Tsikbalttoʼon tuʼux síijech.

Síijen tu añoil 1943 tu luʼumil Italia. In papáeʼ carpintero kaʼachi yéetel ku meyajtik le luʼumoʼ. Teen yéetel in sukuʼunoʼobeʼ líiʼsaʼaboʼon tiʼ junpʼéel chan kaaj ichil le religión católicaoʼ.

¿Baʼaxten ta beetaba sacerdoteil?

Tin chichnileʼ uts tin tʼaan in wuʼuyik le misa ku tsʼáaik le sacerdoteʼoboʼ bey xan le baʼaxoʼob ku beetkoʼoboʼ. Le beetik taakchaj in beetik in sacerdoteil. Le yaanten 13 añosoʼ in maamaeʼ tu bisen teʼ lugar tuʼux ku kaʼansaʼal le paalaloʼob u beet u sacerdoteiloʼoboʼ.

¿Ta xokaj wa túun le Biblia teʼ tuʼux bisaʼabechoʼ?

Maʼ jachiʼ. Le yaanten 15 añosoʼ juntúul tiʼ in maestroʼobeʼ tu síiajten junpʼéel libro tuʼux yaan le cuatro Evangelioʼoboʼ, le libroʼob tuʼux ku tsikbaltik u kuxtal Jesúsoʼ, jach yaʼab u téenel tin xokaj. Yaanten 18 años ka binen kajtal Roma utiaʼal in bin teʼ universidadoʼob ku nuʼuktaʼal tumen le papaoʼ. Teʼ universidadoʼ tin xokaj latín, griego, historia, filosofía, psicología yéetel teología. Teʼ misa ku beetaʼal utiaʼal domingooʼ k-uʼuyik u xoʼokol le Bibliaoʼ yéetel k-aʼalik de memoriail u versículoiloʼob le Bibliaoʼ, chéen baʼaleʼ maʼ t-xakʼaltik utiaʼal k-naʼatik.

¿Ta tsʼáaj wa xook le táan a nuʼuktik le seminariooʼ?

Jach in meyajeʼ letiʼe in nuʼuktik le seminariooʼ. Pero tocarnaj xan in tsʼáaik xook utiaʼal in kaʼansik le decretos del Concilio aticano II.

¿Baʼaxten xuʼul a creertik baʼax ku kaʼansik le Iglesiaoʼ?

Yoʼolal óoxpʼéel baʼal. Le iglesiaoʼ ku yoksikuba tiʼ política, tsʼoʼoleʼ ku consentirtik le baʼaxoʼob kʼaastak ku beetik le sacerdoteʼob yéetel le máaxoʼob ku binoʼob iglesiaoʼ. Yaan xan tiʼ u kaʼansajoʼobeʼ jach jelaʼantakoʼob. Por ejemploeʼ wa Dios yaabilajeʼ, ¿baʼaxten túun kéen kíimik máakeʼ ku castigartik tiʼ junpʼéel infierno? ¿Jach wa tu jaajil u kʼáat ka k-usart junpʼéel rosario utiaʼal ka rezarnakoʼon yaʼab u téenel? *

¿Baʼax ta chʼaʼtuklaj a beetik?

Tin wokʼol ka tin kʼáataj u yáantaj Dios. Ka tsʼoʼokeʼ tin manaj junpʼéel Biblia maʼ úuch jóoʼsaʼak ich italianoiʼ, letiʼe Biblia de Jerusalén, ka túun káaj in sen xokik. Le táant u tsʼoʼokol in tsʼáaik misa utiaʼal junpʼéel domingo de tempranoeʼ, jach le táan in chʼuykíintik in sotanaoʼ tʼaanaj kaʼatúul máakoʼob teʼ seminariooʼ. Tu yaʼaloʼobeʼ u testigoʼob Jéeoba, ka túun joʼopʼ k-tsikbal, maas tiʼ junpʼéel hora táan u tsolkoʼob baʼax ku yaʼalik le Biblia yoʼolal le religión kaʼansik u jaajiloʼ.

¿Baʼax ta tuklaj le ka ta kʼaj óoltaj le Testigoʼoboʼ?

Jach jaʼakʼ in wóol le ka tin wilaj bix u kaxtikoʼob le tekstoʼob teʼ Biblia católicaoʼ. Maʼ xáanchajeʼ káaj u taal juntúul Testigo ku kʼaabaʼtik Mario, letiʼeʼ jach yaan u paciencia kaʼachi. Kex jeʼel baʼalak ka kʼáatak tu beeleʼ cada sábado láas nueve de la mañanaeʼ ku bin u kaʼansen.

¿Baʼax túun tu yaʼalaj le u maasil sacerdoteʼob ikil káajik a xíimbaltaʼal?

Tin invitartoʼob utiaʼal ka u láakʼintenoʼob teʼ xookoʼ, pero mix juntúul tu yóotiʼ. Chéen baʼaleʼ teneʼ jach uts tin tʼaan le baʼax kin kanik kaʼachoʼ, tumen táan kaʼach in kanik u núukil le preguntaʼob desde úuch taakak in wojéeltik u núukiloʼ. Por ejemploeʼ, ¿baʼaxten ku chaʼik Dios u sufrir máak? yéetel ¿baʼaxten ku chaʼik u yantal kʼasaʼanil?

¿Yaan wa máax aʼaltech ka xuʼuluk a xokik le Bibliaoʼ?

Tu añoil 1975 yaʼab u téenel binen tu kaajil Roma utiaʼal in waʼalik le baʼax táan in kanikoʼ. U nuuktakil in religióneʼ tu yaʼaloʼob maʼ maʼalob le baʼax ku kaʼansaʼal tenoʼ, pero tiʼ mix juntúul meyajnaj le Biblia utiaʼal u yeʼesik baʼaxtenoʼ. Nueve tiʼ enero tiʼ 1976, tin tsʼíibtaj junpʼéel carta tuʼux kin waʼalik táan in pʼatik le religión católicaoʼ ka tin túuxtaj Roma. Ka máan dos díaseʼ yáax binen tiʼ le reunión ku beetik u testigoʼob Jéeobaoʼ. Le tuʼux binenoʼ junpʼéel asamblea, jach yaʼab máakoʼob binoʼobiʼ. Jach jatsʼuts tin wilil tumen cada juntúuleʼ yaan u Biblia yéetel ku kaxtik le tekstoʼob ku yaʼalaʼaloʼ.

¿Baʼax tu yaʼalaj a láakʼtsiloʼob yoʼolal le baʼaxoʼob ka kanikoʼ?

U maas yaʼabileʼ tsʼíikilnaji. Pero tin wojéelteʼ juntúul tiʼ in sukuʼunoʼob yaan Lombardía, junpʼéel lugar yaan tu xamanil Italiaeʼ, táan xan u xook yéetel u testigoʼob Jéeoba. Ka binen in xíimbalteʼ, le Testigoʼob kajaʼanoʼob teʼeloʼ tu yáantenoʼob in kaxt meyaj bey xan tuʼux in kajtal. Teʼ año jeʼeloʼ tin beetinba u testigo Jéeoba.

¿Ka arrepentir yoʼolal le baʼax ta beetoʼ?

Jach junpuliʼ maʼ tin arrepentir yoʼolal mix baʼal. Tumen beoraeʼ jach in kʼaj óol Dios jeʼex u yaʼalik le Bibliaoʼ, maʼ jeʼex u kaʼansik le Iglesia católicaoʼ. Tsʼoʼoleʼ beoraeʼ in wojleʼ le baʼax kin tsikbalt tiʼ le máakoʼoboʼ letiʼe u jaajiloʼ.