo Gobernanteoʼ maʼatech u kʼexik baʼax ku kaʼansik chéen utiaʼal ka pʼáatak igual yéetel le baʼax uts tu tʼaan u maasil máakoʼoboʼ. Baʼaxeʼ ku beetkoʼob baʼax ku yaʼalik u Tʼaan Dios, lelaʼ ku yeʼesikeʼ Jéeoba nuʼuktikoʼob tak bejlaʼeʼ.

16. ¿Baʼaxten unaj ‹k-kʼaʼajsik› le máaxoʼob yanoʼob ichil le Cuerpo Gobernanteoʼ?

¹⁶ (Xok Hebreoʼob 13:7.) Le Bibliaoʼ ku yaʼalik: «Kʼaʼajakteʼex le máaxoʼob nuʼuktik a beeleʼexoʼ». Ken orarnakoʼon tu yoʼolal le Cuerpo Gobernanteoʼ k-eʼesik táan ‹k-kʼaʼajsikoʼob› (Efe. 6:18). Yaʼab meyaj yaantiʼob, ku tsʼáaikoʼob le kaʼansaj ku keʼetel yéetel janal tu yorailoʼ, ku nuʼuktikoʼob le kʼaʼaytaj ku beetaʼal tuláakal yóokʼol kaaboʼ yéetel ku yilkoʼob u meyaj maʼalob le taakʼin ku siʼibiloʼ. Le oʼolal mantatsʼ unaj k-orar tu yoʼolaloʼob.

17, 18. 1) ¿Bix k-chaʼik u nuʼuktikoʼon le Cuerpo Gobernanteoʼ? 2) ¿Bix k-áantik le Cuerpo Gobernante yéetel Jesús ken kʼaʼaytajnakoʼonoʼ?

¹⁷ Uláakʼ bix ‹k-kʼaʼajsik› le sukuʼunoʼob yanoʼob ichil le Cuerpo Gobernanteoʼ letiʼe ken k-beet baʼax ku yaʼalikoʼoboʼ. Letiʼobeʼ ku nuʼuktikoʼon yéetel le publicacionoʼoboʼ, teʼ muchʼtáambaloʼoboʼ yéetel teʼ asambleaʼoboʼ. Le Cuerpo Gobernanteoʼ ku yéeyik xan le superintendenteʼob tiʼ circuitooʼ, yéetel le superintendenteʼoboʼ ku yéeyikoʼob le ancianoʼoboʼ. Letiʼobeʼ ku ‹kʼaʼajsikoʼob› le Cuerpo Gobernante ken u chaʼa u nuʼuktaʼaloʼoboʼ. Ken k-beet xan baʼax ku yaʼalik le Cuerpo Gobernanteoʼ k-eʼesik k-kʼáat ka u nuʼuktoʼon Jesús (Heb. 13:17).

¹⁸ Uláakʼ bix k-eʼesik ‹k-kʼaʼajsik› le Cuerpo Gobernanteoʼ letiʼe ken k-tsʼáa k-óol teʼ kʼaʼaytajoʼ. Hebreoʼob 13:7, ku líiʼsik k-óol utiaʼal u yantaltoʼon fe jeʼex le máaxoʼob nuʼuktik u kaajal Diosoʼ. Le Cuerpo Gobernanteoʼ ku yeʼesik bukaʼaj nojchil u fe ikil u beetik le ku páajtal utiaʼal ka maas tsikbaltaʼak u Tʼaan Diosoʼ. ¿Táan wa k-áantkoʼob yéetel le nojoch meyajaʼ? Wa táan k-beetkeʼ yaan u kiʼimaktal k-óol ken u yaʼal Jesús: «Tuláakal le baʼaxoʼob ta beeteʼex tiʼ juntúul u maas chichnil in sukuʼunoʼobaʼ, tiʼ teen ta beeteʼex» (Mat. 25:34-40).

19. ¿Baʼaxten techeʼ tsʼoʼok a chʼaʼtuklik a chaʼik u nuʼuktikech Jesús?

¹⁹ Kex suunaj Jesús teʼ kaʼanoʼ maʼ xuʼul u yáantik u disipuloʼobiʼ (Mat. 28:20). Le tiaʼan way Luʼumoʼ tu yilaj bix áantaʼabik tumen le kiliʼich muukʼ, le angeloʼob yéetel u Tʼaan Dios utiaʼal u nuʼuktik u disipuloʼoboʼ. Le oʼolal teʼ kʼiinoʼobaʼ letiʼe baʼax ku meyajtiʼ utiaʼal u yáantik le palitsil chúukaʼan u yóoloʼ. Le sukuʼunoʼob táakaʼan ichil le Cuerpo Gobernanteoʼ láayliʼ táan u «binoʼob tu paach le Taman», Jesús, «jeʼel tuʼuxak ka xiʼikoʼ» (Apo. 14:4). Le beetkeʼ ken k-beet baʼax ku yaʼalik le Cuerpo Gobernanteoʼ táan k-chaʼik u nuʼuktikoʼon Jesús. Letiʼeʼ táan u nuʼuktikoʼon utiaʼal ka yanaktoʼon le kuxtal minaʼan u xuuloʼ (Apo. 7:14-17). Mix juntúul wíinik jeʼel u nuʼuktikoʼon utiaʼal u yantaltoʼon kuxtal minaʼan u xuuleʼ.